Leviticus 24:1-23
24 Áádóó Bóhólníihii éí Mózes yichʼįʼ haadzíiʼgo ííłní,
2 Ízrel dineʼé bee bá hoołʼaah áliv tsin naazkaadii bineestʼąʼ níkʼíbíʼneeshtłishgo bikʼahígíí bee hoolʼin doo biniyé naa deidiyookááł; éí diltłiʼgo bee hoolʼingo néílkáah doo.
3 Níbaal biiʼ dahozdísinii biiʼ neeznáago bikʼeh óʼooʼníiłii bee bééhániihii sinilígíí bidááhjí dáádiníbaalídóó tłʼóoʼjigo hazʼání góneʼ eʼeʼááhdóó abíníjįʼ Éran éí Bóhólníihii binááł tʼááłáhígi átʼéego bee hoolʼiní yaa áhályą́ą doo; díí bee nihoníʼáanii ahóyéelʼáágóó Ízrel dineʼé náás daʼahíínółchíihii nihá átʼée doo.
4 Áádóó bee hoolʼiní bá yadaaʼáii nizhóníii bílátahdi dah naaznilígíí Bóhólníihii binááł tʼáá áłahjįʼ hashtʼeyósin doo.
Bááh nááhániihii
5 Áádóó akʼáán dibahí bee bááh naakitsʼáadahgo ádíílííł; éí ómer bee íʼneelʼąąhí bee akʼáán dibahí naakidi haaką́ągo bááh bikʼeh níką́ą doo.
6 Éí ałtsʼą́ą́hjí hastą́ągo naakigo hadiitʼiʼgo bikááʼ adání nizhóníii bikáaʼgi Bóhólníihii binááł nidíínił.
7 Áádóó tsin bijeeh dilidgo łikání halchinii fránkinsens wolyéii éí naakigo ałʼąą bááh hadiitʼiʼígíí bikʼi nináhíjihgo bee ééhániihii átʼée doo; éí Bóhólníihii bichʼįʼ didlidgo nááhániihii átʼée doo.
8 Tʼáá hááʼáyı̨́ı̨́h jı̨́ náʼádleeh bikʼeh éí Bóhólníihii binááł tʼáá áłahjįʼ hashtʼééjiilʼįįh doo; éí Ízrel dineʼé bá hoolʼáágóó bee ahaʼdeetʼáanii átʼée doo.
9 Áko éidí Éran áádóó biyeʼké daabí dooleeł, áko éí hodiyingo hazʼání góneʼ nídeidı̨́įh doo; jó, éí aláahgo dílzinii átʼéego nááyiiłniihii Bóhólníihii bichʼįʼ didlidgo náádahaniihii ádaatʼéego éí łaʼ ahóyéelʼáágóó bee nihoníʼáanii átʼé.
Dadiyinii doo dílzingóó baa yájíłtiʼii áádóó atíhodiʼdoolníiłgo bee hazʼáanii
10 Asdzání éí Ízrel dineʼé nilíinii łaʼ biyáázh éí bizhéʼé Ííjip dineʼé nilı̨́įgo Ízrel dineʼé yitahgi níyá. Díí asdzání biyáázh éí níbaal haalʼáagi Ízrel dineʼé łaʼ yił ałkʼiilwod.
11 Áko díí asdzání biyáázh éí Bóhólníihii bízhiʼ doo yidísingóó yá haadzíiʼgo yiyíídzííʼ. Éí Mózes yichʼįʼ yił daaskai. Bimá éí Shílomith wolyé; Dan dineʼé nilíinii Díbri yitsiʼ nilı̨́.
12 Áko yah adadzistʼeʼ; haash yitʼéego Bóhólníihii baa nitsíkeesígíí hoł ííshją́ą́ ádooleeł biniyé.
13 Áádóó Bóhólníihii éí Mózes kótʼéego yichʼįʼ haadzííʼ,
14 Éí diné éédzíiʼii níbaal haalʼá bitsʼáhwiiníʼą́ądi nidanohłóosgo tʼáá ałtso dahodiiztsʼą́ąʼii éí hatsiiʼkáaʼgi dah dadidoolnihgo tʼáá dah oonééł nítʼééʼ hoł nidazdoołniił.
15 Áko Ízrel dineʼé kótʼéego bichʼįʼ handziihgo ábididííniił, Tʼáá háiida haDiyin God jíídzíiʼgo éí bee ádił ajisiihígíí bee hohodiitʼiʼgo nijigháa doo.
16 Áádóó łaʼda Bóhólníihii bízhiʼ doo jidísingóó bá hadzoodzíiʼgo éí tʼáá aaníí hodiʼyoolyééł; dah oonééł tʼáá átʼé tʼáádóo nídí hoł nidazdoołniił; déʼéyóní índa kéyah biiʼ hoʼdizhchíinii éí Bóhólníihii bízhiʼ doo jidísingóó bá hadzoodzíiʼgo hodiʼyoolyééł.
17 Łaʼda diné náánáłaʼ diné jiisxíinii tʼáá aaníí hodiʼyoolyééł.
18 Áádóó łaʼda alı̨́ı̨́ʼ łaʼ jiisxı̨́įgo tʼáá alı̨́ı̨́ʼ łaʼ ninázhʼdoodlééł.
19 Índa diné tʼáá háiida bił kééhojitʼíinii łaʼ atíjiilaago hó ałdóʼ tʼáá ákónáhodiʼdoolnííł.
20 Bitsʼin kʼíizhnítiʼgo hatsʼin kʼínídootih; binááʼ atíjiilaago hanááʼ atínídoolnííł; biwooʼ atíjiilaago hawooʼ atínídoolnííł; diné łaʼ hadabizdeesʼnihgo hó ałdóʼ tʼáá ákótʼéego kʼééhodiʼdoolnííł.
21 Áádóó łaʼda alı̨́ı̨́ʼ jiisxı̨́įgo tʼáá alı̨́ı̨́ʼ łaʼ ninázhʼdoodlééł, índa tʼáá háiida diné jiisxı̨́įgo hó ałdóʼ hodiʼyoolyééł.
22 Bee hazʼáanii tʼááłáʼí nihee hólǫ́ǫ dooleeł; déʼéyóní áádóó nihikéyahgi nidahoʼdiizhchíinii há átʼée doo; jó, shí Bóhólníihii nihiDiyin God nishłı̨́.
23 Áádóó Mózes éí Ízrel dineʼé yichʼįʼ haadzííʼ, áko éí diné éédzíʼígíí níbaal haalʼá bitsʼáhwiiníʼą́ądi nideizlóozgo yił nidadzisneʼ. Áko Ízrel dineʼé ákódaadzaa; Bóhólníihii éí Mózes yichʼįʼ yee haadzíʼígíí yidaʼiilaa.
