Leviticus 6:1-30
6 Áádóó Bóhólníihii éí Mózes ííłní,
2 Łaʼ ádił adzisiihgo áádóó doo ákǫ́ǫ́ ájíítʼįįdígíí bee Bóhólníihii bikʼijįʼ dzizlı̨́įʼgo éí bił kééhojitʼíinii bichʼįʼ naʼadloʼ nijiiłdeełgo hąąh niʼílyáhígíí, doodaiiʼ ádee hazdoodzíʼígíí, doodaiiʼ tʼáá naʼníleʼdii bighá jídláhígíí, doodaiiʼ tʼáadoo leʼé biniinaa bił kééhojitʼíinii bąąh neijiiłhaał nítʼéʼígíí bééʼáhozhdilyáahgo,
3 doodaiiʼ yóóʼeeldéelii nízhdiiláago biniinaa hayoochʼíidgo tʼáá ádzaagóó ádee hazdiidziihgo díí doo ákǫ́ǫ́ átʼéii tʼáá ałtso háiida áyoolíiłgo éí yee ádił niʼiilzíhígíigi átʼéego ádił adzisiihgo
4 kózhdoonííł; jó, ádił adzisiihgo bee ádihozhdiiltʼiʼgo tʼáá naʼníleʼdii aghaʼyídláhígíí, doodaiiʼ inaʼadloʼ bee shójoostʼeʼígíí, doodaiiʼ hąąh niʼníláhígíí, doodaiiʼ yóóʼeeldéelii nízhdiiláhígíí bééʼáhozhdilyáahgo éí ákódziidzaaígíí bąą ninázhʼdoodlééł.
5 Doodaiiʼ tʼáá haʼátʼíhída bąą tʼáá ádzaagóó ádee hazdoodzíʼígíí éí doo tʼóó bíighahígo ninázhʼdoodléeł da, nidi bą́ą́h ílínígíí ashdlaʼgo aháádzooígíí tʼááłáʼí bínéizdoozohgo ninázhʼdoodlééł, áko doo ákǫ́ǫ́ ájíítʼįįdjí nááhániihii átʼéego nááhániih bijı̨́ı̨́ góneʼ éí bííʼ ílíinii baa nízhʼdooʼnił.
6 Áko doo ákǫ́ǫ́ ájíítʼįįdjí nááhániihii Bóhólníihii bichʼįʼ nááhizhdoołnihii jidoolóós; éí dibé bitahdę́ę́ʼ deenástsʼaaʼ hadaałtʼéii doo ákǫ́ǫ́ ájíítʼįįdjí nááhániihii átʼéego nááʼiiłniihii baazdoolóós.
7 Áádóó nááʼiiłniihii éí há bee kʼééhodoodǫǫłii Bóhólníihii binááł há néidiyoołnihgo tʼáá haʼátʼíhída baa nijiyáago bee doo ákǫ́ǫ́ ájíítʼįįdígíí tʼáá átʼé há yóóʼanídidootʼááł.
Náádaʼiiniihjí bee nahazʼáanii náádaałaʼígíí
8 Áko Bóhólníihii éí Mózes ííłní,
9 Éran áádóó biyeʼké biʼníłníihgo ábidiní, Díí didlidgo nááhániihjí bee hazʼáanii átʼé: didlidgo nááhániihii wolyé, háálá tłʼééʼ bíighah bikááʼ nááʼiiniihí bikáaʼgi dookʼą́ąłgo náhoolʼįįh doo; bikááʼ nááʼiiniihí bikáaʼgi kǫʼígíí éí tʼáá diltłiʼgo óolzin doo.
10 Áádóó nááʼiiłniihii ééʼ agod taʼjįʼ nineelʼánígíí áádóó tłʼaajiʼééʼ naʼatʼą́hí łigaii ditsʼidgo bee ályaii yee háádiitʼı̨́įhgo didlidgo nááhaazniiʼ yę́ę biłeeshchʼiih hááyiikáahgo bikááʼ nááʼiiniihí bíighahgi ninéíkáah doo.
11 Áko biʼééʼ háiidiyiiʼníiłgo ééʼ náánáłaʼ yiih náhádáahgo łeeshchʼiih éí níbaal haalʼá bitsʼáhwiiníʼą́ądi yáʼáhootʼéehjįʼ yááyiikáah doo.
12 Áádóó bikááʼ nááʼiiniihí bikáaʼgi kǫʼ tʼáá diltłiʼgo óolzin doo; éí doo dínóoltsis da; nááʼiiłniihii éí tʼáá ákwíí jı̨́ abínígo bikááʼ nááʼiiniihí bikáaʼgi chizh tʼáá diltłiʼgo áyósin doo, áádóó bikáaʼgi didlidgo nááhániihii ninéiʼniłgo hashtʼééyiilʼįįh doo, índa bikáaʼjįʼ akʼah hózhǫ́ǫ́jí nááhániihii átʼéego néidiłiʼ doo.
13 Bikááʼ nááʼiiniihí bikáaʼgi kǫʼ tʼáá áłahjįʼ diltłiʼgo óolzin doo; tsʼídá doo dínóoltsis da.
14 Díí akʼáán nááhániihjí bee hazʼáanii átʼé: Éran biyeʼké éí Bóhólníihii binááł bikááʼ nááʼiiniihí bidááhdóó náádayiiłniih doo.
15 Áko nááʼiiłniihii éí akʼáán nááhániihii akʼáán áádóó akʼah łaʼ índa tsin bijeeh dilidgo łikání halchinii fránkinsens wolyéii tʼáá átʼé bóóltąʼgo bílákʼee hadeezbingo hanéíjihgo bikááʼ nááʼiiniihí yikáaʼjįʼ néidiłiʼgo łikání halchingo bee ééhániihii átʼéego Bóhólníihii bichʼįʼ nááyiiłniih doo.
16 Éran áádóó biyeʼké éí yidziihígíí dííkʼǫsh tʼáágééd bááh ályaii yił hodiyingo hazʼánígi nídeidı̨́įh doo; éí níbaal biiʼ dahozdísinii binaa hazʼánígi nídeidı̨́įh doo.
17 Dííkʼǫsh doo bił álʼı̨́į da doo. Éí didlidgo nááhániihii łahjįʼ baa diníʼánígíí átʼé; tsʼídá aláahgo dílzinii éí ádił niʼiidzííhjí nááhániihii índa doo ákǫ́ǫ́ ájíítʼįįdjí nááhániihiigi átʼéii átʼé.
18 Éran bitsʼą́ą́dóó náás ahoolchíiłii bitahdóó ashiikéhígíí tʼáá ałtso éí nídeidı̨́įh dooleeł. Díí hoolʼáágóó yee nihoníʼáanii bikʼehgo éí náás daʼahíínółchííhgóó Bóhólníihii bichʼįʼ didlidgo náádahaniihii bitsʼą́ą́dóóígíí nihá átʼée doo; tʼáá háiida yihidilchídígíí éí diyin doo.
19 Áádóó Bóhólníihii éí Mózes ííłní,
20 Díí nááhániihii Éran áádóó biyeʼké náás ahoolchíiłii éí Bóhólníihii yichʼįʼ náádayiiłniihii átʼéego aláahgo nááʼiiłniihii dooleeł biniyé akʼah bikʼi yaadziidgo biʼdilzı̨́ı̨́h bijı̨́ı̨́ góneʼ náádeidiyoołnih: éí ómer bee íʼneelʼąąhí bee tʼááłáhídi akʼáán dibahí haaką́ągo akʼáán nááhániihii átʼéego tʼáá áłahjįʼ ałnííʼdóó abínígo náádayiiłniih doo índa łahjįʼ ałnííʼdóóígíí éí eʼeʼáahgo náádayiiłniih doo.
21 Éí akʼah biłgo sitʼéhígíí dííkááł; éí niheestiʼgo bááh nááhániihii átʼéego Bóhólníihii bichʼįʼ didlidgo łikání halchingo nááhíłniih doo.
22 Áko nááʼiiłniihii hayeʼké łaʼ hatsáskʼehgi naalʼaʼ doo biniyé akʼah bikʼi yaadziidgo biʼdoolzı̨́ʼígíí díí nááhániihii nááyiiłniih dooleeł; díí hoolʼáágóó yee nihoníʼáanii átʼéego Bóhólníihii bichʼįʼ ałtso nídídliʼ doo.
23 Akʼáán náádahaniihii tʼáá ałtso éí nááʼiiłniihii bá nááhániihgo ałtso néidiłiʼ doo; éí doo nídeidı̨́įh da doo.
24 Áádóó Bóhólníihii éí Mózes ííłní,
25 Éran áádóó biyeʼké bichʼįʼ handziihgo ábidiní, Díí ádił niʼiidzííhjí nááhániihii bee hazʼáanii átʼé; didlidgo nááhániihii nidaatseedígi tʼáá ákwii ádił niʼiidzííhjí nááhániihii éí Bóhólníihii binááł nidaatseed doo; éí tsʼídá aláahgo dílzinii átʼé.
26 Nááʼiiłniihii éí ádił niʼiidzííhjí nááyiisniiʼígíí néídı̨́įh doo; hodiyingo hazʼánígi éí níbaal biiʼ dahozdísinii binaa hazʼánígi néídı̨́įh doo.
27 Tʼáá haʼátʼíhída díí atsįʼ bíhidééʼnáʼígíí dílzin dooleeł, índa bidił łaʼ éí ééʼ bikʼé náłdasgo éí bikʼé náłdasígíí hodiyingo hazʼą́ągi tánínádaahgis doo.
28 Nidi hashtłʼish łeetsʼaaʼ bee shíníłbéezhgo dííłtsʼił; béésh łitsoii ásaaʼ bee shíníłbéezhgo yéego bąąh dííchʼish índa bąąh nidííłʼoł.
29 Diné nááʼiiłniihii danilínígíí tʼáá ałtso éí atsįʼígíí nídeidı̨́įh doo; éí tsʼídá aláahgo dílzinii átʼé.
30 Áádóó ádił niʼiidzííhjí nááhániihii bidił éí níbaal biiʼ dahozdísinii biyiʼ hodiyingo hazʼání góneʼ bee kʼééhodoodǫǫł biniyé yah anákáahgo éí atsįʼígíí doo nídeidı̨́įh da doo; tʼóó nídeidiłiʼ doo.
