Judges 2:1-23
2 Áko Bóhólníihii bidiyingo naalʼaʼí Gílgal hazʼánídóó Bókim hazʼáníjįʼ honíleʼgo ádííniid, Ííjip kéyahdę́ę́ʼ hanihííʼeezhgo danihizhéʼé yę́ę kéyah baa diníʼą́ągo bichʼįʼ bee ádee haasdzíiʼii biih nihííʼeezh. Shą́ą́ʼ ádíshní, Shibee ahaʼdeetʼáanii doo tʼáá kʼad nihitsʼą́ą́ʼ kʼínítiʼ da.
2 Áádóó díí kéyahgi kéédahatʼínígíí tʼáá haʼátʼeegoda tsʼídá doo bił ahadadiʼdoohtʼáał da; bibikááʼ nááʼiiniihí naa adahidoołkał. Nidi nihichʼįʼ bee haasdzíiʼii tʼáadoo bikʼeh dahosoołʼįįd da. Haʼátʼíísh biniinaa kódaohdzaa?
3 Éí bąągo ádííniid, Doo nihitsʼádínéeshkał da, nidi nihooshkʼiizh góneʼ nihaa anídaʼajiłígi átʼéego hóyéeʼgo nihichʼįʼ nidahwiiłnáa doo, áádóó bidiyin dabidiʼníinii łoh nihá nánídlı̨́įgo bizahohkáah doo.
4 Ákódzaago Bóhólníihii bidiyingo naalʼaʼí éí Ízrel dineʼé yichʼįʼ díí saad yee hahaasdzííʼ, áko diné chánahgo idaʼniichago dáácha.
5 Áko ákwii Bókim hoolyée doo, dadííniidgo Bóhólníihii yichʼįʼ náádaʼiisniiʼ.
Jáshowa daaztsą́ (Josh. 24:29-31)
6 Áko Jáshowa éí diné yééʼníłniiʼgo, Ízrel dineʼé tʼáá ałtso kéyah ádííʼ ádeidoolííłgóó dah nídahidiikai.
7 Áko diné éí Bóhólníihii yá nidaalʼaʼgo Jáshowa bíiníłką́, áádóó aląąjįʼ naazíinii Jáshowa bilááh ánízáágóó dahináá nítʼééʼ; Bóhólníihii éí ayóó ádaatʼéii yaa naagháii tʼáá ałtso deinééłʼı̨́ı̨́ʼ; éí ayóó ádaatʼéii Ízrel dineʼé yá yaa naayá.
8 Áko Nan biyeʼ Jáshowa éí Bóhólníihii yá naalʼaʼí nilíinii daaztsą́; neeznádiindóó baʼaan neeznáá binááhai nítʼééʼ.
9 Áko yóóʼádahoolaa; tʼáá hó hakéyah biyiʼ Tímnath-síírah kin shijaaʼgi Dził Íífreiyim nahósʼaʼgi áhoolyé; Géíyash dah yiskʼidígíí náhookǫsjí hazʼą́.
10 Áko éí daʼahílchíihii tʼáá ałtso dahazhéʼé yę́ę ahikááhgóó dadzizlı̨́ı̨́ʼ, índa bikééʼdóó náádaʼahideeshchínígíí éí Bóhólníihii doo yéédahósin da nítʼééʼ, doodaiiʼ ayóó ádaatʼéii Ízrel dineʼé yá yaa naayáhígíí doo bił béédahózin da nítʼééʼ.
Ízrel dineʼé tʼáá ádzaagóó dahodeesá áádóó ándahodiiʼaahii binahatʼaʼ
11 Áko Ízrel dineʼé danilíinii éí Bóhólníihii binááł doo yáʼátʼéhígi ádajíítʼįįd, áádóó diyin dabidiʼníinii Béíyal daolyéii yichʼįʼ nidahałáá nítʼééʼ.
12 Áko dabizhéʼé yę́ę biBóhólníihii Diyin God yóóʼadeideezʼą́; éí Ííjip kéyahdę́ę́ʼ chʼíbiníʼeezh nítʼééʼ, áádóó diyin dabidiʼníinii yikééʼ dah dahidiikai; diné hanaagóó kéédahatʼínígíí bidiyin dabidiʼníinii łaʼ yichʼįʼ nitséédadigohgo yee Bóhólníihii yá nídahałchįįh nítʼééʼ.
13 Bóhólníihii yóóʼadeideezʼą́ągo diyin dabidiʼníinii Béíyal daolyéii áádóó Áshtarath yá nidahałáá nítʼééʼ.
14 Ákohgo Bóhólníihii éí Ízrel dineʼé yichʼįʼ báhóóchįįdgo aghadaʼiiʼníiłii hoł nidínóodah biniyé yaa hodiníʼą́. Hanaagóó hweʼanaʼí kéédahatʼínígíí hwee ádídahólníihgo áhoolaa, áko hweʼanaʼí danilíinii doo bídazhníłdzilgóó áhoolaa.
15 Tʼáá dah hizhdikááhgóó Bóhólníihii hakʼijįʼ nilı̨́įgo doo yáʼáshónígi áháłʼı̨́; Bóhólníihii áhodííniidígi átʼéego áádóó ákódooníiłgo hachʼįʼ ádee hadoodzíʼígi átʼéego atíháłʼı̨́, áko tsʼídá ayóó átʼéego bikʼee nitsijíkai.
16 Ákótʼée nidi Bóhólníihii éí ándahodiiʼaahii łaʼ há niinínil; éí hwee daʼniʼįįhii bitsʼą́ąjįʼ yisdádahwiinííł nítʼééʼ.
17 Áko biʼándahodiiʼaahii tsʼídá doo dayíistsʼą́ąʼ da, nidi ałjiłnii bił ahéʼéldahígi átʼéego diyin dabidiʼníinii yikééʼ naanánooyéełgo yichʼįʼ nidahałáá nítʼééʼ; honítʼiʼ tʼóó yitsʼáhájeehgo dabizhéʼé yikʼehgo deíkai yę́ę éí Bóhólníihii bibikʼeh óʼooʼníiłii yikʼeh dahółʼı̨́įgo deidísin yę́ę doo yikʼeh dahółʼı̨́ı̨́góó tʼáadoo yikʼeh ádaadzaa da.
18 Áádóó Bóhólníihii éí ándahodiiʼaahii há néidiinilgo Bóhólníihii éí ándahodiiʼaahii nídaadleehii yił dahólǫ́ǫ́ nítʼééʼ, áko hwedaʼanaʼí bitsʼą́ąjįʼ ánihodiiʼaahii yisdáhwiiníiłgo yiiníłką́; Bóhólníihii łahgo átʼéego hąąh tsíńdeezkééz, háálá hwedaʼanaʼí hade ádahósingo bikʼee chaał nidahojiyiinííh nítʼééʼ áádóó hódaʼatsʼihgo bikʼee tiʼdahojiyoozniiʼ.
19 Ákódzaago ánihodiiʼaahii abííłkáahgo tʼą́ą́ʼ dah nídahidiikááh áádóó tʼáá bí tʼóó nidaʼádiyiishchxǫʼgo dabizhéʼé yę́ę biláahgo diyin dabidiʼníinii yikééʼ dah dahidiikaigo yá nidaalʼaʼ índa yichʼįʼ yaa á nídaatʼįįhgo yichʼįʼ nidahałá; ádaatsʼįįł yę́ę áádóó doo ádabidiʼnínígi ádaatʼįįł yę́ę doo niʼhódeiléeh da.
20 Ákohgo Bóhólníihii éí Ízrel dineʼé yichʼįʼ báhóóchįįdgo ání, Díí dineʼé éí shibee ahaʼdeetʼáanii kʼídeiztiʼ; dahazhéʼé yę́ę éí yikʼeh dahółʼı̨́į doo biniyé bichʼįʼ bee haasdzííʼ nítʼééʼ, áko ádíshníinii doo dayíistsʼą́ąʼ da.
21 Anaʼí danilíinii Jáshowa daaztsą́ągo yiʼoh niʼníghą́ą́ʼ yę́ę doo łaʼ há chʼíhidínéeshkał da.
22 Áko éí anaʼí bee Ízrel dineʼé ádajítʼéegi hwééhózíní áhodeeshłíiłgo nahóníshtaah; Bóhólníihii bihonítʼiʼii bikʼeh ádajítʼéego daatsʼí dajíkááh; tʼáá dahazhéʼé yę́ę akʼeh dahóółʼįįdígi daatsʼí ádajitʼı̨́, dooda daatsʼí.
23 Éí bąą Bóhólníihii éí daʼanaʼí ánéísįįd; tʼáadoo tʼáá łahjįʼ baa chʼíníjéeʼ da índa tʼáadoo Jáshowa yílákʼee hodííʼą́ą da.
