Leviticus 8:1-36
8 Áádóó Bóhólníihii éí Mózes ííłní,
2 Éran áádóó biyeʼké nídidííʼishgo, ééʼ áádóó akʼah akʼi yahiidzíidgo bee alzı̨́įhii nídiinííł, índa dóola yázhí ádił niʼiidzííhjí nááhániihii átʼéego áádóó deenástsʼaaʼ naakigo nídidííʼish, índa dííkʼǫsh tʼáágééd bááh ályaii tsʼiizis bee dííkááł,
3 áádóó níbaal biiʼ dahozdísinii bichʼéédą́ąʼjįʼ Ízrel dineʼé tʼáá átʼé áłah ádíílííł.
4 Áko Mózes éí Bóhólníihii hachʼįʼ yee haadzíʼígíí biʼjiilaago níbaal biiʼ dahozdísinii bichʼéédą́ąʼjįʼ Ízrel dineʼé áłah ájiilaa.
5 Mózes éí áłah ílínígíí yichʼįʼ haadzíiʼgo ání, Díí ádoolníiłgo Bóhólníihii yee haadzííʼ.
6 Áádóó Mózes éí Éran áádóó biyeʼké jiníʼeezhgo nidabijiisbı̨́ı̨́ʼ.
7 Áko Mózes éí ayaadi ééʼ nineezígíí Éran biih jííłtı̨́įgo sis bee áká bijiszas áádóó ééʼ agod taʼjįʼ nineelʼánígíí biih náájííłtı̨́; éí bikáaʼgi íífad wolyéii éí ajéítsʼiin bąąh nináltsosígíí yąąh niiníłtsoozgo íífad biniyé sis naashchʼąąʼgo yistłʼónígíí yee yeʼaztłʼǫ́.
8 Áádóó ayidgi dah siłtsoozígíí yąąh niiníłtsoozgo éí biiʼ góneʼ Yúrim áádóó Thámmim wolyéhígíí ałdóʼ niinínil.
9 Áko atsiináztʼiʼígíí bitsiinídzístʼiʼgo bikáaʼgi átáaʼgi óola diyingo dah nátı̨́hígíí bítáaʼgi bíjístłʼǫ́; Bóhólníihii éí Mózes yichʼįʼ yee haadzíʼígíí yiʼiilaa.
10 Áádóó Mózes éí akʼah akʼi yahiidzíidgo bee alzı̨́įhii néidiiką́ągo níbaal biiʼ hodílzinii áádóó biiʼ góneʼ naaznilii tʼáá átʼé yiyíísı̨́įʼgo dílzingo áyiilaa.
11 Éí akʼah bee tsostsʼidi bikááʼ nááʼiiniihí bikʼídzístah índa bikááʼ nááʼiiniihí áádóó biłeetsʼaaʼ bił chodaoʼínígíí tʼáá átʼé akʼah bee dadzíísı̨́ı̨́ʼ; biiʼ táʼádígisí áádóó bá siʼánígíí tʼáá bił dílzingo ájiilaa.
12 Ákohgo Éran éí akʼah akʼi yahiidzídígíí bitsiitʼáajįʼ yadziiziidgo jíísı̨́ı̨́ʼ; diyingo atsʼázhníłtı̨́.
13 Áádóó Mózes éí Éran biyeʼké nízhdiiʼeezhgo ayaadi ééʼ nineezígíí biih jiiłteehgo sis bee áká dabidzisas, áádóó chʼah bitsiinídadzistʼiʼ; Bóhólníihii éí Mózes yichʼįʼ yee haadzíʼígíí yiʼiilaa.
14 Áádóó dóola yázhí ádił niʼiidzííhjí nááhániihii átʼéego yinílóóz, áko Éran áádóó biyeʼké éí dóola yázhí ádił niʼiidzííhjí nááhániihii átʼéego yitsiitʼáagi dah dadeesʼniiʼ.
15 Áko Mózes éí dóola yázhí yiyiisxı̨́įgo bidiłígíí néidiiką́ągo bikááʼ nááʼiiniihí bideeʼ dadeezʼáhígíí yąąh áyiilaago dílzingo áyiilaa áádóó yidziihígíí éí bikááʼ nááʼiiniihí bitsı̨́įjįʼ yayiiziidgo bee kʼé náhodoodleeł biniyé dílzingo atsʼáidiníʼą́.
16 Áádóó Mózes éí atsą́ siláí akʼah daabąąhígíí tʼáá átʼé áádóó azid bíighahgi akʼahígíí índa atsą́ áshkʼazhí bąąh akʼahígíí tʼáá bił néidiinilgo bikááʼ nááʼiiniihí yikáaʼjįʼ yiidííłid.
17 Nidi dóola yázhí bikágí áádóó bitsįʼ índa bichaan éí níbaal haalʼá bitsʼáhwiiníʼą́ądi yidííłid; Bóhólníihii éí Mózes yichʼįʼ yee haadzíʼígíí yiʼiilaa.
18 Áádóó deenástsʼaaʼ didlidgo nááhidoonih biniyé yinílóóz, áádóó Éran índa biyeʼké éí deenástsʼaaʼ bitsiitʼáagi dah dadeesʼniiʼ.
19 Mózes éí deenástsʼaaʼ yiyiisxı̨́įgo bidiłígíí éí bikááʼ nááʼiiniihí bikáaʼgi tʼáá átʼé yikʼíistah.
20 Áko deenástsʼaaʼ niyiishgizh, áádóó bitsiiʼ áádóó neheeshgizhígíí índa akʼahígíí yidííłid.
21 Áádóó atsą́ siláí índa ajáád tánéízgiz, áko Mózes éí deenástsʼaaʼ tʼáá átʼé bikááʼ nááʼiiniihí yikáaʼjįʼ yidííłid; éí didlidgo nááhániihii łikání halchinii átʼéego Bóhólníihii bichʼįʼ didlidgo nááhaazniiʼ; Bóhólníihii éí Mózes yichʼįʼ yee haadzíʼígíí yiʼiilaa.
22 Áádóó deenástsʼaaʼ łaʼígíí diyingo hatsʼąą hastiʼgo há nááhániihii nínéidiilóóz; éí bitsiitʼáagi Éran áádóó biyeʼké dah dadeesʼniiʼ.
23 Mózes éí deenástsʼaaʼ yiyiisxı̨́įgo diłígíí łaʼ néidiiką́ągo éí yee Éran bijaaʼ nishʼnáájí yaa ninítʼiʼígi dah yiyiiłchiiʼ áádóó bílátsoh nishʼnáájí índa bikétsoh nishʼnáájí bílátahgi dah yiyiiłchiiʼ.
24 Áádóó Mózes éí Éran biyeʼké hágo yidííniidgo diłígíí łaʼ néidiiką́ągo éí yee dabijaaʼ nishʼnáájí yaa nidaaztʼiʼgi áádóó dabílátsoh nishʼnáájí índa dabikétsoh nishʼnáájí dah dayiiłchiiʼ, índa dił yidziihígíí bikááʼ nááʼiiniihí bikáaʼgi tʼáá átʼé yikʼíístah.
25 Deenástsʼaaʼ bikʼah áádóó bitseeʼ neeskʼahígíí áádóó bitsą́ siláí bąąh akʼahígíí tʼáá átʼé áádóó azid bíighahgi akʼahígíí áádóó bitsą́ áshkʼazhí bąąh akʼahígíí tʼáá biłgo índa bijáád nishʼnáájíígíí ałdóʼ néidiinil.
26 Índa dííkʼǫsh tʼáágééd bááh ádaalyaii Bóhólníihii binááł tsʼiizis bee sikánígíí biiʼdę́ę́ʼ bááh áádóó łeesʼáán akʼah bił ályaii índa bááh dáʼákaʼí tʼáá daałaʼígo néidiinilgo akʼah áádóó ajáád nishʼnáájíígíí yikáaʼgi dah yiznil.
27 Áko éí tʼáá ałtso Éran índa biyeʼké yílákʼee yíínilgo Bóhólníihii binááł náásee bił nídiʼdilnihgo nááhániihii átʼéego náásee yił dadideesniiʼ.
28 Áádóó Mózes éí dahálákʼeedóó néidiinilgo bikááʼ nááʼiiniihí yikáaʼjįʼ yiidiłidgo didlidgo nááhániihii átʼéego nááyiisniiʼ, áko éí diyingo bitsʼąą hastiʼgo Bóhólníihii bichʼįʼ há nááhániihii łikání dahalchinii didlidgo nááhaazniiʼii ádaatʼé.
29 Áko Mózes éí ajéítsʼiinígíí néidiiʼą́ągo Bóhólníihii binááł náásee yił nídiʼdilnihgo nááhániihii átʼéego náásee yił nídiʼdilnih nítʼééʼ; diyingo hatsʼąą hastiʼgo há deenástsʼaaʼ nááhániihii bijéítsʼiinígíí éí Mózes bí; Bóhólníihii éí Mózes áyidííniidígíí yiʼiilaa.
30 Áádóó Mózes éí akʼah akʼi yahiidzíidii áádóó diłígíí bikááʼ nááʼiiniihí yikʼíístahii tʼáá bííʼohígíí néidiiką́ągo Éran áádóó biyeʼké índa dabiʼééʼ tʼáá yił yikʼíístahgo Éran áádóó biʼééʼ áádóó biyeʼké índa dabiʼééʼ dadílzingo ájiilaa.
31 Áko Mózes éí Éran áádóó biyeʼké ííłní, Níbaal biiʼ dahozdísinii bichʼéédą́ąʼgi atsįʼígíí dadoołbishgo diyingo bitsʼąą hastiʼgo nihá nááhániihii tsʼiizis bee bááh sikánígíí biłgo dadoohsı̨́ı̨́ł; tʼáá bee haasdzíʼígi átʼéego ádíshní, Éran áádóó biyeʼké deidooyı̨́ı̨́ł.
32 Éí atsįʼ áádóó bááh łaʼ tʼáá chʼínííłnaʼgo éí dadidoohłił.
33 Tsostsʼid yiską́ąjįʼ níbaal biiʼ dahozdísinii biiʼdóó doo chʼídoohkah da; diyingo bitsʼąą hastiʼii bíighah yiską́ągo índa chʼídoohkah, áko tsostsʼid jı̨́ diyingo nihitsʼąą hastiʼgo ánihizhdoolííł.
34 Díí jı̨́ ídaʼiilyaaígi átʼéego Bóhólníihii yee haadzíʼígíí bikʼehgo bee nihá kʼééhodoodǫǫłii náádahiilniiʼ.
35 Éí bąą níbaal biiʼ dahozdísinii bichʼéédą́ąʼgi shá bíighah áádóó tłʼééʼ bíighah nahísóotą́ągo tsostsʼid yidoołkááł, áko Bóhólníihii bikʼeh ádanohtʼéego doo dínóohnéeł da; jó, shí ákótʼéego bee shichʼįʼ haʼoodzííʼ.
36 Áko Éran áádóó biyeʼké éí Mózes binahjįʼ Bóhólníihii hachʼįʼ yee haadzíiʼii tʼáá ałtso bidaʼjiilaa.
