Lamentations 2:1-22
Bóhólníihii éí Záíyan yínííł nilı̨́įgo ííłʼı̨́
2 Dooládóʼ Bóhólníihii báhóóchįįdígíí kʼosgi átʼéego Záíyan* bichʼéʼé bikʼi diilkǫʼ da áádóó Ízrel dineʼé yee baa dzólníí nítʼééʼ yę́ę yáʼąąshdę́ę́ʼ hadah ahoolghan da índa Bóhólníihii báhóóchįįdígíí biniinaa bibikʼi dah adéesʼeezii doo yénáálniiʼ da!
2 Bóhólníihii éí doo aa aʼááh niizı̨́ı̨́ʼgóó Jéíkab dineʼé kéédahatʼı̨́ı̨́ nítʼééʼ yę́ęgi ałtso éʼésdįįd, índa báhóóchįįdgo Júdah bitsiʼ yineʼ naadziʼ yę́ę ałtso naaʼayiistłʼííd, áádóó óhólníihgo hazʼą́ą́ nítʼééʼ yę́ę índa binanitʼaʼí danilı̨́ı̨́ nítʼééʼ yę́ę ałtso yiyííłchxǫʼ.
3 Báhóóchįįdígíí bee bił halchxíiʼgo Ízrel dineʼé yee bidziil yę́ę ałtso yiyííłchxǫʼ índa bílaʼ nishʼnáájí yee doo anaʼí yichʼą́ą́h nideelniiʼ da áádóó Jéíkab bikéyahgi kǫʼ óʼoołdįįłii nahalingo tʼáá ałtsogóó tʼáá ałtsoní íísdįįd.
4 Anaʼí nahalingo beʼełtı̨́ı̨́ʼ yiyiiłtaaz; anaʼí nahalingo bílaʼ nishʼnáájí yidineeshjołgo yiizįʼgo dabíiyisii danílʼíinii tʼáá ałtso yiyííghą́ą́ʼ; Záíyan bichʼéʼé biníbaal biiʼ kǫʼ nahalingo tʼóó báhádzidgo bibee atíʼélʼíinii hadíínáád.
5 Bóhólníihii éí anaʼígi átʼé; Ízrel dineʼé ałtso íísdįįd áádóó binanitʼaʼí dabikin ałtso íísdįįd áádóó bineʼ naʼadziʼgo bił nahazʼáanii yę́ę ałtso íísdįįd índa Júdah bitsiʼ atínídadindleehgo daachaígíí kʼeeʼąą yilzhishgo áyiilaa.
6 Dáʼákʼeh hojiłdééh nahalingo bikin biiʼ sohodizinę́ę tʼáá naʼníleʼdii íísdįįd; Bóhólníihii éí Záíyangi hodílzingo áłah náʼádleeh yę́ę áádóó hááʼáyı̨́ı̨́h jı̨́ yę́ę doo béédajilniihgóó áhoolaa índa yéego báhóóchįįdígíí bee aláahgo naatʼáanii áádóó náádaʼiiłniihii danilı̨́ı̨́ nítʼééʼ yę́ę yá nihwiizʼą́.
7 Bóhólníihii bidiyingo hazʼą́ yę́ę yaa iih niizı̨́įʼgo bibikááʼ nááʼiiniih yę́ę yóóʼiidííʼą́. Aláahgo naatʼáanii bikin bináʼástłʼinii anaʼí yeidiníʼą́; hodílzingo áłah náʼádleeh yę́ęgi átʼéego Bóhólníihii bikin biiʼ sohodizin biyiʼ hahóóʼá.
8 Bóhólníihii éí Záíyan bichʼéʼé ditą́ągo binaa ahééʼítłʼinii íidoołdįįłgo yinahazʼą́. Yídaʼnééłʼąądígíí bikʼehgo bílaʼ yee íʼdoołdįįłgo tʼáadoo ánéísįįdígíí bąą bineʼ naʼadziʼii áádóó tsé ahénátłʼinii yichago yínííł nilı̨́įgo áyiilaa.
9 Hadáńʼdaʼdítı̨́ı̨́h yę́ę łeeh daaskai; bichʼą́ą́h dáńʼdaʼdilkał yę́ę niyiiztiʼgo niyiishchxǫʼ; aláahgo hananitʼaʼí nilíinii áádóó binaatʼáanii danilíinii ałʼąą dineʼé bitahgóó dabiʼdisná; bee hazʼáanii doo nááhódlǫ́ǫ da áádóó áhodooníiłii yaa dahalneʼii éí Bóhólníihii bitsʼą́ą́dóó doo bił ádahatʼı̨́į da.
10 Záíyan bichʼéʼé bił hazʼánídóó hastóí danilínígíí niʼgóó tʼáadoo íitsʼaʼí nidaháaztą́; tłʼoh yishbizh dabiʼéeʼgo łeezh bitsiiʼjįʼ yikʼídayiiskaad* áádóó Jerúsalem kin haalʼáádóó chʼikéí danilíinii niʼjįʼ yaa adaneesʼą́.
11 Yishchaígíí bikʼee shinááʼ chʼééh deezhʼáázh; shiyiʼdi tʼáá íiyisí bichʼįʼ nahwiiʼnáago yínííł nishłínígíí tó nahalingo niʼjįʼ náálı̨́, háálá shidineʼé bichʼéʼé ábiʼdisdįįd áádóó kin haalʼáagi áłchíní yázhí índa awééʼ nidahoneełʼąąh.
12 Kin haalʼáagi nidaʼaztiingóó diné atídabiʼdiilyaii nahalingo bimá dah dabíjáahgo nidahoneełʼąąhgo bimá ádeiłní, Háadiyeeʼ tłʼoh naadą́ą́ʼ índa wáin łaʼ hólǫ́?
13 Jerúsalem bichʼéʼé nílíinii, haʼátʼíí lá bił aheníłtʼéego naa chʼíhodeeshʼááł? Záíyan bichʼikę́ę́h nílíinii, haʼátʼíí lá bił ahąąh nindeeshniłgo handiʼyeeshnih lá? Tónteel áníłtélígi átʼéego nichʼįʼ ayééchǫʼgo háísh hadaałtʼé ánándoodlííł?
14 Áhodooníiłii yaa dahalneʼígíí doo tʼáá aaníígóó bił ádaadzaii índa tʼáá ádzaaí átʼéego nił chʼídahazʼą́; doo ákwii ádaotʼįįdii tʼáadoo yáádaʼdééłtsoozgóó niʼdisnánígíí bitsʼą́ąjįʼ tʼáadoo kódaniilaa da, nidi yee nił dahoolneʼígíí éí doo tʼáá aaníígóó bił ádaadzaii átʼé.
15 Tʼáá ałtso ną́ą́h nídadikahígíí tʼóó ná nidahałtʼiʼgo nichʼįʼ ahídaakad, áádóó bitsiitsʼiin deiłneʼgo Jerúsalem bichʼéʼé yichʼįʼ ídaʼdiłtsʼǫǫs kódaaníigo, Kin haalʼáii ayóó ánóolninii hadaałtʼéii áádóó, Nahasdzáán tʼáá siʼą́ą́ nítʼééʼ dadineʼé yaa bił dahózhóní wolyéii, daʼ díísh éí átʼé?
16 Niʼanaʼí tʼáá ałtso nichʼįʼ nidahidilgháashgo biwooʼ ahídeidiłkʼashgo nichʼįʼ ídaʼdiłtsʼǫǫs kódaaníigo, Ádahosiildįįd; tʼáá aaníí, díí baa hodoolzhishígíí bíká dadíníitʼı̨́ı̨́ʼ nítʼééʼ; kʼad baa honíyáago danéelʼı̨́ı̨́ʼ.
17 Bóhólníihii yinahazʼáanii yiʼiilaa; áhodoolíłígíí ałkʼidą́ą́ʼ yee haadzíiʼii áyiilaa; doo nikʼédí nilı̨́ı̨́góó ánísdįįd; niʼanaʼí danilíinii naa bił dahózhǫ́ǫgo áyiilaa índa nitsʼą́ą́jí nilíinii bidziil yee ádaa dahaʼniihgo áyiilaa.
18 Bóhólníihii yichʼįʼ diné bijéí yéego daachago ádaaní, Záíyan bichʼéʼé ditą́ągo binaa ahééʼítłʼinii nílíinii, bíniʼdii ninákʼeeshtoʼ tooh nahalingo shá bíighah áádóó tłʼééʼ bíighah náálı̨́į leʼ, doo háánílyı̨́ı̨́hgóó ánósin leʼ índa ninákʼeeshtoʼ doo áhodiilzéeh da leʼ.
19 Nídiidáahgo tłʼéeʼgo yéego hááníchah; hiłiijı̨́įhgo Bóhólníihii bidáahjįʼ tó háálı̨́ nahalingo nijéí biyiʼdóó ádił háánídzoł; kintah hadaʼiiztiin tʼáá ałtsogóó naʼáłchíní yázhí dichin yikʼee nidahoneełʼąąhígíí bá Bóhólníihii bichʼįʼ dah didiilnííh.
20 Shoo, Bóhólníihii nílíinii, díí kwíinilaaígíí baa nitsíníkees. Daʼ sáanii baʼáłchíní dah deíjáhígíísh nídeidoolghał? Daʼ Bóhólníihii bikin biiʼ hodiyin góneʼésh náádaʼiiłniihii índa áhodooníiłii yaa dahalneʼii nidadooltsxił?
21 Kintah daʼnítiingóó ániid nidaakaígíí índa hadaastihii naazhjééʼ; nichʼeekęʼí índa nitsíłkéí éí diltłish bee nidabiʼdiztseed; náhóóchįįd yę́ędą́ą́ʼ yíníghą́ąʼgo doo bikʼédí nílı̨́ı̨́góó nidasíníłtseed.
22 Hodílzingo áłah náʼádleehjįʼ diné bidaʼasniiʼígi átʼéego tʼáá ałtsodę́ę́ʼ báádahadzidii shikʼijįʼ biʼiyíníłniiʼ, áko Bóhólníihii báhóóchįįd bijíní góneʼ doo łaʼ yóóʼanííchą́ąʼ da, doo nidi łaʼ yidzíiʼ da; bił nídaʼiisdis yę́ę índa danísą́ yę́ę* shiʼanaʼí ałtso ádabisdįįd.
Footnotes
^ Jerúsalem kin haalʼá ááhyiłní.
^ Achʼįʼ nahwiiʼnáago atínídindleeh bee ééhózinii.
^ Jerúsalem kin haalʼáagi kéédahatʼínígíí ááhyiłní.
