Judges 6:1-40
6 Bóhólníihii binááł Ízrel dineʼé doo yáʼáshónígi ádáátʼįįd, áko Bóhólníihii éí Mídiyan dineʼé tʼóó yílákʼee hodííʼą́ągo tsostsʼid nááhai.
2 Áko Mídiyan dineʼé éí Ízrel dineʼé yikʼeh dadidlı̨́įgo Mídiyan dineʼé biniinaa dziłghą́ąʼdi adahasdzą́ą́góó áádóó tséʼáán dahasdzą́ą́góó índa nidahontʼin nahazʼą́ą́góó Ízrel dineʼé tʼáá bí ádá hashtʼedahoolaa.
3 Ákohgo Ízrel dineʼé kʼéédazhdidléehgo Mídiyan dineʼé áádóó Ámalek dineʼé índa haʼaʼaahdę́ę́ʼ dineʼé haa nidahaakaigo hoł nidahwiiłchǫǫh.
4 Áádóó haatįįh nídaaʼnéehgo náhinootʼı̨́łígíí ałtso hatsʼą́ą́ʼ áńdeiłdįįh; tʼáá níléí Géíza kin haalʼáágóó nidi áńdeiłdįįh, áádóó Ízrel dineʼé bichʼiyąʼ doo áńdeisįįh da; dibé, doodaiiʼ béégashii, doodaiiʼ téliida doo łaʼ yá ánínádeisįįh da.
5 Háálá dabilı̨́ı̨́ʼ yił háádaaʼnéehgo biníbaal ninádeiʼnił; nahachagiitsoh tʼóó ahayóí nánísánígi átʼéego nídaaʼnééh. Jó, bí áádóó bibighą́ą́ʼdaʼaskʼidii doo jóołtaʼ ádanéelą́ą́ʼgóó kéyahgi nidahwiiłchxǫǫh yiniyé yił nídaaʼnééh.
6 Áko Mídiyan dineʼé biniinaa Ízrel dineʼé tʼáá íiyisí hojoobaʼ dahozhdiilʼaʼ lá, áádóó Ízrel dineʼé éí Bóhólníihii nídayookąąh.
7 Ákódzaago Mídiyan dineʼé biniinaa Ízrel dineʼé éí Bóhólníihii nídayookąąhgo
8 Bóhólníihii éí Diyin God yá halneʼí łaʼ Ízrel dineʼé yeiníłʼaʼgo áyidííniid, Ízrel dineʼé biBóhólníihii Diyin God ání, Shí Ííjip kéyahdę́ę́ʼ chʼínihiníʼeezh; naalteʼ dasidinohdlı̨́ı̨́ʼ nítʼééʼ yę́ę bitsʼą́ąjįʼ hanihííʼeezh.
9 Áko Ííjip dineʼé bílákʼee hanihíínil, áádóó nihide ádahósinii tʼáá ałtso bílákʼee hanihíínil, índa nihilą́ąjįʼ ałtso shaa chʼíheezhjéeʼgo bikédaayah nihílákʼedííʼą́.
10 Áko ánihidííniid, Shí Bóhólníihii nihiDiyin God nishłı̨́; Ámor dineʼé bikéyahgi kéédahohtʼı̨́įgo bidiyin dabidiʼníinii tʼáadoo dadíínóhsiní, nihidííniid. Nidi tʼáadoo shizaad bikʼeh dahosoołʼįįd da.
11 Bóhólníihii bidiyingo naalʼaʼí honíleʼgo Áfra kin shijaaʼgi Jóʼash joolyéii Éíbiyíízer dineʼé jílı̨́įgo hachéchʼil yiyaagi neezdá. Jóʼash biyeʼ Gídiyan éí tłʼoh naadą́ą́ʼ nazhniłhaałgo chʼil naʼatłʼoʼii yiljizh góneʼ baa nijigháago Mídiyan dineʼé bitsʼąą nazhniłʼin.
12 Áko Bóhólníihii bidiyingo naalʼaʼí hachʼįʼ yitʼíní íʼdiilyaago áháłní, Bóhólníihii nił hólǫ́, diné ayóó átʼéii doo nánílyéesii nílíinii.
13 Áko Gídiyan éí diyingo naalʼaʼí ábizhdííniid, Bóhonishníihii nílíinii, Bóhólníihii nihił hólǫ́ǫgo haʼátʼíí biniyé díí tʼáá ałtso bee kónihiʼdoolʼįįd? Áko álílee yee ááníłígíí danihizhéʼé yę́ę ákótʼéego yee nihił dahoolneʼgo ádaaní, Daʼ doósh Bóhólníihii Ííjip kéyahdę́ę́ʼ chʼínihiníʼeezh da? Nidi kʼad Bóhólníihii yóóʼanihidííʼą́ągo Mídiyan dineʼé yílákʼee nihidííʼą́.
14 Áko Bóhólníihii honíłʼı̨́įgo áhodííniid, Nílááh, nidziilgo Ízrel dineʼé danilínígíí Mídiyan dineʼé bitsʼą́ąjįʼ yisdádíínił. Daʼ shíísh doo nííłʼaad da?
15 Áko ábizhdííniid, Bóhonishníihii nílíinii, haa yitʼéegoshąʼ Ízrel dineʼé yisdádeeshnił? Shoo, Manáseh dineʼé bitahgi shikʼéí hojoobaʼ ádaatʼı̨́, índa shizhéʼé bighangi tʼah ánístsʼíísígo ádaa nitsískees.
16 Áko Bóhólníihii áhodííniid, Tʼáá aaníí nił honishłǫ́ǫ doo, áádóó diné tʼááłáʼí dziisxı̨́ nahalingo Mídiyan dineʼé ałtso áhodííłdįįł.
17 Áko ábizhdííniid, Ajoobaʼ bee shichʼijí asíníłtą́ą́ ládą́ą́ʼ, bee ééhózinii shichʼįʼ ííshją́ą́ ádíílíiłgo tʼáá ni shichʼįʼ yáníłtiʼígíí shił bééhózin doo.
18 Kodóó dah doóyaʼ lágo, baa nánooshkąąh; nánísdzáago índa aa deeshłéełii chʼídeeshjihgo nichʼįʼ nideeshnił. Áko áhodííniid, Néínídzáajįʼ nibaʼ sédáa doo.
19 Áko Gídiyan hakin góneʼ yah ajííyáago tłʼízí yázhí índa íífa* wolyéii bee íʼneelʼąąhí bee akʼáán haką́ągo dííkʼǫsh tʼáágééd bááh ályaii hashtʼejiilaa; atsįʼ éí tsʼaaʼ bee nízhdiiką́ áádóó atooʼ éí ásaaʼ bee nízhdiiką́, áko chéchʼil biyaagi diyingo naalʼaʼí biyaa nizhníką́.
20 Áko Diyin God bidiyingo naalʼaʼí áhodííniid, Atsįʼ áádóó dííkʼǫsh tʼáágééd bááh ályaii nídiiníiłgo díí tséʼéłkáaʼgi ninínííł, índa bikʼijįʼ atooʼ yaidííził. Áádóó ákójiilaa.
21 Ákohgo Bóhólníihii bidiyingo naalʼaʼí gish bílákʼee sitánígíí atsįʼ áádóó dííkʼǫsh tʼáágééd bááh ályaii yiidiníłgeedgo tsé biyiʼdę́ę́ʼ kǫʼ hadíínáád. Áko atsįʼ áádóó dííkʼǫsh tʼáágééd bááh ályaii iidííłkʼą́ą́ʼ. Áádóó Bóhólníihii bidiyingo naalʼaʼí dah hodiileʼ.
22 Ákohgo Gídiyan éí Bóhólníihii bidiyingo naalʼaʼí átʼı̨́įgo baa ákozniizı̨́įʼgo ájíní, Dooládóʼ da, Bóhólníihii Diyin God nílíinii, háálá Bóhólníihii bidiyingo naalʼaʼí tʼáá ałníiʼjįʼ bił áhinishʼı̨́įgo bił ałchʼįʼ yáshtiʼ nítʼééʼ.
23 Nidi Bóhólníihii áhodííniid, Nichʼįʼ hózhǫ́ǫ doo; tʼáadoo nił yéʼí; doo dadíítsaał da.
24 Ákohgo Gídiyan éí Bóhólníihii bichʼįʼ bikááʼ nááʼiiniihí hajíítłʼingo éí Bóhólníihii bikʼeh hózhǫ́ nilı̨́, wolyée doo, jidííniid. Éíbiyíízer dineʼé bikin shijaaʼ Áfra hoolyéegi díí jı̨́ı̨́góó tʼahdii yadiitłʼin.
25 Ákódzaago tʼáá éí bitłʼééʼ Bóhólníihii áhodííniid, Nizhéʼé bidóola yázhí, áádóó naaki góneʼígíí tsostsʼid binááhai nídidíílóosgo nizhéʼé bibikááʼ nááʼiiniihí Béíyal yichʼįʼ nahałáhígíí bitsʼą́ą́ʼ naaʼadínííłkał áádóó bíighahgi Ashíírah daolyéego naazkaadii ałdóʼ bitsʼą́ą́ʼ łeeh bíʼdíítsił.
26 Áko Bóhólníihii niDiyin God bichʼįʼ díí tséʼéłkáaʼgi éʼélʼíinii bikʼehgo bikááʼ nááʼiiniihí ádíílííł; dóola naaki góneʼígíí éí didlidgo nááhániihii Ashíírah daolyéii ahidííníłneʼígíí bee didííłił.
27 Áko Gídiyan éí diné há nidaalʼaʼí neeználtʼéego nízhdiinil; Bóhólníihii tʼáá áhodííniidígi átʼéego íʼjiilaa; jó, hazhéʼé baʼałkʼeedóó hakʼéí danilíinii áádóó kintahdóó diné kéédahatʼíinii tʼáá íiyisí bikʼee hoł yéeʼgo biniinaa jı̨́įgo tʼáadoo ákójiilaa da, nidi tłʼéeʼgo índa ákójiilaa.
28 Áko tʼah abíínígo kintahdóó dineʼé nídiijééʼ nítʼééʼ; jó, Béíyal bichʼįʼ nahadláii bibikááʼ nááʼiiniihí nihidítąąd índa bíighahgóó Ashíírah daolyéego naazkaad yę́ę łeeh bíʼootsxéél lá áádóó dóola naaki góneʼígíí bikááʼ nááʼiiniihí ályaii bikáaʼgi nááhaazniiʼ lá.
29 Áko ahidiníłnáago ádaʼahidooʼniid, Díishąʼ háí kódzaa? Áko yíndaʼídíłkidgo nideiskááʼdóó bikʼijįʼ ádadííniid, Dííyeeʼ Jóʼash biyeʼ Gídiyan wolyéii átʼı̨́ı̨́ lá.
30 Ákohgo kintahdóó dineʼé éí Jóʼash ádeidííniid, Niyeʼ dadootsaał biniyé bił níʼaash, háálá Béíyal bichʼįʼ nahadláii bibikááʼ nááʼiiniihí nayííłkaad índa bíighahgi Ashíírah daolyéego naazkaadii łeeh yíʼííłtsxéél lá.
31 Áko Jóʼash bikʼídahaʼáahgo naazínígíí tʼáá átʼé áyidííniid, Daʼ Béíyalísh bichʼą́ą́h yádaałtiʼ? Doodaiiʼ yisdádanołteehgoósh ádadohní? Hániʼdii Béíyal bichʼą́ą́h yájíłtiʼígíí tʼah abínídą́ą́ʼ tʼóó hodiʼyoolyééł. Béíyal tʼáá bí diyin nilı̨́ı̨́ ládą́ą́ʼ hániʼdii tʼáá bí áchʼą́ą́h haadziih, háálá bibikááʼ nááʼiiniihí bitsʼą́ą́ʼ ahiih názhnííłkaad.
32 Éí bąą íídą́ą́ʼ Jerabéíyal joolyée doo, hozhdííniid. Hániʼdii Béíyal éí tʼáá bí hakʼijįʼ haadziih,* háálá bichʼįʼ bikááʼ nááʼiiniihí bitsʼą́ą́ʼ ahiih názhnííłkaad.
33 Ákohgo Mídiyan dineʼé áádóó Ámalek dineʼé índa haʼaʼaahdóó dineʼé tʼáá ałtso tʼáá łaʼ bizhiʼee áłah daazlı̨́įʼgo Jórdan tooh haʼnaadi Jézriyel kin shijaaʼgi yíldzis góyaa dah yinééł.
34 Nidi Bóhólníihii biNíłchʼi Diyinii éí Gídiyan bikʼi hooleʼgo deenástsʼaaʼ bideeʼ bee íʼdílzoołí yee ádííniidgo Éíbiyíízer dineʼé hakééʼ dah diiná.
35 Áko naalʼaʼí Manásehgóó adziisʼaʼ, áko áádę́ę́ʼ hakééʼ niʼiisdeeʼ. Áádóó naalʼaʼí éí Ásher dineʼé áádóó Zébyulan dineʼé índa Náftalai dineʼé bichʼįʼ anáádziisʼaʼgo áádę́ę́ʼ hadááh dahaazná.
36 Ákohgo Gídiyan éí Diyin God áyidííniid, Shí shee Ízrel dineʼé yisdánínííł ládą́ą́ʼ, bee háínídzíʼígi átʼéego ánílééh.
37 Jó, aghaaʼ bitsʼáljoolii niʼgóó nideeshjoł dahtooʼ bąąh silı̨́įʼgo niʼgóó éí tʼáá hóółtsei ládą́ą́ʼ bee háínídzíʼígi átʼéego shí shee Ízrel dineʼé yisdáníníiłgo shił bééhodoozįįł.
38 Áko ákódzaa. Tʼah abínídą́ą́ʼ nízhdiiʼnaʼgo aghaaʼ bitsʼáljoolii bąąh dziznih nítʼééʼ, dahtooʼ bąąh lá, éí ásaaʼ hadeezbin bíighahgo bąąh háánaʼ.
39 Ákohgo Gídiyan éí Diyin God áyidííniid, Tʼáadoo shichʼįʼ náháchįʼgo shikʼijįʼ nílíní; shíniʼdii tʼááłáhídi hanáádeesdzih; shíniʼdii tʼááłáhídi aghaaʼ bee bíníshtáahgo shił bééhodoozįįł baa nánooshkąąh: éí aghaaʼ bitsʼáljoolii tʼéí yíłtsei doo, nidi niʼgóó tʼáá átʼé hashzhoh doo.
40 Tʼáá éí bitłʼééʼ Diyin God ákódzaago aghaaʼ bitsʼáljoolii tʼáá yíłtseii, nidi niʼgóó tʼáá átʼé náháshzhoh lá.
Footnotes
^ Íífa bee íʼneelʼąąhí éí bilasáana bee naakáhígíí ałnííʼ bitis áníłtsoígíí óolyé.
^ Jerabéíyal jiníigo Hííbrew kʼehjígo, Hániʼdii Béíyal éí tʼáá bí haadziih, jiníigo óolyé.
