Leviticus 15:1-33
15 Áko Bóhólníihii éí Mózes áádóó Éran yichʼįʼ haadzíiʼgo ííłní,
2 Ízrel dineʼé bichʼįʼ haohdziihgo kóbidohní, Diné éí naałniih bitsʼíís bitsʼą́ą́dóó háálı̨́įgo, jó, bąąh háálínígíí yee doo biʼdidéeh da doo.
3 Díí bąąh háálı̨́ silı̨́ʼígíí doo biʼdidéeh da doo, éí bąąh háálı̨́įgo, doodaiiʼ doo bąąh háálı̨́į da silı̨́įʼ nidi éí doo biʼdidéeh da doo.
4 Áko tsáskʼeh tʼáá yikááʼ nánítéhígíí tʼóó baaʼih neheleeh doo, índa tʼáá yikʼi nánídaahígíí tʼóó baaʼih neheleeh doo.
5 Áádóó tʼáá háiida éí bitsáskʼeh bíhizhdééʼnáaʼgo haʼééʼ jidoogis áádóó nizhdoobeeł, áko iʼííʼą́ąjįʼ doo hoʼdidéeh da doo.
6 Tʼáá háiida díí diné bąąh háálínígíí tʼáá haʼátʼíhída yikááʼ neezdáhígíí bikáaʼjįʼ jineezdáago éí haʼééʼ jidoogis, índa nizhdoobeełgo iʼííʼą́ąjįʼ doo hoʼdidéeh da doo.
7 Áádóó diné bąąh háálínígíí tʼáá háiida éí bíhizhdééʼnáaʼgo éí haʼééʼ jidoogis índa nizhdoobeełgo iʼííʼą́ąjįʼ doo hoʼdidéeh da doo.
8 Áko diné bąąh háálínígíí éí diné biʼdíídeeʼii yikʼídeezhéeʼgo éí biʼééʼ yidoogis áádóó nidoobeełgo iʼííʼą́ąjįʼ doo hoʼdidéeh da doo.
9 Áádóó diné bąąh háálínígíí éí tʼáá haʼátʼíhída bikʼi dah náʼniłí yikʼi dah neezdáago éí tʼóó baaʼih dooleeł.
10 Áko tʼáá haʼátʼíhída biyaa sinil nítʼééʼ yę́ę tʼáá háiida bíhizhdééʼnáaʼgo éí iʼííʼą́ąjįʼ doo hoʼdidéeh da doo, áko éí tázhdííjaaʼígíí haʼééʼ jidoogis áádóó nizhdoobeełgo iʼííʼą́ąjįʼ doo hoʼdidéeh da doo.
11 Áádóó diné bąąh háálínígíí tʼáadoo bílaʼ tánéígisí tʼáá háiida yideelchidgo éí diné biʼééʼ yidoogis áádóó nidoobeełgo iʼííʼą́ąjįʼ doo hoʼdidéeh da doo.
12 Índa diné bąąh háálínígíí hashtłʼish łeetsʼaaʼ yíhidééʼnáʼígíí dooltsʼił áádóó tsin bee ásaaʼ ádaalyaaígíí tʼáá ałtso bąąh nidadoolʼoł.
13 Áko éí diné bąąh háálínígíí hadaałtʼé násdlı̨́įʼgo biʼdidéehgo tsostsʼid yidoołkááł áádóó biʼééʼ yidoogis índa tó nílínígíí yiiʼ nidoobeeł, áko biʼdidéeh doo.
14 Áádóó tseebíí yiską́ągo hasbídí naakigo, doodaiiʼ hasbídí łigaii yázhí naakigo Bóhólníihii binááł níbaal biiʼ dahozdísinii bichʼéédą́ąʼgi nááʼiiłniihii yeidoonił.
15 Áko nááʼiiłniihii éí náádiʼyoołnihgo tʼááłáʼígo ádił niʼiidzííhjí nááhániihii átʼéego áádóó łaʼígíí éí didlidgo nááhániihii átʼéego há néidiyoołnih. Kótʼéego nááʼiiłniihii éí Bóhólníihii binááł diné bąąh háálı̨́ı̨́ nítʼéʼígíí yá kʼééhodoołdǫǫł.
16 Diné łaʼda hwíígąsh hááłtsʼąʼgo tʼáá dzizı̨́ı̨́ nítʼééʼ táʼázhdidoogis, áko iʼííʼą́ąjįʼ doo hoʼdidéeh da doo.
17 Ééʼda índa akágída bikʼijįʼ hwíígąsh háánaʼígíí táázhdoogis, áko iʼííʼą́ąjįʼ tʼóó badaaʼih doo.
18 Asdzání éí diné łaʼ bił neezhtéezhgo hwíígąsh háánaʼgo éí tʼáá ájíłah nizhdoobeeł, áko iʼííʼą́ąjįʼ doo hoʼdidéeh da doo.
19 Áádóó asdzání łaʼda dił bighánílı̨́įgo éí tsostsʼid yiską́ąjįʼ atsʼáhodiʼdootʼááł, áko tʼáá háiida hóhidééʼnáaʼgo éí iʼííʼą́ąjįʼ doo hoʼdidéeh da doo.
20 Áko atsʼáhoʼdeetʼání góneʼ tʼáá bikʼizhnitéhígíí índa tʼáá bikʼi názhnídaahígíí tʼóó baaʼih neheleeh doo.
21 Áádóó tʼáá háiida hatsáskʼeh yíhidééʼnáaʼgo biʼééʼ yidoogis áádóó nidoobeełgo iʼííʼą́ąjįʼ doo hoʼdidéeh da doo.
22 Tʼáá haʼátʼíhída bikááʼ jineezdá nítʼééʼ yę́ę tʼáá háiida yikááʼ neezdáago éí biʼééʼ yidoogis áádóó nidoobeeł, áko iʼííʼą́ąjįʼ doo hoʼdidéeh da doo.
23 Hadiłígíí hatsáskʼeh bąąh silı̨́įʼgo, doodaiiʼ tʼáá haʼátʼíhída bikááʼ dzizdáhígíí bąąh dił silı̨́įʼgo tʼáá háiida éí yíhidééʼnáaʼgo iʼííʼą́ąjįʼ doo hoʼdidéeh da doo.
24 Diné łaʼ hoł neezhtéezhgo éí haʼąądii yénáyáago tsostsʼid yiską́ąjįʼ doo biʼdidéeh da doo, áádóó tʼáá yikááʼ nánítéhígíí tʼóó baaʼih neheleeh doo.
25 Aszdání ąądii nádleehígíí tʼáá bitaʼgi dił bighánílı̨́įgo ląʼí yiską́ągo, doodaiiʼ ąądii nádleehígíí bilááhgóó ayííłką́ągo éí ąądii jílı̨́įgo atsʼánáhoʼdiltéhígi átʼéego atsʼáhoʼdeeltı̨́į doo, áko doo hoʼdidéeh da doo.
26 Áádóó tʼáá dił haghánílı̨́įgo neiłkaʼ góneʼ éí tʼáá bikááʼ jinitéhígíí áádóó tʼáá haʼátʼíhída bikááʼ dzizdá nítʼééʼ yę́ę tʼóó baaʼih neheleeh doo.
27 Áko éí tʼáá háiida yíhidééʼnáaʼgo doo biʼdidéeh da doo; éí biʼééʼ yidoogis áádóó nidoobeełgo iʼííʼą́ąjįʼ doo biʼdidéeh da doo.
28 Nidi asdzání bidił bighánílínígíí doo átʼée da násdlı̨́įʼgo tsostsʼid yidoołkáłígíí yibaʼ átʼée doo; éí bikʼijįʼ índa biʼdidéeh doo.
29 Áádóó tseebíí yiską́ągo hasbídí naakigo, doodaiiʼ hasbídí łigaii yázhí naakigo nízhdidooniłgo níbaal biiʼ dahozdísinii bichʼéédą́ąʼgi nááʼiiłniihii baazhdoonił.
30 Áko nááʼiiłniihii éí náádiʼyoołnihgo tʼááłáʼígo ádił niʼiidzííhjí nááhániihii átʼéego áádóó łaʼígíí éí didlidgo nááhániihii átʼéego néidiyoołnih; kótʼéego nááʼiiłniihii éí asdzání bidił bighánílı̨́įgo doo biʼdidééhgóó biniinaa Bóhólníihii binááł yá kʼééhodoołdǫǫł.
31 Kótʼéego Ízrel dineʼé doo bidaʼdidéhígíí tʼóó bitsʼádahidíʼaah, áko doo biʼdidéhígíí doo yiiʼ dadínóonéeł da; tʼáá hazhóʼó shiníbaal biiʼ hodílzinii hatahgi siʼánígíí dajííłchxǫʼgo tʼéiyá.
32 Díí bee hazʼáanii há átʼé: diné łaʼ hąąh hááłtsʼąʼgo, doodaiiʼ hwíígąsh hąąh háánaʼígíí bee jííchxǫʼii
33 áádóó asdzání tʼáá bí biʼąądii yikʼee doo ákótʼéégóó áádóó diné łaʼ bąąh hááłtsʼąʼígíí éí diné há, doodaiiʼ asdzání há índa diné éí asdzání bił jineeztézhígíí doo biʼdidééhgóó ájííłʼįįdígíí há bee hazʼáanii átʼé.
