Leviticus 1:1-17
1 Áádóó Bóhólníihii éí Mózes yíká ádííniidgo yichʼįʼ haadzííʼ; níbaal biiʼ dahozdísinii biyiʼdóó ábíłní,
2 Ízrel dineʼé bichʼįʼ handziihgo ábidiní, Nihitahdóó łaʼ Bóhólníihii bichʼįʼ náázhdiʼyoołnihgo éí béégashii áádóó dibé łaʼ nááhizhdoołnihgo éí jidoolóós.
3 Nááhizhdoołnihii éí béégashii jidiłidgo nááhizhdoołnih ládą́ą́ʼ bikąʼii hadaałtʼéii nízdidoolóosgo tʼáá hó íiznízingo níbaal biiʼ dahozdísinii bichʼéédą́ąʼgi Bóhólníihii binááł jidiłidgo nááhizhdoołnih.
4 Áádóó didlidgo náájiiłniihígíí bitsiitʼáagi dashdidoolnihgo há dínóodzįįł; éí bee há kʼééhodoodǫǫł biniyé áchʼą́ą́h nááhizhdoołnih.
5 Áádóó Bóhólníihii binááł dóola jidiyoołhééł, áko náádaʼiiłniihii Éran biyeʼké éí dił nídeidiyiikaahgo níbaal biiʼ dahozdísinii bichʼéédą́ąʼgi bikááʼ nááʼiiniihí bikáaʼgi tʼáá átʼé yikʼínídeiłkaʼ doo.
6 Ákohgo didlidgo nááhidoonihígíí néidoołʼah áádóó niidiyoołgish.
7 Nááʼiiłniihii Éran biyeʼké éí bikááʼ nááʼiiniihí bikáaʼgi kǫʼ iididoołtʼáałgo ákwii hazhóʼó chizh deididoonił.
8 Áádóó náádaʼiiłniihii Éran biyeʼké éí nááhidoonihígíí bitsiitsʼiin índa bikʼah tʼáá bił ałkééʼ sinilgo bikááʼ nááʼiiniihí bikáaʼgi chizh diltłiʼígíí yikááʼ nideidoonił.
9 Nidi bitsą́ siláí áádóó bijádígíí éí táádoogis. Áko nááʼiiłniihii éí bikááʼ nááʼiiniihí bikáaʼjįʼ didlidgo nááhániihii tʼáá átʼé Bóhólníihii bichʼįʼ łikání halchingo néidiyoołnih.
10 Áádóó nááhizhdoołnihii éí dibé bitahdę́ę́ʼ dibé łaʼ, doodaiiʼ tłʼízí łaʼ didlidgo nááhizhdoołnihgo éí bikąʼii hadaałtʼéii nááhizhdoołnih.
11 Áko éí bikááʼ nááʼiiniihí siʼánídóó náhookǫsjígo Bóhólníihii binááł jidiyoołhéełgo náádaʼiiłniihii Éran biyeʼké éí diłígíí bikááʼ nááʼiiniihí bikáaʼgi yikʼínídeiłkaʼ doo.
12 Áádóó diné éí nááhizhdoołnihígíí nihizhdoołgishgo atsiiʼ áádóó akʼah tʼáá bił ałkééʼ sinilgo nááʼiiłniihii éí bikááʼ nááʼiiniihí bikáaʼgi chizh diltłiʼígíí yikááʼ niidoonił.
13 Nidi bitsą́ siláí áádóó bijáád táidoogis. Áko nááʼiiłniihii éí tʼáá ałtso néididooniłgo bikááʼ nááʼiiniihí bikáaʼjįʼ yididoołił; díí didlidgo nááhidoonihii éí Bóhólníihii bichʼįʼ łikání halchingo nááhániihii átʼée doo.
14 Didlidgo nááhániihii éí Bóhólníihii bichʼįʼ nááhizhdoołnihígíí éí tsídii átʼéego nááhizhdoołnihígíí éí hasbídí, doodaiiʼ hasbídí łigaii biyázhí átʼéego jidoojih.
15 Áko nááʼiiłniihii éí bikááʼ nááʼiiniihí siʼáníjįʼ yidoołtéełgo bikʼos haidoonishgo bikááʼ nááʼiiniihí bikáaʼjįʼ yididoołił; bidiłígíí éí bikááʼ nááʼiiniihí bitsı̨́įjįʼ yąąh haidoonih.
16 Áádóó yiiʼ iiłneehígíí índa atsʼosígíí tʼáá bił haidoonishgo bikááʼ nááʼiiniihí bíighahgi haʼaʼaahdę́ęʼgo łeeshchʼiih yahiikaahjįʼ iidiyoołtłʼił.
17 Áádóó bitʼaʼ tʼáá yił ąą yididoozǫ́ǫ́s, nidi doo aháidoonił da, índa nááʼiiłniihii éí bikááʼ nááʼiiniihí bikáaʼgi chizh diltłiʼígíí yikááʼ niidooniłgo yididoołił, áko didlidgo nááhidoonihii éí Bóhólníihii bichʼįʼ łikání halchingo nááhániihii átʼée doo.
