Leviticus 25:1-55
25 Áko Dził Sáínaidi Bóhólníihii kóníigo Mózes yichʼįʼ haadzííʼ,
2 Ízrel dineʼé bichʼįʼ handziihgo kóbidiní, Kéyah nihaa dinishʼaahígíí biih woonáago índa Bóhólníihii bichʼįʼgo dáʼákʼeh hanínályįh doo.
3 Hastą́ą́h nínáhahjįʼ kʼéédaʼdohdléeh doo, áádóó hastą́ą́h nínáhahjįʼ nihichʼil naʼatłʼoʼii nídahohgish doo, índa nídantʼı̨́įhii áłah áńdaałʼįįh doo.
4 Nidi tsostsʼid náhááh góneʼ dáʼákʼeh hanínályįh doo; éí Bóhólníihii bá hááʼáyı̨́ı̨́h átʼé. Tʼááká kʼidaʼdoohłééł lágo, tʼááká nihichʼil naʼatłʼoʼii bílátah dahoohgéésh lágo.
5 Áádóó tʼáá bíniʼdii hadaneesánígíí éí doo dadoohish da; chʼil naʼatłʼoʼii doo bílátah heeshgizhii doo bąąh nídaʼíínóhbeeh da doo; jó, dáʼákʼeh hanályı̨́įhgo náháhígíí átʼé.
6 Áko dáʼákʼeh hanályı̨́įhgo yihahígíí biyiʼ chʼiyáán nihá hólǫ́ǫ doo; nihá nidaalʼaʼí bá, asdzání nidaalʼaʼí bá áádóó adeenáago nihá nidaalʼaʼí bá índa déʼéyóní nihitahgóó tʼóó átsééd kéédahatʼíinii bá chʼiyáán hólǫ́ǫ doo.
7 Áádóó danihilı̨́ı̨́ʼ bá índa naaldlooshii nihikéyah bikááʼgóó nidaakaígíí bá; éí nídaneestʼą́ągo bee ídaʼazįįdígíí dabichʼiyąʼ doo.
8 Áko tsostsʼid náhááh góneʼ kéyah hanínályįhígíí éí tʼáá ákótʼéego tsostsʼidi ákónádzaago dízdiindóó baʼaan náhástʼéí nááhai doo.
9 Ákohgo deenástsʼaaʼ bideeʼ bee íʼdílzoołí didooltsʼı̨́įłgo baa hózhǫ́ǫgo yihah wolyéhígíí hahoolzhiizhgo tsostsʼid nídízííd binih neeznáá jı̨́ı̨́ góneʼ éí á kʼééhoodǫǫłgo nááʼiiniih yoołkááł átʼéego kéyah tʼáá átʼé biiʼgóó deenástsʼaaʼ bideeʼ bee íʼdílzoołí didooltsʼı̨́ı̨́ł.
10 Áádóó ashdladiin náháhígíí dadíínóhsin, índa kéyahgóó kéédahatʼíinii tʼáá átʼéé nítʼééʼ áhonídleeʼ bee bił dahołneʼ; díí danihichʼįʼgo hózhǫ́ǫ́jí náhááh átʼé, áko diné tʼááłáʼí nítínígo bidádaʼakʼeh yichʼįʼ nihéédahidookah áádóó bikʼéí yichʼįʼ nihéédahidookah.
11 Éí ashdladiin yihahígíí biiʼ nihił nidahoozhǫǫh doo; doo kʼidadiʼdoohłéeł da áádóó doo daʼdoohish da; tʼáá bíniʼdii hadaneesánígíí doo dadoohish da índa nihichʼil naʼatłʼoʼii doo bílátah daʼiishgizhii doo bąąh daʼ íídóohbeeł da.
12 Háálá baa hózhǫ́ǫgo yihah, áko éí nihá hodiyingo baa nitsídaahkees doo; dáʼákʼehdóó daneestʼánígíí daahsą́ą doo.
13 Áko díí baa hózhǫ́ǫgo yihahígíí biiʼ diné łáʼí nízínígo bidáʼákʼeh yichʼįʼ anáhidookah.
14 Áádóó bił kééhótʼíinii bichʼįʼ kéyah nahíłniihgo, doodaiiʼ baa nahíłniihgo tʼáadoo ałchʼįʼ ałde áhwíínóhsiní.
15 Baa hózhǫ́ǫgo yihahígíí bíighah náʼádleehdóó bikʼijįʼ nináháháhígíí bikʼehgo bił kééhótʼíinii kéyah baa nahíłniih doo, índa nináháháhígíí bikʼehgo néidínóołtʼı̨́łígíí nichʼįʼ nayiiłniih doo.
16 Tʼóó ahayóí nínáhahígíí bikʼehgo ląʼí bą́ą́h aníłı̨́į doo áádóó aʼohgo nínáhahgo aʼohgo bą́ą́h aníłı̨́į doo, háálá nídadoohahígíí biyiʼ nídadínóotʼı̨́łígíí bikʼehgo nichʼįʼ nayiiłniih doo.
17 Tʼáadoo ałchʼįʼ ałde áhwíínóhsiní, nidi nihiDiyin God dadíínóhsin; jó, shí Bóhólníihii nihiDiyin God nishłı̨́.
18 Éí bąą bee nihoyíʼáanii bikʼeh ádanohtʼée doo áádóó bee nihodiishʼaahii bikʼeh dahonołʼı̨́į doo, áko kéyah bikááʼ hasihgo kéédahohtʼı̨́į doo.
19 Ákohgo kéyah bikááʼ aneestʼąʼ hááhinootʼı̨́įł doo, áko hwiih danohłı̨́įgo hasihgo kéédahohtʼı̨́į doo.
20 Áádóó kódadidoohniiłgo, Tsostsʼid náhááh góneʼ haʼátʼíishąʼ deiidą́ą dooleeł? Jó, doo kʼéédaʼdidiilyéeł da lá, doodaiiʼ nídaneestʼáanii doo dadiigish da lá.
21 Ákohgo bee hahasdziihii shibee akʼihojidlíii átʼéego hastą́ą́h náhááh góneʼ nídadíʼnóołtʼı̨́įłgo tááʼ nááhai bíighahjįʼ nídaneestʼáanii nihee hólǫ́ǫ doo.
22 Tseebíí náhááh góneʼ kʼidadiʼdoohłééł, nidi náhástʼéí nááhaijįʼ éí nídanoołtʼánígíí tʼahdii daohsą́ą doo.
23 Kéyah doo nahaniihgóó ahóyéelʼáa doo; jó, kéyah éí shí; nihí éí déʼéyóní danohłı̨́įgo tʼóó átsééd shił kéédahohtʼı̨́.
24 Áádóó kéyah nihííʼ danilíinii tʼáá átʼé éí bikʼé nináʼiilyéego bee nahosoołʼą́ą doo.
25 Nihikʼis łaʼ bahojoobáʼí silı̨́įʼgo bikéyah łaʼ baa nahaazniiʼgo bikʼéí łaʼ éí kéyah tʼą́ą́ʼ ninéidiyoołnih yiniyé níyáago éí hakʼéí baa nahaazniiʼígíí tʼą́ą́ʼ náhizhdoołnih.
26 Nidi bikʼéí ádingo tʼáadoo bá kéyah ninéiyółniihígóó áádóó tʼáá bí ninéidiyoołnihgo yíneelʼą́ą́ ládą́ą́ʼ
27 kéyah baa nahaazniiʼ yę́ędóó nináháhááh yidziihígíí wóltaʼgo nínádantʼı̨́įhii bą́ą́h ílíinii bikʼehgo éí baa naʼiisniiʼígíí yichʼįʼ ninéidoodlééł, ákohgo bikéyah bííʼ nídoodleeł.
28 Nidi yikʼé nináʼdoodléełgi yiʼoh neelʼą́ągo diné baa naʼiisniiʼígíí tʼáá yótąʼ doo, áko baa hózhǫ́ǫgo yihahígíí hahoolzhiizhgo bikéyah bííʼ nídoodleełgo yichʼįʼ nídoodááł.
29 Diné łaʼda kin haalʼá bináʼástłʼin góneʼ kin biiʼ dahooghanígíí łaʼ baa nahaazniiʼgo éí haa nahaazniiʼ yę́ędóó nááhaijįʼ tʼą́ą́ʼ nááhizhdoołnihgo há hazʼą́; tʼááłáʼí nááhaijįʼ bikʼé ninázhʼdoodléełgo bee há hazʼą́.
30 Nidi tsʼídá tʼááłáʼí nááhaijįʼ tʼáadoo bikʼé nináʼjídláágóogo éí kin haalʼá binaa ahééʼítłʼin góneʼ diné bichʼįʼ kin nidziisʼniiʼígíí tʼáá bí doo, áádóó baʼáłchíní náás ahoolchíiłii ałdóʼ hoolʼáágóó bííʼ dooleeł, áko baa hózhǫ́ǫgo yihah wolyéhígíí baa halzhishgo doo aa náhiditʼaah da doo.
31 Nidi kin haalʼá binaa ahééʼítłʼin bitsʼáhwiiníʼą́ądi kin dah naazhjaaʼígíí éí tʼáá hakédaayah bił aheełtʼéego baa nitsáhákees doo; éí bikʼé nináʼiilyéego bee hazʼą́; baa hózhǫ́ǫgo yihah wolyéhígíí baa náhwiilzhíishgo haa nídahiditʼaah doo.
32 Ákondi Líívai dineʼé bikin hadaasʼáagi éí daakinígíí kin hadaasʼáago daabíhígíí yikʼé ninádaʼiidléego hoolʼáágóó bá bee hazʼą́.
33 Diné łaʼ éí Líívai dineʼé kin yaa nayiisʼniiʼgo kin haalʼáádóó bikin baa nahaazniiʼígíí éí baa hózhǫ́ǫgo yihah wolyéhígíí baa hoolzhiizhgo baa nídidootʼááł, háálá Líívai dineʼé bikin hadaasʼáhídóó daakinígíí éí Ízrel dineʼé bitahgi Líívai dineʼé náás ahoolchíiłii daabí.
34 Nidi dabikin hadaasʼáágóó dahootsooígíí éí doo baa nidahaniih da, háálá éí hoolʼáágóó tʼáá daabí dooleeł.
35 Áko nihikʼis łaʼ bahojoobáʼí silı̨́įʼgo éí nihitahgi chʼééh ákʼidildzíiłgo bíká adoohjah; éí ayóní, doodaiiʼ tʼóó átsééd nihił kééhatʼínígíí tʼáá bikʼi nidaałdzilígi átʼéego nihił bighan doo.
36 Ínáóltąʼí tʼáadoo bídeínóhkeedí, doodaiiʼ binahjįʼ tʼáadoo béeso ádaałʼíní, nidi nihiDiyin God dadíínóhsin, áko nihikʼis tʼáá nihił bighan doo.
37 Áádóó ínáóltąʼí tʼáágééd béeso baa nídaʼohnił, áádóó chʼiyáán baa dahohníiłgo bee tʼáadoo náádaʼáyółbįįhí.
38 Jó, shí éí Bóhólníihii nihiDiyin God nishłı̨́; éí Ííjip kéyahdę́ę́ʼ chʼéénihiníʼeezhii nishłı̨́ áádóó nihiDiyin God nishłı̨́į doo biniyé Kéínan kéyah nihaa dinishʼaah.
39 Áádóó nihikʼis nihíighahgóó kééhatʼíinii bahojoobáʼí silı̨́įʼgo nihichʼįʼ naʼádiisʼniiʼgo doo naalteʼ nilı̨́įgo nihá naalʼaʼ da doo.
40 Nidi adeenáago nihá naalʼaʼ doo áádóó tʼóó átsééd kééhatʼíinii nahalingo nihił bighan doo, áádóó baa hózhǫ́ǫgo yihah wolyéhígíí baa hoolzhiizhjįʼ nihá naalʼaʼ doo.
41 Áko índa nihitsʼą́ą́dóó baʼáłchíní yił bikʼéí yichʼįʼ dah nídidookah áádóó bizhéʼé danilı̨́ı̨́ nítʼééʼ yę́ę bikéyahjįʼ nídookah.
42 Háálá shá nidaalʼaʼí danilı̨́; éí Ííjip kéyahdę́ę́ʼ chʼééníʼeezh; éí bąą doo naalteʼ biniyé nidahaniih da doo.
43 Tʼáadoo tʼáá naʼníleʼdii bindanohtʼáhí, nidi nihiDiyin God dadíínóhsin doo.
44 Diné áádóó asdzání nihinaalteʼ danilı̨́į doogo éí ałʼąą dineʼé nihinaagóó kéédahatʼínígíí bitahdę́ę́ʼ diné áádóó asdzání nihinaalteʼ danilı̨́į doo biniyé nidahidoołnihgo bee hazʼą́.
45 Áádóó ałdóʼ déʼéyóní tʼóó átsééd nihitahgóó kéédahatʼínígíí badaʼáłchíní índa banáádaʼáłchíní nihikéyahgi nidahaazhchı̨́įgo nihił kéédahatʼínígíí bitahdę́ę́ʼ nidahołniihgo danihí doo.
46 Áko nihikééʼ ádahasdįįdgo nihadaʼáłchíní daabííʼ dadooleełgo bá ádadoohłííł; éí hoolʼáágóó bindaalteʼ doo, nidi nihikʼisóó Ízrel dineʼé danilíinii éí doo tʼáá naʼníleʼdii bił ahindanohtʼáa da doo.
47 Déʼéyóní tʼóó átsééd nihitahgi kééhatʼíinii nihinahjįʼ atʼı̨́ silı̨́įʼgo áádóó nihikʼis éí yíighahgóó kééhatʼı̨́įgo bahojoobáʼí silı̨́įʼgo éí déʼéyóní, doodaiiʼ baʼáłchínída łaʼ yichʼįʼ naʼádiisʼniiʼgo
48 naʼádiisʼniiʼdóó bikʼijįʼ hakʼé nináʼdoolyéełgo bee hazʼą́; hakʼisóó łaʼ hakʼé nináʼdoodlééł.
49 Hadáʼí, doodaiiʼ hadáʼí biyeʼda hakʼé nináʼdoodlééł, doodaiiʼ áhą́dígo hakʼéí éí badaʼáłchínída łaʼ tʼáá hakʼé nináʼdoodlééł, doodaiiʼ tʼáá hó bízhneelʼą́ągo ákʼé ninázhʼdoodlééł.
50 Áádóó haash yitʼéego hááʼádizhdooltéełgi bichʼįʼ naʼázdiisʼniiʼii bił baa yázhdoołtih; éí naʼázdiisʼniiʼ yę́ędóó baa hózhǫ́ǫgo yihah wolyéhígíí baa níhaijįʼ éí nináháháahgo ákʼé ninádziisyaʼígíí bikʼehgo há yídóołtahgo ahíidoodzoh, áádóó adeenáago naalnishii bichʼįʼ nahalyéii bikʼehgo hakʼé nináʼdoolyééł.
51 Ląʼí nááhaidi baa hózhǫ́ǫgo yihah wolyéhígíí baa hodoolzhishgo béeso hakʼé naalyáhígíí bikʼehgo tʼáá hó łahjįʼ ákʼé ninázhʼdoodlééł.
52 Áádóó baa hózhǫ́ǫgo yihah wolyéhígíí tʼah tʼáá díkwíí nídoohah hadziihgo éí nááhai yidziihígíí bikʼehgo tʼáá hó ákʼé ninázhʼdoodlééł.
53 Nináháháahgo adeenáago łaʼ há naalnishígi átʼéego há naalnish doo; ninááł doo tʼáá naʼníleʼdii binazhnitʼáa da doo.
54 Áko díí nínáháháhígíí biyiʼ doo nabiʼdiizniiʼgóogo baa hózhǫ́ǫgo yihah wolyéii baa hoolzhiizhgo bí áádóó baʼáłchíní bił tʼóó bééʼdoolnih.
55 Háálá Ízrel dineʼé éí shá naalʼaʼí danilı̨́; éí shá naalʼaʼí danilı̨́įgo Ííjip kéyahdę́ę́ʼ chʼééníʼeezh; jó, shí Bóhólníihii nihiDiyin God nishłı̨́.
