Judges 4:1-24
4 Áko Ííhad daaztsą́ą́dóó bikʼijįʼ Ízrel dineʼé éí Bóhólníihii binááł doo yáʼáshónígi ánáádáátʼįįd.
2 Bóhólníihii éí Kéínan kéyahdóó aláahgo naatʼáanii Jéíbin wolyéii yílákʼee hodííʼą́; éí Héízor kin haalʼáadi nantʼá; Sísera éí Heirósheth-hagóyiim kin shijaaʼdi kééhajitʼíinii éí hasiláo yinanitʼaʼí nilı̨́.
3 Áko Ízrel dineʼé éí Bóhólníihii bíká adoolwoł biniyé nídayookąąh, háálá Sísera éí tsindaabąąs bijáád naakiígíí béésh nitłʼizii bee ádaalyaii náhástʼéidi neeznádiin yisʼnil áádóó Ízrel dineʼé doo hashtʼéʼégóó yide áhósingo naadiin nááhai.
Déborah áádóó Bérak éí Sísera wolyéii yikʼeh deesdlı̨́ı̨́ʼ
4 Lápidath beʼasdzą́ą́ Déborah éí Diyin God bá hojilneʼí jílı̨́. Éí íídą́ą́ʼ Ízrel dineʼé bá nihozhdiiʼaah nítʼééʼ.
5 Dził Íífreiyimgi Réímah kin haalʼáii áádóó Béthel kin haalʼáii bitaʼgi Déborah hatsin páam sikaadgo biyaagi kééhojitʼı̨́įgo Ízrel dineʼé haa nídaakahgo bá nihozhdiyiiʼaah nítʼééʼ.
6 Áko Abínowam biyeʼ Bérak éí Kéídesh-náftalai kin haalʼáagi kééhatʼíinii bíká ajííłʼaʼgo ábizhdííniid, Ízrel dineʼé biBóhólníihii Diyin God díí yee ná haadzííʼ: Nílááh, Náftalai dineʼé índa Zébyulan dineʼé bisiláo neeznáadi míilgo nił yinéeł doo.
7 Áko Jéíbin bisiláo binanitʼaʼí Sísera nizahodínéeshʼahgo bitsindaabąąs bijáád naakiígíí yee deínéehii índa tʼóó ahayóigo bił deínéehii éí Kíshan tooh nílínígi nidááh doonéełgo nílákʼee hodideeshʼááł.
8 Nítʼééʼ Bérak áhodííniid, Shił díníʼáazhgo tʼéiyá deeshááł, nidi doo shił díníʼáázhgóó éí doo deesháał da.
9 Áko asdzání áhodííniid, Tʼáá aaníí nił deeshʼash, nidi doo yéí ayóó ánítʼéego yínáał da dooleeł, háálá Sísera éí asdzání bílákʼeejįʼ Bóhólníihii nahodiyoołnih. Ákohgo Déborah nídiiʼnaʼgo Kéídesh kin haalʼáágóó Bérak yił dah diiʼáázh.
10 Áko Bérak éí Zébyulan dineʼé índa Náftalai dineʼé danilíinii Kéídesh kin haalʼáágóó dooleeł bizhdííniid, áko diné neeznáadi mííl yiltʼéego hoł dah diiná índa Déborah ałdóʼ hoł níʼáázh.
11 Áko Hííber éí Kííni dineʼé jílíinii Kííni dineʼé bitsʼázhníyá; éí Mózes yaadaaní nilíní Hóbab bikʼéí łaʼ jílı̨́; chéchʼil tʼáá bitsʼáhwiiníʼą́ądi Zéíyanéíyim nahósʼaʼgi haníbaal nizhníʼą́, éí Kéídesh kin haalʼáii tʼáá bíighahgóó áhoolyé.
12 Abínowam biyeʼ Bérak éí Dził Téíbor siʼánígóó ííyá, haʼníigo Sísera hoł hóóneʼ.
13 Áko Sísera éí bitsindaabąąs bijáád naakiígíí tʼáá átʼé áłah áyiilaa, éí tsindaabąąs bijáád naakiígíí béésh nitłʼizii bee ádaalyaii náhástʼéidi neeznádiingo áádóó Heirósheth-hagóyiim kin shijaaʼdóó Kíshan tooh nílíníjįʼ diné bił naakaígíí tʼáá ałtso áłah áyiilaa.
14 Áko Déborah éí Bérak áyidííniid, Sołtįʼ, háálá díí jı̨́ Bóhólníihii éí Sísera nílákʼee hodííʼą́. Tsʼídá tʼáá aaníí Bóhólníihii nilą́ąjįʼ hooleeł doo. Ákohgo Bérak éí Dził Téíbor bighą́ą́ʼdę́ę́ʼ diné neeznáadi míilgo hoł hadááná.
15 Áko Bóhólníihii éí Sísera bił ałkʼeh hólǫ́ǫgo áyiilaa; bitsindaabąąs bijáád naakiígíí índa bisiláo tʼáá átʼé tʼóó bił dahóóląądgo Bérak éí diltłish ałtso yee áhásdįįd, áko Sísera bitsinaabąąs bijáád naakiígíí yikááʼdę́ę́ʼ hadah yaaltáalgo yóóʼeelwod lá.
16 Áko Bérak éí tsindaabąąs bijáád naakiígíí índa siláo Heirósheth-hagóyiim kin shijaaʼjįʼ yikééʼ nídiilwodgo Sísera bisiláo ałtso diltłish yee nideistseed; tʼááłáʼí nidi tʼáadoo łaʼ yidzíiʼ da.
17 Nidi Sísera éí Kííni dineʼé Hííber wolyéii beʼasdzą́ą́ Jéíyel biníbaalígóó yóóʼajoolwod, háálá Héízor kin haalʼáádóó aláahgo naatʼáanii Jéíbin índa Kííni diné nilíinii Hííber bighandóóígíí éí yił kʼé daʼahóʼní.
18 Áko Jéíyel éí Sísera yidááh níyáago áyidííniid, Yah aninááh, shinanitʼaʼí, shił yah aninááh; tʼáadoo nił yéʼí. Ákohgo biníbaal góneʼ yah ajííyáago beeldléí hakʼíístiʼ.
19 Áko asdzání ábizhdííniid, Baa nánooshkąąh, tó doodlı̨́łígíí áłchʼı̨́ı̨́dígo łaʼ shaa níkaah, háálá dibááʼ sélı̨́ı̨́ʼ. Ákohgo abeʼ bee naatʼáhí ąą ájiilaago doodlı̨́įłii baazhníką́ągo bikʼínídzístiʼ.
20 Áko ánáábizhdooʼniid, Níbaal bichʼéʼétiingi sínízı̨́įgo tʼáá háiida naa níyáago nanídíłkidgo, Łaʼdaásh kweʼé naaghá, nidííniidgo, Nidagaʼ, bididííniił.
21 Nidi Jéíyel éí Hííber beʼasdzą́ą́ nilíinii níbaal bá anídaalkałí łaʼ néidiitą́ áádóó bee atsidí néidiiʼą́, áko hazhóʼógo haa níyáago éí tʼáá íiyisí chʼééshdeeyáago ajiłhosh, índa níbaal bá anídaalkałí hajaatʼah góneʼ yaa ayííłkaalgo niʼjįʼ yił iʼííłkaal, áko dadziztsą́.
22 Áádóó shoo, Bérak éí Sísera yíkantáago Jéíyel hadááh yílwodgo áháłní, Hágo, diné hanítáii bichʼįʼ nił dishʼaash. Ákohgo biníbaal góneʼ yah ajííyáago, jó, Sísera daaztsą́ą́ lá índa níbaal bá anídaalkałí bijaatʼah góneʼ bił eelkaal lá.
23 Ákohgo íídą́ą́ʼ Diyin God éí Ízrel dineʼé dabinááł Kéínan kéyahdóó aláahgo naatʼáanii Jéíbin wolyéii yikʼeh dadeesdlı̨́ı̨́ʼ.
24 Ízrel dineʼé náás deeskai, áádóó éí Kéínan kéyahdóó aláahgo naatʼáanii Jéíbin dayiisxı̨́įjįʼ tʼáá bizááká ádaatʼı̨́ı̨́ nítʼééʼ.
