Leviticus 10:1-20
10 Áádóó Éran biyeʼké Néídab áádóó Abáíhu éí tsin bijeeh dilidgo łikání halchinii bee naakáhí yee tʼáá ałʼąą kǫʼ néidiiką́ągo bikáaʼgi tsin bijeeh dilidgo łikání halchinii niiníjaaʼ, áádóó Bóhólníihii binááł kǫʼ doo dílzinii nááyiisniiʼ; éí doo ádoolnííłgóó Bóhólníihii yee haadzííʼ nítʼééʼ.
2 Áko Bóhólníihii bitsʼą́ą́dę́ę́ʼ kǫʼ hadadíínóodgo ahodííłkʼą́ąʼgo Bóhólníihii binááł jineezná.
3 Ákohgo Mózes éí Éran ííłní, Bóhólníihii kóníigo díí yee haadzííʼ, Dinishyingo dashizdósingo shitʼáahjįʼ nidajiikáah doo, áádóó diné tʼáá ałtso binááł ayóó átʼéego shaa haʼniihgo dashizdósin doo. Áko Éran tʼóó déesyéél.
4 Mózes éí Éran bidáʼí Azáíyel biyeʼké Mísheiyel áádóó Elzéífan hágo yidííniidgo ííłní, Kojįʼ ninohʼaashgo nihikʼis yę́ę hodiyingo hazʼą́ą́dę́ę́ʼ chʼínóhjáahgo níbaal haalʼá bitsʼáhwiiníʼą́ądi ninohjááh.
5 Ákohgo áyídíjįʼ bichʼįʼ nizhníʼáazhgo biʼééʼ tʼáá yiiʼ shitéezhgo chʼízhníjaaʼgo níbaal haalʼá bitsʼáhwiiníʼą́ądi nizhníjaaʼ; Mózes áhodííniidígíí biʼjiilaa.
Náádaʼiiłniihii baa hiditʼaahígíí áádóó bindaanishígíí
6 Áádóó Mózes éí Éran índa biyeʼké Eliyéízar áádóó Íthamar ííłní, Nihitsiiʼ tʼááká bikʼi daʼdoołtsóós lágo, danihiʼééʼ tʼááká ákʼindaołdlaad lágo, áko doo dadínóohnéeł da índa diné tʼáá ałtso doo atíbidiʼdoolníił da biniyé ákódadoohnííł. Nidi bíniʼdii danihikʼisóó Ízrel dineʼé tʼáá ałtso éí Bóhólníihii ahodííłkʼą́ʼígíí yaa atínídadindleeh.
7 Áko nihí éí níbaal biiʼ dahozdísinii bichʼéédą́ą́ʼdóó doo chʼídoohkah da; áko doo dínóohnéeł da; jó, Bóhólníihii biʼakʼah akʼi yahiidzíidii bee danihiʼdoolzı̨́ı̨́ʼ. Áko Mózes bizaad kʼehgo ádadziidzaa.
8 Áádóó Bóhólníihii éí Éran yichʼįʼ haadzíiʼgo ííłní,
9 Níbaal biiʼ dahozdísin góneʼ yah anáhkahgo ni áádóó niyeʼké tʼáá bił wáin, doodaiiʼ tó tsiʼnaʼiiłáii tʼááká daohdlą́ą́ʼ lágo, áko doo dínóohnéeł da; díí bee nihoníʼáanii ahóyéelʼáágóó nihá átʼéego náás daʼahíínółchíih doo.
10 Áko dílzinii áádóó doo dílzinii índa badaaʼihii áádóó doo badaaʼihii ałʼąą átʼéego baa ákodanohsin doo.
11 Áádóó éí Ízrel dineʼé nidanohtingo yee nihodiizʼáanii tʼáá átʼé Ízrel dineʼé bichʼįʼ Mózes binahjįʼ Bóhólníihii hahadziihígíí bee nidanohtin.
12 Áko Mózes éí Éran áádóó biyeʼké tʼáá naaʼaashígíí Eliyéízar áádóó Íthamar yichʼįʼ haadzíiʼgo ííłní, Bóhólníihii bichʼįʼ akʼáán nááhaazniiʼii bííʼohígíí nídadoohkaahgo bikááʼ nááʼiiniihí bíighahgi dííkʼǫsh tʼáágééd bááh ályaii dadoohsı̨́ı̨́ł, háálá tsʼídá aláahgo dílzin.
13 Áko tʼáá ákwii hodiyingo hazʼą́ągi dadoohsı̨́ı̨́ł, háálá ni áádóó niyeʼké bił nihaa hiditʼaahígíí Bóhólníihii bichʼįʼ didlidgo náádahaazniiʼii bitsʼą́ą́dóó átʼé; jó, shí ákótʼéego shichʼįʼ yee haadzííʼ.
14 Nidi ajéítsʼiin náásee bił nídiʼdilnihgo áádóó ajáád bił dah nídiʼdiilnihgo nááhaazniiʼígíí éí ni áádóó niyeʼké índa nitsiʼké yáʼáhootʼéehgi bił dadoohsı̨́ı̨́ł; jó, ni áádóó niyeʼké bił nihaa hiditʼaahii éí Ízrel dineʼé náádaʼiiłniihgo hózhǫ́ǫ́jí náádayiiłniihígíí łahjįʼ danihííʼ.
15 Áko ajáád bił dah nídiʼdiilnihgo áádóó ajéítsʼiin náásee bił nídiʼdilnihgo nááhániihígíí éí akʼah didoodliłgo nááhániihígíí yił nídeijihgo Bóhólníihii binááł náásee bił nídiʼdilnihgo náádahołniih doo, áko éí ni áádóó niyeʼké bił danihííʼ doo; éí yee nihoníʼą́ągo ahóyéelʼáa doo; jó, ákótʼéego Bóhólníihii haadzííʼ.
16 Ákohgo Mózes éí ádił oodzííʼjí tłʼízí nááhaazniiʼii hazhóʼó házhdééʼı̨́įʼgo, jó, ałtso doodlid lá, áko Éran biyeʼké tʼáá naaʼaashígíí Eliyéízar áádóó Íthamar bichʼįʼ háhóóchįįdgo ábijiní,
17 Haash yitʼéego ádił oodzííʼjí nááhaazniiʼígíí hodiyingo hazʼą́ągi tʼáadoo daoyą́ąʼ da; jó, éí tsʼídá aláahgo dílzinii átʼé, áko éí Diyin God nihaidiníʼą́ągo doo ákwii átʼéii yaa dayíkáahgo bee bidahodiyiitʼéehii bá bee kʼééhoodǫǫłii bá náádahołniih dooígíí Bóhólníihii binááł náádahołniih doo.
18 Jó, tłʼízí bidił hodiyingo hazʼání góneʼ doo yah aaką́ą da, áko éí nááhániihii hodiyingo hazʼą́ągi dadoohsı̨́įłgo bee nihichʼįʼ haasdzííʼ nítʼééʼ.
19 Áko Éran éí Mózes ííłní, Shoo, jı̨́ı̨́dą́ą́ʼ ádił niʼiidzííhjí nááhániihii índa didlidgo nááhániihii Bóhólníihii binááł náádayiisniiʼ. Jó, shichʼįʼ doo ákǫ́ǫ́ áhóótʼįįdgo ádił niʼiidzííhjí nááhaazniiʼii jı̨́ı̨́dą́ą́ʼ yíyą́ąʼgo Bóhólníihii bíniʼ beełtʼéegoósh íishłaa doo nítʼééʼ?
20 Ákohgo Mózes díí yidiiztsʼą́ąʼgo bił yáʼíítʼééh.
