Judges 14:1-20
14 Sámson éí Tímnah kin shijaaʼgóó jiníyáago áadi Filístiya dineʼé bitsiʼké łaʼ dziiłtsą́.
2 Áádę́ę́ʼ nídzídzáago hazhéʼé áádóó hamá bił hojoolneʼgo ájíní, Tímnah kin shijaaʼgi Filístiya dineʼé bitsiʼ łaʼ yiiłtsą́. Áko kʼad sheʼasdzą́ą doo biniyé shá bił nánóhkááh.
3 Nidi hazhéʼé áádóó hamá áhodííniid, Daʼ nikʼéí bitsiʼké, doodaiiʼ nihidineʼé bitahgóó asdzání ádingoósh biniinaa Filístiya dineʼé doo bąąh nídahineeshgizhii bitahdę́ę́ʼ asdzání łaʼ neʼasdzą́ą doo? Nidi Sámson bizhéʼé ánéidooʼniid, Shá bił nánítʼaash, háálá tʼáá íiyisí shił yáʼátʼééh.
4 Nidi díí éí Bóhólníihii bitsʼą́ą́dę́ę́ʼ átʼéhígíí hazhéʼé índa hamá doo bił bééhózin da, háálá Bóhólníihii éí Filístiya dineʼé bíká dootʼáałgi yíká déezʼı̨́ı̨́ʼ nítʼééʼ. Ákwii hoolzhish yę́ędą́ą́ʼ Filístiya dineʼé tsʼídá ayóó átʼéego Ízrel dineʼé yee ádídahólnííh nítʼééʼ.
5 Ákohgo Sámson éí Tímnah kin shijaaʼ góyaa hazhéʼé áádóó hamá bił jíkai, áko Tímnahgi chʼil naʼatłʼoʼii kʼéédílyéehgi jiníyáago, jó, náshdóítsoh yáázh bitsiijįʼ ditłʼooígíí biiʼ nahodiʼniʼgo haatįįh yíyá.
6 Áko Bóhólníihii biNíłchʼi Diyinii bibee adziilii hakʼi hooleʼgo tʼáadoo nijiléhígóó tʼáá tłʼízí yázhí nijiiníshígi átʼéego náshdóítsoh bitsiijįʼ ditłʼooígíí nijiizhnizh. Nidi ádziidzaaígíí bee tʼáadoo hazhéʼé áádóó hamá bił hojoolneʼ da.
7 Áádóó Sámson dah náádiidzáago asdzání bił ahił hojoolneʼ, áko Sámson éí tʼáá íiyisí asdzání hoł yáʼátʼééh.
8 Áádóó éí bikʼijįʼ asdzání bił nihéézhdootʼash biniyé náájoodááł nítʼééʼ; náshdóítsoh bitsiijįʼ ditłʼooígíí bitsʼíís jidínóołʼįįł biniyé naanii hajííyá. Nítʼééʼ jó, tsésʼná éí náshdóítsoh bitsiijįʼ ditłʼooígíí bitsʼíís yiih yínáá lá áádóó tsésʼná bitłʼizh biiʼ hazlı̨́ı̨́ʼ lá,
9 áko łaʼ nízhdiinilgo jiyą́ągo níjoodááł, áko hazhéʼé áádóó hamá baa nídzídzáago łaʼ baazhnínilgo éí ałdóʼ łaʼ yiyííyą́ą́ʼ. Nidi náshdóítsoh bitsiijįʼ ditłʼooígíí bitsʼíís biiʼdóó tsésʼná bitłʼizh nízhdiinilígíí éí tʼáadoo bee bił hojoolneʼ da.
10 Áádóó hazhéʼé éí asdzání yichʼįʼ níyá, áko áadi Sámson éí ídaʼazįįd ájiilaa, háálá diné ániid nidaakaii daʼiiyehgo ákódaʼałʼı̨́.
11 Áko ákódzaago diné dahoołtsą́ągo dabikʼisóó tádiingo nídeiizhʼeezhgo yił haa áłah silı̨́ı̨́ʼ.
12 Áko Sámson éí diné áyidííniid, Tsostsʼid jı̨́ ídaʼazįįd bee hoogááł biyiʼ saad nanilʼingo béédiʼdootı̨́įłii łaʼ bee nihichʼįʼ hadeesdzih, áko ááhyiłnínígíí nihił béédahoozingo bee shił dahodoołnih, ákohgo ééłgaii tádiingo índa ééʼ bee haʼdítʼéhígíí ałdóʼ tádiingo nihaa deeshʼnił,
13 nidi tʼáadoo shił dahoołneʼgóó nihí ééłgaii tádiingo índa ééʼ bee haʼdítʼéhígíí shaa dadoohnił. Áko ádahodííniid, Haaʼíyeeʼ, saad nanilʼingo béédiʼdootı̨́įłii bee handziih; bíniʼdii dadidiitsʼı̨́ı̨́ł.
14 Áko ábizhdííniid,
Ayáanii bitsą́ą́dę́ę́ʼ doodı̨́įłii hazlı̨́ı̨́ʼ.Bidziilii bitsʼą́ą́dę́ę́ʼ łikanii hazlı̨́ı̨́ʼ.
Áko saad nanilʼingo béédiʼdootı̨́įłii tágí jı̨́ chʼééh béédazhdeetįįh.
15 Tsostsʼid yiską́ągo Sámson beʼasdzą́ą́ ádeidííniid, Nahastiin bichʼįʼ baa nisiʼníłdeełgo saad nanilʼingo béédiʼdootı̨́įłii ááhyiłnínígíí yee nihił hodoolnih, doodaiiʼ doo íinidzaagóó tʼóó adandidiilkʼą́ą́ł índa nizhéʼé bighandóó danilíinii ałdóʼ adadidiilkʼą́ą́ł. Daʼ hojoobaʼ ádaniitʼée doósh biniyé nihíká ádííníniid?
16 Áko Sámson éí hweʼasdzą́ą́ yichago áháłní, Ayóogo shijiiníłxá; doo ayóóʼáshííníʼníi da; shikéyahdóó diné bichʼįʼ saad nanilʼingo béédiʼdootı̨́įłii bee bił hwíínílneʼ, áko ááhdinínígíí doo bee shił hólneʼ da. Áádóó ábizhdííniid, Jó, shizhéʼé áádóó shimá nidi doo bee bił hashneʼ da, daʼ ákoósh bee nił hodeeshnih lá?
17 Ídaʼazįįd bee nihoolzhiizhjįʼ asdzání náhookąąhgo tsostsʼid jı̨́ azlı̨́ı̨́ʼ. Áko tsostsʼid yiską́ągo índa bee bił hojoolneʼ, háálá tʼáá bizááká hachʼįʼ yaa nisééʼáłdił. Ákohgo saad nanilʼingo béédiʼdootı̨́įłii bidineʼé yee yił náhoolneʼ.
18 Áko tsostsʼid jı̨́ı̨́ góneʼ tʼáadoo eʼeʼaahí kin haalʼáádóó diné éí Sámson ádeidííniid,
Haʼátʼíishąʼ tsésʼná bitłʼizh biláahgo łikan?Haʼátʼíishąʼ náshdóítsoh bitsiijįʼ ditłʼooígíí biláahgo bidziil?
Áko nítʼééʼ ábizhdííniid,
Shibéégashiistsaʼii doo bee nidahoyołdlaadgóósaad nanilʼingo béédiʼdootı̨́įłii shitsʼą́ą́ʼ tʼáadoo nihił béédahoozin da doo nítʼééʼ.
19 Áko Bóhólníihii biNíłchʼi Diyinii bibee adziilii hakʼi hooleʼgo Áshkelan kin haalʼáágóó jiníyáago áadi diné tádiingo nidzistseed, áko bindaalyeʼé nízhdiinilgo saad nanilʼingo béédiʼdootı̨́įłii yaa dahoolneʼígíí ééʼ bee haʼdítʼéhígíí bitaadzizniiʼ. Áko hoł hazhchxihgo tʼóó hazhéʼé bighangóó dah nízdiidzá.
20 Sámson éí diné łaʼ bił ałchʼojónéego chojoołʼíinii hweʼasdzą́ą́ baa yíltı̨́.
