Leviticus 21:1-24
21 Áádóó Bóhólníihii éí Mózes ííłní, Éran biyeʼké náádaʼiiłniihii danilíinii bichʼįʼ handziihgo kóbidiní, Łaʼda dadziztsą́ągo hadineʼé bitahgi doo bee ádizhdoolchxǫǫł da.
2 Tʼáá hazhóʼó áhánígo hakʼéígíí éí hamáda, hazhéʼéda, hayeʼda, hatsiʼda áádóó bił hajííʼáazhda,
3 índa halah tʼah chʼikę́ę́h nilı̨́įgo áhánígo hakʼéígíí éí tʼah doo bahastiin haleehígíí éí tʼéí bee ázhdidoolchxǫǫł.
4 Doo niʼízhdiilchxǫǫh da doo; jó, hodineʼé bitahgi aląąjįʼ sizíinii jílı̨́; doo ákójítʼı̨́ı̨́góó doo hodílzin náhoołbaʼ doo.
5 Hatsiiʼ doo dazhdooshih da, doodaiiʼ hadághaaʼ ałtsʼą́ą́hjí doo dazhdooshih da, doodaiiʼ hatsʼíís doo ahidajiigéesh da doo.
6 HaDiyin God bichʼįʼgo dazhdiyin doo, áádóó haDiyin God bízhiʼ doo dílzingóó doo ádadzósin da doo, háálá Bóhólníihii bichʼįʼ didlidgo náádahaniihii éí haDiyin God bibááh átʼéego náádajiiłniih; éí bąą dazhdiyin doo.
7 Áádóó asdzání ałjiłnii doo hweʼasdzą́ą́ ázhdoolíił da, doodaiiʼ doo hodílzin kʼehgo átʼéii ałdóʼ dooda; bahastiin yóóʼabidííʼáanii nidi doo bázhʼdooyeh da, háálá hó éí haDiyin God bichʼįʼgo jidiyin.
8 Éí bąą jidiyingo áhodíílííł, háálá niDiyin God bibááh náájiiłniih; nihichʼįʼgo jidiyin doo; jó, shí éí Bóhólníihii nishłı̨́įgo dadinohyingo ánihíínísinii dinishyin.
9 Áádóó nááʼiiłniihii łaʼda bitsiʼ doo ádá hodílzinii ajił nábiiłbaʼgo doo ádá hodílzinii bee bizhéʼé náyiiłbaʼ doo, áko chʼikę́ę́h abidiʼdoolkʼą́ą́ł.
10 Áko hakʼisóó bitahgi aláahgo nááʼiiłniihii jílínígíí hatsiitʼáagi akʼah akʼi yaadziidgo bee alzı̨́įhii áádóó diyingo bitsʼąą hastiʼii áhoʼdiilyaago ééʼ dílzinii biishdoogáłígíí éí doo hatsiiʼ bikʼizdiʼdoołtsos da, doodaiiʼ haʼééʼ doo azdoozǫ́ǫs da.
11 Doodaiiʼ atsʼíís daaztsáanii doo bitʼáahjįʼ jidoogáał da, azhą́ hazhéʼé índa hamá nidi biniinaa doo ázhdidoolchxǫǫł da.
12 Doodaiiʼ hodiyingo hazʼą́ą́dóó doo chʼízhdoogáał da, doodaiiʼ tʼááká doo ádá hodílzinii bee haDiyin God bihodiyingo hazʼánígíí yółchxǫǫh lágo, háálá haDiyin God bitsʼą́ą́dóó akʼah hakʼi yaadziidgo bee hoʼdoolzı̨́ı̨́ʼ; jó, shí Bóhólníihii nishłı̨́.
13 Chʼikę́ę́h tʼah doo diné bee haleehii éí hweʼasdzą́ą́ dooleeł.
14 Asdzání bąąh áhásdįįdii, doodaiiʼ bahastiin yóóʼabidííʼáanii, doodaiiʼ doo hodílzin kʼehgo átʼéii, doodaiiʼ ałjiłnii nilíinii éí doo hweʼasdzą́ą́ ázhdoolíił da, nidi tʼáá hó hodineʼé bitahdóó chʼikę́ę́h tʼah doo diné bee haleehii éí hweʼasdzą́ą doo.
15 Ákótʼéego hadineʼé bitahgóó haʼáłchíní éí doo hodílzin kʼehgo átʼéii doo danilı̨́ı̨́góó ahoolchíił doo; jó, shí Bóhólníihii nishłíinii jidiyingo áhwíínísin.
16 Áádóó Bóhólníihii éí Mózes ííłní,
17 Éran bichʼįʼ handziihgo ábidiní, Nitsʼą́ą́dóó náás ahoolchíłígíí bitahdóó tʼáá háiida tʼáá haʼátʼéegoda bąąh dahazʼą́ągo éí haDiyin God bibááh doo nááhizhdoołnih da.
18 Diné hąąh dahazʼáanii, doodaiiʼ doo ajooʼíinii, doodaiiʼ nazhʼniłhodii, doodaiiʼ hatsiitsʼiin bąąh tʼáá haʼátʼéegida digizgo, doodaiiʼ hatsʼíís tʼáá haʼátʼéhígida alááh níísą́ągo éí doo Diyin God bichʼįʼ náázhdiʼyoołnih da.
19 Hakeeʼ, doodaiiʼ hálaʼ kʼéʼéltǫʼii éí dooda.
20 Doodaiiʼ hwíígháán askʼidgo, doodaiiʼ diné chilí jílı̨́įgo, doodaiiʼ hanááʼ bąąh dahazʼą́ągo, doodaiiʼ hakááʼgóó łóodgo, doodaiiʼ hakááʼgóó sidgo, doodaiiʼ hayęęzhii sitsʼilgo.
21 Nááʼiiłniihii Éran bitsʼą́ą́dóó náás oochíiłii bitahdóó diné łaʼ ákótʼéego bąąh dahazʼą́ągo éí Bóhólníihii bichʼįʼ didlidgo nááhániihii doo nááhizhdoołnih da; éí hąąh dahazʼánígíí biniinaa haDiyin God bibááh doo nááhizhdoołnih da.
22 HaDiyin God bibááh níjídı̨́įh doo; aláahgo dadiyinígíí áádóó dadiyingoígíí tʼáá áłah jiyą́ą doo.
23 Nidi dáádiníbaal bineʼ góneʼ, doodaiiʼ bikááʼ nááʼiiniihí doo bichʼįʼ nizhdoogáał da, háálá hąąh dahazʼą́, áko éí shihodiyingo nahazʼánígi doo nihozhdiyoołchxǫǫł da; jó, shí Bóhólníihii nishłı̨́įgo dazhdiyingo áhwíínísin.
24 Áko Mózes éí Éran áádóó biyeʼké índa Ízrel dineʼé tʼáá ałtso díí yee yił hoolneʼ.
