Leviticus 22:1-33
22 Áádóó Bóhólníihii éí Mózes ííłní,
2 Éran áádóó biyeʼké bichʼįʼ handziihgo kóbidiní, Ízrel dineʼé éí deidísingo dílzinii shaa nídeidiiʼaahígíí doo haʼátʼéegoda ádayósin da doo, áádóó shízhiʼ dílzinii tʼááká doo dílzinii ádayóleʼ lágo, jó, shí Bóhólníihii nishłı̨́.
3 Kóbidiní, Nihitsʼą́ą́dóó náás ahoołchíiłii tʼáá ánółtso nihitahdóó dílzingo aa náhiditʼaahii biniyé yah ajííyáago éí Ízrel dineʼé Bóhólníihii yaa nídeidiiʼaahgo deidísinígi átʼéego éí tʼahdii doo hoʼdidééhgóó yah ajííyáago honishłóní bitsʼą́ąjįʼ hodiʼyoolyééł; jó, shí Bóhólníihii nishłı̨́.
4 Éran bitsʼą́ą́dóó yichíiłii tʼáá háiida łóód atsʼíís yiyáanii naałdzidii bee bąąh dahazʼą́ągo, doodaiiʼ naałniih bitsʼíís bitsʼą́ą́dóó háálı̨́įgo éí dílzingo shaa náhiditʼaahii doo łaʼ yidooyı̨́įł da; hoʼdíídeeʼgo índa. Łaʼ atsʼíís daaztsáanii bee tʼóó baaʼih silı̨́įʼii, doodaiiʼ diné łaʼ bíígąsh háánaʼii bíhizhdééʼnáaʼgo,
5 doodaiiʼ tʼáá haʼátʼíhída nidaaʼnaʼii łaʼ daaztsą́ągo bíhizhdééʼnáaʼgo tʼáá haa dayitʼéego doo hoʼdidééh áhoolaagóó, doodaiiʼ diné doo biʼdidéehii bíhizhdééʼnáaʼgo éí tʼáá haʼátʼéegoda doo biʼdidééhgóó
6 éí ákódaatʼéii łaʼ bíhizhdiyiiʼnáhígíí iʼííʼą́ąjįʼ doo hoʼdidéeh da doo; dílzingo shaa náhiditʼaahígíí doo łaʼ yidooyı̨́įł da; tʼáá hazhóʼó naabeehgo tʼéiyá.
7 Iʼííʼą́ągo índa hoʼdidoodah, áádóó bikʼijįʼ índa dílzingo shaa náhiditʼaahígíí yidooyı̨́ı̨́ł; jó, éí bichʼiyąʼ átʼé.
8 Tʼáá bíniʼdii daaztsánígíí, doodaiiʼ naaldlooshii nibiisdládígíí tʼááká yóyą́ąʼgo yee ádólchxǫǫh lágo, jó, shí éí Bóhólníihii nishłı̨́.
9 Éí bąą shibikʼeh hoogáałii bikʼeh ádajooníił doo, áko ádił daʼdzisiihígíí doo bee hodahodiitʼiʼgo dajíkáah da doo áádóó doo dazdísinígíí biniinaa tʼóó jidínóonééł; jó, shí Bóhólníihii nishłı̨́įgo dazhdiyingo áhwíínísin.
10 Diné tʼáá azlı̨́ʼígíí éí dílzingo shaa náhiditʼaahígíí doo łaʼ yidooyı̨́įł da; tʼóó átsééd yił bighango, doodaiiʼ adeenáago bá naalnishii dílzingo shaa náhiditʼaahígíí doo łaʼ yidooyı̨́įł da.
11 Nidi nááʼiiłniihii tʼáá bí bibéeso yee naalteʼ nayiisʼniiʼgo áádóó bighangi yizhchíinii éí dílzingo shaa náhiditʼaahígíí yidooyı̨́ı̨́ł.
12 Nááʼiiłniihii bitsiʼ éí diné tʼáá azlı̨́ʼígíí yił ahaa yítʼáazhgo éí dílzingo shaa nídeidiiʼaahígíí łaʼ nááyiisniiʼii doo łaʼ yidooyı̨́įł da.
13 Nidi nááʼiiłniihii bitsiʼ bąąh áhásdįįdgo, doodaiiʼ bahastiin yóóʼabidííʼą́ągo índa baʼáłchíní ádingo éí tʼáá ániid nijigháádą́ą́ʼ ájítʼé yę́ęgi átʼéego hazhéʼé bighangi nídzídzáago éí hazhéʼé bichʼiyąʼ jiyą́ą doo, nidi diné tʼáá azlı̨́ʼígíí éí doo yidooyı̨́įł da.
14 Índa diné łaʼ dílzingo shaa náhiditʼaahígíí doo bił bééhózingóó yiyííyą́ąʼgo bą́ą́h ílínígíí éí ashdlaʼgo ałtsʼáádzoígíí tʼááłáʼí haadzogo bínéizdoozohgo nááʼiiłniihii bichʼįʼ nizhdoolééł.
15 Áko Ízrel dineʼé éí dílzingo Bóhólníihii yaa nídeidiiʼaahígíí tʼááká doo dílzingóó ádayólééh lágo, jó, éí Bóhólníihii yichʼįʼ náádayiiłniih.
16 Áko dílzingo shaa nídeidiiʼaahígíí doo dazdísingóó dajííyą́ąʼgo doo ákwii átʼéii bee Ízrel dineʼé bidahodiitʼiʼgo deíkáahgo ádazhdoolííł; jó, shí Bóhólníihii nishłı̨́įgo dazhdiyingo áhwíínísin.
17 Áádóó Bóhólníihii éí Mózes ííłní,
18 Éran áádóó biyeʼké índa Ízrel dineʼé tʼáá ałtso bichʼįʼ handziihgo kóbidiní, Ízrel dineʼé bitahdóó łaʼ, doodaiiʼ déʼéyóní éí Ízrel kéyahgi kéédahatʼíinii łaʼ náádiʼyoołnihgo éí yee ádee haadzíiʼii tʼáá átʼé índa tʼáá bí íinízingo nááyiiłniihii tʼáá átʼé éí Bóhólníihii bichʼįʼ didlidgo nááhániihii náádayiiłnihgo
19 tʼáá nihí ádeinohsingo dóola, doodaiiʼ deenástsʼaaʼ, doodaiiʼ tłʼízíchǫǫh hadaałtʼéii náádahołniih doo.
20 Nidi bąąh dahazʼánígíí doo łaʼ náádahidoołnih da; éí Bóhólníihii doo nihá yidínóozįįł da.
21 Áádóó tʼáá háiida náádiʼyoołnihgo nááhidoonihii hózhǫ́ǫ́jí nááhániihii átʼéego Bóhólníihii bichʼįʼ néidiyoołnihgo yee ádee haadzíiʼii, doodaiiʼ tʼáá bí íinízingo nááyiiłniihii éí béégashii, doodaiiʼ dibé hadaałtʼéii tʼáá noodzı̨́ʼígi átʼéii nááyiiłniih doo; doo tídiilyaii tʼéí nááhániih doo.
22 Alı̨́ı̨́ʼ doo ooʼı̨́ı̨́góó, doodaiiʼ bitsʼin kʼéʼéltǫʼgo, doodaiiʼ bąąh dahazʼáanii, doodaiiʼ łóód,* doodaiiʼ dishchʼid* bąąh hólóonii, doodaiiʼ bikááʼgóó sidgo kódaatʼéhígíí doo Bóhólníihii bichʼįʼ nááhidoołnih da, doodaiiʼ éí bikááʼ nááʼiiniihí bikáaʼjįʼ doo didlidgo nááhániihii Bóhólníihii bichʼįʼ nááhidoołnih da.
23 Dóola yázhí, doodaiiʼ dibé yázhída éí bitsʼíís tʼáá haʼátʼéhígida alááh, doodaiiʼ aʼoh níísánígíí éí náádiʼyííłnihgo tʼáá ni íinínízingo nááhániihii tʼéí nááhíłniih doo, nidi ádee háínídzííʼjí nááhániihii átʼéego éí doo ná dínóodzįįł da.
24 Alı̨́ı̨́ʼ bichoʼ ayęęzhii yishtłishii, doodaiiʼ yishjizhii, doodaiiʼ sitsʼilii, doodaiiʼ haaʼnilii éí doo Bóhólníihii bichʼįʼ náádahidoołnih da, doodaiiʼ ákótʼéhígíí nihikéyahgi doo náádahidoołnih da.
25 Doodaiiʼ déʼéyóní bitsʼą́ą́dóó díí haʼátʼíhída łaʼ nihiDiyin God bibááh átʼé; doo óolzinii éí doo náádahidoołnih da, háálá éí yíchxǫʼgo áádóó bąąh dahazʼą́ągo átʼé; éí doo nihá dínóodzįįł da.
26 Áádóó Bóhólníihii éí Mózes ííłní,
27 Dóola yázhí, doodaiiʼ dibé yázhí, doodaiiʼ tłʼízí yázhí yichíihgo bimá tʼáá yił naaʼaashgo tsostsʼid yidoołkááł, áko tseebíí yiską́ą́dóó bikʼijįʼ índa éí Bóhólníihii bichʼįʼ didlidgo nááhániihii átʼéego dínóodzįįł.
28 Áádóó béégashii, doodaiiʼ dibétsaʼii biyázhí tʼáá bił doo tʼáá łaʼóo jı̨́ nidadoołtsił da.
29 Índa náádiʼyííłnihgo nááhidoonihii bee ahééh hwiindzingo nááhániihii Bóhólníihii bichʼįʼ náádahołniihgo éí tʼáá nihí ádeinohsingo náádahołniih doo.
30 Tʼáá éí bijı̨́ ałtso dadoohsı̨́ı̨́ł; biiskání doo łaʼ tʼáá yidziih da doo; jó, shí Bóhólníihii nishłı̨́.
31 Éí bąą shibikʼeh óʼooʼníiłii bikʼeh dahonołʼı̨́įgo bidaʼołʼı̨́į doo; jó, shí Bóhólníihii nishłı̨́.
32 Doodaiiʼ shízhiʼ dílzinii tʼááká doo dílzinii ádaohłeʼ lágo, nidi Ízrel dineʼé bitahgóó dashizdósin doo; jó, shí Bóhólníihii diyingo atsʼánihidiníʼáanii nishłı̨́.
33 Shí tʼéiyá nihiDiyin God nishłı̨́į doo biniyé Ííjip kéyahdę́ę́ʼ dah nihidiiʼeezh; jó, shí Bóhólníihii nishłı̨́.
Footnotes
^ Wen wolyéii éí atsiiʼ bąąh hadzííyá óolyé.
^ Scurvy wolyéii éí naałniih atsʼíís bidadilnaʼii óolyé.
