Leviticus 20:1-27
20 Áádóó Bóhólníihii éí Mózes yichʼįʼ haadzíiʼgo ííłní,
2 Ízrel dineʼé anáábididííʼniił, Ízrel dineʼé bitahdóó łaʼ, doodaiiʼ déʼéyóní éí Ízrel dineʼé bitahgi tʼóó átsééd kéédahatʼínígíí tʼáá háiida baʼáłchíní łaʼ Mólek diyin bidiʼníinii yichʼįʼ nááyiisniiʼgo éí tʼáá aaníí bidiʼyoolyééł; kéyahdóó tsé yee hoł nidazdoołniił.
3 Áko éí dinéhígíí hakʼijįʼ deeshłeełgo hadineʼé bitsʼą́ąjįʼ hodiyeeshxééł, háálá haʼáłchíní łaʼ Mólek diyin bidiʼníinii bichʼįʼ náájiisniiʼgo shihodiyingo hazʼánígíí jííłchxǫʼ áádóó shízhiʼ diyinígíí doo dílzingóó ájiilaa.
4 Áko kéyahgi kéédahojitʼínígíí éí Mólek diyin bidiʼníinii yichʼįʼ diné baʼáłchíní łaʼ nááyiisniiʼígíí tʼáadoo baa nídajistʼįįdgóó índa tʼáadoo dajiisxı̨́ı̨́góó
5 éí dinéhígíí baʼáłchíní tʼáá bił bikʼijįʼ nishłı̨́įgo áádóó tʼáá ałtso hakékʼeh dookaigo Mólek diyin bidiʼníinii bikʼehgo ajił baa jideeskaígíí hadineʼé bitsʼą́ąjįʼ nidahodeestsxił.
6 Áádóó diné tʼáá háiida chʼı̨́įdii yádabiiłtiʼii índa daʼdiłgąshii bikééʼ dashdiiyáago ajił baa nijigháhígíí hakʼijįʼ nishłı̨́į doo, índa hadineʼé bitsʼą́ąjįʼ hodiyeeshxééł.
7 Éí bąą tʼáá nihí diyingo ádaʼdołnééh, áko dadinohyin doo, háálá shí Bóhólníihii nihiDiyin God nishłı̨́.
8 Áádóó bee nihoyéʼáanii bikʼeh dahonołʼı̨́įgo bidaʼołʼı̨́į doo; shí Bóhólníihii nishłíinii dadinohyingo ánihíínísin.
9 Háálá tʼáá háiida éí hazhéʼé, doodaiiʼ hamá dadzódziihígíí tsʼídá hodiʼyoolyééł; hazhéʼé, doodaiiʼ hamá dzíídzíʼígíí bąą hadił tʼáá hó hakʼéidootʼih.
10 Diné éí diné náánáłaʼ beʼasdzą́ągo tʼáá éí bił kééhojitʼíinii beʼasdzą́ą́ nilı̨́įgo bił ahizhdoolyáago éí diné áádóó bił ahizhdoolyáhígíí tʼáá bił nidahoditseed doo.
11 Áádóó diné łaʼ bizhéʼé beʼasdzą́ą́ yił neezhtéezhgo éí hazhéʼé tʼáá łichíʼígo ájiilaago átʼé; éí tʼáá ájíłah tsʼídá nahodiʼdootsxił ni; hadił tʼáá hó hakʼéidootʼih.
12 Diné łaʼ bizhááʼáád yił neezhtéezhgo éí tʼáá ájíłah tsʼídá nahodiʼdootsxił ni; tʼáadoo éʼélʼı̨́įgi ádziidzaaígíí bąą hadił tʼáá hó hakʼéidootʼih.
13 Diné łaʼ éí tʼáá diné nilı̨́įgo yił neezhtéezhgo asdzání bił aneezhtézhígíigi átʼéego éí tʼáá ájíłah doo haldinígi ádziidzaago átʼé; éí tsʼídá nahodiʼdootsxiłgi hadił tʼáá hó hakʼéidootʼih.
14 Diné łaʼ éí asdzání áádóó bimá tʼáá bił hweʼasdzą́ą́ ájiilaago éí doo yáʼáshónígi áhóótʼįįdii átʼé; éí tʼáá hwíighah adahodidoolkʼą́ą́ł; hó áádóó asdzání tʼáá áłah bił akóhodiʼdoolnííł, áko nihitahgi doo yáʼáshóonii doo hólǫ́ǫ da doo.
15 Áádóó diné łaʼ naaldlooshii yáʼázyehgo éí diné tsʼídá diyoolyééł, índa naaldlooshii ałdóʼ diyoolyééł.
16 Áko asdzání łaʼ naaldlooshii yaa níyáago báʼázyehgo éí asdzání diyoolyééł, naaldlooshii ałdóʼ; tsʼídá nahodiʼdootsxiłgi hadił tʼáá hó hakʼéidootʼih.
17 Índa diné łaʼ hazhéʼé bitsiʼ, doodaiiʼ hamá bichʼéʼé bił ahizniidzı̨́įʼgo áádóó hoł neezhtéezhgo éí doo yáʼáshóonii átʼé; hadineʼé binááł nahodiʼdootsxił, háálá halah tʼáá łichíʼígo ájiilaa; tʼáá hó doo ákwii ájíítʼįįdígíí tsʼídá bee hohodiitʼiʼ doo.
18 Diné łaʼ éí asdzání ąądii nilı̨́įgo bił jineezhtéezhgo áádóó tʼáá łichíʼígo ájiilaago chooyin silı̨́ʼígíí jiiłtsą́ áádóó asdzání tʼáá bí íinízingo ákójiilaa, áko tʼáá ájíłah hodineʼé bitsʼą́ąjįʼ hodiʼyoolyééł.
19 Nimá yił hááʼáázh, doodaiiʼ nizhéʼé bilah doo tʼáá łichíʼígo ádíílíił da, háálá éí hánígo hakʼéí nilíinii tʼáá łichíʼígo ájiilaa, áko tʼáá ájíłah doo ákwii ájíítʼįįdígíí bee hohodiitʼiʼgo nijiʼaash doo.
20 Diné łaʼ hadáʼí, doodaiiʼ hazhéʼé yázhí beʼasdzą́ą́ bił jineezhtéezhgo éí hadáʼí, doodaiiʼ hazhéʼé yázhí tʼáá łichíʼígo ájiilaago átʼé; ádił adzisiihígíí bee hohodiitʼiʼgo nijiʼaash doo, índa haʼáłchíní doo hodooleełgóó áhodiʼdoolníiłgo jidínóonééł.
21 Diné łaʼ yił hááʼáázh beʼasdzą́ą́ bighajíltı̨́įgo éí doo bee hoʼdidoodahii ájiilaago átʼé; éí yił hááʼáázh tʼáá łichíʼígo áyiilaago átʼé; éí haʼáłchíní doo hodooleeł da.
22 Éí bąą bee nihodiyéʼáanii tʼáá átʼé bikʼeh dahonołʼı̨́į doo índa bee nihodiishʼaahii tʼáá átʼé bidaʼołʼı̨́į doo, áko kéyah biih nihideeshʼishígíí doo nihídoołkoh da.
23 Dineʼé nihitsʼą́ąjįʼ chʼíhinishkaadígíí éí deíkáhígi átʼéego tʼáadoo deínóhkáhí, háálá éí díí tʼáá átʼé yaa nidaakaigo ádayoołííł; éí bąą bikʼee dinishʼniih.
24 Nidi ánihidííniid, Dabikéyah danihííʼ dooleeł, nihaa dideeshʼáałgo nihííʼ ádadoohłííł; éí kéyah biiʼ abeʼ áádóó tsésná bitłʼizh bee ádaʼazįįd; jó, shí Bóhólníihii nihiDiyin God nishłı̨́; éí ałʼąą dineʼé bitsʼánihinínilígíí áshtʼı̨́.
25 Éí bąą naaldlooshii daadánígíí áádóó doo daadánígíí índa nidaatʼaʼii doo daadánígíí áádóó daadánígíí nihił ałʼąą átʼéii átʼé. Áko naaldlooshii, doodaiiʼ nidaatʼaʼii, doodaiiʼ tʼáá haʼátʼíhída nihokááʼgóó nidaaʼnaʼii tʼááká bee baaʼihii ádaʼdoołnééh lágo, éí nihitsʼádiníʼą́ągo doo dadoohsı̨́ı̨́łgóó ánihiishłaa.
26 Áko nihí shichʼįʼgo dadinohyin doo, háálá shí Bóhólníihii tsʼídá dinishyin, ałʼąą dineʼé bitsʼánihidiníʼą́, áko shííʼ dadoohłeeł.
27 Diné łaʼ, doodaiiʼ asdzání łaʼ chʼı̨́įdii yábiiłtiʼii, doodaiiʼ adiłgąshii nilı̨́įgo éí tsʼídá nidabidiʼtseed doo; tsé bee bił nidahizdoolniiłgi bidił tʼáá bí bikʼéidootʼih.
