Leviticus 17:1-16
17 Áádóó Bóhólníihii éí Mózes yichʼįʼ haadzíiʼgo ííłní,
2 Éran áádóó biyeʼké áádóó Ízrel dineʼé tʼáá ałtso bił hólneʼ, Bóhólníihii díí yee haadzíiʼgo kóní,
3 Ízrel dineʼé bitahdóó łaʼda éí béégashii, doodaiiʼ dibé yázhí, doodaiiʼ tłʼízída níbaal haalʼáagi, doodaiiʼ níbaal haalʼá bitsʼáhwiiníʼą́ądi yiyiisxı̨́įgo,
4 áko níbaal biiʼ dahozdísinii bichʼéʼétiingi náádiʼyoołnihgo Bóhólníihii yichʼįʼ néidiyoołnihii Bóhólníihii biníbaal biiʼ hodílzinii bichʼéédą́ąʼgi tʼáadoo niyílósí; éí naaldlooshii bidił bitsʼánílı̨́įgo áyiilaaígíí yee ádihodiiltʼiʼ doo, áko bidineʼé bitsʼą́ąjįʼ bidiʼyoolyééł.
5 Díí biniyé Ízrel dineʼé éí náádeidiyoołnihii halgaidi náádahiilniih doo danízin nidi; éí Bóhólníihii bichʼįʼ níbaal biiʼ dahozdísinii bichʼéʼétiinjįʼ nááʼiiłniihii baa dajiiʼéeshgo bee hazʼą́; éí náádayiiłniihii hózhǫ́ǫ́jí nááhániihii átʼéego Bóhólníihii yichʼįʼ náádayiiłniih doo.
6 Áádóó nááʼiiłniihii éí Bóhólníihii bibikááʼ nááʼiiniihí níbaal biiʼ dahozdísinii bichʼéʼétiingi siʼánígíí dił yikʼínéíłtah doo, áádóó akʼahígíí yiidiłidgo Bóhólníihii bichʼįʼ łikání halchin doo.
7 Tʼááká níłchʼi bidaʼiiníziinii yichʼįʼ nínáádaʼiiłniih leʼ lágo, jó, éí bił tłʼééʼ daʼíldééh. Díí éí yee nihoníʼáanii ahóyéelʼáágóó bá átʼéego náás daʼahílchíih doo.
8 Áádóó kóbididííniił, Ízrel dineʼé bitahdóó dinéhígíí łaʼ, doodaiiʼ déʼéyóní nihitahgi tʼóó átsééd kéédahatʼínígíí łaʼ náádiʼyoołnihgo didlidgo nááhániihii, doodaiiʼ nááhidoonihii
9 éí níbaal biiʼ dahozdísinii bichʼéʼétiingi náádiʼyoołnihgo Bóhólníihii bichʼįʼ néidiyoołnihii tʼáadoo niyílósí nááyiisniiʼgo éí bidineʼé bitsʼą́ąjįʼ bidiʼyoolyééł.
Dił tsʼídá doo yidą́ą da
10 Ízrel dineʼé bitahdóó dinéhígíí łaʼ, doodaiiʼ déʼéyóní nihitahgi tʼóó átsééd kéédahatʼíinii łaʼ tʼáá haʼátʼíhída bidił yiyííyą́ąʼgo éí dił jííyą́ąʼii hakʼijįʼ nishłı̨́į doo; éí hodineʼé bitsʼą́ąjįʼ hodiyeeshxééł.
11 Háálá atsʼíís éí dił yee hiná, áádóó éí nihaa diníʼą́ągo bikááʼ nááʼiiniihí bikáaʼgi bee nihá kʼééhodoodǫǫł, háálá diłígíí bee iináago bee á kʼééhoodǫǫłii átʼé.
12 Éí bąą Ízrel dineʼé ábidishní, Nihí doo łaʼ dił doohsı̨́įł da, doodaiiʼ déʼéyóní nihitahgi tʼóó átsééd kéédahatʼíinii doo łaʼ dił yidooyı̨́įł da.
13 Ízrel dineʼé bitahdóó łaʼda, doodaiiʼ déʼéyóní nihitahgi tʼóó átsééd kéédahatʼíinii łaʼda naalzheehgo naaldlooshii, doodaiiʼ nidaatʼaʼii daadánígíí łaʼ shóyoostʼeʼgo łeeshtahjįʼ yizéididoogishgo bidiłígíí yikʼi hwiidoogoł.
14 Háálá atsʼíís ádaatʼéii tʼáá ałtso dił yee dahiná; diłígíí tʼéiyá beʼiinaʼ ádaatʼéego yee dahiná; éí bąą Ízrel dineʼé ábidishní, Tʼáá haʼátʼíhída dabitsʼíís bidił doo dadoohsı̨́įł da, háálá atsʼíís tʼáá ałtso dił yee dahiná; tʼáá háiida éí dił jííyą́ąʼgo hodineʼé bitsʼą́ąjįʼ hodiʼyoolyééł.
15 Áádóó tʼááłáʼí jinítínígo naaldlooshii tʼáá bíniʼdii daaztsáanii, doodaiiʼ naaldlooshii dahashkéii iisxı̨́įgo yiyiisxínígíí bitsįʼ jííyą́ąʼgo éí Ízrel dineʼé jílíinii, doodaiiʼ déʼéyóní jílíinii ákójiidzaago haʼééʼ jidoogis áádóó nizhdoobeełgo iʼííʼą́ąjįʼ tʼah doo hoʼdidéeh da doo, ákódzaago índa hoʼdíídeeʼ doo.
16 Nidi tʼáadoo haʼééʼ dzizgisgóó índa tʼáadoo nidzizbı̨́ı̨́ʼgóó éí tʼáá hó doo ákwii ájíítʼįįdígíí bee ádihozhdiiltʼiʼgo nijigháa doo.
