Leviticus 9:1-24
9 Áádóó tseebíí yiską́ągo Mózes éí Éran áádóó biyeʼké índa Ízrel dineʼé yá aląąjįʼ naazíinii hágo yidííniid.
2 Ákohgo Éran ííłní, Dóola yázhí éí ádił niʼiidzííhjí nááhániihii átʼéego índa deenástsʼaaʼ éí didlidgo nááhániihii átʼéego tʼáá áłah hadaałtʼéii nídiiʼéeshgo Bóhólníihii binááł nááhidííłnih.
3 Áádóó Ízrel dineʼé ábidiní, Tłʼízíchǫǫh éí ádił niʼiidzííhjí nááhániihii átʼéego áádóó dóola yázhí índa dibé yázhí éí tʼáá áłah łaʼ binááhaí hadaałtʼéii didlidgo nááhániihii átʼéego nídadidoohʼish.
4 Áádóó dóola yázhí índa deenástsʼaaʼ éí hózhǫ́ǫ́jí nááhániihii átʼéego Bóhólníihii binááł náádahidoołnih, áádóó akʼáán éí akʼah bił ałtahgo nááhániihii náádahidoołnih; jó, díí jı̨́ Bóhólníihii nihichʼįʼ yitʼíní ídiʼdoolnííł.
5 Áko Mózes hachʼįʼ yee haadzíʼígíí bikʼehgo níbaal biiʼ dahozdísinii bichʼéédą́ąʼjįʼ nidajiizhʼeezh áádóó Ízrel dineʼé tʼáá átʼé áháníjįʼ niikaigo Bóhólníihii yinááł naazı̨́.
6 Áádóó Mózes ání, Díí éí ádadoohníiłgo Bóhólníihii yee nihá haadzííʼ, áko Bóhólníihii bee biʼoh adidilyéehii nihichʼįʼ ííshjání dooleeł.
7 Ákohgo Mózes éí Éran ííłní, Nílááh, bikááʼ nááʼiiniihí bichʼįʼ ninínááh, áádóó ádił oodzííʼjí nááhidííłnihígíí índa didlidgo nááhidííłnihígíí éí bee kʼééhodííłdǫǫłii ádá nááhidííłnih, áádóó Ízrel dineʼé índa nááhidoonihii náádeidiyoołnihígíí éí bee kʼééhodííłdǫǫłii bá nááhidííłnih; jó, Bóhólníihii ákótʼéego yee haadzííʼ.
8 Áko Éran éí bikááʼ nááʼiiniihí bichʼįʼ nizhníyáago dóola yázhí ádił niʼiidzííhjí nááhániihii tʼáá hó ádá nááhizhdoołnihígíí jiisxı̨́.
9 Áádóó hayeʼké éí diłígíí haa deizką́, áko dił biishdoolniiʼgo éí dił łaʼ bikááʼ nááʼiiniihí bideeʼ dadeezʼáhígíí bąąh ájiilaa, índa dił yidziihígíí éí bikááʼ nááʼiiniihí bitsı̨́įjįʼ yajiiziid.
10 Nidi akʼah áádóó atsą́ áshkʼazhí índa azid bíighahgi akʼahígíí éí ádił niʼiidzííhjí nááhániihii átʼéego bikááʼ nááʼiiniihí bikáaʼjįʼ jidííłid; Bóhólníihii éí Mózes yichʼįʼ yee haadzíʼígíí biʼjiilaa.
11 Áádóó atsįʼ índa akágí éí níbaal haalʼá bitsʼáhwiiníʼą́ądi jidííłid.
12 Áádóó didlidgo nááhidoonihígíí yiyiisxı̨́įgo éí bidiłígíí Éran hayeʼké haa deizką́ągo bikááʼ nááʼiiniihí tʼáá ałtsodę́ę́ʼ bikʼídzístah.
13 Áko didlidgo nááhániihii niheeshgizhígíí áádóó atsiiʼígíí tʼáá bił haa deiznilgo bikááʼ nááʼiiniihí bikáaʼjįʼ jidííłid.
14 Áádóó bitsą́ siláí índa ajáád éí táájízgiz áádóó bikááʼ nááʼiiniihí bikáaʼjįʼ jidiłidgo náájiisniiʼ.
15 Áko Ízrel dineʼé bá nááhidoonihígíí nizhnílóóz; éí tłʼízí ádił oodzííʼjí nááhidoonihígíí Ízrel dineʼé bá nááhániihii átʼéego nízdiidzı̨́ı̨́z áádóó jiisxı̨́įgo tʼáá átséedi ádił oodzííʼjí náájiisniiʼígi átʼéego náájiisniiʼ.
16 Áádóó didlidgo nááhidoonihígíí nízdiilóozgo bikʼehgo hoogáałii bikʼehgo náájiisniiʼ.
17 Áko akʼáán nááhidoonihígíí nízhdiiką́ągo hálákʼee hadeezbingo łaʼ hajííjaaʼgo bikááʼ nááʼiiniihí bikáaʼjįʼ abínígo didlidgo nááhániihii bóóltąʼgo jidííłid.
18 Dóola yázhí índa deenástsʼaaʼ nízhdiiʼeezhgo nidzistseed; éí nááhidoonihii hózhǫ́ǫ́jí nááhániihii átʼéego Ízrel dineʼé bá náájiisniiʼ, áko Éran hayeʼké éí diłígíí haa deizką́ągo bikááʼ nááʼiiniihí tʼáá ałtsodę́ę́ʼ bikʼídzístah.
19 Dóola yázhí índa deenástsʼaaʼ bikʼahígíí áádóó bitseeʼ neeskʼahígíí áádóó bitsą́ siláí bąąh akʼahígíí, bitsą́ áshkʼazhí áádóó azid bíighahgi akʼahígíí
20 éí akʼahígíí ajéítsʼiin yikááʼ nideiznilgo bikááʼ nááʼiiniihí bikáaʼjįʼ jidííłid.
21 Mózes haadzíʼígi átʼéego Éran éí ajéítsʼiin áádóó ajáád nishʼnáájíígíí náásee bił nídiʼdilnihgo nááhániihii átʼéego Bóhólníihii binááł náásee bił jidideesniiʼ.
22 Áádóó Éran éí diné bichʼįʼ dashdidiilniiʼgo, Nihikʼidahojidlíi leʼ, bizhdííniid, áádóó ádił niʼiidzííhjí nááhániihii áádóó didlidgo nááhániihii índa hózhǫ́ǫ́jí nááhániihii náájiisniiʼdę́ę́ʼ hadajííyá.
23 Áko Mózes áádóó Éran éí níbaal biiʼ dahozdísinii góneʼ yah ajííʼáázh áádóó áádę́ę́ʼ chʼééjítʼáazhgo, Nihikʼidahojidlíi leʼ, diné bizhdííniid, áádóó Bóhólníihii bee biʼoh adidilyéehii diné tʼáá átʼé bichʼįʼ yitʼíní silı̨́ı̨́ʼ.
24 Ákohgo Bóhólníihii bitsʼą́ą́dę́ę́ʼ kǫʼ bidadíínóodgo bikááʼ nááʼiiniihí bikáaʼjįʼ didlidgo nááhániihii áádóó akʼah ałtso adííkʼą́ą́ʼ, áko éí diné tʼáá ałtso dayiiłtsą́ągo hadadeeshghaazhgo tséʼyaa daneeshjool.
