Judges 3:1-31
3 Bóhólníihii díí ałʼąą anaʼí yidziihgo áyiilaa; éí bee Ízrel dineʼé hwééhózíní áhodoolíiłgo nahwíintaah; Kéínan kéyahgi Ízrel dineʼé łaʼ anaaʼ baa nidaʼasdeeʼígíí doo bił béédahózin da.
2 Tsʼídá díidíígíí tʼéiyá biniyé ákótʼéego Ízrel dineʼé náás ahoolchíiłii bił ééhodoozįįłgo ákóyiilaa; éí anaaʼ bichʼįʼ naʼabaah doo bił béédahózin dago anaaʼ bíńdabidiʼniltin doo.
3 Díí lą́ą: Filístiya dineʼé éí binanitʼaʼí ashdlaltʼéego yił bikin hadaasʼá áádóó Kéínan dineʼé tʼáá ałtso kéyahgi kéédahatʼı̨́ı̨́ nítʼééʼ áádóó Sáídan dineʼé índa Háíva dineʼé Dził Lébanangóó éí Dził Béíyal-hérman siʼánídóó Héímath kin haalʼáii yah ahóótʼiʼjįʼ kéédahatʼı̨́ı̨́ nítʼééʼ.
4 Áko tʼáá bí bee Ízrel dineʼé nayídeintaahgo bikʼeh óʼooʼníiłii dayíistsʼą́ąʼgo daatsʼí bił béédahodoozįįł; éí dabizhéʼé yę́ę yichʼįʼ Mózes yiniitʼaa yee haadzííʼ nítʼééʼ.
5 Ákohgo Ízrel dineʼé éí Kéínan dineʼé áádóó Het dineʼé áádóó Ámor dineʼé áádóó Píírez dineʼé áádóó Háíva dineʼé índa Jííbas dineʼé yitahgóó kéédahatʼı̨́ı̨́ nítʼééʼ.
6 Áko Ízrel dineʼé éí anaʼí dabitsiʼké bidaʼasdzą́ą doo biniyé tʼáá bí ádá nídayiisdlááʼ, áádóó dahatsiʼké éí dabiyeʼké bił ahaa dayiiʼnííł nítʼééʼ, índa bidiyin dabidiʼníinii bichʼįʼ nidahojiłáá nítʼééʼ.
Áthniyel éí Kúshan-rishathéíyim yitsʼą́ąjįʼ Ízrel dineʼé yisdáyíínil
7 Ízrel dineʼé éí Bóhólníihii binááł doo yáʼáshónígi ádajíítʼįįd áádóó Bóhólníihii haDiyin God baa dajiyooznah, áko Béíyal índa Ashíírah edaʼalyaii bichʼįʼ nidahojiłáá nítʼééʼ.
8 Éí bąą Bóhólníihii éí Ízrel dineʼé yichʼįʼ báhóóchįįdgo, Mesopotéímiya kéyahdóó aláahgo naatʼáanii Kúshan-rishathéíyim wolyéii hasnáago Ízrel dineʼé éí Kúshan-rishathéíyim yinaalteʼ danilı̨́įgo tseebíí nááhai.
9 Áádóó Ízrel dineʼé éí Bóhólníihii nídayookąąhgo Bóhólníihii éí Ízrel dineʼé yisdáyiiníił dooígíí niiníłtı̨́įgo Ízrel dineʼé yisdáyíínil; éí Kéíleb bitsilí Kíínez biyeʼ Áthniyel wolyé.
10 Éí Bóhólníihii biNíłchʼi Diyinii hakʼi hooleʼgo Ízrel dineʼé yá nihodiyiiʼaah nítʼééʼ áádóó anaaʼ baa naʼaldeehgóó dah diiyá; Bóhólníihii éí Mesopotéímiya kéyahdóó aláahgo naatʼáanii Kúshan-rishathéíyim wolyéii hálákʼeidííʼą́; Kúshan-rishathéíyim bikʼijįʼ jílı̨́įgo bikʼesdeesdlı̨́ı̨́ʼ.
11 Áádóó éí kéyahgi hashtʼehodítʼéego dízdiin nááhai. Ákohgo Kíínez biyeʼ Áthniyel daaztsą́.
Ííhad éí Móʼab dineʼé yitsʼą́ąjįʼ Ízrel dineʼé yisdáyíínil
12 Nítʼééʼ Ízrel dineʼé éí Bóhólníihii binááł doo yáʼáshónígi ánáádáátʼįįd. Áko Móʼab kéyahdóó aláahgo naatʼáanii Églan wolyéii Bóhólníihii bidziil ábiilaago Ízrel dineʼé atíyiilaa, háálá Bóhólníihii binááł doo yáʼáshónígi ádajíítʼįįd.
13 Églan éí Áman dineʼé índa Ámalek dineʼé áłah áyiilaago Ízrel dineʼé yaa heekaigo yikʼeh dadeesdlı̨́ı̨́ʼ, áko kin haalʼáii tsin páam yílʼáii hoolyéii bííʼ daazlı̨́ı̨́ʼ.
14 Áko Ízrel dineʼé éí Móʼab kéyahdóó aláahgo naatʼáanii Églan wolyéii yá nidaalʼaʼgo tseebíítsʼáadah nááhai.
15 Nidi Ízrel dineʼé éí Bóhólníihii nídayookąąhgo Bóhólníihii éí yisdáhwiiníił dooígíí niiníłtı̨́; Ííhad éí Gííra biyeʼ Bénjamin dineʼé nilíinii éí diné nitłʼaii nilı̨́. Móʼab kéyahdóó aláahgo naatʼáanii Églan wolyéii baa doolyéełii yił hachʼįʼ Ízrel dineʼé idaʼasʼaʼ.
16 Áko Ííhad tʼáá bí diltłish ałtsʼą́ąjįʼ deenínígíí tʼááłáʼídóó ałnííʼ ké silá áníłnéezgo áyiilaa, índa bikʼaiʼ nishʼnáájí biʼééʼ biyaadi yił ákászaazgo áyiilaa.
17 Áko Móʼab kéyahdóó aláahgo naatʼáanii Églan wolyéii baa doolyéełii bichʼįʼ jiníjaaʼ. Églan éí tʼáá íiyisí diné neeskʼahii jílı̨́.
18 Áádóó aa doolyéełii bichʼįʼ nizhʼnínilgo, adaʼazláii dah nídazhdiiłʼaʼ.
19 Nidi Gílgal hazʼání bíighahgi tsé edaʼalyaii bikʼi nidaʼashkʼaazhii sinilíjįʼ yił niikaigo Églan yichʼįʼ tʼą́ą́ʼ nádzáago ííłní, Aláahgo naatʼáanii nílíinii, tʼáá ádííghahígo haneʼ łaʼ bee nił hodeeshnih. Áádóó naatʼáanii ání, Haaʼíshąʼ diiłhééł. Áko bíighahgóó naazínígíí ałtso chʼékai.
20 Áádóó Ííhad hachʼįʼ niníyá; tʼáá sáhí chahaʼoh biyaagi dzizdáago áhodííniid, Diyin God bitsʼą́ą́dę́ę́ʼ haneʼ łaʼ bee nił hodeeshnih. Áko dzizdáhídóó nízhdiiʼnaʼgo
21 Ííhad bikʼaiʼ nishʼnáájí diltłish bąąh níʼáhígíí nishtłʼají yee yił háádéelgo habid góneʼ yaa ayííłgeed.
22 Diltłish bitsiin tʼáá bił baa eelwodgo bikʼah bee diltłish tʼáá átʼé doo yitʼı̨́ı̨́góó áyiilaa, áko bibid biyiʼdę́ę́ʼ diltłish doo háájótą́ą́ʼ átʼée da silı̨́ı̨́ʼ índa bibid biyiʼdę́ę́ʼ chąąʼ háágoʼ.
23 Ákohgo Ííhad éí dah náhástʼání góneʼ ajoolwodgo chahaʼohgi dáńʼdaʼditı̨́hígi dádaʼdeeskaalgo ájiilaa.
24 Índa Ííhad chʼélwodgo Églan bá nidaalʼaʼí níjéeʼgo chahaʼohgi dáádílkał dádaʼdeeskaalgo dayiiłtsą́, nítʼééʼ ádaaní, Niiʼohdi sidá shaʼshin.
25 Áko habaʼ nidaakaigo dadooshchʼiizh, nidi chahaʼohgi dáádadilkał tʼáadoo ąą ájíléhí tʼóó bee ąą ńdítı̨́hí nídeidiinilgo ąą ádayiilaa; nítʼééʼ binanitʼaʼí daaztsą́ągo niʼgóó sitı̨́įgo dayiiłtsą́.
26 Tʼah nidaʼáhodilziidgo Ííhad chʼélwodgo tsé bikʼi nidaʼashkʼaazhii edaʼalyaii sinilígíí bineʼ góneʼ chʼíneetʼı̨́ı̨́ʼ, áádóó Siyáírath hazʼáníjįʼ yisdáálwod.
27 Áko nídzídzáago Dził Íífreiyimdi deenástsʼaaʼ bideeʼ bee íʼdílzoołí bee ázhdííniidgo Ízrel dineʼé dziłghą́ą́ʼdę́ę́ʼ hoł adah deíjeehgo bilą́ąjįʼ joolwołgo
28 ábizhdííniid, Shikééʼ deínóhjeeh; jó, Bóhólníihii éí Móʼab dineʼé nihiʼanaʼí danilíinii nihílákʼeidííʼą́. Ákohgo bikééʼ joonéełgo Móʼab kéyah bichʼįʼgo Jórdan tooh tséʼnaa nideetiinígi anaʼí baa nijiyeekaigo tʼáadoo łaʼ chʼééyáhí da.
29 Íídą́ą́ʼ Móʼab dineʼé neeznáadi mííl nideistseed; éí tʼáá ałtso ayóó ádabóodziilii índa ayóó ádaaltahii danilı̨́į nidi tʼáadoo łaʼ yisdááyáhí da.
30 Ákohgo éí bijı̨́ Móʼab dineʼé dajílíinii Ízrel dineʼé biyaa azhníídeeʼ. Áko éí kéyahgi hashtʼehodítʼéego tseebídiin nááhai.
Shámgar éí Filístiya dineʼé yitsʼą́ąjįʼ Ízrel dineʼé yisdáyíínil
31 Áádóó hakʼijįʼ Éínath biyeʼ Shámgar éí béégashii binahaalyéii bee Filístiya dineʼé hastą́ądi neeznádiin neistseed, índa Ízrel dineʼé yisdáyíínil.
