Leviticus 2:1-16
2 Áko łaʼda Bóhólníihii bichʼįʼ akʼáán nááhániihii náájiiłniihgo éí akʼáán dibahí bikʼijįʼ akʼah yaadziidgo índa bikáaʼgi tsin bijeeh dilidgo łikání halchinii fránkinsens wolyéii niijaaʼgo éí náájiiłniihii átʼée doo.
2 Ákohgo éí náádaʼiiłniihii Éran biyeʼké baazhdookááł; éí akʼáán áádóó akʼah łaʼ índa fránkinsens wolyéii tʼáá átʼé bóóltąʼgo bílákʼee hadeezbingo hanéíjihgo nááʼiiłniihii éí bee ééhániihii átʼéego bikááʼ nááʼiiniihí bikáaʼjįʼ néidiłiʼ doo; éí didlidgo nááhániihii Bóhólníihii bichʼįʼ łikání halchingo nááhániihii átʼée doo.
3 Akʼáán nááhániihii yidziihígíí éí Éran áádóó biyeʼké daabí doo; díí aláahgo dílzinii éí Bóhólníihii bichʼįʼ didlidgo nááhániihii átʼé.
4 Bááh bighan góneʼ bááh ádoolníłígíí nááhidííłnihgo éí dííkʼǫsh tʼáágééd akʼah bił ałtahgo ályaii, doodaiiʼ dííkʼǫsh tʼáágééd bááh dáʼákaʼí ályaii akʼah bikʼi yaadziidgo nááhíłniih doo.
5 Áádóó ásaaʼ ditání bee bááh ádoolníłígíí nááhidííłnihgo éí dííkʼǫsh tʼáágééd akʼah bił ałtahgo bááh álʼı̨́į doo.
6 Éí neheeztiʼgo bikʼijįʼ akʼah yanáadziʼ doo; díí akʼáán bee ályaii nááhániihii átʼée doo.
7 Áádóó tseeʼí bee łeesʼáán ádoolníłígíí nááhidííłnihgo akʼáán dibahí éí akʼah bił ałtahgo álʼı̨́į doo.
8 Áko kótʼéego ádaalyaaígíí łaʼ akʼáán bitsʼą́ą́dóó ályaii nááhániihii éí Bóhólníihii bichʼįʼ nááhidííłnihígíí dííʼáałgo nááʼiiłniihii baa dííʼáałgo bikááʼ nááʼiiniihí siʼáníjįʼ yidooʼááł.
9 Áádóó nááʼiiłniihii éí akʼáán bee ályaii nááhániihii łaʼ yéiditih doo, áko éí bee ééhániihii dooleełgo bikááʼ nááʼiiniihí yikáaʼjįʼ néidiłiʼ doo; éí didlidgo nááhániihii Bóhólníihii bichʼįʼ łikání halchinii nááhániihii átʼée doo.
10 Akʼáán bee ályaii nááhániihii daadziihígíí éí Éran áádóó biyeʼké daabí doo; díí aláahgo dílzinii éí Bóhólníihii bichʼįʼ didlidgo nááhániihii átʼée doo.
11 Akʼáán nááhániihii éí Bóhólníihii bichʼįʼ náádahidoołnihii éí dííkʼǫsh tʼáágééd ályaii tʼéí náádahołniih doo; jó, dííkʼǫsh, doodaiiʼ tsésʼná bitłʼizh tʼáadoo dadohłidgo Bóhólníihii bichʼįʼ didlidgo nááhániihii ádeínóhsiní.
12 Éí aneestʼąʼ áłtsé nídantʼı̨́įhii nááhániihii átʼéego Bóhólníihii bichʼįʼ náádahołniih doo, nidi bikááʼ nááʼiiniihí bikáaʼjįʼ tʼáadoo łikání halchin biniyé dadohłidgo náádahołniihí.
13 Índa akʼáán náádahołniihígíí tʼáá ałtso áshįįh biih nídahohjih; Bóhólníihii nihiDiyin God éí áshįįh* yee nihił ahaʼdeetʼáanii tʼáágééd akʼáán doo náádahołniih da doo; náádahołniihii tʼáá ałtso áshįįh bił náádahołniih doo.
14 Aneestʼąʼ átsé nídantʼı̨́įhii bitsʼą́ą́dóó akʼáán nááhániihii éí Bóhólníihii bichʼįʼ náádahołniihgo éí tłʼoh naadą́ą́ʼ bideeʼí bineestʼąʼ áłtsé nídantʼı̨́įhii náneeztʼéego naalzilgo náádahołniih doo.
15 Áko bikʼijįʼ akʼah yanídaohdziʼgo fránkinsens wolyéii bikááʼ dah dadoohjih; díí akʼáán nááhániihii átʼée doo.
16 Áádóó bee ééhániihii átʼéego nááʼiiłniihii éí tłʼoh naadą́ą́ʼ bideeʼí naalzilígíí łaʼ índa akʼah łaʼ éí fránkinsens wolyéii tʼáá átʼé yił yididoołił; éí Bóhólníihii bichʼįʼ didlidgo nááhániihii átʼée doo.
Footnotes
^ Áshįįh chooʼı̨́įgo éí ahaʼdeetʼáanii hoolʼáágóó biʼjiłʼı̨́ jiníigo óolyé.
