Lamentations 3:1-66
Diyin God bibee aa aʼááh hasinii binahjįʼ chohooʼı̨́
3 Shíyeeʼ tʼóó báhádzidgo báhóóchįįdgo bigish yee atíʼéłʼínígíí yiiłtsą́.
2 Chahałheeł biiʼ yisháałgo áshiilaa, adinídíinjįʼ éí dooda.
3 Tʼáá aaníí shikʼijįʼ silı̨́ı̨́ʼ; shá bíighah bílaʼ yee atínáshiilʼįįhgo eʼeʼááh.
4 Shitsįʼ áádóó shikágí haastihgo áyiilaa; shitsʼin niyiiztiʼ.
5 Shikʼijįʼ aztłʼin áádóó yínííł índa adiniihgo achʼįʼ nahwiiʼná shináhaazlá.
6 Ałkʼidą́ą́ʼ daneeznánígi átʼéego chahałheełgi nishiníłtı̨́.
7 Shináʼázʼáago béésh daʼahólzhaʼí nidaazii shąąh niinínilgo biniinaa doo haoshaʼ átʼée da.
8 Áádóó ałdóʼ yishcha índa dishwoshgo shisodizin doo shá yidiitsʼaʼ da.
9 Yishááłgóó tsé hashtʼedaalyaaígíí yichʼą́ą́h yiztłʼin; sheʼatiin yę́ęgóó nahoneeshtłʼiizhgo áyiilaa.
10 Shash aa héestı̨́ nahalingo, doodaiiʼ náshdóítsoh nahontʼingi aa héestı̨́įgo sitínígi átʼéego shikʼijįʼ nilı̨́.
11 Tʼáá ádzaagóó yisháałgo áshiilaago nishiizhnizh índa shinaagi doo naagháhígóó áshiilaa.
12 Beʼełtı̨́ı̨́ʼ yiyiiłtaazgo kʼaaʼ bee doolkahii nishłı̨́įgo áshiilaa.
13 Kʼaayééł biyiʼdóó bikʼaaʼ yee shiyiʼ siláii yiskah.
14 Ałʼąą dineʼé tʼáá ałtso shá bíighah shaa daadloh áádóó shídaʼdíłʼaʼgo iʼiiʼaah.
15 Shił nihoołchʼiihgo áshiilaa áádóó chʼil díchʼíiʼii bitooʼ shiiyííłdlą́ąʼgo éí yee tsiʼshidiisááʼ.
16 Tsézéí yee shiwooʼ niyiiztiʼ índa łeeshchʼiih biiʼ shishjoolgo áshiilaa.
17 Shiiʼ sizíinii hashtʼehodítʼé tʼáá íiyisí bee ádingo ályaago yáʼátʼéehgo iinánígíí baa yisénah.
18 Áko ádíshní, Shidziil yę́ę áádóó Bóhólníihii bitsʼą́ą́dę́ę́ʼ shił chohooʼı̨́ yę́ę ásdįįd.
19 Shichʼįʼ nahwiiʼnánígíí índa shíniʼ łánígíí, chʼil díchʼíiʼii áádóó bitooʼ béénílniih.
20 Shiiʼ sizíinii ééjiilníihgo tʼáá íiyisí ádaa hojooshbáʼígo ánáshiilʼįįh.
21 Nidi díí bénáshniihgo bee shił chohooʼı̨́:
22 Bóhólníihii bibee ajoobaʼ doo ádįįh da; yee aa aʼááh nízinii doo nineełnéeh da.
23 Éí tʼáá ákwíí bíní ániidí náádleeł; naʼahódlíhígíí ayóó átʼé.
24 Shiiʼ sizíinii ání, Bóhólníihii éí shííʼ; éí bąą hwee shił chohooʼı̨́.
25 Bóhólníihii yibaʼ nidaakaii índa hahontáhígíí baa jijoobaʼ.
26 Bóhólníihii yee yisdáʼiiníiłii yíká diné bił chohooʼı̨́įgo áádóó hazhóʼógo yibaʼ hashtʼedítʼéego yáʼátʼééh.
27 Diné ániid naagháago bee bichʼįʼ nahwiiʼnánígíí yitsʼą́ą́dóó íhwiidoołʼáłígíí bá yáʼátʼééh.
28 Hachʼįʼ nahwiiʼnáago áhoʼdiilyaaígíí biniinaa bíniʼdii dzidéesxéelgo tʼáá sáhí dzizdáa doo.
29 Áádóó há chohooʼı̨́į dooleełgo bíniʼdii łeezh dibahí biishnoolʼą́.
30 Haniitsįʼ néididoołtsʼı̨́łígíí hániʼdii bá dashdíníitʼaah; tʼóó hánahatʼiʼgo bíniʼ hade ánééh.
31 Jó, Bóhólníihii doo hoolʼáágóó yóóʼiʼdidooʼáał da;
32 azhą́ yínííł yee tiʼayoołníih nidi, yee aa aʼááh nízinii tʼóó ahayóígíí bikʼehgo aa aʼáhí nízin doo.
33 Háálá doo íinízin da, nidi achʼįʼ nahwiiłná índa diné ahoolchíiłii yínííł yee tiʼyiyoołnííh.
34 Nahasdzáán bikááʼdóó awáalyaaí danilíinii tʼáá ałtso bikʼi naʼaldeehgo,
35 áádóó Aláahgo Ayóóʼátʼéii binááł diné bee bá hazʼáanii bitsʼą́ą́ʼ nahjįʼ kólyaago,
36 índa diné doo ákótʼéégóó baa hwiinístʼįįdgo éí Bóhólníihii doo bił yáʼátʼéeh da.
37 Bóhólníihii doo yee haadzíiʼiishąʼ háí yee hadoodzihgo áádóó bohodoolníiłgo yíneelʼą́?
38 Aláahgo Ayóóʼátʼéii haadzihgo tsʼídá yáʼátʼéehii índa doo yáʼátʼéehii bohoolnííł.
39 Diné ádił niʼdziihsíhígíí biniinaa atíhoʼdilʼı̨́įgo haʼátʼíísh biniyé saad hojíłǫ́ǫ doo.
40 Haaʼíyeeʼ baa nideiikaígíí hazhóʼó hanáádadiilziłgo bínáádadíníitah áádóó Bóhólníihii baa nínáádiikah.
41 Haaʼíyeeʼ Diyin God yáʼąąshdi hólóonii bichʼįʼ yadadidiilnihgo nihijéí bee bichʼįʼ atsídadiikos.
42 Bee hazʼáanii dahiitiʼgo nichʼįʼ nidasiilteeʼgo doo nihá yóóʼadííníʼą́ą da.
43 Náháchįʼígíí ákʼísíníłtiʼ; nanihiníłchéego tʼáadoo nihikʼédí sínílı̨́ı̨́ʼgóó nanihisíníłtseed.
44 Nihisodizin doo didootsʼı̨́įł da biniyé kʼos áchʼą́ą́h diniłkǫʼ.
45 Ałʼąą dineʼé bitahgi doo niidzı̨́įʼii áádóó yóóʼaheestłʼíidii daniidlı̨́įgo ánihiinilaa.
46 Nihiʼanaʼí danilíinii tʼáá ałtso nihikʼijįʼ yéego hadaasdzííʼ.
47 Náhádzidii áádóó aʼáán díníidahii índa yíchǫʼii áádóó áʼdoodįįłii nihikʼiitʼiʼ.
48 Shidineʼé bichʼéʼé ábiʼdisdįįdígíí biniinaa shinákʼeeshtoʼ náálı̨́.
49 Shinákʼeeshtoʼ doo bitaʼ hooʼaahgóó doo áhodiilzééhgóó náálı̨́.
50 Bóhólníihii yáʼąąshdę́ę́ʼ nihinééłʼı̨́įʼjįʼ ákóníshtʼée doo.
51 Shikin haalʼáádóó bichʼéʼéké ábiʼdilʼínígíí yishʼı̨́įgo biniinaa shijéí yineesgai.
52 Shiʼanaʼí danilíinii tʼáadoo biniinaanígóó tsídii nanché nahalingo nidashineeshchą́ą́ʼ.
53 Tʼáá hinishnáago aʼáán góyaa adashiisxango tsé shidadeideezʼą́.
54 Shitsiitsʼiin biláahgo tó néésʼąądgo ádíshní, Kʼad lą́ą, shá nahonítʼiʼ niʼ.
55 Bóhólníihii nílíinii, aʼáán góyaadę́ę́ʼ nííníshíigo nichʼįʼ sodeeszin.
56 Nichʼįʼ sodiszingo shiinééʼ disínítsʼą́ą́ʼ: nichʼįʼ yishchago tʼáadoo jéʼáhodílkałí.
57 Nichʼįʼ ádííniid yę́ę bijı̨́ áháníjįʼ shichʼįʼ nihwííníleʼgo áshidííníniid, Tʼáadoo nił yéʼí.
58 Bóhólníihii nílíinii, shichʼįʼ nahwiiʼnáago shá baa nísínítʼįįdgo shikʼé nináʼíínídlá.
59 Bóhólníihii nílíinii, doo ákǫ́ǫ́ áshiʼdiilyaaígíí yiniłtsą́; éí bąą shá baa nánítʼįįh.
60 Kʼéédahodidiilnííł danízinii índa doo yáʼáshǫ́ǫ́góó shindahaʼáii tʼáá ałtso yiniłtsą́.
61 Bóhólníihii nílíinii, shándahałtʼiʼgo áádóó doo yáʼáshǫ́ǫ́góó shindahaʼáago tʼáá ałtso disínítsʼą́ą́ʼ;
62 shichʼįʼ nídiikaii shikʼijįʼ yádaałtiʼígíí áádóó shá bíighah doo yáʼáshǫ́ǫ́góó shindahaʼáii disínítsʼą́ą́ʼ.
63 Naazdáago, doodaiiʼ naazı̨́įgo níníłʼı̨́; shídaʼdiłʼaʼ.
64 Bóhólníihii nílíinii, yaa nidaaskaii bikʼé kʼéédabidídleʼ.
65 Bijéí doo binídahazʼáágóó ádanileʼ índa hóyéeʼgo bá handziih.
66 Náhóóchįįdígíí bee atíníléehgo Bóhólníihii biyótʼááh hiníláii biyaagi áníłdįįh.
