Judges 15:1-20
15 Ákódaadzaadóó bikʼijįʼ daʼagizhjįʼ ahoolzhiizhgo Sámson éí tłʼízí yázhí joołtéełgo hweʼasdzą́ą́ nítʼéʼígíí baazhníyáago ázhdííniid, Daʼnjah góneʼ sheʼasdzą́ą́ bił yah adeeshááł nisin. Nidi asdzání bizhéʼé doo yah azhdoogááłgóó yee há hoołʼaʼ.
2 Asdzání bizhéʼé áhodííniid, Baa nitsískeesgo tʼáá íiyisí doo bił niʼníłdįįh da nisingo biniinaa diné bił ałchʼoniʼníigo choiníłʼíinii baa níłtı̨́. Daʼ bideezhíísh doo biláahgo nizhóní da? Éiigo nídiiłteeh, baa nánooshkąąh.
3 Áko Sámson ánááhodooʼniid, Kʼad Filístiya dineʼé atéshʼı̨́įgo éí tʼáadoo bee shikʼíhótʼahí da doo.
4 Áko Sámson dah diiyáago mąʼii dootłʼizhí táadi neeznádiingo bił nidziizdéelgo bitseeʼ ahidiníłnáago ahídaastłʼǫ́ǫgo honooyééł bídajiistłʼǫ́.
5 Áko honooyééł dazhdiiłtłahgo mąʼii dootłʼizhí Filístiya dineʼé bidáʼákʼehgóó bidazhdeezhchid, áko tłʼoh naadą́ą́ʼ daaldeeʼgo ahandahaashjoolígíí índa tʼah doo daaldéhígíí ałdóʼ áádóó chʼil naʼatłʼoʼii deílʼáhígíí índa áliv tsin nidantʼąʼii ałtso adahideezkʼą́ą́ʼ.
6 Ákohgo Filístiya dineʼé ádaaní, Díísh háí átʼı̨́? Nítʼééʼ łaʼ ádaaní, Tímnah dineʼé nilíinii baadaaní Sámson átʼı̨́, háálá diné łaʼ bił ałchʼojíʼníinii hweʼasdzą́ą́ baa yíltı̨́. Áko Filístiya dineʼé ákóde yíkaigo asdzání áádóó bizhéʼé bighandóó danilíinii tʼáá bóóltąʼgo adeideeskʼą́ą́ʼ.
7 Áko Sámson áhodííniid, Kódaahdzaaígíí bąą tsʼídá kʼéénihidiishdlaago índa ááhodeeshtʼįįłgo ádee hadeesdzííʼ.
8 Áko tsʼídá ayóó átʼéego nabídzísdįįd áádóó dashdiiyáago Íítam kin shijaaʼgi tségiizh góneʼ haghan nítʼééʼ.
Sámson éí Lííhai hazʼánídi Filístiya dineʼé bikʼidi yaa dzizlı̨́ı̨́ʼ
9 Ákohgo Filístiya dineʼé dah diikaigo Júdahgi nidahaazná índa Lííhai hazʼání bóhoneelʼą́ągo nidahaazná.
10 Áko Júdah dineʼé ádaaní, Haʼátʼíishąʼ biniyé nihikʼiidoohjahgo nihí niikánoohkai? Nítʼééʼ ádahodííniid, Sámson bidaʼdiitłʼóół biniyé niikai; tʼáá ánihijiilaaígi áńdahodiilnííł.
11 Áko Júdah dineʼé táadi míilgo Íítam kin shijaaʼgi tségiizhdi Sámson yaa yíkaigo ádaaní, Filístiya dineʼé nihindantʼáhígíísh doo nił bééhózin da? Díísh haa nihiinilaa? Áko ábizhdííniid, Tʼáá hó shichʼįʼ ákódajitʼı̨́įgo biniinaa ákódahooshłaa.
12 Áko ádahodííniid, Nidaʼdiitłʼóołgo Filístiya dineʼé bílákʼee dandidiitʼááł biniyé naa niikai. Áko Sámson éí diné áyidííniid, Tʼáá nihí doo dashidiyoołhééłgóó bee shichʼįʼ ádee hadahididoohdzih.
13 Nítʼééʼ ádahodííniid, Aooʼ, tʼóó nidaʼdiitłʼóołgo bílákʼee dandidiitʼááł. Doo dandiyiilyéeł da. Ákohgo tłʼóół ániidígíí naakigo yee hwedaʼaztłʼǫ́ǫgo tségiizhdę́ę́ʼ chʼídahazlóóz.
14 Áko Lííhai hazʼánígi jiníyá. Nítʼééʼ Filístiya dineʼé dadilwoshgo hadááh yíkai. Áko Bóhólníihii biNíłchʼi Diyinii bibee adziilii hakʼi hooleʼgo tłʼóół bee hagaan beʼestłʼónígíí azhííh diiltłah nahalingo nijiiníishgo haa diiłdááz.
15 Áko télii biyaatsʼiin tʼah ditłééʼ léiʼ bił hajíídéelgo éí bee diné míilgo nidzistseed.
16 Áko Sámson ázhdííniid,
Télii biyaatsʼiin bee míilgo diné nisíłtsxeedgo ałkʼi dadeeskʼidgo áshłaa.*
17 Ałtso niyázhníłtiʼgo télii biyaatsʼiin nahgóó ajiyííłxan. Áko ákweʼé Réímath-lííhai hoolyée doo, jidííniid.*
18 Áko nítʼééʼ tʼáá íiyisí dibááʼ dzizlı̨́įʼgo Bóhólníihii bichʼįʼ sozdoolzingo ájíní, Díí ayóó átʼéego ná naalʼaʼí bílaʼ bee yisdáʼíínínil. Ákoósh kʼad tʼóó dibááʼ shidiyoołhéełgo doo bąąh nídahineeshgizhii bílákʼee deeshtłish?
19 Áko Lííhai hazʼánígi hooldzis léiʼgi Diyin God ąą áhoolaago áádę́ę́ʼ tó háánaʼgo éí joodlą́ą́ʼ; nítʼééʼ hwiih náhwiisdogo hashtʼeʼninádzídzá. Éí bąą Enhákorii hoolyée doo, jidííniid.* Díí jı̨́ı̨́góó tʼahdii Lííhai hazʼánídi hólǫ́.
20 Áko Filístiya dineʼé bidziilgo naaldeehdą́ą́ʼ Sámson éí Ízrel dineʼé bá nihozhdiyiiʼaahgo naadiin nááhai.
Footnotes
^ Ałkʼi dadeeskʼidgo jiníigo éí Hííbrew kʼehjígo télii jinínígi átʼéego diitsʼaʼ.
^ Réímath-lííhai jiníigo éí Hííbrew kʼehjígo télii biyaatsʼiin yiskʼid jiníigo óolyé.
^ Enhákorii jiníigo éí Hííbrew kʼehjígo yízhí bee áká áháʼníinii jiníigo óolyé.
