Judges 8:1-35
8 Áko Íífreiyim dineʼé ádahodííniid, Haʼátʼéegoshąʼ kónihííníłʼįįd? Tʼáadoo hágo nihidiníní Mídiyan dineʼé bił daʼahidíígą́ą́łgóó nisíníyáá lá. Áko tʼáá íiyisí nahóyádaastiʼ.
2 Áko Gídiyan áhodííniid, Áátʼįįdígíí éí ádaotʼįįdígíísh bił ałhąąh nidanohnííł? Íífreiyim dineʼé bichʼil naʼatłʼoʼii daadziihígíí éí Éíbiyíízer dineʼé bichʼil naʼatłʼoʼii bineestʼąʼ biláahgoósh yáʼátʼééh?
3 Diyin God éí Mídiyan dineʼé bitahdóó bídahólníihii alą́ąjįʼígíí Óreb áádóó Zíyeb nihílákʼeidííʼą́, áko nihí ayóó ádaotʼįįdígíísh haʼátʼíí bee bíneeshʼą́ągo. Ákohgo ákózhdííniidgo hachʼįʼ bádahachįʼígíí áńdahodiilzeeʼ.
4 Áko Gídiyan éí Jórdan toohdi jiníyáago tséʼnaa nizhníyá, hó áádóó diné táadi neeznádiin hoł naakaígíí bił chʼééh dzideeskai nidi tʼáá bikééʼ dajíbááh.
5 Áko Sákath dineʼé áyidííniid, Diné shikééʼ yikahígíí bááh łaʼ baa dadoohniłgo nihííníshkeed, háálá chʼééh dadeeskai, índa shí éí Mídiyan dineʼé aláahgo binanitʼaʼí Zííbah áádóó Zalmóna wolyéii bikééʼ yishbah.
6 Áko Sákath dineʼé aląąjįʼ bídahólníihii ádahodííniid, Kʼadísh Zííbah áádóó Zalmóna nílákʼeeʼnilgo biniinaa nisiláo bááh baa dadiiʼnił?
7 Áko Gídiyan ání, Díí bąą Bóhólníihii éí Zííbah áádóó Zalmóna shílákʼeidííʼą́ągo honoojíídę́ę́ʼ hosh índa chʼil ahoshí bee nihitsʼíís nídínéestsxis.
8 Áádóó dashdiiyáago Piinúwel hoolyéhígíí baazhníyáago éí dineʼé bichʼįʼ tʼáá ákótʼéego hanáádzoodzííʼ, áko Sákath dineʼé ádahodííniidígi átʼéego Piinúwel dineʼé hanáádaasdzííʼ.
9 Áádóó Piinúwel dineʼé ánáábizhdooʼniid, Kʼé bił nínáánísdzáago díí kin yótʼááh yíʼáhígíí naaʼadeeshkał.
10 Nítʼééʼ Zííbah áádóó Zalmóna hasiláo Kárkor kin haalʼáagi bił nijikai; éí diné danilíinii ashdlaʼáadahdi mííl ánéelą́ąʼgo haʼaʼaahdę́ę́ʼ dineʼé kónéeltʼeʼ nidahaasdzííʼ lá, háálá tʼááłáhídi neeznádiindóó baʼaan naadiindi mííl ánéelą́ąʼgo diltłish yee nidaabaahii ałtso ábiʼdisdįįd.
11 Áko Gídiyan dashdiiyáago Nóbah kin haalʼáii áádóó Jagbíyah kin haalʼáii haʼaʼaahjígo níbaal yiiʼ kéédahatʼínígíí éí beʼatiingóó jiníyá, áádóó anaʼí ádzísdįįd, háálá doo hadaʼídéesʼı̨́įʼ da nítʼééʼ.
12 Áko Zííbah áádóó Zalmóna nilíinii yóóʼahiʼnoolchą́ąʼgo bíjílwod, áko Mídiyandóó aláahgo naatʼáanii nidiltʼéhígíí Zííbah áádóó Zalmóna dashdiiʼeezh, áko anaʼí dah yinéłígíí tazhʼnooskaad.
13 Áko Jóʼash biyeʼ Gídiyan éí anaaʼ baa naʼaldeehdę́ę́ʼ níjookahgo Hérez báhátis níjookai.
14 Áko Sákathdóó dinééh bił nidadzizdéelgo nidayízhdééłkid; éí Sákathdóó hastóí bídahólníhígíí índa aląąjįʼ naazíinii tsostsʼidiindóó baʼaan tsostsʼid ánéelą́ąʼgo dabízhiʼ há naaltsoos yikááʼ níyíizoh.
15 Áko Sákathdóó dineʼé baazhníyáago ábizhdííniid, Shoo, díí Zííbah áádóó Zalmóna éí bee shá nidahołtʼiʼgo kódadooniid yę́ę, Kʼadísh Zííbah áádóó Zalmóna nílákʼee dootʼą́ągo bąą nisiláo chʼééh deeskaigo bááh baa dadiiʼnił?
16 Kin haalʼáádóó hastóí aląąjįʼ naazíinii nízhdiiʼeezhgo honoojíídę́ę́ʼ hosh áádóó chʼil ahoshí łaʼ nízhdiiłjoolgo bee Sákathdóó hastóí názneestsxasgo nazneeztą́ą́ʼ.
17 Áádóó Piinúwel hoolyéegi kin yótʼááh yíʼáhígíí nazhnííłkaad, índa kin haalʼáhídóó diné danilíinii ałtso nidadzistsxeed.
18 Ákohgo Zííbah índa Zalmóna ábizhdííniid, Dził Téíborgi diné nidasoołtseedígíí haa daatʼéé shı̨́įshąʼ ádaałʼı̨́? Áko ánááhodooʼniid, Ni ánítʼéhígi ádaatʼéé nítʼééʼ; éí tʼááłáʼí nítínígo aláahgo naatʼáanii biyeʼké nidahalin nítʼééʼ.
19 Áko ábizhdííniid, Éí shikʼis danilı̨́ı̨́ nítʼééʼ; shimá biyáázhké ádaatʼéé nítʼééʼ; tsʼídá tʼáá aaníí Bóhólníihii hiná; ákótʼéego yisdéínínilgo shí tsʼídá tʼáá aaníí doo nanihideestsxił da nítʼééʼ.
20 Áko Jííther alą́ąjįʼ há yizhchíinii ábizhdííniid, Nídiidáahgo naniłtsxeed. Nidi ániid naagháhígíí biniinaa tʼáadoo bidiltłish hayíítą́ą da, háálá tʼah ániid nijigháhígíí biniinaa hoł yééʼ.
21 Ákohgo Zííba índa Zalmóna ázhdííniid, Tʼáá ninídiiʼ néehgo nihikʼi hooleeh, háálá adziil bee hólóonii éí diné ákótʼı̨́. Áko Gídiyan náhidiitahgo Zííbah áádóó Zalmóna neistsxeed. Áko dah yiitą́ beʼelyaago ghą́ą́ʼaskʼidii bizéédéenilígíí nizhʼdiinil.
Gídiyan náásgóó áátʼįįdii índa daaztsánígíí
22 Ákohgo Ízrel dineʼé éí Gídiyan ádeidííniid, Níhólníihgo nihinanítʼáa doo, áádóó niyeʼ índa ninálí ałdóʼ nihinantʼáa doo, háálá Mídiyin dineʼé bitsʼą́ąjįʼ yisdánihíínínil.
23 Gídiyan áhodííniid, Doo nihinanishtʼáa da doo, índa shiyeʼ ałdóʼ doo nihinantʼáa da doo, nidi Bóhólníihii tʼéiyá nihinantʼáa doo.
24 Áko Gídiyan ánááhodooʼniid, Nánihooshkąąh, diné tʼááłáʼí nootínígo jaaʼ bigháníʼáhí dasoołnánígíí shaa dahidoohnił. (Háálá Íshmeiyel dineʼé danilı̨́įgo óola jaaʼ bigháníʼáhí bee dahólǫ́ǫ́ nítʼééʼ.)
25 Áko ádadííniid, Nihił dahadleeʼgo naa dadiiʼnił. Áádóó ééʼ nideiskaadgo diné tʼááłáʼí nítínígo ajaaʼ bigháníʼáhí deisnánígíí yikáaʼjįʼ adayiiznil.
26 Áko óola jaaʼ bigháníʼáhí jííkeedígíí éí shékel wolyéhígíí tʼááłáhídi mííldóó baʼaan tsostsʼidi neeznádiin dah hidiidloh áádóó dah yiitą́ bidaʼalyaiida áádóó yooʼda índa Mídiyan dineʼé aláahgo binanitʼaʼí biʼééʼ tsídídééh nahalingo łichíʼígíí bóóltąʼgo áádóó bighą́ą́ʼaskʼidii bizéédaaztʼiʼ nítʼéʼígíida.
27 Áko Gídiyan éí aheesnilígíí bee íífad wolyéii áyiilaago bikin haalʼáhígíí Áfra hoolyéegi dah hidíłtsoozgo áyiilaa. Áko ałjiłnii bichʼįʼ ałkʼi naʼaldeehígi átʼéego éí bichʼįʼ Ízrel dineʼé tʼáá ałtso ałkʼi naakai áádóó Gídiyan índa haʼáłchíní tʼáá bił łoh bizajiiskai nidahojílin silı̨́ı̨́ʼ.
28 Ákohgo Mídiyan dineʼé éí Ízrel dineʼé biyaa dziznil dadzizlı̨́įʼgo doo dah náádazhnéetʼaah da. Áko éí kéyahgi hashtʼehodítʼéego Gídiyan bíyoołkáałgo dízdiin nááhai.
29 Jóʼash biyeʼ Jerabéíyal dashdiiyáago tʼáá hó hakin biiʼ kééhojitʼı̨́ı̨́ nítʼééʼ.
30 Áko Gídiyan hayeʼké tsostsʼidiin, tʼáá íiyisí tʼáá hó haʼáłchíní, háálá hweʼasdzą́ą́ tʼóó ahayóí.
31 Áko hweʼasdzą́ą́ jíłʼíní Shííkem kin haalʼáagi hayeʼ łaʼ há yishchı̨́, éí Abímelek bee jíízhiʼ.
32 Áko Jóʼash biyeʼ Gídiyan dadziztsą́; są́ biisxı̨́; éí Éíbiyíízer dineʼé bikéyah Áfra nahósʼaʼgi hazhéʼé yę́ę Jóʼash bitséníʼootséél góneʼ yóóʼáhoʼdiilyaa.
33 Gídiyan dadziztsą́ą́dóó tʼáadoo hodíínaʼí Ízrel dineʼé tʼą́ą́ʼ dah nínáádiijéeʼgo ałjiłnii bichʼįʼ ałkʼi naʼaldeehígi átʼéego Béíyal bił nidahodíłchiiłgo Béíyal-bíírith bidiyin dabidiʼníinii ádayiilaa.
34 Áko Ízrel dineʼé biBóhólníihii Diyin God doo yéédáálniiʼ da; éí bidaʼanaʼí tʼáá ałtso bílákʼeedę́ę́ʼ tʼáá ałtsojįʼ háábooʼnil.
35 Áko Jerabéíyal (éí Gídiyan óolyé) Ízrel dineʼé éí haʼáłchíní tʼáadoo yaa nídajoozbaʼ da, Ízrel dineʼé nizhónígo bichʼįʼ ájítʼéé nítʼééʼ, nidi tʼáadoo ákónídahoodlaa da.
