Leviticus 3:1-17
3 Áádóó nááhizhdoołnihii éí hózhǫ́ǫ́jí nááhániihii nááhizhdoołnihígíí éí béégashii bitahdóó béégashii átʼéego éí bikąʼii, doodaiiʼ biʼáadii hadaałtʼéii łaʼ nízdidoolóosgo Bóhólníihii binááł nááhizhdoołnih.
2 Áko nááhizhdoołnihígíí bitsiitʼáagi dashdidoolnih áádóó níbaal biiʼ dahozdísinii bichʼéédą́ąʼgi jidiyoołhééł. Áádóó náádaʼiiłniihii Éran biyeʼké éí diłígíí bikááʼ nááʼiiniihí tʼáá ałtsodę́ę́ʼ yikʼínídeiłkaʼ doo.
3 Áádóó náádiʼyoołnihgo néidiyoołnihígíí éí hózhǫ́ǫ́jí nááhániihii łaʼ Bóhólníihii bichʼįʼ didlidgo nááyiiłniih doo; éí akʼah łání áádóó atsą́ siláí akʼah daabąąhígíí tʼáá átʼé
4 áádóó bitsą́ áshkʼazhí tʼáá áłah áádóó bikʼah tʼáá bąąhgo, éí atságah bidiitʼiʼígíí, índa azid bíighahgi akʼahígíí éí atsą́ áshkʼazhí tʼáá bił hazhdooniłgo tʼáá bił náájiiłniih doo.
5 Áko Éran biyeʼké éí bikááʼ nááʼiiniihí bikáaʼgi chizh diltłiʼígíí yikááʼ ninádeiʼniłgo nídeidiłiʼ doo, áko didlidgo nááhidoonihii éí Bóhólníihii bichʼįʼ łikání halchingo nááhániihii átʼée doo.
6 Náájidiʼyoołnihgo nááhidoonihii éí hózhǫ́ǫ́jí nááhániihii Bóhólníihii bichʼįʼ nááhizhdoołnihígíí éí dibé nanilkaadii bikąʼii, doodaiiʼ biʼáadii hadaałtʼéii łaʼ nízdidoolóosgo nááhizhdoołnih.
7 Néidiyoołnihii éí dibé yázhí néidiyoołnihgo Bóhólníihii binááł nááyiiłniih doo.
8 Áko náájiiłniihígíí bitsiitʼáagi dashdidoolnih áádóó níbaal biiʼ dahozdísinii bichʼéédą́ąʼgi jidiyoołhééł, áádóó Éran biyeʼké éí diłígíí bikááʼ nááʼiiniihí tʼáá ałtsodę́ę́ʼ yikʼínídeiłkaʼ doo.
9 Áádóó náádiʼyoołnihgo néidiyoołnihígíí éí hózhǫ́ǫ́jí nááhániihii łaʼ Bóhólníihii bichʼįʼ didlidgo nááyiiłniih doo; dibé yázhí neeskʼahii: éí bitseeʼ neeskʼahígíí áádóó akʼah łání índa bitsą́ siláí akʼah daabąąhígíí tʼáá átʼé
10 áádóó bitsą́ áshkʼazhí tʼáá áłah áádóó bikʼah tʼáá bąąhgo, éí atságah bidiitʼiʼígíí índa azid bíighahgi akʼahígíí éí atsą́ áshkʼazhí tʼáá bił hazhdoonił.
11 Áko nááʼiiłniihii éí bikááʼ nááʼiiniihí bikáaʼjįʼ néidiłiʼ doo; éí Bóhólníihii bichʼįʼ chʼiyáán didlidgo nááhániihii átʼée doo.
12 Néidiyoołnihii éí tłʼízí néidiyoołnihgo éí Bóhólníihii binááł nááyiiłniih doo.
13 Áko náájiiłniihígíí bitsiitʼáagi dashdidoolnih áádóó níbaal biiʼ dahozdísinii bichʼéédą́ąʼgi jidiyoołhééł, áádóó Éran biyeʼké éí diłígíí bikááʼ nááʼiiniihí tʼáá ałtsodę́ę́ʼ yikʼínídeiłkaʼ doo.
14 Áádóó náádiʼyoołnihgo néidiyoołnihígíí łaʼ Bóhólníihii bichʼįʼ didlidgo nááyiiłniih doo; akʼah łání áádóó bitsą́ siláí akʼah daabąąhígíí tʼáá átʼé
15 áádóó bitsą́ áshkʼazhí tʼáá áłah áádóó bikʼah tʼáá bąąhgo, éí atságah bidiitʼiʼígíí áádóó azid bíighahgi akʼahígíí índa atsą́ áshkʼazhí tʼáá bił hazhdooniłgo tʼáá bił náájiiłniih doo.
16 Áko nááʼiiłniihii éí bikááʼ nááʼiiniihí bikáaʼjįʼ néidiłiʼ doo; éí chʼiyáán didlidgo łikání halchinii nááhániihii átʼée doo; akʼah tʼáá átʼé Bóhólníihii bí.
17 Díí hoolʼáágóó yee nihoníʼáanii éí náás daʼahíínółchííhgóó tʼáá danihiníghanígi bikʼeh ádanohtʼée doo; éí akʼah, doodaiiʼ dił tʼáadoo daahsání.
