Leviticus 11:1-47
11 Áádóó Bóhólníihii éí Mózes índa Éran ánéidooʼniid,
2 Ízrel dineʼé kóbidohní, Niʼ bikááʼgóó naaldlooshii tʼáá ałtso díí kódaatʼéhígíí tʼéí daohsą́ą dooleeł:
3 naaldlooshii dabikéshgaan dahałgizhígíí áádóó doo bitaʼ nidaʼazbaalii índa nídaʼatʼaałígíí éí daohsą́ą doo.
4 Ákondi díí éí doo yidą́ą da doo: éí náʼátʼaał nidi bikéshgaan doo hałgizh daígíí; ghą́ą́ʼaskʼidii náʼátʼaał nidi bikéshgaan doo hałgizh da; éí nihił tʼóó badaaʼih.
5 Áádóó dlǫ́ʼiigi átʼéhígíí éí náʼátʼaał nidi bikéshgaan doo hałgizh da; éí nihił tʼóó baaʼih.
6 Índa gah éí náʼátʼaał nidi bikéshgaan doo hałgizh da; éí nihił tʼóó baaʼih.
7 Bisóodi éí bikéshgaan hałgizh áádóó doo bitaʼ nideezbaal da, nidi doo náʼátʼaał da; éí nihił tʼóó baaʼih.
8 Éí bitsįʼ doo doodı̨́įł da; daaztsą́ągo bitsʼíís doo bídahididoohnáał da; éí nihidoołchxǫǫł.
9 Díí táyiʼ nidaaldeehii tʼáá átʼé kódaatʼéhígíí tʼéí daohsą́ą doo: tó biiʼgóó áádóó tónteel biiʼgóó índa tooh biiʼgóó bitʼaʼ dahólǫ́ǫgo yee nidaʼałkǫ́ǫʼii áádóó bikágí dadichʼíizhii éí daohsą́ą doo.
10 Áádóó tónteel biiʼgóó índa tooh biiʼgóó táyiʼ dahólóonii tʼáá ałtso doo bitʼaʼ yee nidaʼałkǫ́ǫʼii áádóó bikágí doo dichʼízhígíí éí tʼáá ákónáádaatʼéii táyiʼ dahináanii éí baaʼih danohsin doo.
11 Áko éí tʼóó baaʼih danohsingo bitsįʼígíí doo daohsą́ą da doo, nidi dabitsʼíís daaztsą́ągo tʼóó baaʼih danohsin doo.
12 Tʼáá haʼátʼíhída táyiʼ dahólóonii bitʼaʼ ádinii áádóó bikágí doo dichʼízhígíí éí baaʼih danohsin doo.
13 Áádóó díí éí tʼóó baaʼih danohsin doo; nidaatʼaʼígíí doo daadáanii éí baaʼihii ádaatʼé: atsá áádóó jeeshóóʼ índa dzílí
14 áádóó atsá ałʼąą ádaatʼéii índa giní,
15 gáagii tʼáá ałtso tʼáá ałʼąą ádaatʼéii,
16 náʼáshjaaʼ áádóó hooz áádóó biizhii índa giní ałʼąą ádaatʼéii
17 áádóó náʼáshjaaʼ yázhí áádóó toohjįʼ noołnahii índa náʼáshjaatsoh,
18 náʼáshjaaʼ łigaígíí áádóó naalʼeełí bidaanézí índa atseiłtsoii.
19 Tsídii bijáád danineezígíí áádóó tsídii bikʼos nineezígíí ałʼąą ádaatʼéii áádóó hóopo wolyéii índa jaaʼabaní.
20 Chʼosh bitʼaʼ dahólǫ́ǫgo bijáád daadı̨́ʼígíí tʼáá ałtso éí tʼóó baaʼih danohsin doo.
21 Ákondi díí éí daohsą́ą doo: éí chʼosh bitʼaʼ dahólóonii áádóó niʼgóó nidaakaii índa bijáád dahólǫ́ǫgo niʼgóó nidahachaʼii.
22 Díí éí daohsą́ą doo: nahachagitsoh binídaałtʼéii áádóó nahachagitsoh bitsiitsʼiin dilkǫǫhígíí binídaałtʼéii áádóó nahákʼízii binídaałtʼéii índa nahachagii binídaałtʼéii daohsą́ą doo.
23 Nidi náádaałaʼ chʼosh bitʼaʼ dahólǫ́ǫgo bijáád daadı̨́ʼígíí tʼáá ałtso tʼóó baaʼih danohsin doo.
24 Áko díí bee doo nihidaʼdidoodah da: tʼáá háiida díí łaʼ daaztsą́ągo bitsʼíís bíhizhdééʼnáʼígíí iʼííʼą́ąjįʼ doo hoʼdidoodah da.
25 Tʼáá háiida díí daaztsą́ągo bitsʼíís nidzistínígíí éí haʼééʼ jidoogis, áko iʼííʼą́ąjįʼ doo hoʼdidoodah da.
26 Áádóó naaldlooshii bikéshgaan dahałgizhii nidi doo bitaʼnideezbaalii áádóó doo nídaʼatʼaałii éí nihił tʼóó badaaʼih; tʼááłáʼí jinítínígo éí bídahizhdiyiiʼnáhígíí bee doo hodaʼdidoodah da.
27 Naaldlooshii ałʼąą ádaatʼéii bijáád daadı̨́ʼígíí bíláshgaan dahólǫ́ǫgo éí nihił tʼóó badaaʼih; tʼáá háiida éí bitsʼíís bíhizhdééʼnáʼígíí iʼííʼą́ąjįʼ doo hoʼdidoodah da.
28 Áko tʼáá háiida díí daaztsą́ągo bitsʼíís nidzistı̨́įgo éí haʼééʼ jidoogis áádóó iʼííʼą́ąjįʼ doo hoʼdidoodah da; éí naaldlooshii nihił tʼóó badaaʼih.
29 Díí ałdóʼ nihił tʼóó badaaʼih doo: niʼgóó nidaajeehii éí dlǫ́ʼii áádóó naʼatsʼǫǫsí índa chʼééh digháahii binídaałtʼéii.
30 Índa tsékʼih naʼazólii áádóó naʼashǫ́ʼiiłbáhí łahgo aníʼdoolníiłii, naʼashǫ́ʼiiłbáhítsoh, naʼashǫ́ʼiiłbáhí łitsoii, naʼashǫ́ʼii dootłʼizhii táyiʼ dahólóonii.
31 Díí niʼgóó nidaajeehii tʼáá ałtso łaʼ dabitahdóó éí nihił tʼóó badaaʼih doo; tʼáá háiida díí łaʼ daaztsą́ągo bíhizhdééʼnáaʼgo éí iʼííʼą́ąjįʼ doo hoʼdidoodah da.
32 Áko éí łaʼ daaztsą́ągo bitsʼísígíí tʼáá haʼátʼíhída chooʼíinii éí tsin, doodaiiʼ naʼatʼą́hí, doodaiiʼ akágí, doodaiiʼ tłʼoh azis bee ádaalyaii yikʼijįʼ náátłizhgo éí tʼóó baaʼih doo, áko éí taah dooʼnił, áádóó iʼííʼą́ąjįʼ tʼóó baaʼih doo; kótʼéego biʼdidéeh doo.
33 Hashtłʼish ásaaʼ łaʼ yiih yítłizhgo tʼáá haʼátʼíhída biyiʼígíí éí tʼóó baaʼih doo, áko tʼóó doołtsʼił.
34 Éí ásaaʼ biiʼ tóhígíí éí chʼiyáán doodı̨́łígíí tʼáá ałtso bikʼésdáazgo tʼóó baaʼih doo, áádóó doodlı̨́įłii tʼáá ałtso éí ásaaʼ bee sikánígíí tʼóó baaʼih doo.
35 Tʼáá ałtsoní bikʼijįʼ bitsʼísígíí náátłizhgo éí tʼóó baaʼih doo; kǫʼ bá haʼastłʼingi bikááʼ abézhígíí, doodaiiʼ ásaaʼ ditání taidootsxił, háálá tʼóó baaʼih; éí nihił tʼóó baaʼih doo.
36 Ákondi tó háálı̨́įgo índa tó bá azʼą́ągo ákwii ląʼí tógo éí doo tʼóó baaʼih da, nidi atsʼíís daaztsáanii bíhidééʼnáaʼii éí tʼóó baaʼih doo.
37 Índa bitsʼísígíí éí kʼeelyéí kʼididoolyéłígíí łaʼ bíhidééʼnáaʼgo éí doo tʼóó baaʼih silı̨́įʼ da.
38 Nidi tó bee kʼeelyéí nástłéeʼgo éí atsʼísígíí bíhidééʼnáaʼgo éí nihił tʼóó baaʼih doo.
39 Áádóó naaldlooshii dadoołghałígíí łaʼ tʼáá bíniʼdii daaztsą́ągo tʼáá háiida éí daaztsánígíí bíhizhdééʼnáaʼgo iʼííʼą́ąjįʼ doo hoʼdidoodah da.
40 Áádóó tʼáá háiida éí tʼáá bíniʼdii daaztsáanii bitsįʼ łaʼ jííyą́ąʼgo éí haʼééʼ jidoogis, áko iʼííʼą́ąjįʼ doo hoʼdidoodah da, áádóó ałdóʼ tʼáá háiida éí daaztsáanii nijistínígíí haʼééʼ jidoogisgo iʼííʼą́ąjįʼ doo hoʼdidoodah da.
41 Áko niʼgóó nidaajeehii tʼáá ałtso baaʼihii ádaatʼé; éí doo yidą́ą da.
42 Tʼáá haʼátʼíhída bibid yee nidaaʼnaʼii áádóó bijáád dı̨́įʼgo yee nidaajeehii, doodaiiʼ tʼáá haʼátíhída bijáád tʼóó adahayóigo łeeshtahgóó nidaajeehii éí doo yidą́ą da; jó, éí baaʼihii ádaatʼé.
43 Díí niʼgóó nidaaʼnaʼii łaʼ bee tʼááká baaʼihgo ádaʼdoołnééh lágo, doodaiiʼ tʼááká éí bee doo biʼdidéehii ádaʼdoołnééh lágo, jó, éí nihidoołchxǫǫł.
44 Háálá shí Bóhólníihii nihiDiyin God nishłı̨́; éí bąą diyingo ádadiʼdoołnííł, áádóó dadinohyin doo; jó, shí dinishyin; tʼááká tʼáá haʼátʼíhída niʼgóó nidaaʼnaʼii łaʼ bee ádadoołchxǫǫh lágo.
45 Háálá shí Bóhólníihii nishłı̨́įgo nihiDiyin God nishłı̨́į doo biniyé Ííjip kéyahdę́ę́ʼ chʼéénihiníʼeezh; éí bąą dadinohyin doo; jó, shí dinishyin.
46 Díí naaldlooshii áádóó nidaatʼaʼii índa táyiʼgóó dahináanii tʼáá ałtso, áádóó niʼgóó nidaaʼnaʼii tʼáá ałtso biniyé bee hazʼáanii átʼé.
47 Áko díí ałʼąą átʼéii átʼéhígíí baa nitsókees: badaaʼihígíí áádóó doo badaaʼihígíí índa naaldlooshii daadánígíí áádóó doo daadánígíí.
