Leviticus 13:1-59
13 Áko Bóhólníihii éí Mózes áádóó Éran yichʼįʼ haadzíiʼgo ííłní,
2 Diné łaʼ bikágí bikáaʼgi bąąh hadzííyáago, doodaiiʼ łóód bąąh dah yistsʼidgo, doodaiiʼ łóód bąąh dah yiigaiigo éí bikágí bikáaʼgi łóód atsʼíís yiyáanii naałdzidii silı̨́įʼgo nááʼiiłniihii Éran, doodaiiʼ biyeʼké náádaʼiiłniihii łaʼ bichʼįʼ bił dazhdookah.
3 Áko hatsʼíís bąąh łódígíí éí nááʼiiłniihii háidínóołʼįįł, áko hakágí bąąh łódígi hatáshtłʼoh yiigaiigo índa wóyahgo łóodgo éí naałniih łóód atsʼíís yiyáanii naałdzidii átʼé, áko nááʼiiłniihii hazhóʼó honééłʼı̨́įʼgo, Doo niʼdidéeh da lá, hodidooniił.
4 Nidi hakágí bąąh éí łóód yéego dah yiigaiigo índa doo wóyahgo łóódgóó áádóó ákwii hatáshtłʼoh tʼáadoo yiigaiigóó éí naałniih hodoolnaʼígíí tʼáá sahdii tsostsʼid yiską́ąjįʼ nááʼiiłniihii hadádiʼdoołkał.
5 Áko tsostsʼid yiską́ągo nááʼiiłniihii nááhodínóołʼįįł; jó, naałniihígíí tʼáadoo łahgo ádzaa dago áádóó tʼáadoo kʼeeʼąą deeshzhiizh dago éí tʼáá sahdii tsostsʼid náánéiską́ąjįʼ nááʼiiłniihii hadánáádiʼdoołkał.
6 Áádóó tsostsʼid náánéiską́ągo nááʼiiłniihii nááhodínóołʼįįł; éí naałniihígíí tʼóó yiijı̨́įʼgo hakágí bąąh tʼáadoo kʼeeʼąą deeshzhiizhgóó éí nááʼiiłniihii, Doo ánítʼéhí da, hodidooniił, nidi łóód bisgąʼ tʼéiyá silı̨́įʼgo haʼééʼ jidoogisgo hoʼdidéeh doo.
7 Nidi hoʼdidééh bééhodoozįįł biniyé nááʼiiłniihii honééłʼı̨́ı̨́ʼdóó bikʼijįʼ halóód nááltseígíí hakágí biiʼgóó náádeesʼniiʼ ládą́ą́ʼ éí nááʼiiłniihii nááhodínóołʼįįł.
8 Áko nááʼiiłniihii éí yiyiiłtsą́ągo łóód nááltseígíí hakágí biiʼgóó náás deesʼniiʼ lágo, Doo niʼdidéeh da lá, hodidooniił; jó, éí łóód atsʼíís yiyáanii naałdzidii átʼé.
9 Ákohgo diné łaʼ łóód atsʼíís yiyáanii naałdzidii bidoolnaʼgo éí nááʼiiłniihii yichʼįʼ hoł dadookah,
10 áádóó nááʼiiłniihii hodínóołʼįįłgo hakágí bikáaʼgi bąąh hadzííyáhígíí yiigaiigo áádóó ákwii hatáshtłʼoh yiigaiigo índa hąąh hadzííyáhígi łóodgo
11 éí ałkʼidą́ą́ʼ łóód atsʼíís yiyáanii hodoolnaʼ yę́ę átʼé, áko nááʼiiłniihii éí, Doo niʼdidéeh da lá, hodidooniił, áko doo tʼáá sahdii hadádiʼdoołkał da, háálá doo hoʼdíídeeʼ da.
12 Nidi łóód atsʼíís yiyáanii naałdzidii hąąh hazlı̨́įʼgo áádóó tʼáá átʼé łóód atsʼíís yiyáanii naałdzidii tʼáá hatsiitʼáádóó hakétłʼáahjįʼ haa diiłniiʼgo nááʼiiłniihii éí tʼáá átʼé łigaigo yiyiiłtsą́ągo
13 nááʼiiłniihii éí łóód atsʼíís yiyáanii naałdzidii hakááʼgóó tʼáá átʼé hazlı̨́ʼígíí yinééłʼı̨́įʼgo éí naałniih hodoolnaʼígíí, Doo ánítʼéhí da, hodidooniił; jó, tʼáá átʼé łigaii silı̨́ı̨́ʼ lá, áko hoʼdidéeh doo.
14 Nidi hakááʼgóó łóód silı̨́įʼgo éí doo hoʼdidoodah da.
15 Áko nááʼiiłniihii éí halódígóó há yidínóołʼįįłgo, Doo niʼdidéeh da lá, hodidooniił, háálá díí łóód tʼóó baaʼih; łóód atsʼíís yiyáanii naałdzidii átʼé.
16 Doodaiiʼ łódígíí łahgo ánáánádzaago łigaii silı̨́įʼgo nááʼiiłniihii bichʼįʼ náázhdoodááł.
17 Áko nááʼiiłniihii honééłʼı̨́įʼgo, éí naałniihígíí yiigaiigo yiyiiłtsą́ągo naałniih hodoolnaʼ yę́ę, Doo ánítʼéhí da, hodidooniił, áko hoʼdidéeh doo.
18 Áádóó ałdóʼ hatsʼíís yishchʼozh nítʼéeʼgo yáʼátʼééh násdlı̨́įʼgo éí tʼóó sid nídzoodzíiʼ dooleeł;
19 éí jishchʼozhígi łigaigo hąąh hááyáago, doodaiiʼ dinilgaigo, doodaiiʼ dah yiichiiʼgo nááʼiiłniihii há yidínóołʼįįł.
20 Áádóó nááʼiiłniihii éí yiníłʼı̨́įgo, jó, łóód haníʼíígháázh lá áádóó hatáshtłʼoh ákwii dah yiigaiigo nááʼiiłniihii, Doo niʼdidéeh da lá, hodidooniił; jishchʼozhígíí biiʼdóó łóód atsʼíís yiyáanii naałdzidii hááłniiʼígíí átʼé.
21 Nidi nááʼiiłniihii éí yiníłʼı̨́įgo, jó, atáshtłʼoh ákwii doo łaʼ łigaigóó áádóó łóód doo haníʼíígháázhgóogo nidi tʼáá bíyó dinilzhingo éí nááʼiiłniihii tsostsʼid yiską́ąjįʼ tʼáá sahdii hadádiʼdoołkał.
22 Áádóó hakááʼgóó kʼeeʼąą deeshzhiizhgo éí nááʼiiłniihii, Doo niʼdidéeh da lá, hodidooniił; éí naałniih átʼé.
23 Nidi dah yiigaii yę́ę doo kʼeeʼąą deeshzhiizhgóogo éí yishchʼozhígíí sid dooleeł, áko nááʼiiłniihii, Doo ánítʼéhí da, hodidooniił.
24 Doodaiiʼ tʼáá haʼátʼéegida ázhdoodlidgo áádóó ázhdoodlidígi dah yiichiiʼgo łóód silı̨́įʼgo, doodaiiʼ dah yiigaiigo
25 éí nááʼiiłniihii há yidínóołʼįįł, áko ákwii hatáshtłʼoh yiigaiígíí yiníłʼı̨́įgo tʼáadoo bahatʼaadí łóód haníʼíígháazhgo éí ázhdoodlidígíí bitsʼą́ą́dóó łóód atsʼíís yiyáanii naałdzidii silı̨́ʼígíí átʼé; éí bąą nááʼiiłniihii, Doo niʼdidéeh da lá, hodidooniił; éí łóód atsʼíís yiyáanii naałdzidii naałniih átʼé.
26 Nidi nááʼiiłniihii éí yiníłʼı̨́įgo, éí łódígi hatáshtłʼoh doo łaʼ yiigaiigóogo áádóó doo haníʼíígháázhgóogo, nidi tʼáá bíyó dinilzhingo, áko nááʼiiłniihii éí tsostsʼid yiską́ąjįʼ tʼáá sahdii hadádiʼdoołkał.
27 Áádóó tsostsʼid yiską́ągo nááʼiiłniihii nááhodínóołʼįįł, áko hakááʼgóó kʼeeʼąą deeshzhiizh lágo éí nááʼiiłniihii, Doo niʼdidéeh da lá, hodidooniił; éí łóód atsʼíís yiyáanii naałdzidii naałniih átʼé.
28 Nidi dah yiigaii yę́ę doo kʼeeʼąą deeshzhiizhgóogo, nidi dinilzhingo éí ázhdoodlidígi hadzííyáhígíí átʼé; nááʼiiłniihii éí, Doo ánítʼéhí da, hodidooniił; jó, ázhdoodlidgo hadzííyáhígi tʼóó sid dooleeł.
29 Áádóó diné łaʼ, doodaiiʼ asdzání łaʼ bitsiitsʼiin bikáaʼgi, doodaiiʼ bidághaatahgi naałniih hazlı̨́įʼgo,
30 éí nááʼiiłniihii há yidínóołʼįįł; jó, yiníłʼı̨́įgo tʼáadoo bahatʼaadí łóód haníʼíígháazhgo áádóó ákwii tsiighá tʼáá díkwíí łitsogo hadaaztʼiʼgo, áko nááʼiiłniihii, Doo niʼdidéeh da lá, hodidooniił; éí łóód atsʼíís yiyáanii naałdzidii hatsiitsʼiin bikʼi, doodaiiʼ hadághaatahgóó niníkę́ę́z lá.
31 Nidi nááʼiiłniihii éí łóód hakʼi niníkę́zígíí yiníłʼı̨́įgo doo tʼáá íiyisí haníʼíígháázhgóogo áádóó tsiighá doo łaʼ łizhingóó nááʼiiłniihii éí tʼáá sahdii tsostsʼid yiską́ąjįʼ hadádiʼdoołkał.
32 Áádóó tsostsʼid yiską́ągo nááʼiiłniihii éí halóód hakʼi niníkę́zígíí há néidínóołʼįįł; jó, łóód tʼáadoo kʼeeʼąą deeshzhiizhgóó áádóó tsiighá doo łaʼ łitsogóó índa doo haníʼíígháázhgóogo
33 há adoolzhih, nidi halóód hakʼi niníkę́zígi doo doolzhih da, áádóó nááʼiiłniihii éí halóód hólónígíí tʼáá sahdii tsostsʼid yiską́ąjįʼ hadánáádiʼdoołkał.
34 Ákohgo tsostsʼid yiską́ągo nááʼiiłniihii éí halóód hakʼi niníkę́zígíí há néidínóołʼįįł; jóʼakon, doo kʼeeʼąą deeshzhiizhgóogo, doodaiiʼ doo haníʼíígháázhgóogo éí nááʼiiłniihii, Doo ánítʼéhí da, hodidooniił, áko haʼééʼ jidoogisgo hoʼdidéeh doo.
35 Nidi, Ałtso niʼdíídeeʼ lá, hoʼdooʼniidóó bikʼijįʼ halóód nááltsei yę́ę tʼóó tséʼédinda anáánádzaago
36 nááʼiiłniihii éí nááhodínóołʼįįł; éí łódígíí tʼóó tséʼédinda ádzaa lá, ákondi hatsiiʼ yiitsoígíí doo háidídóoʼįįł da, háálá doo hoʼdíídeeʼ da.
37 Nidi łóód hakʼi niníkę́zígíí tʼáadoo haa dahoolaagóogo éí tsiighá łizhingo yiníłʼı̨́įgo éí łóód hąąh ásdįįd lá, áko hoʼdíídeeʼgo nááʼiiłniihii, Doo ánítʼéhí da, hodidooniił.
38 Diné, doodaiiʼ asdzání łaʼ bikágí yistłʼingo ákwii dinilgai silı̨́įʼgo
39 éí nááʼiiłniihii há yidínóołʼįįł, áko éí hakágí yistłʼinígi doo yéego dinilgaigóó, tʼóó ąąh haʼííjéʼígíí átʼé, áko éí hoʼdidééh átʼé.
40 Diné łaʼ hatsiitsʼiin ałtso béétʼóodgo bitsiiʼ ádinii jílı̨́; jó, tʼóó hoʼdidééh átʼé.
41 Áádóó diné łaʼ hatsiitʼáád iʼíítʼóodgo tsiitʼádii jílı̨́; jó, tʼóó hoʼdidééh átʼé.
42 Nidi łaʼda hatsiitsʼiin béétʼóodgo, doodaiiʼ hatsiitʼáád iʼíítʼóodgo éí dinilchíiʼgo binídzísgaigo bąąh hááyáhígíí éí łóód atsʼíís yiyáanii naałdzidii hatsiitsʼiin dilkǫǫhígíí bidoolnaʼ, doodaiiʼ hatsiitʼáád iʼíítʼódígi bidoolnaʼgo átʼé.
43 Ákohgo nááʼiiłniihii há yidínóołʼįįłgo, jó, hatsiitsʼiin béétʼódígi, doodaiiʼ hatsiitʼáád iʼíítʼódígi bąąh hadzííyáhígíí dinilchíiʼgo binídzísgaigo éí łóód atsʼíís yiyáanii naałdzidii ąąh dahoyoołʼaałígi átʼéii átʼé.
44 Éí łóód atsʼíís yiyáanii naałdzidii bee bąąh dah hooʼaʼii dzizlı̨́ı̨́ʼ; éí doo hoʼdidéeh da, áko nááʼiiłniihii éí, Tsʼídá doo niʼdidoodah da lá, hodidooniił; naałniih éí hatsiitsʼiin bąąh hólǫ́.
45 Áádóó łóód bee bąąh dah hazʼáanii éí biʼééʼ bikʼi neheesdǫ́ǫz doo áádóó bitsiitsʼiin nidi doo bikʼéʼéstiʼ da doo, índa bidaaʼ bikʼéʼéstiʼgo, Doo shiʼdíídeeʼ da, doo shiʼdíídeeʼ da, níigo háádílwosh doo.
46 Éí yidiiską́ą́góó naałniih bee bąąh dahazʼą́ągo baaʼihii jílı̨́į dooleeł; doo biʼdíídeeʼii jílı̨́; tʼáá sahdii haghan doo; níbaal haalʼá bitsʼáhwiiníʼą́ądi haghan doo.
47 Áádóó ałdóʼ ééʼ łaʼ éí aghaaʼ bee ályaii, doodaiiʼ naʼatʼą́hí łigaii ditsʼidgo bee ályaii naałniih łóód atsʼíís yiyáanii naałdzidii bąąh hazlı̨́įʼgo,
48 naʼatʼą́hí łigaii ditsʼidgo bee ályaii, doodaiiʼ aghaaʼ bee nanoolzheeʼ ályaii, doodaiiʼ beistłʼónígíí łóód bąąh hazlı̨́įʼgo, doodaiiʼ akágída, doodaiiʼ tʼáá haʼátʼíhída akágí bee ályaii łóód bąąh hazlı̨́įʼgo,
49 tátłʼid nahalingo adiiłtłʼíishii índa iiłchíihii éí ééʼ, doodaiiʼ akágí, doodaiiʼ binanoolzheeʼígíí, doodaiiʼ beistłʼónígíí naałniih bąąh hazlı̨́įʼgo índa tʼáá haʼátʼíhída akágí bee ályaii bąąh yiiltsą́ągo éí naałniih łóód atsʼíís yiyáanii naałdzidii átʼé; éí nááʼiiłniihii yidínóołʼįįł.
50 Áádóó nááʼiiłniihii éí ééʼ naałniih bąąhígíí yidínóołʼįįłgo tsostsʼid yiską́ąjįʼ tʼáá sahdii yidádiʼdoołkał.
51 Áko tsostsʼid yiską́ągo néinééłʼı̨́įʼgo binanoolzheeʼígíí, doodaiiʼ beistłʼónígíí bąąhgo, doodaiiʼ akágí tʼáá haʼátʼíhída biniyé akágí bee ályaii éí naałniih bąąh kʼeeʼąą deeshzhiizhgo éí łóód atsʼíís yiyáanii naałdzidii átʼé; jó, éí tʼóó baaʼih.
52 Éí bąą éí éʼígíí iididoołkʼą́ą́ł; binanoolzheeʼígíí, doodaiiʼ beistłʼónígíí bąąhgo, doodaiiʼ aghaaʼ bee ályaii, doodaiiʼ naʼatʼą́hí łigaii ditsʼidgo bee ályaii, doodaiiʼ tʼáá haʼátʼíhída akágí bee ályaii éí iididoolkʼą́ą́ł, háálá łóód atsʼíís yiyáanii naałdzidii átʼé.
53 Nidi nááʼiiłniihii éí néinééłʼı̨́įʼgo tʼáadoo naałniih bąąh kʼeeʼąą deeshzhiizhgóogo éí binanoolzheeʼígíí, doodaiiʼ beistłʼónígíí bąąhgo éʼígíí, doodaiiʼ tʼáá haʼátʼíhída akágí bee ályaii bąąhgo,
54 ákohgo nááʼiiłniihii éí, Łóód bąąhígíí daohgis, hodidooniił, áádóó tsostsʼid yiską́ąjįʼ yidánáádiʼdoołkał.
55 Áádóó nááʼiiłniihii éí łóód bąąhígíí tánásgizdóó bikʼijįʼ néidínóołʼįįł, áádóó shoo, łódígíí tʼáadoo łahgo anádzaagóogo, azhą́ doo kʼeeʼąą deeshzhiizh da nidi; éí tʼóó baaʼih; éí adidííłkʼą́ą́ł; jó, éí biyiʼdi, doodaiiʼ bikááʼdę́ę́ʼ łóód atsʼíís yiyáanii naałdzidii bąąh hazlı̨́įʼii átʼé.
56 Ákondi nááʼiiłniihii éí nááyinééłʼı̨́įʼgo naałniih bąąh tánásgizdóó bikʼijįʼ doo wózhǫ́ bąąhgóogo éí ééʼ binanoolzheeʼígíí, doodaiiʼ beistłʼónígíí, doodaiiʼ akágí bąąhdóó nahjįʼ kwíidoolííł.
57 Nidi ééʼ binanoolzheeʼígíí, doodaiiʼ beistłʼónígíí, doodaiiʼ akágí bee ályaii tʼah tʼáá bąąhgo éí naałniih kʼeeʼąą deeshzhiizhígíí átʼé, áko éí naałniih bąąhgo tʼóó adidííłkʼą́ą́ł.
58 Áko ééʼ binanoolzheeʼígíí, doodaiiʼ beistłʼónígíí, doodaiiʼ akágí bee ályaii bąąhgo éí sínígisgo naałniihígíí bąąh kʼééʼníídeeʼgo náádíígis, áko biʼdidéeh doo.
59 Díí éí naałniih łóód atsʼíís yiyáanii naałdzidii bee hazʼáanii átʼé; ééʼ éí aghaaʼ, doodaiiʼ naʼatʼą́hí łigaii ditsʼidgo bee ályaii binanoolzheeʼ, doodaiiʼ beistłʼónígíí bąąh hazlı̨́įʼgo, doodaiiʼ akágí bee ályaii bąąh hazlı̨́įʼgo éí biʼdidééh, doodaiiʼ doo biʼdidéeh da, hodidooʼniił.