Judges 9:1-57
9 Áko Jerabéíyal biyeʼ Abímelek éí Shííkem kin haalʼáágóó jiníyáago hamá bikʼéí áádóó tʼáá ałtso hamá bizhéʼé bikʼéí danilíinii ábizhdííniid,
2 Shííkem kin haalʼáagi kéédahatʼíinii tʼáá ałtso dadiʼdootsʼı̨́ı̨́ł biniyé ádabidohní, Jerabéíyal biyeʼké tsostsʼidiin yiltʼéego nihindantʼáa dooígíí nihá yáʼátʼééh, doodaiiʼ tʼááłáʼígo daatsʼí nihinantʼáa doo? Béédaałniih, shą́ą́ʼ tʼááłáʼí dineʼé daniidlı̨́įgo nihikʼéí nishłı̨́.
3 Áko hamá bikʼéí éí Shííkem dineʼé tʼáá ałtso yichʼįʼ díí saad tʼáá átʼé yee haa nidahasneʼgo Abímelek yikééʼ deíkáah dooleełgo tsídadeezkééz, háálá ádaaní, Nihikʼéí jílı̨́.
4 Áko Béíyal-bíírith dílzinii bikindę́ę́ʼ béésh łigaii tsostsʼidiingo haa deiznilgo Abímelek joolyéii éí diné tʼáadoo yee chodaoʼíní daígíí áádóó tʼóó akʼi nidanilneʼii bichʼįʼ niʼjiiléego hakééʼ tádookai.
5 Áko Áfra kin shijaaʼgóó hazhéʼé bighangóó ajííyáago hakʼis Jerabéíyal biyeʼké tsostsʼidiin yiltʼéego tsé tʼááłáʼígíí bikáaʼgi nidzistseed, nidi Jerabéíyal biyeʼ akéédę́ʼígíí Jótham tʼéí yidzííʼ, háálá tʼáá bínáʼádeesʼı̨́ı̨́ʼ lá.
6 Áko Shííkem kin haalʼáagi kéédahatʼíinii tʼáá ałtso áłah silı̨́įʼgo Míllo kin yaa áhídóó danilíinii bił dashdiikai, índa Shííkemgi chéchʼil áyah niiʼáii bíighahgi Abímelek aláahgo naatʼáanii ádayiilaa.
7 Áko Jótham bił hóóneʼgo dah diiyáago Dził Gérazim bighą́ąʼjįʼ haayáago sizı̨́įgo yéego hadoolghaazhgo ání, Shííkem dineʼé danohłíinii, dashíínółtsʼą́ą́ʼ, áko Diyin God nihółtsʼą́ąʼ doo.
8 Tsin naazkaadii aláahgo yinantʼáa dooígíí akʼah yikʼi yadeidooził biniyé dah diikaigo áliv tsin ádeididooniił, Nihinanítʼáa dooleeł.
9 Nidi áliv tsin áhodidooniił, Daʼ shiʼakʼah bee Diyin God áádóó diné hoł nilínígíí bitsʼą́ą́ʼ dah dideesháałgoósh tsin naazkaadii tʼáá ałtso tʼéí binanishtʼáa doo?
10 Áko tsin naazkaadii éí fig tsin ádeididooniił, Hágo, nihinanítʼáa doo.
11 Nidi fig tsin áhodidooniił, Daʼ bee łinishkanígíí áádóó bee shineestʼąʼ yáʼátʼéhígíí bitsʼą́ą́ʼ dah dideesháałgoósh tsin naazkaadii tʼéí binanishtʼáa doo?
12 Áko tsin naazkaadii éí chʼil naʼatłʼoʼii ádeididooniił, Hágo, nihinanítʼáa dooleeł.
13 Nidi chʼil naʼatłʼoʼii áhodidooniił, Daʼ shineestʼąʼ bitooʼ bee Diyin God áádóó diné danilíinii éí bił hóshónígíí bitsʼą́ą́ʼ dah dideesháałgoósh tsin naazkaadii binanishtʼáa dooleeł?
14 Ákohgo tsin naazkaadii tʼáá ałtso chʼil deeníní ádeididooniił, Hágo, nihinanítʼáa dooleeł.
15 Índa chʼil deeníní éí tsin naazkaadígíí ádeididooniił, Tʼáá aaníí nihinaatʼáanii ádashohłéehgo akʼah shikʼi yadaohsíidgo atsʼádashinołteeh ládą́ą́ʼ, hágo, shichahaʼohgi nahísóotą́ nidi doo ákódaahnééhgóó éí hániʼdii chʼil deeníní bitsʼą́ą́dóó kǫʼ hazdoosxihgo Dził Lébanangóó gadtsoh ałtso iididoołkʼą́ą́ł.
16 Éí bąą kʼad tʼáá aaníinii áádóó tʼáádóo nídíii ádeiilyaa danohsingo éí Abímelek aláahgo naatʼáanii ádaohłaago áádóó Jerabéíyal índa bighandóó danilíinii yáʼátʼéhígi bichʼįʼ ádaohdzaago, éí yaa naayáhígíí bikʼehgo baa nisoohkai ládą́ą́ʼ yáʼátʼéhígi lá ádaohdzaa ni,
17 háálá shizhéʼé nihá naazbaaʼgo beʼiinaʼ tsʼídá nihá ninéidiníʼą́, áádóó Mídiyan dineʼé bitsʼą́ąjįʼ yisdánihíínil.
18 Nidi shizhéʼé bighandóó danilíinii díí jı̨́ bikʼijįʼ dasoolı̨́įʼgo biyeʼké tsostsʼidiin yiltʼéego tsé tʼááłáʼígíí bikáaʼjįʼ nidasoołtseed, áko shizhéʼé éí asdzání há naalʼaʼí biyáázh Abímelek éí Shííkem dineʼé aláahgo binanitʼaʼí nilı̨́įgo ádaohłaa, háálá aají nihí nihikʼis nilı̨́.
19 Tʼáá aaníinii áádóó tʼáádóo nídíii díí jı̨́ Jerabéíyal áádóó bighandóó danilíinii bił bichʼįʼ bee ádanohtʼéé nítʼéeʼgo Abímelek baa nihił nidahoozhǫǫh doo índa bí ałdóʼ bíniʼdii nihaa bił nihoozhǫǫh doo.
20 Nidi doo ákótʼéégóó bíniʼdii Abímelek bitsʼą́ą́dę́ę́ʼ kǫʼ hazdoosxihgo Shííkem kin haalʼáádóó dineʼé índa Míllo kin yaaʼáhídóó dineʼé iidółkʼą́ą́h, áádóó bíniʼdii Shííkemdóó dineʼé índa Míllo kin yaaʼáhídóó dineʼé bitsʼą́ą́dóó kǫʼ hadónaadgo Abímelek iidółkʼą́ą́h.
21 Áko Jótham yóóʼajoolwodgo yóóʼazhnííchą́ą́ʼ áádóó Bíyer hazʼánígi jiníyáago ákwii kééhojitʼı̨́ı̨́ nítʼééʼ, háálá hakʼis Abímelek bikʼee hoł yééʼ.
22 Abímelek éí Ízrel dineʼé binazhʼntʼáago tááʼ nááhai.
23 Diyin God éí Abímelek índa Shííkem dineʼé bitaʼgi akʼeʼdiniih hólǫ́ǫgo áyiilaa. Áko Shííkem dineʼé éí Abímelek yindahazʼą́.
24 Áko Jerabéíyal biyeʼké tsostsʼidiinígíí yichʼįʼ tʼóó báhádzidígi ádáátʼįįd áádóó hakʼisóó naaztseedii bidiłígíí Abímelek hakʼi didootʼááł, índa Shííkem dineʼé háká ííjéeʼgo hakʼisóó neistseedígíí ałdóʼ yikʼi deididooʼááł.
25 Áko Shííkem dineʼé éí diné haa nidahidooʼnahígíí dziłghą́ąʼdi nideiznil. Ákǫ́ǫ́ chʼídahakáhígíí ałtso yighanídaʼiiʼnił, áko éí bee Abímelek hoł hóóneʼ.
26 Áko Ébed biyeʼ Géíyal hakʼéí bił Shííkem kin haalʼáágóó jíkai, índa Shííkemdóó dineʼé tʼáá íiyisí haa deidzólí.
27 Ákohgo dáʼákʼehgóó chʼídahaaskaigo bichʼil naʼatłʼoʼii áłah ádayiilaa áádóó chʼil naʼatłʼoʼii bitooʼ yąąh hadayiizniiʼgo ídaʼíísįįd; bidiyin bidiʼníinii dílzinii bikin góneʼ yah aakaigo daʼííyą́ą́ʼ áádóó daʼoodlą́ąʼgo Abímelek hóyéeʼgo yá hadaasdzííʼ.
28 Áko Ébed biyeʼ Géíyal ázhdííniid, Abímelekshąʼ haʼátʼíí jílı̨́? Shííkem dineʼé daniidlíiniishąʼ haʼátʼíí niidlı̨́įgo Abímelek há nideiilʼaʼ? Doósh Jerabéíyal biyeʼ jílı̨́į da? Doósh Zííbal há naalʼaʼ da? Shííkem dineʼé bizhéʼé nilíinii Héímor bá nidaałʼaʼ. Ákoshąʼ haʼátʼíí biniyé há nideiilʼaʼ?
29 Díí diné shílákʼee sinil leʼ nisin. Ákótʼéego Abímelek nahjįʼ kóhodeeshłííł, áádóó Abímelek ííłní, Nisiláo ląʼí áníléehgo nihichʼįʼ nídiibááh.
30 Áko kin haalʼáádóó naatʼáanii jílíinii Zííbal joolyéii éí Ébed biyeʼ Géíyal bizaad baa hozdiiztsʼą́ąʼgo bikʼee háhóóchįįd.
31 Áko tʼáá nahontʼinee Abímelek bichʼįʼ naalʼaʼí adziisʼaʼgo ájíní, Shoo, Ébed biyeʼ Géíyal bikʼéí yił Shííkem kin haalʼáajįʼ yíkai, áko kin haalʼáagi tsʼídá ditą́ągo nichʼą́ą́h ahééʼítłʼingo áyiilaa.
32 Éí bąą kʼad, díí tłʼééʼ nílááh yínááł; diné nił naakaígíí bił halgaidi baa hínóhjééʼ.
33 Ákohgo tʼah abíínígo jı̨́honaaʼéí tʼóó hááyáhígo nídidoohjahgo kin haalʼáhígíí bikʼi dah doohjahgo diné yił naakaígíí nihá hashjadaʼdoolíiłgo tʼáá nínízinígi átʼéego atídadíílííł.
34 Áko éí bitłʼééʼ Abímelek índa diné hoł naakaígíí tʼáá ałtso nídiijéeʼgo tʼáá nahontʼinee nizhnínáago Shííkem kin haalʼáhígíí dı̨́ı̨́ʼdę́ęʼgo baa nijiyeekai.
35 Áko Ébed biyeʼ Géíyal dashdiiyáago kin haalʼáhí yah aʼatiinígi dzizı̨́, áádóó Abímelek índa diné bił naakaígíí aa niheekai yę́ędóó nídiijééʼ.
36 Áko Ébed biyeʼ Géíyal éí diné dziiłtsą́ągo Zííbal ábizhdííniid, Shoo, dziłghą́ą́ʼdę́ę́ʼ diné hadah deíjeeh. Áko Zííbal ánááhodooʼniid, Dził bichahaʼohígíí diné nahalingo yíníʼı̨́ı̨́ lá!
37 Géíyal hanáánáádzíiʼgo ání, Jó, kéyah ałnííʼdę́ę́ʼ diné deíjeeh, áko tʼááłáhígo dah náánááʼnéłígíí éí Míyon-íínim hóteeldę́ę́ʼ deíjeeh.
38 Ákohgo Zííbal áhodííniid, Háájíshąʼ ádííníniid yę́ę silı̨́įʼgo ádíní, Abímelekshąʼ haʼátʼíí jílı̨́įgo há nideiilʼaʼ dooleeł? Díí diné niʼínígíísh ádaatʼı̨́? Kʼad nílááh, bił daʼahígą́.
39 Áko Géíyal éí Shííkem dineʼé yinááł dah diiyáago Abímelek bisiláo yił daʼahoogą́ą́ʼ.
40 Áko Abímelek dah hodíníiłchą́ą́ʼ áádóó bikʼee yóóʼazhnííchą́ą́ʼ, índa tʼáá níléí yah aʼatiinjįʼ tʼóó ahayóí bikʼeh dazdeesdlı̨́įʼgo tídazhdiilaa.
41 Áko Arúmah hazʼánígi Abímelek kééhojitʼı̨́, índa Zííbal éí Géíyal áádóó bikʼisóó tʼáá bił chʼínizhníłkaadgo doo Shííkem kin haalʼáagi kénáádahatʼı̨́į da.
42 Áádóó éí biiskání halgaigóó nidaaskaigo Abímelek yił dahoolneʼ.
43 Áko hasiláo ałtsʼájíínilgo táaʼgo dah yinéełgo halgaigi bił baa nijiyeekai, áádóó jidééʼı̨́įʼgo kin haalʼáádóó diné chʼídahaazhjéeʼii áadi dziiłtsą́, áko náhizhdiitahgo bichʼįʼ jiyeedzáago ałtso nidzistseed.
44 Abímelek áádóó hoł dah yinéłígíí bił kin haalʼáhígi yah eʼetiinígi nizhníjéeʼgo naakigo dah yinéłígíí halgaijįʼ chʼíheezhjéeʼii bikʼi dah jizhjéeʼgo ałtso nidadzistseed.
45 Áko éí bijı̨́ shá bíighah kin haalʼáagi Abímelek bił daʼahijigą́ągo kin haalʼáagi hakʼeh deesdlı̨́ı̨́ʼ áádóó diné ałtso neistseed, áko kin haalʼáii naaʼadadziiskaadgo ákwii áshįįh nihidadziiskaad.
46 Shííkem kin yaaʼáhídóó diné tʼáá ałtso díí deidiiztsʼą́ąʼgo bidiyin Bíírith wolyéii bikin niłdzilgo siʼą́ągo yiyaa aheezhjééʼ.
47 Éí bee Abímelek bił hóóneʼ; Shííkem kin haalʼáagi kin bidziilgo yaaʼáhígi diné tʼáá átʼé áłah silı̨́ı̨́ʼ lá, hodooʼniid.
48 Áko Abímelek éí Dził Zálman siʼánígóó haayá; diné hoł naakaígíí ałdóʼ áajįʼ bił hadziskai, áko Abímelek éí tsénił nízhdiiʼą́ągo tsin bitsʼádaozʼaʼ kʼídziisneʼgo hawosgi dah dziznil. Áko diné hoł naakaígíí ábizhdííniid, Tʼáá dashoohʼı̨́įgo íisdzaaígi átʼéego tsı̨́įłgo nihí ałdóʼ ákódaahtʼı̨́.
49 Diné tʼááłáʼí nítínígo atsʼáozʼaʼ dayiisneʼgo Abímelek yikééʼ dah diikai; kin niłdzilgo hazʼáníjįʼ nidayiizhjaaʼgo kin yiih dahodeeznilgo Shííkemgi kin yaaʼáhígi diné tʼáá ałtso daneezná; tʼááłáhídi mííl daatsʼí diné áádóó asdzání daneezná.
50 Ákohgo Abímelek éí Thííbez kin haalʼáágóó dashdiiyáago Thííbezgi kéédahatʼíinii binijíznáago bikʼeh dazdeesdlı̨́ı̨́ʼ.
51 Nidi éí kin haalʼáhígi kin bidziilgo yaaʼáhí hólǫ́ǫ́ lá, áko éí kin haalʼáhídóó diné índa asdzání áajįʼ adahineezhchą́ąʼgo ádá daʼdeeskaal, áko kin yaaʼáhígíí bighą́ąʼjįʼ hahaazhjééʼ.
52 Áádóó Abímelek éí kin yaaʼáhíjįʼ ajííbaaʼgo bił daʼahijoogą́ą́ʼ áádóó kin yaaʼáhígíí bidáádílkał biih hozhdidoonił biniyé baatįįh jííyá.
53 Áko asdzání léiʼ tsédaashchʼíní nitsxaii yee Abímelek yitsiitʼáá iidzííłneʼgo bitsiitsʼiin sitsʼil.
54 Ákohgo dinééh éí bee naʼabaahii há neijaahii ábijiní, Nidiltłish hahíłhango bee shiyíłhé, áko, Asdzání hwiisxı̨́ı̨́ lá, doo dadidooniił da. Áko dinééh éí diltłish haníkáiníłgeedgo dadziztsą́.
55 Áko Ízrel dineʼé éí Abímelek daaztsą́ągo dayiiłtsą́, índa tʼáá ałtso bighangóó anídahaaskai.
56 Kótʼéego Abímelek doo yáʼáshónígi ájíítʼįįdígíí Diyin God kʼééhodiidlaa; jó, hazhéʼé bitsʼą́ą́ʼ hakʼis tsostsʼidiingo nidzistseedgo bąą ákóhoolaa.
57 Áko Shííkem dineʼé tʼáá ádzíłtso doo yáʼáshónígi ádajíítʼįįdígíí Diyin God kʼééhodiidlaa, índa Jerabéíyal biyeʼ Jótham hóyéeʼgo há haadzíiʼii hakʼijįʼ silı̨́ı̨́ʼ.
