Leviticus 18:1-30
18 Áko Bóhólníihii éí Mózes yichʼįʼ haadzíiʼgo ííłní,
2 Ízrel dineʼé bichʼįʼ handziihgo kóbidiní, Shí Bóhólníihii nihiDiyin God nishłı̨́.
3 Ííjip kéyah hoolyéedi kéédahohtʼı̨́ı̨́ nítʼééʼ yę́ęgi Ííjip dineʼé ádaatʼínígíí tʼáadoo bikʼehgo ádaahtʼíní; Kéínan kéyah biih nihideeshʼishídi dadineʼé ádaatʼínígíí ałdóʼ tʼáadoo bikʼehgo ádaahtʼíní, doodaiiʼ bibikʼeh hoogáałii tʼáadoo bikʼehgo deínóhkáhí.
4 Bee nihodiishʼaahii bikʼeh ádanohtʼé, índa shibikʼeh hoogáałii bikʼehgo deínóhkááh. Shí Bóhólníihii nihiDiyin God nishłı̨́.
5 Éí bąą bee nihodiyéʼáanii áádóó bee nihodiishʼaahii bikʼehgo ádanohtʼé; éí diné yikʼeh ááníiłgo yee hiná. Shí Bóhólníihii nishłı̨́.
6 Nihí łaʼda áhánígo nihikʼéí nilíinii doo tʼáá łichíʼígo bikʼidiʼdííłtsos da biniyé baa dooháał da, háálá shí Bóhólníihii nishłı̨́.
7 Nizhéʼé doo tʼáá łichíʼígo bikʼidiʼdííłtsos da, doodaiiʼ nimá doo tʼáá łichíʼígo ádíílíił da; éí nimá nilı̨́; tsʼídá doo tʼáá łichíʼígo ádíílíił da.
8 Nizhéʼé beʼasdzą́ą́ doo tʼáá łichíʼígo ádíílíił da, háálá nizhéʼé tʼáá łichíʼígo íinilaago átʼé.
9 Nizhéʼé bitsiʼgo, doodaiiʼ nimá bichʼéʼégo éí tʼáá hooghandi biʼdizhchı̨́įgo, doodaiiʼ háadida biʼdizhchı̨́įgo éí nilah nilı̨́įgo doo tʼáá łichíʼígo ádíílíił da.
10 Niyeʼ bitsiʼ, doodaiiʼ nitsiʼ bichʼéʼé éí doo tʼáá łichíʼígo ádíílíił da, háálá tʼáá jilchíʼígo éí tʼáá ni łiníchíʼígo íʼdiinilyaago átʼé.
11 Nizhéʼé beʼasdzą́ą́ bichʼéʼé doo tʼáá łichíʼígo ádíílíił da; éí nizhéʼé bá yizhchı̨́įgo nilah nilı̨́; tʼááká tʼáá łichíʼígo áwóólééh lágo.
12 Nizhéʼé bilah doo tʼáá łichíʼígo ádíílíił da; éí nizhéʼé áhánígo bikʼéí nilı̨́.
13 Nimá bideezhí doo tʼáá łichíʼígo ádíílíił da, háálá éí nimá áhánígo bikʼéí nilı̨́.
14 Nizhéʼé bikʼis doo tʼáá łichíʼígo ádíílíił da; beʼasdzą́ą́ doo baa nídíítʼįįł da; éí nimá yázhí nilı̨́.
15 Nizhááʼáád doo tʼáá łichíʼígo ádíílíił da; éí niyeʼ beʼasdzą́ą́ nilı̨́; éí tʼááká tʼáá łichíʼígo áwóólééh lágo.
16 Nikʼis beʼasdzą́ą́ doo tʼáá łichíʼígo ádíílíił da; éí nikʼis tʼáá łichíʼígo íinilaago átʼé.
17 Asdzání łaʼ bichʼéʼé biłgo doo tʼáá łichíʼígo ádíílíił da, doodaiiʼ biyáázh bitsiʼ, doodaiiʼ éí bichʼéʼígíí náábichʼéʼégo tʼáá bił doo tʼáá łichíʼígo ádíílíił da, háálá éí áhánígo dabikʼéí danilı̨́, ákónítʼı̨́įgo doo yáʼáshxónígi ííníłʼįįd doo.
18 Neʼasdzą́ą́ yił hááʼáázh niniinaa doo yił ahoolchʼı̨́įd da doo biniyé doo tʼáá łichíʼígo ádíílíił da; łaʼígíí tʼah hináago doo bił ahíidííłtsoł da.
19 Asdzání łaʼ tʼááká baatįįh wóóyaʼgo tʼáá łichíʼígo áwóólééh lágo, jó, éí ąądii silı̨́įʼgo tʼah doo biʼdidééhgóó átʼé.
20 Bił kééhótʼíinii łaʼ beʼasdzą́ą́ doo bił díníítish da, áko doo ádidíílchxǫǫł da.
21 Nihaʼáłchíní dadidoodliłgo Mólek diyin bidiʼníinii tʼáadoo bichʼįʼ ninádahidohʼaahí, doodaiiʼ nihiDiyin God bízhiʼ doo dílzingóó doo ádadoohłíił da. Shí Bóhólníihii nishłı̨́.
22 Tʼáá asdzání bił ashtézhígi átʼéego náánáłaʼ diné doo bił díníítish da; éí doo haldinígi áhátʼíinii átʼé.
23 Doodaiiʼ tʼááká naaldlooshii łaʼ bił nóóteeshgo ádóólchxǫǫh lágo, doodaiiʼ tʼááká asdzání łaʼ naaldlooshii tʼóó yá sizı̨́įgo bá óyeh lágo, jó, éí doo álʼı̨́į da.
24 Díí kódahooníłígíí doo łaʼ bee ádidoołchxǫǫł da; jó, díí tʼáá ałtso éí ałʼąą dineʼé yee ádadoolchxǫʼgo danihitsʼą́ąjįʼ chʼíhinishkaad.
25 Áko díí kéyahgóó bee dahóóchxǫʼ; éí bąą ákwii doo ákwii átʼéii ádajiilaaígíí hakʼi náhwiidleehgo bee haa nídéeshtʼįįł, áko ákwii kéédahojitʼínígíí hakéyah hwénálkwigo hazʼą́.
26 Éí bąą bee nihodiyéʼáanii índa bee nihodiishʼaahii bikʼehgo ádanohtʼée doo, áádóó éí doo haldinígi ádahatʼíinii tʼááká tʼáá bikʼeh dayínóhkááh yíilaʼ; nihidineʼé, doodaiiʼ déʼéyóní nihitahgi tʼóó átsééd kéédahatʼíinii łaʼ tʼááká tʼáá yikʼeh ádaatʼı̨́ yíilaʼ.
27 (Jó, tʼáá nihítséedi kéyahgi diné kéédahatʼı̨́ı̨́ nítʼéʼígíí díí doo haldinii tʼáá ałtso yaa nidaaskai, áko éí bee kéyahgóó dahóóchxǫʼ.)
28 Áko kéyah doo nihídidoołkoh da biniyé kótʼéego doo dadoołchxǫǫł da; shą́ą́ʼ ałʼąą dineʼé ákódaatʼı̨́įgo nihilą́ąjįʼ kéyah bídeeskwi niʼ.
29 Háálá tʼáá háiida díí doo haldinígi ádzaii éí bidineʼé bitsʼą́ąjįʼ bidiʼyoolyééł.
30 Éí bąą shibikʼeh hoogáałii bidaʼołʼı̨́, áko díí bibee éʼélʼįʼ doo yildinii doo łaʼ bikʼeh ádoohníił da; jó, tʼáá nihilą́ąjįʼ yaa nidaaskai, áko éí doo łaʼ bee ádadidoołchxǫǫł da. Shí Bóhólníihii nihiDiyin God nishłı̨́.
