Leviticus 27:1-34
27 Áádóó Bóhólníihii éí Mózes yichʼįʼ haadzíiʼgo ííłní,
2 Ízrel dineʼé bichʼįʼ handziihgo kóbidiní, Diné łaʼ tʼáá bí ádá ádee hadidoodzihgo Bóhólníihii yaa ádidootʼáałgo éí bą́ą́h aníłı̨́įgo bee hosíníłʼánígíí bikʼehgo niʼdoolééł.
3 Bą́ą́h aníłínígíí éí diné naadiin béédááhaidóó hastą́diin béédááhaijįʼ béésh łigaii shékel wolyéii ashdladiin éí hodiyingo hazʼą́ą́ góneʼ shékel chooʼíinii bíighahgo nidahizhdoolééł,
4 áádóó asdzánígo éí bą́ą́h aníłínígíí bikʼehgo tádiin shékel wolyéii bíighahgo niidoolééł.
5 Áádóó tsíłkéí bichʼįʼgo ashdlaʼdóó naadiinjįʼ béédááhaígíí éí naadiin shékel bą́ą́h aníłı̨́į doo, índa chʼikę́ę́h bichʼįʼgo éí neeznáá shékel bą́ą́h aníłı̨́į doo.
6 Tʼááłáʼí bee nídeezidóó ashdlaʼ binááhaijįʼ ashkii bichʼįʼgo éí béésh łigaii ashdlaʼ shékel wolyéii bą́ą́h aníłı̨́į doo; atʼééd bichʼįʼgo éí tááʼ shékel bą́ą́h aníłı̨́į doo.
7 Hastą́diindóó dego binááhaigo diné bichʼįʼgo éí ashdlaʼáadah shékel bą́ą́h aníłı̨́į doo; asdzánígo éí neeznáá shékel bą́ą́h aníłı̨́į doo.
8 Nidi hahojoobáʼígo bą́ą́h aníłínígíí biʼoshʼneelʼą́ągo éí nááʼiiłniihii baazhdoogáałgo hą́ą́h ílı̨́ı̨́ góneʼ há niididooʼááł; éí bízhneelʼánígíí bikʼehgo bee ádee hadzoodzíiʼii nizhʼdoolééł.
9 Áádóó naaldlooshii tʼáá ałtso éí Bóhólníihii yichʼįʼ náádayiiłniihii éí łaʼ háiida Bóhólníihii yaa neidiiʼaahígíí tʼáá ałtso dílzin doo.
10 Áko díí bitsáskʼehjįʼ doo łaʼ anízhdoołteeł da; yáʼátʼéehii áádóó doo yáʼátʼéehii doo bił ałgháázhdooltéeł da, índa doo yáʼátʼéehii áádóó yáʼátʼéehii doo bił ałgháázhdooltéeł da, ákódziidzaago naaldlooshii ałghááʼjíltı̨́įgo éí tʼáá áłah dílzin dooleeł.
11 Áádóó naaldlooshii doo daadáanii éí doo Bóhólníihii bichʼįʼ nááhidoonihii átʼéhígíí éí nááʼiiłniihii baazdoolóós,
12 áko nááʼiiłniihii éí naaldlooshii yáʼádaatʼéehii, doodaiiʼ doo yáʼádaatʼéehii bą́ą́h ílı̨́ yee hadoodzihgo bikʼehgo bą́ą́h ílı̨́į doo.
13 Nidi diné éí, Díí tʼáá haʼátʼéegoda náhideeshʼnih, nízingo éí ashdlaʼ aháádzooígíí tʼááłáʼí yínéidoozohgo naaldlooshii bą́ą́h aníłı̨́ bikʼehgo yił ninéidoodlééł.
14 Diné łaʼ bikin Bóhólníihii yá tʼáá sahdii dílzingo niideeʼaahgo éí yáʼátʼéehgo, doodaiiʼ doo yáʼátʼééhgóó, éí nááʼiiłniihii yee hadoodzihgo yą́ą́h íłínígíí bikʼé nizhʼdoolééł.
15 Nidi bikin tʼáá sahdii dílzingo niidiníʼánígíí éí, Náhideeshnih, nízingo éí ashdlaʼ aháádzooígíí tʼááłáʼí yínéidoozohgo kin bą́ą́h aníłı̨́ bikʼehgo yił ninéidoodlééł, áko tʼáá bííʼ nídoodleeł.
16 Áko diné łaʼ bikéyahgi dáʼákʼeh łahjįʼ Bóhólníihii yá atsʼéideeʼaahgo ákwii álástsiiʼ haa néeltʼeʼgo anéíjihígíí bikʼehgo bą́ą́h aníłı̨́į doo; tsitsʼaaʼ hómer wolyéii biiʼ tłʼoh naadą́ą́ʼ bideeʼí binááʼ hadeezbingo éí béésh łigaii shékel wolyéii ashdladiin bą́ą́h aníłı̨́į doo.
17 Áádóó baa hózhǫ́ǫgo yihah nááhaidóó bidáʼákʼeh dílzingo niideeʼaahgo bą́ą́h aníłínígíí tʼáá éí bikʼehgo bą́ą́h ílı̨́į doo.
18 Nidi baa hózhǫ́ǫgo yihah wolyéhígíí ałtso yíhaidóó bikʼijįʼ díkwíida nááhaigo bidáʼákʼeh éí Bóhólníihii yá dílzingo niidiníʼáanii baa hózhǫ́ǫgo yihah baa náhodoolzhishjįʼ nídoohah yidziihígíí yíídóołtah; éí bikʼehgo bidáʼákʼeh bą́ą́h aníłı̨́įgi nááʼiiłniihii bíniikʼehgo bą́ą́h ílínígíí há yéididooʼnił.
19 Áko hadáʼákʼeh dílzingo nidizhníʼáanii éí, Náhideeshnih, jinízingo éí ashdlaʼ aháádzooígíí tʼááłáʼí bínéizdoozohgo dáʼákʼeh bą́ą́h aníłı̨́ bikʼehgo yił ninéidoodlééł, índa tʼáá bííʼ nídoodleeł.
20 Dáʼákʼeh doo náhideeshʼnih da, nízingo, doodaiiʼ tʼáá íídą́ą́ʼ diné náánáłaʼ yichʼįʼ nayiisʼniiʼgo éí doo nááhidoonihgóó nideetʼą́ą doo.
21 Nidi dáʼákʼehígíí éí baa hózhǫ́ǫgo yihah wolyéii baa hoolzhiizhgo Bóhólníihii bichʼįʼgo dílzin doo, áko dílzingo nideetʼánígi átʼéego nááʼiiłniihii bííʼ dooleeł.
22 Áádóó diné łaʼ éí Bóhólníihii bá kéyah nayiisʼniiʼgo dílzingo niidiníʼą́ą́ ládą́ą́ʼ éí doo tʼáá bí bikéyahígíí łaʼ ííłʼı̨́ı̨́góó,
23 áko nááʼiiłniihii éí bą́ą́h aníłínígíí bikʼehgo baa hózhǫ́ǫgo yihah wolyéii baa hodoolzhishígíí há yídóołtahgo bą́ą́h aníłínígíí bikʼehgo éí bijı̨́ bikʼé nizhʼdoolééł; éí Bóhólníihii bichʼįʼ dílzingo naalyáii átʼée doo.
24 Áko baa hózhǫ́ǫgo yihah wolyéii binih diné éí dáʼákʼeh baa nahaazniiʼígíí baa nídidootʼááł; tʼáá hó hakéyah yę́ę hóóʼ násdlı̨́įʼ doo.
25 Áádóó bą́ą́h daʼníłínígíí tʼáá ałtso éí hodiyingo hazʼą́ą́ góneʼ shékel wolyéii chooʼínígíí bikʼehgo bą́ą́h aníłı̨́į doo. Éí shékel naadiin gíírah wolyéii bíighahgo dah hidiidloh.
26 Nidi alı̨́ı̨́ʼ átsé nidahachíhígíí, éí Bóhólníihii bí neheleehígíí éí diné łaʼ doo dílzingo niididooʼáał da; béégashii, doodaiiʼ dibéda, díí Bóhólníihii bííʼ.
27 Nidi alı̨́ı̨́ʼ doo daadáanii átʼéego éí bą́ą́h aníłínígíí bikʼehgo ninéidiyoołnih; éí ashdlaʼ aháádzooígíí tʼááłáʼí yínéidoozohgo yił ninéidoodlééł, doodaiiʼ doo nináyiisʼniiʼgóogo éí bą́ą́h aníłínígíí bikʼehgo nahidoonih.
28 Ákondi diné jílíinii hwee hólóonii tʼáá ałtso bitsʼą́ą́dóóígíí éí diné, doodaiiʼ alı̨́ı̨́ʼ, doodaiiʼ tʼáá hó hakéyah tsʼídá dílzingo Bóhólníihii baa nídizhdiníʼáanii éí doo haa nahidoonih da, doodaiiʼ doo nínááhizhdoołnih da; tʼáá ałtso tsʼídá dílzingo nideetʼáanii éí Bóhólníihii bichʼįʼgo aláahgo dadílzin.
29 Tsʼídá dílzingo nideetʼáanii, éí diné tsʼídá dílzingo niidiníʼánígíí éí doo nááhidoonih da, nidi tʼáádóo nídí ádooldįįł.
30 Kéyah bitsʼą́ą́dóó nídahoodleełii neeznáá daníjaaʼígíí éí tʼááłáʼígo shijaaʼ Bóhólníihii baa náhiditʼaahígíí tʼáá átʼé, éí kéyah bitsʼą́ą́dóó nídaneestʼáanii, doodaiiʼ tsin bineestʼąʼ ádaatʼéii, éí Bóhólníihii bííʼ átʼé, áko Bóhólníihii bichʼįʼgo dadílzin.
31 Diné łaʼ éí tʼáá haʼátʼíhída neeznáá daníjaaʼígíí éí tʼááłáʼígo shijaaʼ Bóhólníihii yaa néidiiʼaahígíí éí, Nááhideeshʼnih, nízingo éí ashdlaʼ aháádzooígíí tʼááłáʼí yínéidoozohgo Bóhólníihii yaa néidiiʼaahii bą́ą́h ílínígíí ninéidoodlééł.
32 Áádóó béégashii, doodaiiʼ dibéda éí gish bee dayééltaʼii tʼáá ałtso éí neeznáá daníjaaʼgo tʼááłáʼí nízínígíí éí Bóhólníihii bichʼįʼgo dadílzin doo.
33 Łaʼ laʼ yáʼádaatʼééh lá, doodaiiʼ łaʼ laʼ doo yáʼádaatʼéeh da lá, doo dínóozįįł da, doodaiiʼ doo łaʼ bił ałgháázhdooltéeł da; łaʼ bił ałghááʼjíltı̨́įgo éí bił ałghááʼjíltínígíí tʼáá bił tʼáá áłah dílzin doo; éí doo nááhizhdoołnih da.
34 Díí bikʼeh óʼooʼníiłii ádaatʼéego Bóhólníihii éí Mózes yichʼįʼ yee haadzíiʼgo Ízrel dineʼé bá Dził Sáínaidi kóhodooʼniid.
