Judges 21:1-25
21 Mízpeh kin haalʼáagi Ízrel dineʼé ádee hadahideesdzíiʼgo ádaaní, Tʼáá háiida nihitsiʼ dahólǫ́ǫgo Bénjamin dineʼé doo łaʼ baa diiltéeł da.
2 Áko Ízrel dineʼé Béthel hazʼánígi nidahaaskaigo ákwii Diyin God binááł nidzíiztą́ągo hwee adaʼazʼą́, áko baa saad haghą́ągo tʼáá íiyisí dajíícha,
3 áádóó ádazhdííniid, Ízrel dineʼé biBóhólníihii Diyin God nílíinii, haʼátʼéegoshąʼ díí jı̨́ Ízrel dineʼé bitsʼą́ą́dóó dineʼíígíí łaʼ bidíníídeeʼ?
4 Áko biiskání tʼah abíínígo diné nídiijéeʼgo bikááʼ nááʼiiniihí hadeiiztłʼingo didlidgo náádahaniihii índa hózhǫ́ǫ́jí náádahaniihii náádadziisniiʼ.
5 Áko Ízrel dineʼé ádaaní, Ízrel dineʼé bitahgóó łaʼ háidíígíishąʼ Bóhólníihii binááł áłah ílı̨́įgi doo nidziiskai da? Háálá Bóhólníihii tsʼídá hódéétʼiʼgo yadazhdiilniiʼgo bee ádee hadahizhdeesdzííʼ yę́ę Bóhólníihii binááł Mízpeh kin haalʼáagi áłah ílı̨́įgi tʼáadoo łaʼ jiníyáágóó, Tʼóó hodiʼyoolyééł, shą́ą́ʼ hoʼdooʼniid niʼ.
6 Áko Ízrel dineʼé éí bikʼis Bénjamin dineʼé yaa aʼáhí danízingo ádaaní, Díí jı̨́ Ízrel dineʼé bitsʼąą tʼááłáʼí dineʼé ábiʼdisdįįd.
7 Haitʼéegoshąʼ Bénjamin dineʼé daadzíʼígíí bidaʼasdzą́ą́ dadooleełígíí bá shódeidiiltʼeeł? Jó, Bóhólníihii binahjįʼ bee ádee hadadeedzíiʼgo ádadiiʼní, Danihitsiʼké hodaʼasdzą́ą dooleeł biniyé doo haa dahidiiʼnił da.
8 Áko ádaaní, Ízrel dineʼé bitsʼą́ą́dóó háidíígíishąʼ Mízpeh kin haalʼáagi Bóhólníihii binááł áłah ílı̨́įjįʼ tʼáadoo dazdeeskai da? Nítʼééʼ, shoo, Jéíbesh-gíliyad kin haalʼáádóó dineʼé dah oonéłíjįʼ tʼáadoo dazdeeskai da lá.
9 Háálá diné dajííłtaʼ nítʼééʼ; shoo, Jéíbesh-gíliyadgi kéédahatʼíinii tʼááłáʼí nidi tʼáadoo łaʼ níyáhí da lá.
10 Ákohgo Ízrel dineʼé áłah nádleehii éí bidineʼé doo nídanilyéesii naakitsʼáadahdi míilgo ákǫ́ǫ́ yidaʼiisniiʼgo yichʼįʼ yee hadaasdzíiʼgo ádeidííniid, Nihílááh, Jéíbesh-gíliyadgi kéédahatʼíinii, asdzání índa baʼáłchíní tʼáá daabił diltłish bee nidaałtseed.
11 Diné tʼááłáʼí nítínígo índa asdzání bił naazhtéezhii tʼááłáʼí nítínígo ałtso nidadoołtsił.
12 Áko Jéíbesh-gíliyadgi kéédahatʼínígíí chʼikéí bízháán nidaakaígíí diné doo yił ahéédahólzinii dı̨́įdi neeznádiingo yikʼídaaskaigo Sháílohgi dah daʼínéhígóó Kéínan kéyahjįʼ nídeizhʼeezh.
13 Ákohgo áłah nilínígíí tʼáá átʼé éí Ríman tsé siʼáníjįʼ hasih hazʼą́ąjįʼ Bénjamin dineʼé yichʼįʼ haneʼ yił adaʼiisʼaadgo ádaaní, Nihichʼįʼ dahózhǫ́ǫgo naałdeeh leʼ.
14 Áko íídą́ą́ʼ Bénjamin dineʼé nináhaaskaigo Jéíbesh-gíliyadóó chʼikéí ninádajiizhʼeezhígíí baa dadziiznil, nidi doo ałtso bininíłnaʼ da.
15 Áko Bénjamin dineʼé baa aʼáhí dazniizı̨́ı̨́ʼ, háálá éí Ízrel dineʼé bitsʼąą nahjįʼ Bóhólníihii kóbiilaa.
16 Ákohgo áłah ílínídóó hastóí aląąjįʼ naazíinii ádadííniid, Haitʼéegoshąʼ Bénjamin dineʼé tʼahdii asdzání bee ádaadinígíí beʼasdzą́ą́ dahólǫ́ǫgo ádadiilnííł? Shoo, Bénjamin dineʼé bitsʼąą asdzání ałtso ádaasdįįd.
17 Áko ádadííniid, Bénjamin dineʼé bííʼ dooleełii tsʼídá bá átʼée doo, áko Ízrel dineʼé bitahdóó doo ałtso ádoodįįł da.
18 Azhą́ ákótʼée nidi danihitsiʼké bidaʼasdzą́ą dooleeł biniyé doo baa dahidiiʼnił da, háálá íídą́ą́ʼ Ízrel dineʼé ádee hadadeesdzíiʼgo ádaaní, Bénjamin dineʼé beʼasdzą́ą dooleełii baazhníłtı̨́įgo éí hóyéeʼgo há haʼdoodzih.
19 Áko ánáádadiʼní, Bóhólníihii baa áłah náʼádleeh tʼáá nináháhááh bikʼeh néitʼaahígíí éí Sháíloh hazʼánígi éí Béthel kin shijaaʼ náhookǫsjígo, Bétheldóó Shííkem kin haalʼáajįʼ atiinígíí haʼaʼaahjígo índa Lebónah kin shijaaʼ shádiʼááhjígo tʼéí bá náhootʼaah.
20 Éí bąą Bénjamin dineʼé yichʼįʼ yee hadaasdzíiʼgo ádaaní, Nílááh, chʼil naʼatłʼoʼii kʼéédílyééhgóó dohkáahgo áadi aa híshóojéeʼ doo,
21 áko shoo, Sháíloh hazʼánídóó chʼikéí daʼdoolzhish biniyé azhishjįʼ daatsʼí chʼídahidookahígíí baa nihidoohkah, ákohgo chʼil naʼatłʼoʼii kʼéédílyééhdóó nídidoohjahgo tʼááłáʼí nootínígo Sháílohdóó chʼikéí niheʼasdzą́ą dooleełígíí biniyé bił dadidoohdiłgo Bénjamin dineʼé bikéyahgóó bił nihééhidoohkah.
22 Áko dabizhéʼé, doodaiiʼ dabikʼisóó danilíinii nihaa heeskaigo nihichʼįʼ saad dahasłı̨́įʼgo ádabididiiʼniił, Baa dajiidoohbaałgo chʼikéí nihá baa dahidoohnił, háálá anaaʼ yę́ędą́ą́ʼ diné tʼááłáʼí nítínígo tʼáadoo asdzání bá áádasiilzįįd da; jó, nihí doo baa dahoyohnííłgóó bee ádił daʼsoohsiihgo ádidahodoołtʼiʼ doo nítʼééʼ.
23 Áko Bénjamin dineʼé tʼáá ákódaadzaa; ádanéeltʼeʼígíí bikʼehgo beʼasdzą́ą́ dooleełii nídayiizlááʼ; chʼikéí tʼáá daʼalzhishdóó nídayiizláaʼgo kéyah yiiʼ kéédahatʼı̨́ı̨́ nítʼééʼ yę́ęgóó yił anídahaaskaigo ákwii bikin hadaasʼáá nítʼééʼ yę́ęgi áńdayiidlaago ákwii kéénáádahatʼı̨́.
24 Áko íídą́ą́ʼ Ízrel dineʼé áádę́ę́ʼ dah nídahidiikaigo tʼááłáʼí nítínígo dabidineʼé áádóó dabikʼéí índa bikédaayah yiiʼ kéédahatʼı̨́ yę́ęgóó łah hoditʼéhee anídahaaskai.
25 Éí yoołkááł yę́ędą́ą́ʼ Ízrel dineʼé bitahgi aláahgo naatʼáanii doo hólǫ́ǫ da nítʼééʼ, nidi diné tʼááłáʼí jinítínígo díí tʼáá ákóneʼ áshtʼı̨́ daznízingo ádajoonííł.
