Leviticus 23:1-44
23 Áádóó Bóhólníihii éí Mózes yichʼįʼ haadzíiʼgo ííłní,
2 Ízrel dineʼé bichʼįʼ handziihgo kóbidiní, Bóhólníihii bichʼįʼ hodílzingo áłah náʼádleeh baa náhwiilzhíishgo nídeitʼaahígíí baa chʼéédahohtʼáah doo; díí hodílzingo áłah náʼádleeh bee náhooshʼaahii átʼé.
3 Tʼáá hastą́ą́h jínígo tʼéí ninádaałnish doo, nidi tsostsʼid jı̨́ı̨́ góneʼ hááʼáyı̨́ı̨́h jı̨́ átʼéego dahodíínóhsingo áłah náhdleeh doo; éí bijı̨́ tsʼídá doo naʼanish da doo; díí éí tʼáá danihiníghangóó tʼáá ałtso Bóhólníihii bihááʼáyı̨́ı̨́h jı̨́ átʼée doo.
4 Díí Bóhólníihii bichʼįʼ hodílzingo áłah náʼádleeh baa náhwiilzhíishgo nídeitʼaahígíí éí baa nídahwiilzhish góneʼ baa chʼéédahohtʼáah doo.
5 Átsé nídízííd binih dı̨́ı̨́tsʼáadahgóó yoołkáałgo iʼííʼą́ągo Bóhólníihii biʼatisʼadeesdzáii bee bééhániihii hahalzhíísh.
6 Áádóó tʼáá éí yiziłígíí binih ashdlaʼáadah yoołkáałgo dííkʼǫsh tʼáágééd bááh ályaii bee Bóhólníihii bichʼįʼ hodílzingo áłah náʼádleeh néitʼaah doo; tsostsʼid jı̨́ dííkʼǫsh tʼáágééd bááh ályaii nídaahdı̨́įh doo.
7 Hahóóyá bijı̨́ nihił dahodiyingo áłah náhdleeh doo; éí bijı̨́ doo nidoołnish da.
8 Nidi tsostsʼid jı̨́ Bóhólníihii bichʼįʼ didlidgo nááhániihii náádahołniih doo; tsostsʼid yiską́ą́ góneʼ hodílzingo áłah náhdleehgo ákóneʼ doo nidoołnish da.
9 Áádóó Bóhólníihii éí Mózes yichʼįʼ haadzíiʼgo ííłní,
10 Ízrel dineʼé bichʼįʼ handziihgo kóbidiní, Kéyah nihaa dinishʼaahígíí biih woonáago daʼohizhgo áłtsé neestʼáanii éí łaʼ beʼastłʼǫ́ǫgo nááʼiiłniihii baa nídaołjoł doo.
11 Áádóó tłʼoh naadą́ą́ʼ beʼastłʼónígíí Bóhólníihii yichʼįʼ náásee yił nídiʼdilnih doo; nihidínóozįįł biniyé hááʼáyı̨́ı̨́h jı̨́ biiłkáhí nááʼiiłniihii éí náásee yił nídiʼdilnih doo.
12 Áádóó tʼáá éí bijı̨́ tłʼoh naadą́ą́ʼ beʼastłʼónígíí náásee bił nídadołnihgo dibé yázhí bikąʼii łaʼ binááhaaí hadaałtʼéii didlidgo nááhániihii átʼéego Bóhólníihii bichʼįʼ náádahołniih doo.
13 Índa ómer bee íʼneelʼąąhí bee akʼáán dibahí naakidi haaką́ągo éí akʼah bił ałtahgo náádahołniih doo; éí didlidgo łikání halchingo Bóhólníihii bichʼįʼ nááhániihii átʼé, áádóó yanáadziʼgo nááhániihii éí wáin tʼááłáhídi yikááł bíighahgo náádahołniih doo.
14 Tłʼoh naadą́ą́ʼ átsé daneestʼánígíí bááh ályaago, doodaiiʼ sitʼéego, doodaiiʼ tʼáadoo sitʼéhí tʼááká daohsą́ą́ʼ lágo, nihiDiyin God átsé bichʼįʼ náádahoołniiʼgo índa tʼáá éí bijı̨́ dadoohsı̨́ı̨́ł; bee nihoníʼáanii ahóyéelʼáágóó náás daʼahíínółchííhgóó tʼáá danihiníghangóó tʼáá ałtso nihá átʼée doo.
15 Hááʼáyı̨́ı̨́h jı̨́ biiłkáhí tłʼoh naadą́ą́ʼ tʼááłáʼí ałchʼįʼ beʼastłʼǫ́ǫgo náádadoołjołgo náásee bił nídiʼdilnihígíí náádahoołniiʼgo éí bijı̨́ı̨́dóó tsostsʼidi hááʼáyı̨́ı̨́h jı̨́ niʼiileehgo deínółtaʼ doo.
16 Áádóó tsostsʼidi hááʼáyı̨́ı̨́h jı̨́ azlı̨́ı̨́ʼdóó biiłkáhíjįʼ ashdladiin jı̨́ azlı̨́įʼgo deínółtaʼ doo, áko náádadiʼyoołnihgo náánáłaʼ akʼáán nááhániihii éí Bóhólníihii bichʼįʼ náádahołniih doo.
17 Áko ómer bee íʼneelʼąąhí bee akʼáán dibahí naakidi haaką́ągo éí tʼáá nihighandi dííkʼǫsh bił bááh ályaaígíí náásee bił nídiʼdilnihii naakigo éí Bóhólníihii bichʼįʼ náádahołniih doo; éí átsé neestʼáanii Bóhólníihii bíhígíí átʼé.
18 Áádóó náádadiʼyoołnihgo bááh náádahołniihígíí bił dibé yázhí tsostsʼidgo łaʼ béédááhaaí dabikąʼígíí hadaałtʼéii áádóó dóola yázhí tʼááłáʼígo índa deenástsʼaaʼ naakigo éí Bóhólníihii bichʼįʼ didlidgo nááhániihii ádaatʼéego akʼáán nááhániihii áádóó yanáadziʼgo nááhániihii óóltąʼgo didlidgo nááhániihii Bóhólníihii bichʼįʼ łikání halchinii átʼéego náádahołniih doo.
19 Ákohgo índa náádahidoołnihii tłʼízíchǫǫh tʼááłáʼígo ádił niʼiidzííhjí nááhániihii átʼéego áádóó deenástsʼaaʼ łaʼ binááhaaí naakigo nááhidoonihii hózhǫ́ǫ́jí nááhániihii átʼéego náádahołniih doo.
20 Áko nááʼiiłniihii éí náásee bił nídiʼdilnihgo náádahaniihii átsé neestʼáanii bitsʼą́ą́dóó bááh ályaii Bóhólníihii bichʼįʼ náásee yił nídiʼdilnihii átʼéego dibé yázhí naakigo bóóltąʼgo nááyiiłniih doo; éí Bóhólníihii bichʼįʼ dílzinii átʼéego nááʼiiłniihii bá átʼée doo.
21 Áádóó tʼáá éí bijı̨́ bee hááʼádzih doo, áko nihichʼįʼgo dílzingo áłah náʼádleehígíí átʼée doo, áádóó éí bijı̨́ doo nidoołnish da; díí bee nihoníʼáanii ahóyéelʼáágóó tʼáá danihiníghangóó tʼáá ánółtso nihá átʼéego náás daʼahíínółchíih doo.
22 Ákohgo nihikéyahgi daʼohizhgo dáʼákʼeh nídaastłʼahgóó tʼáadoo ałtso daohizhí, doodaiiʼ nidahineezdeeʼígíí tʼáadoo nínáádahohdlahí; bíniʼ éí badahojoobáʼígíí índa déʼéyóní danilíinii nihitahgóó kéédahatʼíinii bá áá dahohsįįh; jó, shí Bóhólníihii nihiDiyin God nishłı̨́.
23 Áádóó Bóhólníihii éí Mózes yichʼįʼ haadzíiʼgo ííłní,
24 Ízrel dineʼé bichʼįʼ handziihgo kóbidiní, Tsostsʼid nídízííd binih łaʼa jı̨́ı̨́ góneʼ hááʼáyı̨́ı̨́h jı̨́ deidoołʼaałgo bee ééhániihii átʼéego dilní didootsʼı̨́įłgo hodílzingo áłah doohłeeł.
25 Ákóneʼ doo nidoołnish da, nidi náádahidoołnihii Bóhólníihii bichʼįʼ didlidgo náádahołniih doo.
26 Áádóó Bóhólníihii éí Mózes yichʼįʼ haadzíiʼgo ííłní,
27 Áádóó ałdóʼ díí tsostsʼid nídízííd binih neeznáá jı̨́ı̨́ góneʼ éí á kʼééhodoodǫǫłgo yoołkáłígíí átʼé; éí hodílzingo áłah náhdleehígíí nihá átʼée doo, ákóneʼ doo adą́ą́góó nihiiʼ naazíinii dahodísingo sohodizin áńdaałʼįįh doo, áko náádahidoołnihii Bóhólníihii bichʼįʼ didlidgo náádahołniih doo.
28 Tʼáá éí bijı̨́ tsʼídá doo nidoołnish da, háálá á kʼééhoodǫǫłii yoołkáłígíí átʼéego Bóhólníihii nihiDiyin God binááł nihá kʼééhodoodǫǫł.
29 Tʼáá éí bijı̨́ tʼáá háiida doo adą́ą́góó hodílzingo sohodizin doo áńjiilʼįįhígíí éí hodineʼé bitsʼą́ąjįʼ hodiʼyoolyééł.
30 Áádóó tʼáá éí bijı̨́ tʼáá háiida nijishnishígíí tʼáá éí hodineʼé bitsʼą́ą́ʼ áhodeeshdįįł.
31 Tʼáá haʼátʼéegoda doo nidoołnish da; díí bee nihoníʼáanii ahóyéelʼáágóó náás daʼahíínółchííhgóó tʼáá danihiníghanígi tʼáá ánółtso nihá átʼée doo.
32 Áko díí hááʼáyı̨́ı̨́h jı̨́ nihá átʼée doo, áádóó doo adą́ą́góó nihiiʼ naazíinii dahodísingo sohodizin áńdaałʼįįh doo; tʼáá éí yiziłígíí binih náhástʼéí jı̨́ı̨́ góneʼ iʼííʼą́ą́dóó anááʼootʼą́ąjįʼ nihihááʼ áyı̨́ı̨́h jı̨́ baa dahonohsą́ą doo.
33 Áádóó Bóhólníihii éí Mózes yichʼįʼ haadzíiʼgo ííłní,
34 Ízrel dineʼé bichʼįʼ handziihgo kóbidiní, Tsostsʼid nídízííd binih ashdlaʼáadah jı̨́ı̨́ góneʼ éí chahaʼoh ándaołʼįįhgo tsostsʼid yiską́ąjįʼ hodílzingo áłah náʼádleehgo Bóhólníihii bichʼįʼ ninádahohłaah doo.
35 Hahóóyá bijı̨́ dahodíínóhsingo áłah náhdleeh doo; éí bijı̨́ doo nidoołnish da.
36 Tsostsʼid jı̨́ náádadiʼyoołnihgo Bóhólníihii bichʼįʼ didlidgo nááhániihii náádahołniih doo. Áádóó tseebíí yiską́ągo dahodíínóhsingo áłah náhdleehgo náádadiʼyoołnihii Bóhólníihii bichʼįʼ didlidgo nááhániihii náádahołniih doo; éí hodílzingo áłah náhdleeh doo; éí bijı̨́ doo nidoołnish da.
37 Díí Bóhólníihii bichʼįʼ hodílzingo áłah náʼádleeh baa náhwiilzhíishgo nídeitʼaahígíí éí hodílzingo áłah náhdleehgo baa chʼéédahohtʼáah doo, áko náádadiʼyoołnihgo Bóhólníihii bichʼįʼ didlidgo nááhániihii náádahołniih doo; éí didlidgo nááhániihii áádóó akʼáán nááhániihii áádóó nááhidoonihii índa yanáadziʼgo nááhániihii tʼáá ałtsoní náádayiiłniihígíí łaʼa jı̨́ bá náhootʼaah doo.
38 Bóhólníihii bihááʼáyı̨́ı̨́h jı̨́ı̨́ góneʼ náádahaniihii áádóó aa nooláhígíí áádóó bee ádee haohdzíiʼii tʼáá átʼé índa tʼáá nihí ádeinohsingo náádahołniihii tʼáá átʼé Bóhólníihii baa nídahidohʼaahígíí ádaatʼéego ínáádaóltąʼgo Bóhólníihii bichʼįʼ náádahołniih doo.
39 Tsostsʼid nídízííd binih ashdlaʼáadah jı̨́ı̨́ góneʼ ałdóʼ nihikéyahgi nídaneestʼánígíí áłah ádaohłaago tsostsʼid jı̨́ Bóhólníihii bichʼįʼ hodílzingo áłah náʼádleeh nídaołʼaah doo. Hahóóyá bijı̨́ hááʼáyı̨́ı̨́h jı̨́ átʼée doo índa tseebíí jı̨́ı̨́ góneʼ ałdóʼ hááʼáyı̨́ı̨́h jı̨́ átʼée doo.
40 Áko hahóóyá bijı̨́ tsin naazkaad dabiʼiil danizhóníii éí tsin naazkaadii páam wolyéhígíí biʼiil áádóó tsin dadíłchʼilii biʼiil índa tó nílı̨́ı̨́dę́ę́ʼ kʼaiʼ ałdóʼ nidahidoołjołgo bee chahaʼoh ádadoohłííł, áko Bóhólníihii nihiDiyin God binááł nihił dahózhǫ́ǫgo tsostsʼid yidoołkááł.
41 Díí Bóhólníihii bichʼįʼ dahodíínóhsingo áłah náhdleeh nídaołʼaah dooígíí tsostsʼid néíłkáahjįʼ nínáhahgo ákóndaołʼįįh doo; nihá bee nihoníʼáanii átʼéego ahóyéelʼáágóó náás daʼahíínółchíih doo; tsostsʼid nídízííd binih baa nináhkah doo.
42 Chahaʼoh biiʼ danihighango tsostsʼid yidoołkááł; Ízrel dineʼé danilı̨́įgo nidahaazhchíinii tʼáá ałtso chahaʼoh yiiʼ dabighan doo.
43 Ákohgo nihitsʼą́ą́dóó náás daʼahílchíihii bił béédahózin dooígíí éí Ízrel dineʼé danilı̨́įgo chahaʼoh yiiʼ dabighango áshłaaígíí Ííjip kéyahdę́ę́ʼ chʼééníʼeezh. Jó, shí Bóhólniihii nihiDiyin God nishłı̨́.
44 Áko Mózes éí Ízrel dineʼé bił hojoolneʼgo Bóhólníihii bichʼįʼ hodílzingo éí áłah náʼádleeh nídajiiłʼaah dooleeł lá.
