Judges 7:1-25
7 Ákohgo Jerabéíyal, éí Gídiyan óolyé, índa diné hoł naakaígíí tʼáá ałtso tʼah doo hąhígóó nízhdiijéeʼgo Héírad tó háálı̨́ bíighahgi nidadziizná. Mídiyan dineʼé éí náhookǫsjígo Móreh dah daaskʼid bíighahgi honítsʼaaʼgóoda nidahaazná.
2 Bóhólníihii éí Gídiyan áyidííniid, Diné nił naakaígíí tʼóó ahayóigo biniinaa Mídiyan dineʼé doo nílákʼee dideeshʼáał da. Doodaiiʼ Ízrel dineʼé shikʼijįʼ danilı̨́įgo ádaa dahaʼniihgo ádadidooniił, Tʼáá nihí yisdáʼádadeeʼnil.
3 Éí bąą kʼad kódíníigo diné bił chʼíhoníʼaah, Tʼáá háiida bił yééʼ hólóonii áádóó ádił nahwiijaahgo náldzidii tʼah doo hąhígóó bíniʼdii Dził Gíliyadóó hooghangóó nihéédahakááh. Naadiin naakidi mííl anáhaaskaigo neeznáadi mííl éí tʼáá ákǫ́ǫ́ bił dah joonééł.
4 Áko Bóhólníihii éí Gídiyan ánéídooʼniid, Diné tʼahdii tʼóó ahayóí; tóojįʼ dííʼishgo áadi łaʼ ná bééhózingo ádeeshłíiłgo, Díí lą́ą, nidishʼnínígíí nídidííniłgo éí nił yikah doo índa tʼáá háiida, Díí doo nił dookah da, nidishnínígíí éí diné doo nił dookah da.
5 Tóojįʼ diné jiníʼeezhgo Bóhólníihii éí Gídiyan áyidííniid, Łééchąąʼí ałchʼalígi átʼéego daʼałchʼalígíí tʼáá ałtso tʼáá sahdii bitsʼádíínił, índa tʼáá ałtso nitsidadéesgoʼgo daʼoodlą́ʼígíí ałdóʼ tʼáá sahdii bitsʼádíínił.
6 Áko bílákʼeejįʼ tó deiłchʼalgo daʼoodlą́ʼígíí jííłtaʼgo táadi neeznádiin yiltʼéé lá, nidi łaʼígíí éí tʼáá ałtso nitsidadéesgoʼgo taah daneesʼą́ągo daʼoodlą́ą́ʼ.
7 Áko Bóhólníihii éí Gídiyan ánéídooʼniid, Táadi neeznádiingo diné daʼííłchʼalígíí éí áádeesįįłgo Mídiyan dineʼé nílákʼee dideeshʼááł, áádóó łaʼígíí tʼáá ałtso tʼááłáʼí nítínígo tʼáá bí dabinághangóó bíniʼdii nídeíkááh.
8 Áko Ízrel dineʼé łaʼígíí tʼáá ałtso dabiníbaal naaznilígóó bééʼjiisʼniiʼ, nidi táadi neeznádiin dinéhígíí éí chʼiyáán áádóó deenástsʼaaʼ bideeʼ bee íʼdílzoołí nídeidiinil. Áko Mídiyan dineʼé éí hayaajígo yíldzis góyaa dah yinééł.
9 Tʼáá éí bitłʼééʼ Bóhólníihii áhodííniid, Nídiidááh, anaʼí dah yinéłígóó dínááh, háálá éí nílákʼedííʼą́.
10 Nidi dah oonéłígíí bikʼee nił yéeʼgo éí Púra ná naalʼaʼí ákǫ́ǫ́ bił dííʼash.
11 Áko diné haʼátʼíí daanínígíí yídííłtsʼįįłgo bee nílaʼ bidziil dííleełgo dah oonéłí góyaa hidíídááł. Ákohgo Púra há naalʼaʼí bił ákóyaa jiníʼáazhgo siláo dah yinéłígíí bibąąhjįʼ jiníʼáázh.
12 Áko nahachagiitsoh tʼáadoo bee néelą́ʼída nahalingo Mídiyan dineʼé áádóó Ámalek dineʼé índa haʼaʼaahdę́ęʼgo dineʼé éí yíldzis góyaa dah yinééł, áko tónteel bibąąhgi séí tʼóó ahayóígíigi átʼéego bighą́ą́ʼaskʼidii doo jóołtaʼ ádanéelą́ąʼ da.
13 Gídiyan níyáago, jó, diné łaʼ neizyeelígíí bikʼis yee yił halneʼgo ání, Jó, baa neiseełgo baa neisíyeelii éí tłʼoh naadą́ą́ʼ bideeʼí bááh ályaaígíí éí Mídiyan dineʼé dah yinéłí góneʼ íímáazgo níbaal yikʼi chʼínímááz. Áko yídeezgohgo ahiih nááłhęęzh.
14 Áko bikʼis ábidííniid, Díí Ízrel dineʼé Jóʼash biyeʼ Gídiyan bidiltłish átʼéé lá, háálá Diyin God éí Mídiyan dineʼé áádóó yił dah deínéehii tʼáá ałtso hálákʼeidííʼą́.
15 Áko baa nidziizyeelígíí áádóó ááhyiłnínígíí dzidiiztsʼą́ąʼgo Gídiyan sodoolzin, áádóó Ízrel dineʼé dah yinéłígóó nídzídzáago ájíní, Hashtʼeʼádadołnééh, háálá Mídiyan dineʼé bitsʼą́ą́dóó dah deínéehii Bóhólníihii nihílákʼeidííʼą́.
16 Áko diné táadi neeznádiingo diné dah yinéłígíí tááʼgóó ałtsʼázhnínil, índa deenástsʼaaʼ bideeʼ bee íʼdílzoołí áádóó ásaaʼ éí honooyééł biiʼ naaznilgo tʼáá ałtso deíjáahgo ájiilaa.
17 Áko ábizhdííniid, Dashinółʼı̨́įgo ííshją́ą́ íisdzaaígi ádaahtʼı̨́į doo; dah oonéłígíí bitʼáahjįʼ niníyáago íisdzaaígi ádaahtʼı̨́į dooleeł.
18 Deenástsʼaaʼ bideeʼ bee ídílzoołí bee ádííniidgo shí índa diné shił naakaígíí tʼáá ałtso éí dah oonéłígi tʼáá ałtsodę́ę́ʼ deenástsʼaaʼ bideeʼ bee íʼdílzoołí bee ádadidoohniiłgo, Bóhólníihii índa Gídiyan bidiltłish, dadidoohniił.
19 Áko Gídiyan áádóó diné neeznádiingo hoł naakaígíí dah oonéłígíí bitʼáahjįʼ ajííjéeʼgo tłʼéʼííłníiʼgo hadaʼídéesʼı̨́ʼí ániid ałnánááʼnil, áko deenástsʼaaʼ bideeʼ bee íʼdílzoołí bee ádazhdííniidgo ásaaʼ hálákʼee naaznilígíí nidadziistsʼil.
20 Áko táaʼgo ałtsʼááʼnilígíí deenástsʼaaʼ bideeʼ bee íʼdílzoołí yee ádaaníigo áádóó ásaaʼ nidadzistseedgo honooyééł éí nishtłʼají bílákʼee naaznil, índa adeeʼ bee íʼdílzoołí éí nishʼnáájígo bílákʼee naaznilgo hadadeeshghaazhgo ádaaní, Bóhólníihii índa Gídiyan bidiltłish!
21 Áko diné tʼááłáʼí nítínígo dah oonéłígíí yinázı̨́, áádóó anaʼí tʼáá ałtso nídiijéeʼgo hahodííłdláadgo dah dadíníichą́ą́ʼ.
22 Deenástsʼaaʼ bideeʼ bee íʼdílzoołí táadi neeznádiingo yee ádaaníigo Bóhólníihii éí anaʼí tʼáá átʼé tʼááłáʼí nítínígo bidiltłish yee ałtaa alghaałgo áyiilaa, índa anaʼí éí Beth-shítah kin shijaaʼgóó Zerérah nahósʼaʼ bichʼįʼgo aheezhjééʼ áádóó Éíbel-miihólah kin shijaaʼgóoda éí Tábath nahósʼaʼgóó ałdóʼ aheezhjééʼ lá.
23 Áko Ízrel diné danilíinii éí Náftalai dineʼé áádóó Ásher dineʼé índa Manáseh dineʼé tʼáá átʼé bitsʼą́ą́dóó áłah silı̨́įʼgo Mídiyan dineʼé yikééʼ aheezhjééʼ.
24 Áko Dził Íífreiyimgóó tʼáá átʼé Gídiyan éí nidaalʼaʼí adziisʼaʼgo ájíní, Hágo, Mídiyan dineʼé bikʼiidoohjahgo Bethbára haʼnaa nideetiiníjįʼ Jórdan tooh bibąąhgi bidááh nihidoohkah. Ákohgo Íífreiyim dineʼé tʼáá ałtso áłah silı̨́įʼgo Bethbára haʼnaa nideetiiníjįʼ Jórdan tooh bibąąhgóó tʼáá átʼé baa nijiyeekai.
25 Áko Mídiyan dineʼé binanitʼaʼí naakigo, łaʼ Óreb wolyé, łaʼígíí Zíyeb wolyé, Óreb éí Óreb tséʼéłkáaʼgi dayiisxı̨́, áádóó Zíyeb éí Zíyeb chʼil naʼatłʼoʼii yiljizhígi dayiisxı̨́, áádóó Mídiyan dineʼé yikééʼ yijah. Áko Óreb áádóó Zíyeb bitsiitsʼiin éí Jórdan toohjįʼ Gídiyan yaa deizhjaaʼ.
