Leviticus 26:1-46
26 Edaʼalyaii, doodaiiʼ naashkʼaazhgo edaʼalyaii tʼáadoo ádá ádaołʼíní, doodaiiʼ edaʼalyaii adadoohtsihda, doodaiiʼ nihikéyahgi bichʼįʼ yaa áńdaohtʼįįh doo biniyé tsé bee eʼelyaii doo adadoohtsih da; jó, shí Bóhólníihii nihiDiyin God nishłı̨́.
2 Shihááʼáyı̨́ı̨́h náʼoodleełgo dahodíínóhsin, áádóó shiníbaal biiʼ hodílzinii dadíínóhsin; jó, shí Bóhólníihii nishłı̨́.
3 Bee nihoyéʼáanii bikʼeh dasidoohkaigo áádóó shibikʼeh óʼooʼníiłii bikʼeh ádanohtʼéego áádóó bidaʼíínóhsingo
4 nahałtin baa náhwiilzhíishgo níłtsą́ nihaa hidishʼaah doo, áko kéyah bikááʼgóó nídaʼnitʼı̨́įh doo, áádóó tsin bineestʼąʼ bąąh nídahoodleeł doo.
5 Daʼohizhgo chʼil naʼatłʼoʼii deínóhbéejįʼ anáhálzhish doo, áádóó chʼil naʼatłʼoʼii wóbéhígíí kʼéédílyéehjįʼ anáhálzhish doo, áádóó chʼiyáán bee ádaʼazįįdgo daohsą́ą doo, índa nihikéyahgi hasih nidahohʼáago kéédahohtʼı̨́į doo.
6 Áádóó kéyahgi hodéesyéelgo ádeeshłííł, áko nídanohjahgo doo nídaołdzidgóó ánihideeshłííł; naaldlooshii dahashkéii kéyahdóó hadínéeshkał, doodaiiʼ nihikéyahgi doo diltłish ahindajiilyée da doo.
7 Índa nihiʼanaʼí nihaa chʼídahajeehgo nihilą́ąjįʼ diltłish bee bił nidadziilghaał doo.
8 Ashdlaʼ nołtʼéego neeznádiingo nihaa nídadidoojah; neeznádiin nołtʼéego neeznáadi míilgo nihikʼee nidanichée doo áádóó nihiʼanaʼí nihilą́ąjįʼ diltłish bee bił nidadziilghaał doo.
9 Áádóó nihił nishłı̨́į doo, áádóó nihaʼáłchíní nídahoodleełgo kʼeeʼąą noohtʼı̨́įłgo ánihideeshłííł, índa bohoníłdzilgo nihił ahadiʼnishtʼą́ągo ádeeshłííł.
10 Áko ałkʼidą́ą́ʼ nooh dashoołchínígíí daohsą́ą doo, áádóó ániidígíí bá hwiidooʼaał biniyé nooh dashoołchínígíí chʼídahidoohjih.
11 Áádóó shiníbaal biiʼ hodílzinii nihitahgi nideeshʼááł, áádóó doo nihá deeshnih da doo.
12 Áko nihitaasháa doo; nihiDiyin God nishłı̨́į doo, áádóó nihí shidineʼé danohłı̨́į doo.
13 Shí Bóhólníihii nihiDiyin God nishłíinii Ííjip dineʼé bikéyahdę́ę́ʼ chʼéénihiníʼeezh; doo tʼáá binaalteʼ danohłı̨́į da; jó, nihiyéél dabitłʼóól hénizhgo kʼídasoodongo dayínóhkáahgo ánihiishłaa.
Doo akʼeh hólʼı̨́ı̨́góó biniinaa atíʼélʼíinii (Deut. 28:15-68)
14 Nidi doo dashíínółtsʼą́ą́ʼgóogo áádóó shibikʼeh óʼooʼníiłii tʼáá átʼé doo bikʼeh dahonołʼı̨́ı̨́góogo
15 índa bee nihoyéʼáanii tsʼídá dasooʼįįdgo, doodaiiʼ bee nihodiishʼaahii tsʼídá tʼóó bá dasidoołnihgo, áko shibikʼeh óʼooʼníiłii tʼáá átʼé doo bikʼeh dahonołʼı̨́į da doo, nidi shibee ahaʼdeetʼáanii tʼóó dahohtíih doo.
16 Shí ałdóʼ kónihideeshłííł: tʼóó báhádzidii áádóó niʼiiłganii índa naałniih nihinááʼ tsʼídá doo daʼoohʼı̨́į da ánihidoolííł áádóó yínííł biih dínóohdah, índa chʼééh kʼéédaʼdohdléehgo nihiʼanaʼí nihaa nahodikai doo.
17 Áádóó nihikʼijįʼ nishłı̨́įgo nihiʼanaʼí binááł nidanihiʼditseedgo danihijoołáii nihindantʼáa doo, índa tʼáadoo nidanihiniłchéhígóó nidanochée doo.
18 Áko azhą́ díí tʼáá átʼé kónihiʼdiilyaa nidi tʼahdii doo dashíínółtsʼą́ą́ʼgóogo tʼóó kónihideeshłííł; tsostsʼidi ahą́ą́h nániiláago ádił nidaʼayohsíʼígíí biniinaa atínáánihideeshdlííł.
19 Áádóó nihidziil bee ádaa dadzíínóhdlíhígíí yaa ádeeshłííł, áádóó wódahdi yádiłhił éí béésh nitłʼiziigi átʼéego índa nahasdzáán éí béésh łitsoiigi átʼéego ádeeshłííł.
20 Tʼáadoo biniyéhígóó nidaołdzil doo, háálá nihikéyah doo bikááʼ naʼnitʼąʼ da doo, doodaiiʼ tsin bineestʼąʼ doo bąąh nídahadleeh da doo.
21 Áádóó shikʼijįʼ danohłı̨́įgo tʼéí deínóhkáahgo índa doo dashidoohtsʼaʼgóogo ádił nidaʼayohsíʼígíí bikʼehgo tsostsʼidi ahą́ą́h nániiláago naałniih bee nihichʼįʼ hodiyeeshnááł.
22 Naaldlooshii dahashkéii ałdóʼ nihichʼįʼ biʼdeeshʼnihgo éí nihaʼáłchíní nihee deiniʼįįhgo atídeileʼ doo, áádóó nihilı̨́ı̨́ʼ ádeidoołdįįł, áádóó tʼáá díkónółtʼéhígo ádanihidoolííł índa nihedaʼatiingóó doo nidaagháhí da doo.
23 Áádóó díí bee doo shee łahgo ínídaʼdołnééhgóogo, nidi tʼóó shikʼijįʼ danohłı̨́įgo deínóhkáahgo
24 shí ałdóʼ nihikʼijįʼ nishłı̨́į doo, áádóó nidaʼayoohsíʼígíí biniinaa tʼah yówehgo tsostsʼidi ahą́ą́h nániiláago atínáánihideeshdlííł.
25 Áádóó diltłish bił nihiʼanaʼí nihikʼijįʼ biʼdeeshʼnih; éí nihił ahaʼdinishtʼáanii doo bikʼeh ádanohtʼéégóó tʼóó kʼéénihidideeshdlííł áádóó nihikin hadaasʼáagi áłah nídaahdleehgóó nihitahgóó naałniih bee nihichʼįʼ hodiyeeshʼnááł, índa nihiʼanaʼí bílákʼee nihidiʼdootʼááł.
26 Áko nihichʼiyąʼ łahjįʼ nihitsʼą́ą́ʼ niʼkóshłaago, asdzání neeználtʼéego bááh bighan tʼááłáʼígíí biyiʼ nihá bááh áńdayiilʼįįh doo, áádóó ahádahaastiʼgo dah hidiidlohígíí bikʼehgo nihitaa nídeijih doo, áádóó éí nídaohdı̨́įhgo doo bee hwiih daohłeʼ átʼée da doo.
27 Áko azhą́ díí tʼáá átʼé kónihiʼdiilyaa nidi, doo dashíínółtsʼą́ą́ʼgóogo tʼóó shikʼijįʼ danohłı̨́įgo deínóhkáahgo
28 shí ałdóʼ tʼóó kónihideeshłííł; nihikʼijįʼ nishłı̨́įgo tʼóó báhádzidgo sháháchįʼ doo; nidaʼiyoohsíʼígíí biniinaa tsostsʼidi ahą́ą́h nániiláago tʼáá shí atínihideeshłííł.
29 Áádóó nihiyeʼké bitsįʼ índa nihitsiʼké bitsįʼ nídaołghał doo.
30 Índa ninádahałaah doo biniyé wódah nahazʼą́ągo ádaohłaaígíí nihideeshchxǫǫłgo eʼelyaii danihíhígíí dadideeséigo bikáaʼjįʼ danihitsʼíís ahideeshtłʼił, áko doo nihinisin da doo.
31 Áádóó nihikin hadaasʼáhígíí tʼáá ádzaaí ádeeshłííł, índa nihihodiyingo nahazʼáanii nihideeshchxǫǫłgo tʼáadoo dabiniyéhí da doo, áko łikání halchingo náádahołniihii doo deeshchı̨́įł da.
32 Áko kéyahgi ałtso nihodiyeeshchxǫǫł; ákwii nihiʼanaʼí nidahanéhígíí éí yikʼee tʼóó bił adahayói doo.
33 Áádóó ałʼąą dineʼé bitahgóó tanihidínéeshkał, índa nihichʼįʼ diltłish bił hanáshdił doo áádóó nihikéyah ałtso nidahwiizhchxǫʼ doo, índa nihikin hadaasʼáhígíí tʼáá ádzaaí dadooleeł.
34 Áko kéyah hááʼáyı̨́ı̨́h yee náʼáldįįhgo bił hóóchxǫʼgo hoolzhish doo áádóó nihí éí nihiʼanaʼí bikéyahdi naałdeehgo kéyah háádoolyįhgo hááʼáyı̨́ı̨́h yee náʼáldįįh doo.
35 Haa nízádígi shı̨́ı̨́ kéyah bił hóóchxǫʼgo hanályı̨́įh doo, háálá bikááʼ kéédahohtʼı̨́ı̨́ nítʼééʼ yę́ędą́ą́ʼ hááʼáyı̨́ı̨́h baa náhwiilzhíishgo tʼáadoo hanáályı̨́įʼ da.
36 Áádóó nihitsʼą́ą́dóó chʼéékaigo daadzíʼígíí bidaʼanaʼí bikédaayahgi bił dayéeʼgo biyandahalyizgo ádeeshłííł; tsin bitʼąąʼ dadiitsʼaʼgo yikʼee nídadíníchéeh doo; diltłish yikʼee danéechééh nahalingo nidanichée doo; tʼáadoo dabineełchéhí da nidi nidanichéego dahidigeeh doo.
37 Áádóó ałkʼi dahiniidéehgo tʼáadoo dabinéełchéhí da nidi diltłish yikʼee nidanichéhígíigi ádaatʼée doo. Áádóó nihiʼanaʼí binááł bee adziilii nihee ádaadingo chʼééh ádaahtʼı̨́į doo.
38 Áádóó ałʼąą dineʼé bitahgóó ádoohdįįł; nihidaʼanaʼí bikéyah tʼóó danihildeeł doo.
39 Áko tʼáá díkwíí nihitsʼą́ą́dóó chʼéékaigo daadzíʼígíí éí doo ákwii ádáátʼįįdígíí biniinaa nihidaʼanaʼí bikéyahgi yínííł bidooghą́ą́ł áádóó danihizhéʼé yę́ę doo ákwii ádáátʼįįdígíí ałdóʼ biniinaa tʼáá bił yínííł bidooghą́ą́ł.
40 Áádóó doo ákwii ádáátʼįįdígíí yee ádaa dahalneʼgo dabizhéʼé yę́ę doo ákwii ádáátʼįįdígíí doo ákǫ́ǫ́ áhátʼíinii yee doo ákǫ́ǫ́ ádashííłʼįįdgóó yee ádaa dahoolneʼgo áádóó ałdóʼ shitsʼą́ą́jí tʼóó shikʼijįʼ danilínígíí áádóó ałdóʼ shikʼijįʼ danilı̨́įgo deíkááh nítʼéʼígíí yee ádaa dahalneʼ.
41 Shí ałdóʼ dabikʼijįʼ nishłı̨́ı̨́ nítʼééʼ bidaʼanaʼí bikéyah góneʼ ííʼeezhígíí yaa ákodaniizı̨́ı̨́ʼ; jóʼáko dabijéí doo daalzı̨́įʼ da nítʼééʼ yę́ę* aʼohgo ádaatʼé ádabiʼdiilyaago índa doo ákwii ádáátʼįįdígíí biniinaa atídabiʼdiilyaaígíí tʼéí badaʼahódlíigo
42 tʼáá shí bénáshniihii Jéíkab áádóó Áízak índa Éíbraham éí shibee ahaʼdeetʼáanii bee bił ahadadiʼnishtʼáanii bénáshniih doo áádóó dabikéyah bénáshniih doo.
43 Kéyahdóó nahjįʼ hajookaigo kéyah hááʼáyı̨́ı̨́h yee náʼáldįįhígíí bikááʼ dahóóchxǫʼgo nahazʼą́ą doo, áko doo ákwii ádáátʼįįdígíí biniinaa atídabidiʼdoolníłígíí badaʼahódlíi doo, háálá bee nihodiishʼaahii deizʼįįd áádóó bee nihoyéʼáanii tʼóó yádadoolnih.
44 Azhą́ díí tʼáá átʼé kódajíítʼįįd nidi hwedaʼanaʼí bikéyahdi nijildeehgo doo yóóʼahodeeshkał da, doodaiiʼ doo tʼáá kʼad hádéshʼnihgo ałtso áhoséłdįįd da, áádóó doo tʼáá kʼad shibee ahaʼdeetʼáanii hoł kʼínítiʼ da, háálá shí Bóhólníihii haDiyin God nishłı̨́.
45 Nidi dahazhéʼé yę́ę bił ahadadiʼnishtʼáanii há bénáshniih doo; éí ałʼąą dineʼé dabinááł Ííjip kéyahdę́ę́ʼ chʼééhoníʼeezh, ákótʼéego tʼéiyá haDiyin God nishłı̨́į doo; jó, shí Bóhólníihii nishłı̨́.
46 Díí éí yee nihwiizʼáanii áádóó yee nihodiizʼáanii índa bee hazʼáanii Bóhólníihii tʼáá bí haidiilaaígíí áádóó éí yee Ízrel dineʼé yił ahaʼdeetʼą́ągo Dził Sáínai siʼánígi éí yee Mózes akʼeʼashchı̨́.
Footnotes
^ Ajéí doo ąąh náhineeshgizhii éí ajéí doo daalzı̨́įʼii ááhyiłní. Col. 2:11.
