Lamentations 1:1-22
Záíyan biʼdisnáago yínííł nilı̨́
1 Dooládóʼ kin haalʼáii diné tʼóó ahayóí kééhatʼı̨́ı̨́ nítʼééʼ yę́ęgi doo naagháhí da hazlı̨́ı̨́ʼ! Dooládóʼ bąąh áhásdįįdii dzizlı̨́įʼ da! Dadineʼé bitahgi ayóó átʼéii jílı̨́ı̨́ nítʼééʼ yę́ę hakéyah hadahwiisdzogóó asdzą́ą́ naatʼááh jílı̨́ı̨́ nítʼééʼ yę́ę, dooládóʼ náánáłaʼ hwee ádíhólníihgo bichʼįʼ niʼjiilée da!
2 Tłʼéeʼgo yéego yicha; yił ałchʼįʼ dah daalwoʼii bitahgi tʼáadoo hahoʼayółníhígóó haniitsįʼ bąąhdę́ę́ʼ hanákʼeeshtoʼ nidaazlı̨́; hakʼis danilíinii tʼáá ałtso hakʼijįʼ daazlı̨́įʼgo hweʼanaʼí daazlı̨́ı̨́ʼ.
3 Júdah dineʼé bichʼįʼ nidahwiiʼnáago áádóó naalteʼ daazlı̨́įʼgo tʼah yówehgo dabiʼdisná; ałʼąą dineʼé bitahgóó kéédahojitʼı̨́įgo hááʼáyı̨́ı̨́h há ádin áádóó atídahałʼínígíí tʼáá ałtso łah hontʼéhígi jideesdeeʼgo dahasnááh.
4 Záíyangóó daʼnítiingóó diné atínídadindleeh, háálá hodílzingo áłah nídaʼadleehíjįʼ doo łaʼ yígháhí da; yah adaʼiiztiinígóó doo nidaagháhí da, índa há náádaʼiiłniihii danilíinii ádił hadahadzoołgo áádóó chʼikéí danilíinii yínííł yił nidaakaigo tʼáá íiyisí hajéí yineesgai.
5 Hatsʼą́ą́jí danilíinii éí hananitʼaʼí daazlı̨́ı̨́ʼ; hweʼanaʼí kʼeeʼąą dadeeshzhiizh, háálá ląʼídi niʼdziisíʼígíí biniinaa Bóhólníihii hachʼįʼ hodiisʼnááʼ; ákótʼéego hweʼanaʼí bilą́ąjįʼ haʼáłchíní deisnáago deinééłkaad.
6 Záíyan bichʼéʼé yee baa dzólníí nítʼééʼ yę́ę ałtso bitsʼą́ąjįʼ kódzaa índa binanitʼaʼí danilíinii éí bįįhkąʼ deidoołchoshii chʼééh hadeintá nidahalingo bidiyoołhéełii yilą́ąjįʼ doo dabidziilgóó adahineezhchą́ą́ʼ.
7 Jerúsalem kin haalʼáádóó dineʼé biʼanaʼí yílákʼee níídeeʼgo tʼáadoo łaʼ háká eelwodí da áádóó hachʼįʼ nahwiiʼnáago bikʼee haaʼí shı̨́ı̨́ doo nijighááhgóó ałkʼidą́ą́ʼ yáʼátʼéehgo hoł áhootʼéé nítʼééʼ yę́ę bééjoolniiʼ; hatsʼą́ą́jí danilíinii* dahoołtsą́ągo hachʼįʼ nahwiiʼnánígíí tʼóó yee há nidahastʼiʼ.
8 Jerúsalemgi kéédahatʼíinii tʼáá íiyisí ádił daʼdzisiihgo bąą doo daʼjílı̨́į da dzizlı̨́ı̨́ʼ; bił jílı̨́ı̨́ nítʼééʼ yę́ę tʼáá ałtso dahaʼı̨́ daazlı̨́ı̨́ʼ, háálá haʼééʼ ádingo dahoołtsą́; tʼáá aaníí, ádił háádzídzołgo bitsʼąą dashdiiyá.
9 Tʼóó baaʼihígi ájíítʼįįdii éí haʼééʼ bikʼi sinilgo bee há nihonítʼiʼii tʼáadoo bikʼísízníłkéez da; éí bąą doo shóhootʼéedi nihoníłtʼeʼgo háká adoolwołii ádin nítʼééʼ. Bóhólníihii nílíinii, shichʼįʼ nahwiiʼnánígíí níníłʼı̨́, háálá anaʼí ádaa hasʼnih.
10 Hatsʼą́ą́jí nilíinii hanaalyeʼé daʼílíinii tʼáá ałtso néidiinil. Hanahaghaʼ bá hazʼą́ góneʼ ałʼąą dineʼé yah aheeskai; éí naa áłah néidleehgi doo nihitah hidookahgóó bee nihá háínídzííʼ nítʼééʼ.
11 Hadineʼé tʼáá ałtso ádił háádaadzoł; chʼiyáán hadeintá; yee dabidziil doo biniyé binaalyeʼé daʼílíinii chʼiyáán yikʼéndayiinííł. Níníłʼı̨́, Bóhólníihii nílíinii, áádóó baa nitsíníkees, háálá tʼáadoo biniyéhígóó naashá sélı̨́ı̨́ʼ.
12 Tʼáá ánółtso shą́ą́h nídadohkahii, daʼ doósh nihidaʼdiiłʼáa da? Shoo, Bóhólníihii tʼóó báhádzidgo hashké nídzingo shichʼįʼ hodiisʼnáʼígíí éí yínííł shikʼi yayiiyínígi átʼéegoósh haaʼída yínííł náádaahʼı̨́.
13 Wótʼááhdę́ę́ʼ shitsʼin biiʼjįʼ kǫʼ yiʼníłniiʼgo shikʼeh deesdlı̨́ı̨́ʼ; shidááhgóó biih dideeshtałii neineesdizgo tʼą́ą́ʼ kónáshiidlaa; shinaagi doo naagháhígóó áshiilaago shá bíighah doo shidziilgóó iʼiiʼaah.
14 Bee hazʼáanii hétiʼii éí yishbizhgo ałkʼístasgo shizéédéeláago áádóó doo shidziilgóó áshiilaa. Bóhólníihii éí shiʼanaʼí doo bílákʼee haoshaʼ átʼéii yílákʼee shidííʼą́.
15 Kééhashtʼı̨́ binííʼdóó Bóhólníihii éí diné dabidziilii shitsʼą́ą́ʼ yikʼi naayá áádóó shitsíłkéí éí dabidiʼdooljish biniyé dadineʼé áłah áyiilaa; Júdah bitsiʼ chʼikę́ę́h nilíinii chʼil naʼatłʼoʼii yiljizhígi átʼéego Bóhólníihii hashjizh.
16 Díí biniinaa yishcha; tʼáá íiyisí shinákʼeeshtoʼ náálı̨́, háálá shíká adoolwołii doo deeghánídi shitsʼą́ądi hólǫ́; anaʼí bikʼeh dadeesdlı̨́įʼgo biniinaa shaʼáłchíní tʼáá ádzaagóó chʼéékai.
17 Záíyan kʼídeeshchidgo doo łaʼ habiʼiyółníhí da. Jéíkab bídéétʼiʼgo Bóhólníihii haadzííʼ; hweʼanaʼí danilíinii honásʼáa doo. Jerúsalem éí hatahgi asdzání ąądii nilı̨́ nahalin.
18 Bóhólníihii éí tʼáá ákogi átʼé; jó, bibikʼeh óʼooʼníiłii bikʼijįʼ naasdzil. Ánihidishní, dineʼé tʼáá ánółtso daʼíísółtsʼą́ąʼgo yínííł nishłínígíí danółʼı̨́; shichʼeekęʼí tʼah doo diné bee haleehii áádóó shitsíłkéí ałtso dabiʼdisnááh.
19 Bił ałchʼįʼ dah daashwoʼii hágo bidííniid, nidi éí shindaʼazloʼ; shá náádaʼiiłniih nítʼééʼ yę́ę índa aląąjįʼ naazı̨́ı̨́ nítʼééʼ yę́ę kin haalʼáágóó chʼiyáán bee dahadziil dooleełii chʼééh hadazhnitáago dichin dahóóghą́ą́ʼ.
20 Shoo, Bóhólníihii nílíinii, yéego shichʼįʼ nahwiiʼnáago shide áhootʼé; yínííł bikʼee shijéí neezgai, háálá tʼáá íiyisí nichʼįʼ nisisdzil. Tłʼóóʼgóó diltłish bitsʼą́ą́dóó yínííł hólǫ́; dahooghan góneʼ bikʼee daʼdootsaałii hólǫ́.
21 Ádił hanásdzołgo dashidiiztsʼą́ąʼgo tʼáadoo hashiʼiyółníhí da. Shichʼįʼ nahwiiʼnáago shiʼanaʼí tʼáá ałtso yaa dahodiiztsʼą́ą́ʼ; ákótʼéego íinilaaígíí yaa bił dahózhǫ́. Baa hodoolzhishígíí baa chʼíhwííníʼánígíí baa honíyáago tʼáá shígi ádajítʼée doo.
22 Bíniʼdii doo yáʼáshǫ́ǫ́góó ádadziidzaii nidáahgi hólǫ́ǫ doo, índa tʼáá shí bee hazʼáanii hétiʼii biniinaa áshiinilaaígi átʼéego áhólééh, áko ádił hahasdzoołii tʼóó ahayóigo bikʼee shijéí bąąh nahóókaad.
Footnotes
^ Bábilan dineʼé ááhyiłní.
