Lamentations 5:1-22
Aa aʼááh hasin bíká sohodizin
5 Bóhólníihii nílíinii, ánihiʼdoolʼįįdígíí béénílniihgo baa nitsíníkees, áádóó bee nihá nahatʼiʼígíí níníłʼı̨́.
2 Nihíiʼii éí déʼéyóní bichʼįʼ kólyaa, índa danihikin éí nízaadę́ę́ʼ nidaakaii bííʼ daazlı̨́ı̨́ʼ.
3 Áłchíní bizhéʼé ádaadinii dasiidlı̨́įʼgo nihizhéʼé ádaadin, danihimá éí bąąh ádahasdįįdii nidahalin.
4 Tó deiidlánígíí béeso bikʼé nidahiilyé, índa chizh nihichʼįʼ nidahaniih.
5 Nidanihiniłchéii nihikʼos kʼadę́ę dayiisił; chʼééh deekaigo doo háádeiilyı̨́įh da.
6 Chʼiyáán bee hwiih daniidlı̨́į doo biniyé Ííjip dineʼé áádóó Asíriya dineʼé biyaajįʼ niʼádadeeʼnil.
7 Danihizhéʼé yę́ę ádił nidaʼiiszííʼ, áádóó bikééʼ ádahasdįįdgo éí bikʼee tiʼdahwiiʼnííh.
8 Naalteʼ danilíinii nihindantʼáago doo łaʼ bílákʼeedóó háánihóʼníłí da.
9 Honoojíidi diltłish báhádzidígíí biniinaa chʼiyáán shódeidiiltʼeełjįʼ niheʼiinaʼ ninádahidiitʼaah.
10 Tʼóó báhádzidgo hodííchįįdígíí biniinaa atʼees biniyé hazʼání góneʼ hodiłhiłígi átʼéego danihikágí dadiłhił.
11 Záíyan kin haalʼáádóó sáanii áádóó Júdah dineʼé bikin hadaasʼáádóó chʼikéí bił nidaʼdiisdéél.
12 Naatʼáanii danilíinii bílaʼ bee dah dabiʼdiidloʼ, áádóó hastóí danilíinii doo bił dáálįįd da.
13 Tsíłkéí éí daʼjikʼáago ádahoʼdiilyaa áádóó ashiiké yázhí éí chizh bił nidazhnitʼigo nidajiiłjiid.
14 Hastóí danilíinii yah adaʼiiztiingóó aa dahwiinítʼı̨́įjįʼ ałnáádaakah yę́ę niʼ kódaadzaa índa tsíłkéí nidaʼdiʼaʼ yę́ę doo nidaʼdiʼaʼ da daazlı̨́ı̨́ʼ.
15 Nihijéí bił dahózhóonii doo átʼée da silı̨́ı̨́ʼ índa daʼazhish yę́ę tʼóó cha násdlı̨́ı̨́ʼ.
16 Naatʼá chʼah nihikʼeeltsʼid; dooládóʼ hojoobaʼ ániitʼée da; ádił daʼsiilziih lą́ą!
17 Díí bąą nihijéí bąąh nidahwiizkaadgo nihináʼoh nídahoobah.
18 Háálá Dził Záíyan* bąąh doo naagháhígóó biniinaa mąʼii tʼéí yąąh nidaakai.
19 Ni, Bóhólníihii nílíinii, hoolʼáágóó nanítʼá índa bikááʼdóó nahóʼáii hoolʼáádę́ę́ʼ áádóó ahóyéelʼáágóó hólǫ́.
20 Haʼátʼíísh biniyé hoolʼáágóó nihaidiyíínahgo asʼahgóó nahjįʼ ninihididííʼááł?
21 Áchʼįʼ kónanihídlééh, Bóhólníihii nílíinii, áko nichʼįʼ dah nídidiikah; ałkʼidą́ą́ʼ nihídayééłkaah yę́ęgi átʼéego ániidí ánánihídlééh.
22 Tʼahdiísh tʼáá íiyisí doo nihinínízin da? Tʼahdiísh tʼóó báhádzidgo nihichʼįʼ náháchįʼ?
Footnotes
^ Díí dził bighą́ąʼgi Jerúsalem kin haalʼá.
