Judges 13:1-25
13 Bóhólníihii binááł Ízrel dineʼé doo yáʼáshónígi ánáádáátʼįįd biniinaa dízdiin nááhaijįʼ Bóhólníihii éí Filístiya dineʼé yílákʼee hodííʼą́.
2 Áko ákwii Zórah kin haalʼáádóó diné léiʼ Dan dineʼé jílı̨́įgo Manówah joolyéé lá. Áko hweʼasdzą́ą́ doo ałchíígóó haʼáłchíní doo haleeh da.
3 Áko Bóhólníihii bidiyingo naalʼaʼí éí asdzání yichʼįʼ yitʼíní íʼdiilyaago áyidííniid, Jó, doo ałchíhí nílı̨́įgo naʼáłchíní tʼah doo haleeh da, ákondi iʼdíʼnííltsąął, índa ashkii dííłchííł.
4 Éí bąą bitsʼąą ádaa áhólyą́ą dooleełii baa nánooshkąąh; wáin, doodaiiʼ tó tsiʼnaʼiiłáii tʼáadoo nidlání, índa doo daadą́ą́góó bee nihá hazʼáanii doo łaʼ dííyı̨́įł da,
5 háálá iʼdíʼnííltsąął, jóʼakon, áádóó ashkii dííłchííł. Hatsiiʼ doo kʼídoogish da, háálá ashkii tʼáá yizhchı̨́ı̨́dę́ę́ʼ Diyin God bichʼįʼ Názarait* jílı̨́į dooleeł, áko Filístiya dineʼé bitsʼą́ąjįʼ Ízrel dineʼé yisdéidiyoonił.
6 Áko asdzání níyáago bahastiin yił hoolneʼgo ání, Diyin God bitsʼą́ą́dę́ę́ʼ diné léiʼ shaa níyá, ánoolninígíí éí Diyin God bidiyingo naalʼaʼí noolnin; nílʼı̨́įgo tʼóó báhádzid. Nidi naagháádę́ę́ʼ tʼáadoo bínabídééłkid da, índa bízhiʼ nidi tʼáadoo yee shił hoolneʼ da.
7 Nidi áshidííniid, Iʼdíʼnííltsąął, jóʼakon, áádóó ashkii dííłchííł, áko wáin, doodaiiʼ tó tsiʼnaʼiiłáii tʼáadoo nidlání, índa doo daadą́ą́góó bee nihá hazʼáanii doo łaʼ dííyı̨́įł da, háálá ashkii tʼáá yizhchı̨́ı̨́dóó daaztsą́ąjįʼ Diyin God bichʼįʼ Názarait nilı̨́į dooleeł.
8 Ákohgo Manówah tsʼídá haleebee Bóhólníihii náyookąąhgo ání, Bóhólníihii nílíinii, nánooshkąąh, hániʼdii Diyin God bitsʼą́ą́dóó diné nilíinii nihichʼįʼ yííníłʼaʼígíí nihaa náádoodááł, áko ashkii yizhchı̨́įgo ádiilníłígi bínanihizhdínóołtįįł.
9 Áko Diyin God éí Manówah nábookąąhgo yidiiztsʼą́ąʼgo asdzání dáʼákʼehgi sidáago Diyin God bidiyingo naalʼaʼí baa náánádzá, nidi bahastiin Manówah éí doo ákwii bił naaʼaashgóó.
10 Áko asdzání haneetehee hahastiin baa jílwodgo bił hojoolneʼgo ájíní, Shoo, diné léiʼ shichʼįʼ yitʼíní íʼdiilyaa yę́ę shaa náánádzá.
11 Áko Manówah nídiiʼnaʼgo tʼáá áko beʼasdzą́ą́ yikééʼ dah diiyáago diné yaa níyáago áyidííniid, Daʼ niísh díí asdzání bichʼįʼ yáníłtiʼ nítʼééʼ. Áko ání, Éí lá shí áshtʼı̨́ ni.
12 Áko Manówah ádííniid, Nizaad bihoolyaago ashkii haash yitʼéego hináa doo, índa haʼátʼíishąʼ yaa naagháa doo?
13 Áko Diyin God bidiyingo naalʼaʼí éí Manówah ánéidooʼniid, Neʼasdzą́ą́ ábidííniidígíí tʼáá átʼé yikʼehgo ádaa áhályą́ą doo.
14 Haʼátʼíhída chʼil naʼatłʼoʼii bitsʼą́ą́dóó ályaaígíí tʼáadoo jiyání doo, wáin, doodaiiʼ tó tsiʼnaʼiiłáii tʼáadoo jidlání doo, índa doo daadą́ą́góó bee nihá hazʼáanii doo jidooyı̨́įł da; bee hachʼįʼ haasdzíʼígíí tʼáá átʼé tsʼídá bikʼeh hojíłʼı̨́į doo.
15 Áko Manówah éí Bóhólníihii bidiyingo naalʼaʼí ánéidooʼniid, Tʼáá shǫǫdí átsé tʼáá kǫ́ǫ́ sínídáago tłʼízí yázhí łaʼ ná nídiilʼah.
16 Áko Bóhólníihii bidiyingo naalʼaʼí éí Manówah ánéidooʼniid, Tʼáá kǫ́ǫ́ sédáago nihichʼiyąʼ doo deeshı̨́įł da, nidi didlidgo nááhániihii łaʼ hashtʼedoohłíiłgo Bóhólníihii bichʼįʼ nááhidoołnih. Jó, Manówah éí Bóhólníihii bidiyingo naalʼaʼí átʼínígíí doo hoł bééhózin da.
17 Áko Manówah éí Bóhólníihii bidiyingo naalʼaʼí ánéidooʼniid, Haashąʼ yinílyé, áko ádínínígíí tʼáá aaníí bihoolyaago nił niidlı̨́į doo?
18 Bóhólníihii bidiyingo naalʼaʼí ánááhodooʼniid, Haʼátʼíishąʼ biniyé shízhiʼ bínashídíłkid? Jó, doo bééhózingóó ayóó ánoolninii átʼé.
19 Áko Manówah éí tłʼízí yázhí łaʼ akʼáán nááhidoonihii yił néidiinilgo tséʼéłkáaʼgi Bóhólníihii yichʼįʼ nááyiisniiʼ, índa Manówah áádóó beʼasdzą́ą́ binááł tʼóó bikʼeʼayóigi áhoodzaa.
20 Nítʼééʼ bikááʼ nááʼiiniihí bikááʼdóó dego wótʼáahjigo kǫʼ dah nídínoʼgo, Bóhólníihii bidiyingo naalʼaʼí éí yiih hóóleʼgo yáʼąąshgóó anáhóóleʼ. Áko Manówah áádóó beʼasdzą́ą́ éí yiníłʼı̨́įgo yikʼee tséʼyaa aníídeeʼ.
21 Áko Bóhólníihii bidiyingo naalʼaʼí éí Manówah áádóó hweʼasdzą́ą́ bił tʼáadoo hachʼįʼ yitʼíní ánááʼdiilyaa da. Ákohgo Manówah éí Bóhólníihii bidiyingo naalʼaʼí átʼı̨́įgo hoł bééhoozin.
22 Áko Manówah hweʼasdzą́ą́ ábizhdííniid, Tʼáá aaníí díníiʼnééł lá; jó, Diyin God níilʼı̨́ı̨́ʼ.
23 Nidi hweʼasdzą́ą́ áhodííniid, Bóhólníihii nanihidoołtsił biniyé átʼı̨́įgo didlidgo nááhaazniiʼii índa akʼáán nááhaazniiʼii nihílákʼeedóó doo néidiiláa da doo nítʼééʼ, doodaiiʼ díí tʼáá ałtso tʼáadoo nihichʼįʼ áyiilaa da doo nítʼééʼ, doodaiiʼ díí ákódooníłígíí nidi tʼáadoo yee nihiʼníłniiʼ da doo nítʼééʼ.
24 Áko asdzání biyáázh yishchı̨́ áádóó Sámson bee jíízhiʼ, áko ashkii nooyéełgo Bóhólníihii bikʼijidlí.
25 Zórah kin haalʼáii áádóó Éshteiyal kin shijaaʼ bitaʼgi Dan dineʼé dah yinéłídi nijigháago Bóhólníihii biNíłchʼi Diyinii nábidiiłnáahgo hodeeshzhiizh.
Footnotes
^ Názarait jiníigo éí, Bee ádee haʼoodzíiʼii, jiníigo óolyé. Num. 6:1-5.
