Leviticus 16:1-34
16 Bóhólníihii éí Mózes yichʼįʼ haadzííʼ; Éran hayeʼ nidiltʼéego hatsʼą́ą́ʼ neezná; éí Bóhólníihii yinááł nááʼiisniiʼgo neezná.
2 Áko Bóhólníihii éí Mózes ííłní, Nikʼis Éran bichʼįʼ handziih, Dáádiníbaal bineʼjí tsʼídá aláahgo hodiyingo hazʼání góneʼ tsitsʼaaʼ dílzinii bikáaʼgi aa aʼááh hasinii bił hazʼáníjįʼ doo tʼáá áłahjįʼ yah aníjídáah da doo, áko doo dazdootsaał da, háálá aa aʼááh hasinii bił hazʼání bikʼigi kʼos biyiʼjįʼ yitʼíní íníʼdiishʼįįh doo.
3 Díigi átʼéego Éran éí hodiyingo hazʼą́ąjįʼ yah aníjídáah doo; dóola yázhí éí ádił niʼiidzííhjí nááhániihii átʼéego áádóó deenástsʼaaʼ éí didlidgo nááhániihii átʼéego nínéidiiʼish doo.
4 Ééʼ nineezígíí naʼatʼą́hí łigaii ditsʼidgo bee ályaii dílzinii biih níjídáah doo; tʼáá éí bee tłʼaajiʼééʼ ályaii biih níjítʼis doo, áádóó tʼáá éí bee sis ályaii bee áká nídzílzis doo, índa tʼáá éí bee chʼah dijoolí ályaii hachʼah áńjiilʼįįh doo; díí ééʼ dílzinii ádaatʼé; éí bąą Éran táʼánídígisgo yee háádiitʼįįh doo.
5 Áádóó Ízrel dineʼé dah yinééł bitsʼą́ą́dóó tłʼízíchǫǫh naakigo éí ádił niʼiidzííhjí nááhániihii átʼéego áádóó deenástsʼaaʼ tʼááłáʼígo éí didlidgo nááhániihii átʼéego nínéidiiʼish doo.
6 Áko Éran náázhdiʼyoołnihgo éí dóola yázhí ádił niʼiidzííhjí nááhániihii átʼéego tʼáá hó ádá índa haʼáłchíní ałdóʼ bá bee kʼééhojoołdǫǫłgo náájiiłniih doo.
7 Áádóó tłʼízí naakigo nínéidiiʼishgo níbaal biiʼ dahozdísinii bichʼéédą́ąʼgi Bóhólníihii binááł ninéiʼish doo.
8 Áko Éran éí tłʼízí tʼáá áłah yiniyé yááʼiiltʼeʼ ánáyiilʼįįh doo; kódzaago łaʼ Bóhólníihii bí doo; łaʼígíí éí bééhidichídígíí átʼée doo.
9 Áádóó Éran éí tłʼízí néidiidlóosgo biniyé yááʼiiltʼeʼ ánáyiilʼįįhgo Bóhólníihii bíhígíí néidiiyoołnihgo ádił niʼiidzííhjí nááhániihii átʼéego nááyiiłniih doo.
10 Nidi tłʼízí bééhidichííd biniyé nídiiltínígíí éí tʼáá hináago Bóhólníihii binááł néidiidlóosgo yee kʼééhoołdǫǫł doo, áádóó índa honoojíígóó bihidichíid doo.
11 Áádóó Éran éí dóola yázhí ádá néidiidlóosgo ádił niʼiidzííhjí nááhániihii átʼéego éí tʼáá bí ádá áádóó baʼáłchíní ałdóʼ yá yee kʼééhoołdǫǫł doo biniyé dóola yázhí ádił niʼiidzííhjí nááhániihii átʼéego ádá náyiilyéeh doo.
12 Éran éí tsin bijeeh dilidgo łikání halchinii bee naakáhígíí biiʼ tsííd hadeezbingo bikááʼ nááʼiiniihí siʼánídóó Bóhólníihii binááł néidiikáah doo, índa tsin bijeeh dilidgo łikání halchinii áłtsʼíísígo yitseedígíí bílákʼee hadeezbingo néidiijihgo aláahgo hodiyingo hazʼání góneʼ yah anéíkáah doo.
13 Áádóó Bóhólníihii binááł tsin bijeeh dilidgo łikání halchinii kǫʼ bikáaʼgi néidiłiʼ doo, áko neeznáago bikʼeh óʼooʼníiłii bee bééhániihii bikáaʼgi aa aʼááh hasinii bił hazʼánígi tsin bijeeh dilidgo łikání halchinii bilid hachʼą́ą́h anáʼájoł, ákótʼéego doo dazdootsaał da.
14 Áádóó dóola yázhí bidił łaʼ néidiikáahgo aa aʼááh hasinii bił hazʼánígi haʼaʼaahdę́ęʼgo éí dił yikʼínéíłtah doo, áádóó aa aʼááh hasinii bił hazʼání bitsı̨́įjįʼ tsostsʼidi dił yikʼínéíłtah doo.
15 Áko tłʼízí nááyiilyéehgo ádił niʼiidzííhjí nááhániihii átʼéego Ízrel dineʼé yá nááyiiłniih doo; aláahgo hodiyingo hazʼání góneʼ bidiłígíí yah anéíkáah doo, áádóó dóola yázhí bidił áyiilaaígi átʼéego aa aʼááh hasinii bił hazʼání bikáaʼgi áádóó aa aʼááh hasinii bił hazʼání bidááhdę́ęʼgo bitsı̨́įjįʼ yikʼínéíłtah doo.
16 Áádóó aláahgo hodiyingo hazʼą́ągi bee bá kʼééhoodǫǫłii ánáyiilʼįįh doo, háálá Ízrel dineʼé doo bidaʼdidééhgóó áádóó bee hazʼáanii nidayiitíihgo tʼáá átʼé yee ádił nidaʼiilzííh, índa níbaal biiʼ dahozdísinii ałdóʼ Ízrel dineʼé doo bidaʼdidéehii bitahgi siʼą́.
17 Áko diné doo łaʼ níbaal biiʼ dahozdísinii góneʼ yah azhdoogáał da; Éran éí aláahgo hodiyingo hazʼání góneʼ bee kʼééhoodǫǫłii ííléehgo chʼééhédáahgo índa tʼáá bí ádá áádóó baʼáłchíní bá índa Ízrel dineʼé dah yinéłígíí tʼáá átʼé bá kʼééhoodǫǫłii ánáyiilʼįįh doo.
18 Éran éí Bóhólníihii binááł bikááʼ nááʼiiniihí siʼáníjįʼ chʼééjídáahgo bikááʼ nááʼiiniihí bá kʼééhoodǫǫłii áńjiilʼįįh doo, áádóó dóola yázhí índa tłʼízí bidił łaʼ náázhdiikáahgo éí bikááʼ nááʼiiniihí bideeʼ dı̨́ı̨́ʼgóó deezʼáhígíí bąąh áńjiilʼįįh doo.
19 Áádóó dił yiih nídílchiʼgo łaʼ bikááʼ nááʼiiniihí yikʼijįʼ tsostsʼidi iidoołtahgo yiʼdiłdéeh doo áádóó diyingo nideetʼą́ągo Ízrel dineʼé doo bee biʼdidéehii yitsʼáyiiłdóoh doo.
20 Áko aláahgo hodiyingo hazʼánígíí áádóó níbaal biiʼ dahozdísinii índa bikááʼ nááʼiiniihí ałtso bá kʼénínáhojiłdǫǫhgo tłʼízí tʼáá hináago néidiidlóos doo.
21 Áádóó Éran bílaʼ tʼáá ałchʼijí yee tłʼízí tʼáá hináago bitsiitʼáagi dah nídílnihgo bitsiitʼáagi Ízrel dineʼé doo ákwii ádáátʼįįdígíí tʼáá átʼé áádóó bee hazʼáanii nidayiitíihgo tʼáá átʼé yee ádił nidaʼiisdzíʼígíí bee bá ádaa nináhojilnihgo tłʼízí bitsiitʼáagi kóníjiilʼįįhgo bił bééʼjíłnih doo, áko diné łaʼ yiniyé hashtʼeʼáníʼdiilʼįįhígíí honoojíígóó anéídlóos doo.
22 Áko doo ákwii ádajíítʼįįdígíí tʼáá átʼé tłʼízí bikʼéé diitʼáahgo doo naʼadáhígóó yił anádáah doo, áko diné éí tłʼízí dah néidiidlóosgo honoojíidi yéidichiʼ doo.
23 Áádóó Éran éí níbaal biiʼ dahozdísinii góneʼ yah anádáahgo naʼatʼą́hí łigaii ditsʼidgo bee ééʼ ályaii yiih nádáahgo aláahgo hodiyingo hazʼání góneʼ yee yah anádááh yę́ę háidiiʼniłgo tʼáá ákóneʼ ninéiʼnił doo.
24 Ákohgo hodiyingo hazʼánígi táʼánídígisgo biʼééʼ yiih nádáah doo áádóó chʼééhédáahgo náádiʼyoołnihgo didlidgo nááhániihii ádá nááyiiłniih doo, índa didlidgo nááhániihii diné yá nááyiiłniih doo; kótʼéego tʼáá bí ádá índa diné yá kʼééhoołdǫǫł doo.
25 Ádił niʼiidzííhjí nááhániihii bikʼah éí bikááʼ nááʼiiniihí yikáaʼjįʼ néidiłiʼ doo.
26 Diné éí tłʼízí niiʼohdi yéidichiʼii éí biʼééʼ náyiigis doo áádóó ninábeehgo níbaal haalʼáajįʼ nináhádáah doo.
27 Áádóó dóola yázhí ádił niʼiidzííhjí nááhániihii átʼéego índa tłʼízí ádił niʼiidzííhjí nááhániihii átʼéego nááhaazniiʼii éí bidił yah anákáahgo aláahgo hodiyingo hazʼánígi bee kʼééhoodǫǫłii éí níbaal haalʼá bitsʼáhwiiníʼą́ą́góó anájihgo bikágí áádóó bitsįʼ índa bichaan tʼáá bił áadi nídeidiłiʼ doo.
28 Áko diné éí níʼdíłiʼígíí biʼééʼ náyiigis doo áádóó ninábeeh doo índa níbaal haalʼáajįʼ nínáhádáah doo.
29 Díí yee nihoníʼáanii ahóyéelʼáágóó nihá átʼée doo: tsostsʼid nídízííd binih neeznáá jı̨́ı̨́ góneʼ doo adą́ą́góó nihiiʼ naazíinii dahodísingo sohodizin áńʼdaałʼįįh doo índa tʼáá haʼátʼéegoda doo nidoołnish da; tʼáá nihikéyahdóó danilíinii, doodaiiʼ déʼéyóní tʼóó átsééd nihitahgóó kéédahatʼíinii bił ákódaahtʼı̨́į doo.
30 Jó, éí bijı̨́ nááʼiiłniihii á bee kʼééhoodǫǫłii nihá nááyiiłniihgo doo nihąąh chinígóó ánihizhdoolííł, áko ádił nidaʼiyoosíʼígíí tʼáá átʼé Bóhólníihii binááł ałtso nihąąh táázdoogis.
31 Hááʼáyı̨́ı̨́h jı̨́ nihá átʼée doo; doo adą́ą́góó nihiiʼ naazíinii dahodísingo sohodizin áńʼdaałʼįįh dooígíí yee nihoníʼą́ągo ahóyéelʼáa doo.
32 Áko nááʼiiłniihii éí Éran akʼah hakʼi yeidooziłgo hóósı̨́įʼgo áádóó diyingo bitsʼąą hastiʼii jílı̨́įgo nijilʼaʼ doo biniyé hazhéʼé bitsáskʼehgi nááʼiiłniihii jílı̨́įgo bee kʼééhodoodǫǫłii áńjiilʼįįh doo áádóó naʼatʼą́hí łigaii ditsʼidgo bee ééʼ ályaii dílzinii bee háázhdiitʼįįh doo.
33 Aláahgo hodiyingo hazʼáanii bá, áádóó níbaal biiʼ dahozdísinii áádóó bikááʼ nááʼiiniihí bá kʼééhodoodǫǫłii áńjiilʼįįh doo, áádóó náádaʼiiłniihii índa Ízrel dineʼé tʼáá átʼé bá kʼééhodoodǫǫłii áńjiilʼįįh doo.
34 Ákohgo díí éí hoolʼáágóó yee nihoníʼáanii nihá átʼée doo; Ízrel dineʼé tʼáá bí yee ádił daʼílzíihii tʼáá átʼé tʼáá nínáhah bikʼeh bá kʼééhoodǫǫłii áńjiilʼįįh doo. Áko Bóhólníihii éí Mózes yichʼįʼ yee haadzíʼígíí biʼjiilaa.
