Judges 18:1-31
18 Éí yoołkááł yę́ędą́ą́ʼ Ízrel dineʼé bitahgi aláahgo naatʼáanii doo hólǫ́ǫ da nítʼééʼ. Áko íídą́ą́ʼ Dan dineʼé éí kéyah yikááʼ kéédahatʼı̨́į dooleełígíí hadeintá, háálá íídą́ą́ʼ Ízrel dineʼé bitahgóó kéyah ííʼ dooleełii doo łaʼ hachʼįʼ kódaalnéeh da.
2 Áko Dan dineʼé danilíinii tʼáá bí bidineʼé bitahdóó diné doo nídanilyéesii ashdlaʼ yiltʼéego Zórah kin shijaaʼdóó índa Éshteiyal kin shijaaʼdóó naalchiʼí danilı̨́įgo éí kéyahgóó hazhóʼó hadaʼdoohsił biniyé dah dazhdiiłʼaʼ, áko ádeidííniid, Nílááh, kéyah hazhóʼó hadaohsííd. Áko Dził Íífreiyimgi yíkaigo Máíkah bikingi daneezhjééʼ.
3 Áko Máíkah bikingi nidaháaztą́ą́ nítʼééʼ; Líívai dinééh biinééʼ yéédahoosįįdgo yichʼįʼ niikaigo ádeidííniid, Háishąʼ kweʼé nił níʼáázh? Díí kéyahgishąʼ haʼátʼíí baa naniná? Kweʼésh haʼátʼíí nee hólǫ́?
4 Áko ábizhdííniid, Kótʼéego Máíkah shá ádzaago bikʼé shichʼįʼ niʼiiléego binááʼiiłniihii sélı̨́ı̨́ʼ.
5 Áko ádahodííniid, Haash yitʼéego dooleeł Diyin God nihá nabídíłkid baa nídaniikąąh. Áko díí nihił béédahodoozįįł: dadiikaigóó yáʼátʼéehgo nihá áhooníiłgo deíníikáah doo.
6 Áko nááʼiiłniihii áhodííniid, Nílááh, hózhǫ́ǫgo wohkah; Bóhólníihii nihił hólǫ́ǫgo deínóhkáah doo.
7 Ákohgo diné ashdlaltʼéhígíí dah náádiikaigo Léíyish kin haalʼáadi yíkai. Áko tʼáadoo yąąh dabíniʼígóó ákwii kéédahatʼínígíí Sáídan dineʼé bił hashtʼehodítʼé áádóó hasih dahodiilʼaahgo kéédahatʼínígi átʼéego dziiłtsą́. Éí kéyah biyiʼ naatʼáanii doo hólǫ́ǫ dago doo baa yáhásinígi ádabiʼdilnéeh da. Sáídan dineʼé bitsʼą́ądi nízaadi kéédahojitʼı̨́įgo bąą dadineʼé náánáłaʼ doo bił ahaa nidaʼjiilniih da.
8 Áádóó ashdlajiltʼéhígíí Zórah kin shijaaʼgi áádóó Éshteiyal kin shijaaʼgi hakʼisóó baa níjíkaigo ádahałní, Haa dahootʼéé lá?
9 Áko ádaaní, Sołtįʼ, bichʼįʼ hidiikah; jó, kéyah hadasiilzidígíí tʼáá íiyisí hózhóní. Doósh baa nidaahkaí da? Tʼáadoo nidaʼáhodołdziidí, ákǫ́ǫ́ dah doohkáahgo kéyah nihííʼ ádaohłééh.
10 Ákǫ́ǫ́ dahisidoohkaigo hasih dahodiilʼaahgo kéédahatʼínígíí baa doohkah. Kéyah ayóó áhoníłtsxooígíí Diyin God nihílákʼeidííʼą́. Éí bikáaʼgi tsʼídá tʼáadoo bídin hóyéʼígóó tʼáá ałtsoní dahólǫ́ǫgo hazʼą́.
11 Zórah áádóó Éshteiyal kin naazhjaaʼdóó Dan dineʼé hastą́ądi neeznádiingo naagé bee nidaʼabaahii yee hashtʼeʼádadiilyaaígíí chʼíníná.
12 Ákǫ́ǫ́ nínáago Júdah kéyah biyiʼ Kírjath-jíyarim kin haalʼáadi ákwii dah yinééł nítʼééʼ. Díí jı̨́ı̨́góó éí hazʼą́ągi Méíhaneh-dan* yee dahóózhiʼ, éí Kírjath-jíyarim eʼeʼaahjígo áhoolyé, jóʼakon.
13 Áádę́ę́ʼ chʼínínáago Dził Íífreiyimgi Máíkah bighandi yíkai.
14 Áko ashdlaltʼéego Léíyish kin haalʼáágóó naalchiʼí daazlı̨́ʼígíí bikʼisóó ádeidííniid, Nihiłísh béédahózin? Díí daakin biyiʼ góneʼ íífad wolyéii áádóó térafim wolyéii índa łaʼ bikʼi naʼashkʼaazhgo, łaʼ éí nídoolyı̨́įʼgo edaʼalyaii dahólǫ́. Éí bąą kʼad ádadoohłíiłgi hazhóʼó baa nitsídaahkees.
15 Áko Máíkah bighanjigo dah diikaigo Líívai dinééh bighandi yaa yíkaigo, Yáʼátʼééh, deidííniid.
16 Áko Dan dineʼé hastą́ądi neeznádiingo naagé bee nidaʼabaahii yee hashtʼeʼádadiilyaaígíí dáńʼdítı̨́įhgi naazı̨́.
17 Áko ashdlaltʼéego kéyahgóó naalchiʼí daazlı̨́ʼígíí yah eekaigo bikʼi naʼashkʼaazhgo eʼelyaii áádóó íífad wolyéii índa nídoolyı̨́įʼgo edaʼalyaii nídeidiinil. Áko nááʼiiłniihii éí tłʼóoʼdi dáńʼdítı̨́įhgi diné hastą́ądi neeznádiingo naagé bee nidaʼabaahii yee hashtʼeʼádadiilyaaígíí yił naazı̨́.
18 Áko díí Máíkah bighan góneʼ yah aakaigo bikʼi naʼashkʼaazhgo eʼelyaii áádóó íífad wolyéii áádóó térafim wolyéii índa nídoolyı̨́įʼgo edaʼalyaii nídazhdiinilgo nááʼiiłniihii áháłní, Haʼátʼíishąʼ baa naahkai?
19 Áko ádahodííniid, Geʼ, nizééʼ dádíínílniiʼgo nihił yíkah, áko azhéʼé áádóó nááʼiiłniihii nihá nílı̨́į doo. Daʼ diné tʼááłáʼí bighandóó danilíinii bá nááʼiiłniihii nílı̨́įgo daatsʼí aláahgo ná yáʼátʼééh, doodaiiʼ Ízrel dineʼé áádóó bighandóó danilíinii bá nááʼiiłniihii nílı̨́įgo daatsʼí aláahgo ná yáʼátʼééh?
20 Áko nááʼiiłniihii bił hóózhǫǫdgo íífad wolyéii áádóó térafim wolyéii índa bikʼi naʼashkʼaazhgo eʼelyaii néidiinilgo diné bitahgóó ííyá.
21 Ákohgo badaʼáłchíní áádóó dabilı̨́ı̨́ʼ índa dabiyéél bilą́ąjįʼ yéédaʼasniiʼgo dah nídiikai.
22 Áko Máíkah bighandóó nízaadgóó ajookaigo Máíkah bikin bíighahgóó tʼáá áyídígi dabighanígíí áłah silı̨́įʼgo Dan dineʼé hóníjééʼ.
23 Áko Dan dineʼé yichʼįʼ dadilwosh. Nítʼééʼ Máíkah bichʼįʼgo nídadzizyizgo ádabijiní, Haa lá yinidzaago diné tʼóó ahayóí nikééʼ nooyééł?
24 Áko ájíní, Shidiyin danilı̨́įgo íishłaaígíí índa nááʼiiłniihii shitsʼą́ą́ʼ bił yóóʼoohkááh lá, áko haʼátʼíishąʼ tʼéí yisdzííʼ? Ákohgo haʼátʼéegoshąʼ ádashidohní, Haa lá yinidzaa?
25 Áko Dan dineʼé ádahodííniid, Tʼáadoo nihitahgóó niinééʼ diitsʼaʼí, áko doo łaʼda bá dahodoochįįłgo nikʼiidoojah da, áádóó neʼiinaʼ índa naʼáłchíní doo bił ádíídįįł da.
26 Ákohgo Dan dineʼé dah dadiikaigo haláahgo ádabóodziilígíí Máíkah hoł bééhoozingo tʼą́ą́ʼ dah nízdiidzáago haghangóó anídzoodzá.
27 Áko Dan dineʼé éí Máíkah ádayiilaaígíí hanááʼiiłniihii yił nídeidiinilgo Léíyish kin haalʼáajįʼ yíkaigo diné ádahodéeszéeʼgo áádóó hasih dahodiilʼaah nítʼééʼ yę́ę diltłish yee nideistseed, áko kin haalʼáii ádeideeskʼą́ą́ʼ.
28 Tʼáadoo háká aalwodí da, háálá Sáídan éí doo deeghání da índa doo łaʼ bił ahaa nidaʼjiilniihí da. Beth-rííhob nahósʼaʼ góyaa nidi ákódahóótʼįįd. Ákondi kin haalʼáago áńdayiidlaa áádóó ákwii kéédahatʼı̨́.
29 Dan éí Ízrel baʼáłchíní bitahgi hoʼdizhchı̨́įgo dabizhéʼé yę́ę jílı̨́ı̨́ nítʼééʼ kin haalʼáago ádayiilaaígíí házhiʼ yee dahóózhiʼ. Nidi áłtséédą́ą́ʼ kin haalʼáii éí Léíyish hoolyéé nítʼééʼ.
30 Áko Dan dineʼé éí eʼelyaii tʼáá bí ádá dah dayiyiisįʼ. Manáseh biyeʼ Gérsham nilíinii éí hayeʼ Jánathan áádóó biyeʼké éí kéyah nahósʼaʼgi yisnááh dadzizlı̨́įʼjįʼ Dan dineʼé bá náádaʼiiłniihii dajílı̨́ı̨́ nítʼééʼ.
31 Ákohgo Máíkah biʼeʼelyaii áyiilaaígíí Dan kin haalʼáagi dah sizı̨́įgo ádayiilaa; Diyin God biníbaal biiʼ hodílzinii Sháíloh hazʼą́ągi siʼą́ yę́ędą́ą́ʼ ákódayósin nítʼééʼ.
Footnotes
^ Méíhaneh-dan jiníigo éí Dan dineʼé dah yinéłídi áhoolyé.
