Lamentations 4:1-22
Záíyan atílyaii łaʼidzaa
4 Dooládóʼ óola doo bikʼizdiidíin da silı̨́ı̨́ʼ índa óola bąąh hadoolyı̨́įʼii łahgo ádzaa! Diyingo hazʼánídóó tséhígíí kintahgi dah daʼdiitiingóó nidadeeztąąd.
2 Záíyan biyáázhké ílíinii, óola ąąh hadoolyı̨́įʼii bíighahgo daʼjílíinii dooládóʼ kʼad hashtłʼish ásaaʼ ádeiłʼíinii ádabiilaago baa nitsáhákees da!
3 Mąʼii nidi biyázhí yidaʼiiłtʼoʼ, nidi shidineʼé bichʼéʼé éí honoojíidi tsídii ástrich wolyéii doo tsʼííd átʼéégóó atíʼéłʼínígi átʼéego atíʼéłʼı̨́ silı̨́ı̨́ʼ.
4 Awééʼ daʼałtʼoʼii dibááʼ biʼniighánígíí biniinaa bitsooʼ bizaatʼáajįʼ bídaashjah; áłchíní éí bááh dayókeed nidi, doo baʼíłtsódí da.
5 Ałtaaskąądí deiyą́ą́ nítʼééʼ yę́ę kintah daʼnítiingóó dichin biʼniighą́ą́ʼ; ééʼ tsídídééh nahalingo łichíʼígíí dabiʼéeʼgo dabidiʼneesą́ yę́ę tsʼiilzéí nehegeehígi naazhjééʼ.
6 shidineʼé bichʼéʼé éí Sádam kin haalʼáagi diné kéédahatʼı̨́ı̨́ nítʼééʼ yę́ę yiláahgo ádił asiih. Éí diné yę́ę jishgishígíí nahalingo tʼáadoo hodeelniiʼígóó áhoʼdisdįįd.
7 Ízrel bitahdóó Názarait wolyéii éí yas bilááh átʼéego doo bąąh daachiní da índa abeʼ biláahgo daalgai nítʼééʼ; dabitsʼíís éí tséłchíʼí biláahgo tʼóó daalchííʼ nítʼééʼ; tsé sáfair wolyéii nahalingo bídazdilid.
8 Kʼad dabiniiʼ éí jeełid tsʼídá biláahgo dadiłhił áádóó kintaa daʼaztiingóó nidaakaigo doo béédahózin da; dabikágí éí ahandaayáago bitsʼin bídadiiłgango tsin nidahalin.
9 Dichin nidabistseedígíí biláahgo diltłish bee nidabiʼdiztseedjígo yáʼátʼééh, háálá éí dáʼákʼehdi nidantʼąʼii yíká dichin dabííghą́ą́ʼ.
10 sáanii aa aʼááh danízinii éí tʼáá bí badaʼáłchíní deishbéézh, áko shidineʼé bichʼéʼé atíbiʼdiilyaa yę́ędą́ą́ʼ éí bichʼiyąʼ daazlı̨́ı̨́ʼ.
11 Bóhólníihii báhóóchįįdgo yee atíʼéłʼíinii yee łaʼhoolaa; tʼóó báhádzidgo báhóóchįįdígíí yee atíhoolaago Záíyan kin haalʼáagi* deidííłjéeʼgo atłʼááh nástłʼinii yę́ę iidííłkʼą́ą́ʼ.
12 Jerúsalem bił yah adaʼiiztiindę́ę́ʼ Ízrel dineʼé yikʼijįʼ nilíinii áádóó biʼanaʼí nilíinii yah adahidoonéłígíí éí nihokááʼgóó aláahgo naatʼáanii danilíinii índa nihokááʼ dineʼé tʼáá ałtso ákóhodooníiłgo tsʼídá doo dayoodlą́ą da nítʼééʼ.
13 Ákondi ákódzaa, háálá áhodooníiłii yaa dahalneʼii índa náádaʼiiłniihii éí hatahgóó tʼáá ákogi ádaatʼéii nideistseedgo bidił dadeeznaʼgo éí yee ádił nidaʼiisííʼ áádóó doo ákwii ádáátʼįįd da.
14 Biʼééʼ dił bee dááchǫʼgo diné bidadidoolchiłgi béédaaldzidgo kintahgi daʼnítiingóó doo daʼooʼı̨́į da nidahalingo tádadookai.
15 Éí diné ádeiłní, Tʼóó nihadaaʼih; yówehdi nidaohkai; nihidadoołchííd lágo; yówehdi nidaohkai, áko yóóʼaheezhjéeʼgo ałʼąą dineʼé yitahgóó tádadikáahgo diné ádaaní, Kǫ́ǫ́ doo nináádajikai da doo.
16 Bóhólníihii báhóóchįįdgo tahonooskaadgo doo haa náʼáhodíltʼı̨́į da; dadineʼé éí náádaʼiiłniihii índa hastóí á naazíinii doo bił dáálįįd da.
17 Nihíká aʼdoolwoł biniyé chʼééh dadíitʼı̨́įʼgo nihinááʼ chʼééh dadeeskai. Hadaʼiilzíidgo dineʼé łaʼ yisdádanihidooniłgo yídaneelʼáanii ádin.*
18 Nihikintaa daʼaztiingóó dadiikah yę́ęgóó doo nihá yáʼátʼéeh da, háálá nihaa héeshjééʼ. Nihá nidahwiiztʼiʼjįʼ áhą́dí hadziih; beiníłką́ lą́ą, háálá nihá nidahwiiztʼiʼjįʼ ahoolzhiizh.
19 Nidanihiniłchéii éí wótʼáahdi yá biyiʼ atsá nidaatʼaʼii biláahgo doo nidadilnaʼgóó dziłghą́ąʼdi nidanihiniłché, índa honoojíidi nihaa dahéeshjééʼ.
20 Bóhólníihii akʼah yikʼi yayiiziidgo yiyíísı̨́įʼii biniitʼaa dahiniiʼnáá nítʼééʼ yę́ę éí atídanihiłʼíinii bidaʼaʼáán góyaa íítłizh. Éí bee ałʼąą dineʼé bitahgóó dahiniiʼnáa doo, dadiiʼníí nítʼééʼ.
21 Nił nihoozhǫǫh áádóó nił hózhǫ́, Íídam bichʼéʼé nílíinii, Uz kéyahgi kééhótʼíinii; ni ałdóʼ bee adlání naa hodoołeełgo nídíʼníídlı̨́ı̨́ł áádóó niʼééʼ tʼáágééd nanináago ídiʼdíílnííł.
22 Záíyan bichʼéʼé nílíinii, nibąąhági átʼéii biniinaa atíniʼdilʼínígíí łaʼyidzaa; doo asʼahgóó yisnááh nílı̨́į da doo. Nidi ni, Íídam bichʼéʼé nílíinii, doo yáʼáshǫ́ǫ́góó ááníłígíí biniinaa atíndiʼdoolníiłgo doo ákwii íínítʼįįdii bééhodoozįįł.
