Leviticus 4:1-35
4 Áádóó Bóhólníihii éí Mózes yichʼįʼ haadzíiʼgo ííłní,
2 Ízrel dineʼé bichʼįʼ handziihgo kóbidiní, Łaʼ tʼáadoo baa ákozníziní ádił adzisiihgo, éí Bóhólníihii bibikʼeh óʼooʼníiłii doo ádoolníił da, nínígíí ájiilaago, éí tʼááłáhígo hazʼą́ dzizʼįįdígíí bee ádihozhdiiltʼiʼgo,
3 nááʼiiłniihii akʼah bikʼi yaadziidgo biʼdoolzı̨́įʼii éí Ízrel dineʼé ádił nidaʼiisíihii bikʼehgo ádił asiihgo, éí ádił niʼiidzííh yee ádił asiihígíí biniinaa dóola yázhí hadaałtʼéii néididoolóosgo Bóhólníihii bichʼįʼ ádił niʼiidzííhjí nááhániihii néidiyoołnih.
4 Áádóó dóola yázhí éí níbaal biiʼ dahozdísinii bichʼéédą́ąʼgi Bóhólníihii binááł niidoolóós áádóó dóola yázhí bitsiitʼáagi dah didoolnihgo Bóhólníihii binááł yidiyoołhééł.
5 Áko nááʼiiłniihii akʼah bikʼi yaadziidgo biʼdoolzı̨́įʼii éí dóola yázhí bidiłígíí níbaal biiʼ dahozdísinii siʼáníjįʼ yidookááł.
6 Áádóó nááʼiiłniihii éí diłígíí yiih didoolnihgo Bóhólníihii binááł tsʼídá aláahgo hodiyingo hazʼánígíí bidáádiníbaal bidáahjįʼ tsostsʼidi ałkééʼ niʼjįʼ dił iidoołkał.
7 Áko nááʼiiłniihii éí níbaal biiʼ dahozdísinii góneʼ Bóhólníihii binááł tsin bijeeh dilidgo łikání halchinii bikááʼ nááʼiiniihí bideeʼ dadeezʼáhígíí diłígíí łaʼ yąąh íidoolííł. Áádóó dóola yázhí bidił yidziihígíí tʼáá átʼé níbaal biiʼ dahozdísinii bichʼéʼétiingi didlidgo nááhániihii biniyé bikááʼ nááʼiiniihí siʼánígíí bitsı̨́įjįʼ yeidooził.
8 Índa dóola yázhí bikʼah tʼáá átʼé ádił niʼiidzííhjí nááhániihii átʼéego hazhdoonił; akʼah łání áádóó bitsą́ siláí akʼah daabąąhígíí tʼáá átʼé
9 áádóó bitsą́ áshkʼazhí tʼáá áłah áádóó akʼah tʼáá bąąhgo, éí atságah bidiitʼiʼígíí, índa azid bíighahgi akʼahígíí éí atsą́ áshkʼazhí tʼáá bił hazhdoonił.
10 Nááhidoonihii éí hózhǫ́ǫ́jí nááhániihii béégashii bikʼah haaʼnilígi átʼéego hazhdoonił, áko nááʼiiłniihii éí didlidgo nááhániihii néidiyoołnih biniyé bikááʼ nááʼiiniihí bikáaʼjįʼ yididoołił.
11 Bikágí áádóó bitsįʼ tʼáá átʼé índa bitsiitsʼiin áádóó bijáád biłgo bitsą́ siláí índa bichaan tʼáá bił;
12 dóola yázhí tʼáá sitı̨́ı̨́ nítʼééʼ níbaal haalʼá bitsʼáhwiiníʼą́ądi yáʼáhootʼéehjįʼ chʼídoojihgo łeeshchʼiih nehekaahgi chizh bikáaʼgi didoodlił; łeeshchʼiih yah hiikaahgi didoodlił.
13 Ízrel dineʼé tʼáá yílʼáá nítʼééʼ tʼáadoo ádaa ákodandziní ádił daʼasiihgo áádóó aląąjįʼ naazíinii ahínéikahígíí doo bił béédahózingóó Bóhólníihii bibikʼeh óʼooʼníiłii doo ádoolníił da, nínígíí doo yikʼeh ádaadzaagóó yee ádidahodiiltʼiʼgo,
14 ádił niʼiidzííh yee ádił daʼasiihígíí bił béédahoozingo Ízrel dineʼé éí dóola yázhí ádił niʼiidzííhjí nááhániihii níbaal biiʼ dahozdísinii bichʼéédą́ąʼgi deidoolóós.
15 Áádóó Ízrel dineʼé yiląąjįʼ naazíinii éí Bóhólníihii binááł dóola yázhí yitsiitʼáagi dah dadidoolnihgo Bóhólníihii binááł dóola yázhí deidiyoołhééł.
16 Áko nááʼiiłniihii akʼah bikʼi yaadziidgo biʼdoolzı̨́įʼii éí dóola yázhí bidił łaʼ níbaal biiʼ dahozdísinii siʼáníjįʼ yidookááł.
17 Áádóó nááʼiiłniihii éí diłígíí yiih didoolnihgo Bóhólníihii binááł dáádiníbaalígíí bidáahjįʼ tsostsʼidi ałkééʼ niʼjįʼ dił iidoołkał.
18 Índa níbaal biiʼ dahozdísinii góneʼ bikááʼ nááʼiiniihí Bóhólníihii binááł siʼáanii bideeʼ dadeezʼáhígíí diłígíí łaʼ yąąh íidoolííł áádóó dił yidziihígíí tʼáá átʼé níbaal biiʼ dahozdísinii bichʼéʼétiingi didlidgo nááhániihii biniyé bikááʼ nááʼiiniihí bitsı̨́įjįʼ yeidooził.
19 Akʼahígíí tʼáá átʼé yitsʼéidooniłgo bikááʼ nááʼiiniihí yikáaʼjįʼ yididoołił.
20 Ádił niʼiidzííhjí nááhániihii éí dóola yázhí nááyiisniiʼ yę́ęgi átʼéego nááʼiiłniihii ákóʼdoolííł; kótʼéego nááʼiiłniihii éí há bee kʼééhodoodǫǫłii há nááyiisniiʼgo ádił nidaʼdziisíʼígíí há yóóʼanídidootʼááł.
21 Áádóó níbaal haalʼá bitsʼáhwiiníʼą́ą́góó iidoojihgo áłtséédą́ą́ʼ dóola yázhí yiidííłid yę́ęgi átʼéego yiididoołił; díí ádił niʼiidzííhjí nááhániihii átʼéego Ízrel dineʼé bá átʼée doo.
22 Naatʼáanii łaʼ ádił adzisiihgo tʼáadoo ádaa ákoznidziní Bóhólníihii haDiyin God bibikʼeh óʼooʼníiłii doo ádoolníił da, nínígíí doo bikʼeh ádziidzaagóó bee ádihozhdiiltʼiʼgo
23 ádił niʼiidzííh bee ádił adzisiihígíí hoł bééhoozingo éí nááhizhdoołnihii tłʼízíchǫǫh hadaałtʼéii jidoolóós.
24 Áádóó tłʼízíchǫǫh bitsiitʼáagi dashdidoolnihgo didlidgo náádahaniihii nidaatseedígi Bóhólníihii binááł jidiyoołhééł; éí ádił niʼiidzííhjí nááhániihii átʼée doo.
25 Áko nááʼiiłniihii éí ádił niʼiidzííhjí nááhániihii bidił yiih didoolnihgo didlidgo nááhániihii biniyé bikááʼ nááʼiiniihí bideeʼ dadeezʼáhígíí yąąh íidoolííł áádóó dił yidziihígíí éí didlidgo nááhániihii biniyé bikááʼ nááʼiiniihí siʼánígíí bitsı̨́įjįʼ yeidooził.
26 Áádóó akʼahígíí tʼáá átʼé bikááʼ nááʼiiniihí yikáaʼjįʼ yididoołił; nááhidoonihii éí hózhǫ́ǫ́jí nááhániihii bikʼah didlidígi átʼéego yiididoołił; kótʼéego nááʼiiłniihii éí há bee kʼééhodoodǫǫłii há nááyiisniiʼgo ádił niʼdziisíiʼii há yóóʼanídidootʼááł.
27 Índa diné tʼáá azlı̨́ʼígíí łaʼ tʼáadoo ádaa ákoznidziní ádił adzisiihgo Bóhólníihii bibikʼeh óʼooʼníiłii doo ádoolníił da, nínígíí doo bikʼeh ádziidzaagóó bee ádihozhdiiltʼiʼgo
28 ádił niʼiidzííh bee ádił adzisiihígíí hoł bééhoozingo, éí nááhizhdoołnihii tłʼízí biʼáadii hadaałtʼéii ádił niʼiidzííh bee ádił adzisiihígíí biniinaa jidoołtééł.
29 Áádóó éí ádił niʼiidzííhjí nááhániihii bitsiitʼáagi dashdidoolnihgo ádił niʼiidzííhjí nááhániihii didlidgo nááʼiiniihígi jidiyoołhééł.
30 Índa nááʼiiłniihii éí nááhániihii bidił yiih didoolnihgo didlidgo nááhániihii biniyé bikááʼ nááʼiiniihí bideeʼ dadeezʼáhígíí yąąh íidoolííł, áádóó dił yidziihígíí bikááʼ nááʼiiniihí biyaajįʼ yeidooził.
31 Áádóó akʼahígíí tʼáá átʼé nááhidoonihii éí hózhǫ́ǫ́jí nááhániihii bikʼah bitsʼáʼnilígi átʼéego yitsʼéidoonił; nááʼiiłniihii éí bikááʼ nááʼiiniihí yikáaʼjįʼ akʼahígíí yididoołiłgo Bóhólníihii bichʼįʼ łikání halchin doo; kótʼéego nááʼiiłniihii éí há bee kʼééhodoodǫǫłii há nááyiisniiʼgo ádił niʼdziisíʼígíí há yóóʼanídidootʼááł.
32 Ádił niʼiidzííhjí nááhániihii biniyé dibé yázhí jiníłtı̨́įgo éí dibé yázhí biʼáadii hadaałtʼéii jidoołtééł.
33 Áko ádił niʼiidzííhjí nááhániihii bitsiitʼáagi dashdidoolnihgo ádił niʼiidzííhjí nááhániihii átʼéego didlidgo nááhániihii naatseedígi jidiyoołhééł.
34 Áádóó nááʼiiłniihii éí ádił niʼiidzííhjí nááhániihii bidił yiih didoolnihgo didlidgo nááhániihii biniyé bikááʼ nááʼiiniihí bideeʼ dadeezʼáhígíí yąąh íidoolííł, áádóó dił yidziihígíí tʼáá átʼé bikááʼ nááʼiiniihí bitsı̨́įjįʼ yeidooził.
35 Áádóó akʼahígíí tʼáá átʼé dibé yázhí bikʼah nááhidoonihii éí hózhǫ́ǫ́jí nááhániihii bikʼah bitsʼáʼnilígi átʼéego yitsʼéidoonił, áko nááʼiiłniihii éí bikááʼ nááʼiiniihí yikáaʼjįʼ Bóhólníihii bichʼįʼ didlidgo náádahaniihii bikʼehgo yididoołił; kótʼéego nááʼiiłniihii éí há bee kʼééhodoodǫǫłii há nááyiisniiʼgo ádił niʼdziisíiʼii há yóóʼanídidootʼááł.
