Leviticus 5:1-19
5 Łaʼ ádił adzisiihgo tʼáadoo leʼé hazhdeelʼı̨́įʼgo, doodaiiʼ hoł bééhózingo éí diné binááł baa hodíílnih hodiʼníigo ádee haʼdidziih jidiiztsʼą́ąʼ nidi, doo baa hojilneʼgóó bee ádił adzisiihgo éí doo ákwii ájíítʼįįdígíí bee hohodiitʼiʼgo nijigháa doo.
2 Éí doodaiiʼ łaʼ tʼáá haʼátʼíhída yíchxǫʼii éí naaldlooshii ałchinii, doodaiiʼ alı̨́ı̨́ʼ, doodaiiʼ nidaaʼnaʼii daaztsą́ągo yíchxǫʼii* tʼáadoo baa ákozníziní bíhizhdééʼnáaʼgo hó ałdóʼ éí bee doo hoʼdidoodah da áádóó hohodidootʼih.
3 Doodaiiʼ yee yíchxǫʼii bíhizhdééʼnáaʼgo tʼáá haʼátʼíhída yee yíchxǫʼii tʼáadoo baa ákozníziní bíhizhdééʼnáaʼgo áádóó bikéeʼdi índa hoł bééhoozingo bee hohodiitʼiʼgo átʼée doo.
4 Éí doodaiiʼ łaʼ ádee hazdoodzíiʼgo doo yáʼáshóonii, doodaiiʼ yáʼátʼéehii ádeeshłííł jinízingo tʼáadoo tsíhodeeskézí, ázhdííniidgo tʼáadoo baa ákozníziní tʼáadoo leʼé bee ádee hazdoodzíiʼgo bikéeʼdi índa hoł bééhoozingo éí łaʼ bee hohodiitʼiʼ doo.
5 Ákohgo kózhdoonííł: éí łaʼ bee ádihozhdiiltʼiʼgo éí bee ádił asésiih jiníigo bee ádaa hozhdoolnih.
6 Áádóó doo ákǫ́ǫ́ ájíítʼįįdjí nááhániihii Bóhólníihii bichʼįʼ náájiiłniihgo éí ádił niʼiidzííh bee ádił niʼjiisíhígíí biniyé dibé bitahdę́ę́ʼ dibé yázhí, doodaiiʼ tłʼízí yázhí biʼáadii nízhdidoołtéełgo ádił niʼiidzííhjí nááhániihii átʼéego nááhizhdoołnih; kótʼéego nááʼiiłniihii éí há bee kʼééhodoodǫǫłii ádił niʼjiisíhígíí biniinaa há néidiyoołnih.
7 Nidi dibé yázhí jidoołtéełgi biʼoshneelʼą́ągo hasbídí naakigo, doodaiiʼ hasbídí łigaii biyázhí naakigo doo ákǫ́ǫ́ ájíítʼįįdígíí biniyé Bóhólníihii bichʼįʼ nááhizhdoołnih; łaʼ ádił niʼiidzííhjí nááhániihii, łaʼ éí didlidgo nááhániihii átʼée doo.
8 Áko nááʼiiłniihii baazhdooniłgo éí ádił niʼiidzííhjí nááhániihii áłtsé néidiyoołnih; éí hasbídí bikʼos niiʼdidoogis nidi doo aháidoonił da.
9 Áádóó ádił niʼiidzííhjí nááhániihii bidiłígíí éí bikááʼ nááʼiiniihí bąąhjįʼ yikʼíidoołkał; dił yidziihígíí éí bikááʼ nááʼiiniihí siʼánígíí bitsı̨́įjįʼ yąąh haidoonih; díí ádił niʼiidzííhjí nááhániihii átʼée doo.
10 Naaki góneʼígíí éí bikʼehgo hoogáałii bikʼehgo didlidgo nááhániihii átʼéego nááhizhdoołnih, áko nááʼiiłniihii éí há bee kʼééhoodǫǫłgo nááhániihii ádił niʼiidzííh bee ádił niʼjiisíhígíí biniinaa há néidiyoołnihgo ádił niʼjiisíhígíí há yóóʼanídidootʼááł.
11 Nidi hasbídí naakigo, doodaiiʼ hasbídí łigaii biyázhí naakigo jidoojihgi biʼoshneelʼą́ągo ádił niʼjiisíhígíí éí ómer bee íʼneelʼąąhí tʼááłáhídi akʼáán dibahí haaką́ągo náhizhdoołnihgo ádił niʼiidzííhjí nááhániihii átʼéego jidookááł; akʼah doo bikʼi yeizdooził da, doo nidi tsin bijeeh łikání halchinii fránkinsens wolyéii bikʼi yeizdoojih da, háálá ádił niʼiidzííhjí nááhániihii átʼé.
12 Áádóó nááʼiiłniihii baazhdookáałgo bílákʼee akʼáán hadeezbingo haidoojihgo éí bee ééhániihii átʼéego bikááʼ nááʼiiniihí yikáaʼjįʼ Bóhólníihii bichʼįʼ didlidgo nááhániihii yididoołił; éí ádił niʼiidzííhjí nááhániihii átʼé.
13 Kótʼéego nááʼiiłniihii éí há bee kʼééhoodǫǫłgo nááhániihii ádił niʼiidzííh łaʼ bee ádił niʼjiisíhígíí biniinaa há néidiyoołnih, áko ádił niʼjiisíhígíí há yóóʼanídidootʼááł, áádóó akʼáán yidziihígíí éí nááʼiiłniihii bí doo; akʼáán nááhániihígi átʼéego bí doo.
Doo ákǫ́ǫ́ ájíítʼįįdjí náádahaniihii
14 Áádóó Bóhólníihii éí Mózes ííłní,
15 Łaʼ doo ákǫ́ǫ́ ájíítʼįįdgóogo áádóó dílzingo Bóhólníihii baa náhiditʼaahígíí tʼáadoo baa ákozníziní bił ádił adzisiihgo éí dibé bitahdę́ę́ʼ deenástsʼaaʼ hadaałtʼéii éí shékel wolyéii hodiyingo hazʼą́ą́ góneʼ chooʼíinii bikʼehgo doo ákǫ́ǫ́ ájíítʼįįdígíí biniyé nááhidoonihii jidoolóós.
16 Áko dílzingo Bóhólníihii baa náhiditʼaahígíí bee doo ákǫ́ǫ́ ájíítʼįįdígíí bikʼé ninázhʼdoodlééł biniyé bą́ą́h ílínígíí ashdlaʼgo aháádzooígíí tʼááłáʼí bínéidoozohgo nááʼiiłniihii bichʼįʼ ninázhʼdoodlééł, áko nááʼiiłniihii éí há bee kʼééhoodǫǫłgo doo ákǫ́ǫ́ ájíítʼįįdjí nááhániihii deenástsʼaaʼ há néidiyoołnih áádóó doo ákǫ́ǫ́ ájíítʼįįdígíí há yóóʼanídidootʼááł.
17 Áádóó łaʼ ádił adzisiihgo éí ájíítʼįįdígíí doo ádoolníił da nítʼéeʼgo Bóhólníihii bibikʼeh óʼooʼníiłii doo yee hasʼą́ą da nítʼéeʼgo ájíítʼįįdgo azhą́ tʼáadoo baa ákozniizı̨́įʼ da nidi, tʼáá éí bee hohodiitʼiʼ áádóó doo ákwii ájíítʼįįdígíí bee hohodiitʼiʼgo nijigháa doo.
18 Áko deenástsʼaaʼ hadaałtʼéii dibé bitahdę́ę́ʼ nídidíílóosgo bą́ą́h aníłínígíí bikʼehgo doo ákǫ́ǫ́ ájíítʼįįdjí nááhániihii átʼéego nááʼiiłniihii bichʼįʼ kózhdoolííł, áko nááʼiiłniihii éí há bee kʼénáhoodǫǫłgo nááhániihii tʼáadoo baa ákozníziní doo ákǫ́ǫ́ ájíítʼįįdígíí biniyé há néidiyoołnihgo há yóóʼanídidootʼááł.
19 Díí éí doo ákǫ́ǫ́ áhóótʼįįdjí nááhániihii átʼé; tʼáádóo nídí doo ákǫ́ǫ́ ájíítʼįįdígíí bee Bóhólníihii bikʼijįʼ dzizlı̨́ı̨́ʼ nítʼééʼ.
Footnotes
^ Yíchxǫʼii jiníigo éí doo dooghałii ááhyiłní. Lev. 11:1-24.
