Judges 16:1-31
16 Sámson éí Géíza kin haalʼáágóó jiníyáago áadi asdzání ałjiłnii léiʼ dziiłtsą́, áko bił jineezhtéézh.
2 Sámson kweʼé níyá, daaníigo Géíza dineʼé ahił dahoolneʼ. Áko kin haalʼáago dáńʼdítı̨́įhgi tłʼééʼ bíighah haa héeshjéeʼgo yiską́. Tłʼééʼ bíighah hashtʼedadítʼéego ádaaní, Hániʼdii haʼííʼą́ąjįʼ dahodiyiilyééł.
3 Nidi tłʼéʼííłníiʼjįʼ Sámson sitı̨́ı̨́ nítʼééʼ, áko tłʼéʼííłníiʼgo nídiiʼnaʼgo kin haalʼáhígíí bidáádílkał tʼáá áłah áádóó ałtsʼą́ą́hjí bá ííʼáhígíí índa naadasitánígíí tʼáá bił hajíínilgo hawoostis dah dziznilgo Hííbran bíighahgi dah yiskʼid bighą́ąʼjįʼ hajizhjaaʼ.
Sámson áádóó Diiláílah
4 Ákódzaadóó bikʼijįʼ Sórek yíldzisdi asdzání łaʼ Diiláílah wolyéego ayóóʼájóʼní.
5 Áko Filístiya dineʼé bindanitʼaʼí baa yíkaigo ádabidííniid, Hachʼįʼ baa nisiʼníłdeełgo bee ayóó áhóodziilii índa haash yitʼéego hakʼeh dadidiidleeł, áko hodaʼdiitłʼóołgo atídahodiilnííł. Áko tʼááłáʼí niitínígo béésh łigaii łaʼtsʼáadahdi neeznádiingo naa dahidiiʼnił.
6 Áko Diiláílah éí Sámson ábizhdííniid, Haʼátʼéegoshąʼ ayóó ánóodziil? Tʼáá shǫǫdí bee shił hólneʼ. Índa haash yitʼéego neʼastłʼǫ́ǫgo tʼéí atíndiʼdoolnííł.
7 Áko Sámson éí asdzání ábizhdííniid, Ałtįįtłʼóól tʼah ditłéeʼii tsostsʼidgo bee sheʼastłʼǫ́ǫgo lą́ą, áko tʼáá łaʼ diné ádaatʼéhígi átʼéego doo shidziil da deeshłeeł.
8 Ákohgo Filístiya dineʼé bindanitʼaʼí éí ałtįįtłʼóól tʼah ditłéeʼii tsostsʼidgo asdzání yaa deiznil, áko yee hweʼaztłʼǫ́.
9 Áko asdzání éí náʼáneʼédę́ę́ʼ diné héeshjéeʼgo áyiilaa. Áádóó hadoolghaazhgo ání, Sámson, Filístiya dineʼé nikʼi dah yizhjééʼ! Nidi ałtįįłtłʼóól bee hweʼastłʼónígíí tłʼóół yilzhólígíí kǫʼ bee yideez nahalingo jiizhnizhgo náhizhdiitah. Ákohgo bee hadziilii tʼáadoo bił bééhooziní da.
10 Áko Diiláílah éí Sámson áyidííniid, Jó, tʼóó shá nahosíníłtʼiʼgo shinisíníloʼ. Tʼáá shǫǫdí haitʼéegoshąʼ niʼdootłʼóół bee shił hólneʼ.
11 Áko ábizhdííniid, Tłʼóół ániidíii tʼah doo chooʼįįhii bee sheʼastłʼǫ́ǫgo lą́ą, áko tʼáá łaʼ diné ádaatʼéhígi átʼéego doo shidziil da deeshłeeł.
12 Ákohgo Diiláílah éí tłʼóół ániidíii łaʼ néidiinilgo yee hwenááʼáztłʼǫ́ǫgo hadoolghaazhgo ání, Sámson, Filístiya dineʼé nikʼi dah yizhjééʼ! Áko diné éí náʼáneʼédę́ę́ʼ héeshjééʼ. Nidi bee hweʼastłʼónígíí bee náʼálkadí nahalingo ałtso jiizhnizh.
13 Áko Diiláílah éí Sámson ánéidooʼniid, Tʼahdii yeeʼ tʼóó shá nahółtʼiʼgo shinaʼíloʼ. Haitʼéegoshąʼ niʼdootłʼóół bee shił hólneʼ. Áko ábizhdííniid, Shitsiiʼ tsostsʼid yishbizhgo dah iistłʼǫ́ bił díítłʼóołgo bíighah doo.
14 Áko ajiiłhaazhgo hatsiiʼ yiztłʼǫ́ǫgo tsin niłdzilgo yá ayíítsih áádóó hadoolghaazhgo ání, Sámson, Filístiya dineʼé nikʼi dah yizhjééʼ! Nidi chʼéédzídzidgo bikʼi atłʼóhí áádóó dah iistłʼónígíí tʼáá bił náhizhdiitah.
15 Áko asdzání áhodííniid, Haʼátʼéegoshąʼ ayóóʼánííníshʼní shidiníi nidi nijéí bee doo shitʼáhíjįʼ nitsíníkees da? Kʼad tʼóó shá nahółtʼiʼgo táadi azlı̨́ı̨́ʼ, áko bee ayóó ánóodziilii tʼah doo bee shił hólneʼ da.
16 Áko tʼáá ákwíí jı̨́ tʼáá bizááká hachʼįʼ yaa nisééʼáłdiłgo náhookąąhgo tʼóó báhádzidgo tsʼázdoosʼnih.
17 Áko bee nitsídzíkeesii tʼáá átʼé bee bił hojoolneʼgo ájíní, Tsʼídá doo shitsiiʼ shá yilzhéeh da, háálá tʼáá shimá shiʼniiltsąądę́ę́ʼ Diyin God bichʼįʼ Názarait nishłı̨́. Shá oolzhéeʼgo bee shidziilii shitsʼáhodooleeł, áko tʼáá łaʼ diné ádaatʼéhígi átʼéego doo shidziil da deeshłeeł.
18 Áko bee nitsídzíkeesii tʼáá átʼé Diiláílah bee bił hojoolneʼgo bił bééhoozingo Filístiya dineʼé binanitʼaʼí yichʼįʼ iʼííłʼaʼgo ání, Tʼáá díí tʼéiyá náádoohkah, háálá bintsíkees tʼáá átʼé yee shił hoolneʼ. Ákohgo Filístiya dineʼé binanitʼaʼí éí asdzání yaa yíkaigo béeso yílákʼee deiznil.
19 Áko bitsooskʼid bikáaʼjįʼ hwiʼiiłhaazhgo diné łaʼ hágo yidííniidgo hatsiiʼ tsostsʼidgo yishbizhígíí yiyiizhgizh. Ákohgo asdzání atíhóółʼįįdgo bee hadziilii hatsʼáldoh.
20 Áko hadoolghaazhgo ání, Sámson, aadę́ę́ʼ Filístiya dineʼé nikʼi dah yizhjééʼ! Áko ajiłhoshdę́ę́ʼ nízhdiinaʼgo ájíní, Tʼáá ánéishtʼįįhígi átʼéego chʼídeeshááł áádóó ádíshgáád dooleeł. Áko Bóhólníihii hatsʼą́ą́ʼ dahodiileʼígíí doo hoł bééhózin da.
21 Áko Filístiya dineʼé dahasiłgo hodaʼaztłʼǫ́ índa hanááʼ hayídaʼashiizhgo Géíza kin haalʼáá góyaa adahazlóóz. Áko béésh łitsoii béésh daʼahólzhaʼígíí yee hwedaʼaztłʼǫ́, índa awáalyaa góneʼ ajikʼáago ádahoolaa.
22 Nidi háʼoolzhééʼdóó bikʼijįʼ hatsiiʼ nídíneesą́.
Sámson daaztsą́
23 Filístiya dineʼé binanitʼaʼí danilíinii éí tʼáá łaʼ bizhiʼee áłah silı̨́įʼgo ayóó átʼé nááhániihígíí bidiyin bidiʼníinii Déígan wolyéii yichʼįʼ náádeidiyoołnihgo bił dahózhǫ́ǫgo ádaaní, Nihidiyin éí Sámson nihiʼanaʼí nilíinii nihílákʼeidííʼą́.
24 Áko diné dahoołtsą́ągo bidiyin yaa dahaniihgo ádaaní, Nihikéyahgi nihiʼanaʼí náhoodǫ́ǫsgo ląʼí niiltʼéego nanihistseedígíí nihidiyin nihílákʼee hodííʼą́.
25 Áko bijéí bił dahózhǫ́ǫgo ádaaní, Sámson baa dloh nihighą́ą doo biniyé hágo bidohní. Ákohgo awáalyaagóó Sámson yíká adaʼasʼaʼ áádóó haa dloh bighą́, áko kin bíyah niiʼáii bitaʼgi nidahazlóóz.
26 Áko Sámson éí ashkii nabilózígíí áyidííniid, Haaʼíyeeʼ díí kin bíyah niiʼáhígíí kin dego yótąʼígíí bíniishtı̨́į doo biniyé bidinishnííh.
27 Wóneʼé éí diné áádóó asdzání hazdeezbin; Filístiya dineʼé binanitʼaʼí tʼáá ałtso ákóneʼ áłah nilı̨́. Áko dah nidahazʼánídóó diné áádóó asdzání táadi mííl yiltʼéego Sámson yaa dloh dabighą́.
28 Ákohgo Sámson éí Bóhólníihii yichʼįʼ sodoolzingo ání, Bóhólníihii Diyin God nílíinii, shéénílnííh baa nánooshkąąh; Diyin God nílíinii, shidziilgo ánáshídlééh, áko Filístiya dineʼé shinááʼ hadeiznilii tʼááłáhídiígíí ałtso kʼéédideeshdlííł.
29 Áádóó Sámson éí kin bíyah niiʼáii naakigo ałníiʼgiígíí bíighahgi dziizįʼgo hálaʼ nishʼnáájí áádóó hálaʼ nishtłʼahjí bee kin bíyah niiʼáii kin dego yótąʼígíí ałtsʼą́ą́hjí bizhdeelniiʼ.
30 Áko Sámson ázhdííniid, Shíniʼdii Filístiya dineʼé bił dínéeshnééł. Ákohgo yaa ádziidzaago tʼáá bizááká dzideesdzil. Nítʼééʼ naatʼáanii danilíinii índa diné ákwii yílʼáhígíí bikʼijįʼ kin ahiih nááłdááz. Áko jiiná yę́ędą́ą́ʼ nijistseedígíí bilááh ánéelą́ąʼgo dadziztsánígi daneezná.
31 Áko hakʼisóó índa hazhéʼé bighandóó danilíinii tʼáá ałtso ákwii nidahaaskaigo nídahodiiłtı̨́įgo nídahastı̨́ áádóó Zórah kin shijaaʼ índa Éshteiyal kin shijaaʼ bitaʼgi hazhéʼé yę́ę Manówah bitséníʼootséél góneʼ yóóʼádahoolaa. Ízrel dineʼé bá nihozhdiyiiʼaahgo naadiin nááhai.
