Judges 5:1-31
5 Éí íídą́ą́ʼ Déborah áádóó Abínowam biyeʼ Bérak díí sin yee hóótáalgo ání,
2 Bóhólníihii baa dahohniih, háálá Ízrel dineʼé yisdáyíínil,índa diné tʼáá bí ádeinízingo nááʼádaʼdiisniiʼ.
3 Shoo, aláahgo naatʼáanii danohłíinii, aląąjįʼ nisoozíinii, hazhóʼó daʼíísínółtsʼą́ą́ʼ:shí éí Bóhólníihii bichʼįʼ hashtaał;shí Ízrel dineʼé biBóhólníihii Diyin God baa hashniihgo hashtaał.
4 Bóhólníihii nílíinii, Síyerdę́ę́ʼ chʼííníyá yę́ędą́ą́ʼ,Íídam kéyahdóó chʼííníyá yę́ędą́ą́ʼ nahasdzáán ditsxiz, índa yádiłhiłdę́ę́ʼ nahóółtą́;kʼos ałdóʼ bitsʼą́ą́dóó nahóółtą́.
5 Bóhólníihii binááł dził nidahaʼná,tʼáá éí Dził Sáínai siʼánígíí Ízrel dineʼé biBóhólníihii Diyin God binááł nidi nahaʼná.
6 Shámgar éí Éínath biyeʼ hináádą́ą́ʼáádóó Jéíyel hóyoołkááłdą́ą́ʼdaʼnítiingóó doo nidaʼaldeeh da,índa nidaaldeehii atsʼáʼiiztiinjí tʼéí nídadikah.
7 Kin dah naazhjaaʼgóó doo nidaagháhí da,Ízrel kéyahgi doo nidaagháhí da;wónáásee Déborah yinishyéii á yiizįʼgo Ízrel dineʼé bitahdóó amá sélı̨́ı̨́ʼ.
8 Diyin dabidiʼníinii łahgo átʼéii nideideezʼą́,áko dáńʼdítı̨́hígi anaaʼ hazlı̨́ı̨́ʼ.Naagé, doodaiiʼ tsiidétáán doo Ízrel dineʼé dízdiindi mííl ánéelą́ąʼgo bitahgi hadeelʼı̨́įʼ da.
9 Ízrel dineʼé bindanitʼaʼí tʼáá bí ádeinízingodiné bitahgóó nááʼádaʼdiisniiʼígíí baa shił hózhǫ́.Bóhólníihii baa dahohniih.
10 Téliiłgaii nihił nidaaldlooshii,nihí akʼi dahiʼniłí daʼílíinii bikʼi dah nahísóotáanii,índa atiingóó nidaałdeehii dííbaa dahołneʼ.
11 Tó háálı̨́įdi dibé atsʼáʼníiłgo bee íʼdílzoołí diitsʼaʼígi átʼéego nidaanéegoáádóó dahataałgo Bóhólníihii tʼáá ákogi ááníiłii yaa náádahoolneʼ.Izrel dineʼé kin dah naazhjaaʼgóó kéédahatʼínígíí tʼáá ákogi ááníiłii yaa náádahoolneʼ.Ákohgo Bóhólníihii bidineʼé dáńʼdaʼditı̨́híjįʼ niníná.
12 Chʼéénídzííd, Déborah, chʼéénídzííd! Chʼéénídzííd, sin łaʼ bee hótaał, chʼéénídzííd! Nídiidááh, Abínowam biyeʼ Bérak yinílyéii, dasíníłná danilíinii dah diiʼéésh.
13 Áko daadzíiʼii biʼoh daʼoogą́ʼígíí éí aghádahideezı̨́ı̨́ nítʼéʼígíí binaatʼáanii áhoolaa;Bóhólníihii éí ayóó ádajítʼéii honanitʼaʼí áshiilaa.
14 Íífreiyim dineʼé bitahdóó ehétłʼóól danilíinii Ámalek yikʼijįʼ danilı̨́;Bénjamin dineʼé, danihikʼéí bił danihikééʼ ádaatʼı̨́;Méíker bitsʼą́ą́dóó naatʼáanii yichíiłii áádóó Zébyulan dineʼé bitahdóó naaltsoos ádeiiłʼíní ałdóʼ neheeskai.
15 Ísakar dineʼé bindanitʼaʼí éí Déborah yił yíkai,tʼáá éí Ísakar dineʼé Bérak ałdóʼ yił yíkai, honítsʼaaʼ góyaa Bérak bikééʼ hadajííjééʼ.Rúben dineʼé ałʼąą dah deíkáhígíí ádadooníiłgi tʼáá íiyisí haleebee hazhóʼó nayikʼítsídaaskééz.
16 Haʼátʼíísh biniyé dibé bá íʼdílzooł dadidoohtsʼı̨́įłgo dibé dabighandi tʼóó nidaahkai nítʼééʼ?Rúben dineʼé ałʼąą dah deíkáhígíí ádadooníiłgi tʼáá íiyisí haleebee hazhóʼó nayikʼítsídaaskééz.
17 Gíliyad dineʼé éí Jórdan tooh wónaanídi tʼóó nidaakai,áádóó haʼátʼíísh biniinaa Dan dineʼé tʼáá tsinaaʼeeł tʼóó yiiʼ hólǫ́?Ásher dineʼé éí tábąąhgi táłtsʼá daʼiiʼeełígi tʼahdii tʼóó nidaakai.
18 Dahoníteelgóó ninádahałaah doo biniyé wódah nahazʼą́ągo ádaalyaaígiZébyulan dineʼé áádóó Náftalai dineʼé dajílíinii hóyéeʼjįʼ hweʼiinaʼ ninádazdeezʼą́ągo bee aniné bichʼįʼ nidahodítʼé ídazhʼdiilyaa.
19 Aláahgo naatʼáanii nidahaaskaigo anaaʼ ádahoolaa;Kéínan kéyahdóó aláahgo nidantʼáii éí Téíyanak kin haalʼáadi Megído tooh ílíní bibąąhgi anaaʼ ádahoolaa;béésh łigaii tʼáadoo łaʼ ghadayiisnil da.
20 Yádiłhiłdę́ę́ʼ sǫʼ hoł daʼahoogą́ą́ʼ,sǫʼ dabideetiindę́ę́ʼ Sísera yił daʼahoogą́ą́ʼ.
21 Kíshan tooh nílínígíí adabisʼéél;éí tʼáá ałkʼidą́ą́ʼ tooh nílı̨́įgo Kíshan tooh wolyé.Shiiʼ sizíinii nílíinii, nidziilgo bikʼi nanináa doo.
22 Tʼóó báhádzidgo łı̨́ı̨́ʼ dayíltaałgo ayóogo bikétłʼin dadiitsʼaʼ;łı̨́ı̨́ʼ bee naʼabaahii doo nidadilnaʼgóó dadilwoʼ.
23 Mííraz hazʼánígi kéédahatʼíinii hóyéeʼgo bá hadahohdziih, ní Bóhólníihii bidiyingo naalʼaʼí,ákwii kéédahatʼíinii tsʼídá bikʼeʼíyéʼígi átʼéego hóyéeʼgo bá hadahohdziih,háálá Bóhólníihii tʼáadoo yíká ííjéeʼ da;ayóó ádaatʼéii bichʼįʼ tʼáadoo Bóhólníihii yíká ííjéeʼ da.
24 Kííni dineʼé Hííber wolyéii beʼasdzą́ą́ Jéíyel éí sáanii biláahgo bikʼihojidlíi leʼ;sáanii éí níbaal yiiʼ dabighanígíí biláahgo bikʼihojidlíi leʼ.
25 Tó jííkeedgo abeʼ hainíką́;ásaaʼ ílíinii bee abeʼ díkʼǫ́zhí hainíką́.
26 Bílaʼ yee níbaal bá anídaalkałí néidiitą́áádóó bílaʼ nishʼnáájíígíí yee bee atsidí néidiiʼą́ągoSísera bitsiitsʼiin yigházníłneʼ; bijaatʼah góneʼ ayídzííłneʼ.
27 Hakétsı̨́įjįʼ naaʼíígoʼ, índa kʼídahineezdéél;jó, hakétsı̨́įjįʼ naaʼíígoʼ;tʼáá ákǫ́ǫ́ naaʼíígoʼígi daaztsą́.
28 Sísera yę́ę bimá tsésǫʼgi tsin yistłʼǫ́ǫgo dáádiníbaalígíí yiníká déezʼı̨́įʼgo ání,Haʼátʼéegoshąʼ bitsinaabąąs bijáád naakiígíí doo hąh bee ninádaʼiibąąs da?Haʼátʼéegoshąʼ bilı̨́ı̨́ʼ doo hąh daʼíłbąąs da?
29 Binaalʼaʼí sáanii dahóyánígíí ádabidííniid,áádóó tʼáá bí ałdóʼ tʼáá ádíyiʼídi ádííniidgo ání,
30 Łaʼda daatsʼí hakʼídaneeztą́ąʼgo hanaalyeʼé deiisnáago ałtaa deiʼniih:diné tʼááłáʼí nítínígo bá chʼikę́ę́h tʼááłáʼígo, doodaiiʼ nidiltʼéego yá atsʼádayiinííł.Sísera bá naaʼatʼą́hí ałʼąą átʼéego nidaashchʼąąʼígíí, naaʼatʼą́hí ałʼąą átʼéego nidaashchʼąąʼígíí tsahtsʼósí bee tʼáá ałchʼishdę́ę́ʼ ayóó ánóolningo ádaalyaiiéí nídeididooniłígíí azéédéełtsoozí ałtaa deiʼniih.
31 Bóhólníihii nílíinii, bíniʼdii nidaʼanaʼí tʼáá ałtso ádadoodįįł!Nidi ayóóʼádahóʼníinii éí hózhónígo haʼííʼą́ nahalingo náás yikah doo.
Áko éí kéyahgi hashtʼehodítʼéego dízdiin nááhai.
