Luke 10:1-42
10 Áádóó bikʼijįʼ Bóhólníihii éí diné náánáłaʼ tsostsʼidiin yiltʼéego néidiinil. Áko kin hadaasʼáágóó índa kin naazhjaaʼgóó kʼadę́ę dashdiigháahgo naaki níláago álą́ąjįʼ ajiisʼaʼ.
2 Íídą́ą́ʼ ábizhdííniid, Tʼáá íiyisí daʼneestʼą́, nidi daʼdooyishígíí tʼáá díkwíí; éí bąą agizh bee Bóhólníihii bá daʼdooyishígíí dáʼákʼehgóó iidiyoołʼaałgo bíká sodadołzin.
3 Nihílááh wohkah; jóʼakon, mąʼiitsohtahgóó dibé yázhí dadeeskaiígi átʼéego danihidishʼá.
4 Dah naʼayizii áádóó azis bee naʼaljidí índa ké tʼáadoo dayínóhjáhí, áádóó kʼé haʼní biniyé atiingóó tʼáadoo nidaʼáhodołziidí.
5 Tʼáá haaʼída hooghangi yah adahohkáahgi átsé, Díí hooghanígi hózhǫ́ǫ leʼ! dadohní.
6 Áádóó diné kʼé nídzinii ákwii łaʼ sidáago, kʼé bee yínóhʼníinii bił hólǫ́ǫ dooleeł, doodaiiʼ éí kʼéhígíí tʼóó nihichʼįʼ tʼą́ą́ʼ nídoodleeł.
7 Áádóó tʼáá éí hooghanígi tʼáá ákwii nahísóotą́ą doo, tʼáá nihiyaa nidayiikaahígíí daahsą́ áádóó daahdlą́ą doo, háálá naalnishí éí bichʼįʼ nahalyéii yą́ą́h nilı̨́; tʼáadoo tʼóó hootaadaahkaaí.
8 Tʼáá haaʼída kin hadaasʼáagi nidahohkáahgo, kʼé danihiłníigo, tʼáá nihiyaa nidayiikaahígíí daahsą́;
9 ákweʼé bitah doo dahatsʼídígíí hadaałtʼé áńdaahdleʼgo, Diyin God bee bóhólníihgo bił hazʼáanii bee nihaa honíyá, dabidohní.
10 Nidi tʼáá haaʼída kin hadaasʼáagi nidahohkáahgo doo kʼé danihiłníígóó, ákweʼé kintah daʼnítiinjįʼ chʼídahohkáahgo ádadidoohniił,
11 Nihikintahdóó łeezh nihikeeʼ bee łibá daazlı̨́ʼígíí nihikʼijįʼ ádąąh deiildééh, ákondi díí nihił béédahózin leʼ, Diyin God bee bóhólníihgo bił hazʼáanii bee nihaa honíyá.
12 Nihił hashneʼ, aa hwiinítʼįįh beiníłką́ądi éí kin haalʼáhígíí Sádam biláahgo atíbidiʼdoolnííł.
Kin hadaasʼáagi bąąhági ádaatʼéii yaa deíkáahii (Mt. 11:20-24)
13 Koréízingi kéédahohtʼíinii, doo hojoobaʼ ájíníi da! Bethséyidagi kéédahohtʼíinii, doo hojoobaʼ ájíníi da! Háálá aají nihitahgi ádahooníiłii ayóó ádaatʼéii baa nidaʼasdeeʼígíí éí Táir índa Sáídan kin haalʼáagi baa nidaʼasdeeʼ nítʼéeʼgo, ákwii kéédahatʼíinii ałkʼidą́ą́ʼ aghaashzhiin yistłʼóonii yee hadadiidzaago łeeshchʼiihtahgi dineezbingo* łahgo átʼéego Diyin God yichʼįʼ tsíńdadeezkéezgo yaa dadzoozlíiʼ doo nítʼééʼ.
14 Nidi ánihwiitʼaah beiníłką́ądi Táir índa Sáídan kin haalʼáagi kéédahatʼı̨́ı̨́ nítʼééʼ yę́ę biláahdi átʼéego atídanihidiʼdoolnííł.
15 Áádóó nihí, Kapérniyam dineʼé nohłíinii, daʼ yáʼąąsh ánízahgoósh nihaa dahodooʼnih? Nihíyeeʼ hoolʼáágóó tiʼhooʼnííh góyaa dadoohłeeł.
16 Jó, tʼáá háiida danihidiitsʼaʼígíí éí dashidiitsʼaʼ, áádóó tʼáá háiida doo danihinízinígíí éí doo dashinízin da, áádóó tʼáá háiida doo dashinízinígíí éí shiníłʼaʼígíí ałdóʼ doo deinízin da.
Tsostsʼidiinígíí nákai
17 Áko tsostsʼidiinígíí hoł dahózhǫ́ǫgo níjíkaigo ádajiní, Bóhólníihii, níłchʼi bidaʼiiníziinii nidi nízhiʼ yee nihikʼeh dahółʼı̨́!
18 Áádóó ábizhdííniid, Atsiniltłʼish ahootahígi átʼéego yáʼąąshdę́ę́ʼ Séítan adadzííłhaalgo yiiłtsą́.
19 Jóʼakon, tłʼiish índa séígoʼ bikʼi naałdeeh doo biniyé bee óhólnííh nihaa diníʼą́, áádóó anaʼí bibee adziilii tʼáá átʼé bee nihídahólníih doo biniyé nihaa diníʼą́, áko tsʼídá tʼáadoo atídanihidoolíłí da.
20 Ákondi níłchʼi nihikʼeh dahółʼínígíí éí tʼáadoo baa nihił dahózhóní, nidi yáʼąąshdi nihízhiʼ bee akʼedaʼashchínígíí éí baa nihił dahózhǫ́ǫ leʼ.
Jesus bił hózhǫ́ (Mt. 11:25-27; 13:16,17)
21 Tʼáá éí hoolzhishígíí biyiʼ Níłchʼi Diyinii bee hoł hózhǫ́ǫgo ázhdííniid, ShiTaaʼ, yáʼąąsh índa nahasdzáán bee Nóhólníihii, nichʼįʼ ahééh nisin, háálá díidí dahóyáanii áádóó ídahoołʼą́ąʼii bitsʼąą nídíníłʼı̨́ı̨́ʼ, nidi áłchínígi ádaatʼéii tʼéí bił ííshją́ą́ ádeinilaa; tʼáá aaníí, shiTaaʼ, háálá éí nił yáʼátʼéehgo bee íinínízinígíí átʼé.
22 ShiTaaʼ tʼáá ałtsoní sheidiníʼą́, áko tʼáadoo łaʼ aYeʼ nilíinii yééhósiní da, tʼáá hazhóʼó aTaaʼ tʼéiyá, índa tʼáadoo łaʼ aTaaʼ yééhósiní da, tʼáá hazhóʼó aYeʼ tʼéiyá áádóó aYeʼ éí tʼáá háiida aTaaʼ bééhodzísingo áhodoolíłígíí tʼéiyá.
23 Áádóó hódahoołʼaahii bichʼįʼ nídzízyizgo tʼáá bí tʼéí ábizhdííniid, Daahʼínígíí deiníłʼíinii dabinááʼ bikʼidahojidlí!
24 Háálá ánihidishní, Diyin God yá dahalneʼii índa aláahgo nidantʼáii ląʼí yiltʼéego daahʼínígíí kʼadę́ę dayiiłtsééh, nidi tʼáadoo dayiiłtsą́ą da, áádóó dadoohtsʼaʼígíí kʼadę́ę deidiitsʼı̨́ı̨́h, nidi tʼáadoo deidiiztsʼą́ąʼ da.
Samériya dineʼé joobaʼii
25 Áádóó jóʼakon, bee hazʼáanii yínaʼniłtinii léiʼ yiizįʼgo hákaʼiiłhilgo ání, Naʼnitiní, haash deeshníiłgo éiyá iiná doo ninítʼiʼii shee hodooleeł?
26 Áko ábizhdííniid, Bee hazʼáaniishąʼ haʼátʼíí níigo bee akʼeʼashchı̨́? Yíníłtaʼgoshąʼ haʼátʼíí niłní?
27 Áko ábijiní,
Nijéí tʼáá átʼé bee, áádóó niiʼ sizíinii tʼáá átʼé bee,áádóó nidziil tʼáá átʼé bee, índa níniʼ tʼáá átʼé beeBóhólníihii niDiyin God ayóóʼííníʼní,áádóó tʼáá ni ádííʼníʼnínígi átʼéego bił kééhótʼíinii ayóóʼííníʼní.
28 Áádóó Jesus ánááhodooʼniid, Tsʼídá tʼáá ákóneʼ átʼéé góneʼ bee háínídzííʼ; tʼáá éí baa naniná, áko hinínáa doo.
29 Nidi doo shohodiitʼiʼgóó ídiʼdeeshnííł jinízingo, Jesus ábizhdííniid, Ákoshąʼ háí bił kééhashtʼíinii nilı̨́?
30 Jesus ánáádooʼniidgo ání, Diné léiʼ Jerúsalemdóó Jériko góyaa dashdiiyá, nítʼééʼ aghadaʼiiʼníiłii bizajííyá, áádóó haghadaʼiisʼnil índa tídahodiilaago kʼasdą́ą́ʼ dahwiisxı̨́įgo hatsʼą́ąjįʼ dah diijééʼ.
31 Nítʼééʼ tsʼídá ákohgo nááʼiiłniihii léiʼ ákóyaa yigááł lá; éí hoołtsą́ągo hakʼeeʼąą dah diiyá.
32 Tʼáá ákótʼéego Líívai dineʼé łaʼ ákweʼé náánáádáałgo nááhoołtsą́ągo ałdóʼ hakʼeeʼąą dah náádiidzá.
33 Nidi Samériya dineʼé léiʼ ałdóʼ náánáádáałgo ákweʼé náánádzá, áko hoołtsą́ągo haa aʼááh niizı̨́ı̨́ʼ,
34 áádóó hachʼįʼ niníyáago atíhoʼdiilyaa yę́ęgóó akʼah índa wáin* yąąh áyiilaago yikʼíʼdeezdiz, áko bitélii yikʼi dahastı̨́, áádóó daʼnjahgi hoł yah ííʼáazhgo haa áhályą́.
35 Nítʼééʼ biiskání denériyas naaki* hayíínilgo daʼnjah bee bóhólníihii yeinínilgo kóní, Baa áhólyą́, áádóó tʼáá haʼátʼíhída há ninááhíníłniiʼígíí éí náánísdzáago bikʼé nichʼįʼ nináʼdeeshdlééł.
36 Diné aghadaʼiiʼníiłii bizajííyáhígíishąʼ diné táltʼéhígíí háí hoł kééhatʼíinii nilı̨́įgo baa nitsíníkees?
37 Áko ázhdííniid, Haa joozbaʼígíí lą́ą. Jesus áhodííniid, Nílááh, ni ałdóʼ tʼáá ákónítʼı̨́į leʼ.
Jesus éí Martha áádóó Mary yaa hootah níyá
38 Áádóó náázdeeskaigo, kin sinil léiʼgi Jesus jiníyá, áko asdzání Martha yolyéé léiʼ bighan góneʼ yah ajííyáago haa bił hóózhǫǫd.
39 Áko bideezhí hólǫ́ǫgo Mary yolyé, éí Bóhólníihii yíighahgi sidáago binaʼnitin yiyíistsʼą́ą́ʼ.
40 Nidi Martha ląʼígóó naalʼaʼgo biʼdiiłʼá, áko hachʼįʼ niníyáago áháłní, Bóhólníihii, daʼ shideezhí tʼóó shiʼníłniiʼgoósh tʼáá sáhí naashʼaʼgo nił yáʼátʼééh? Bíká anilyeed shá bidiní.
41 Nidi Bóhólníihii haadzíiʼgo áhodííniid, Martha, Martha, niʼdiiłʼáii índa níniʼ łą́ągo áyósinii tʼóó ahayóí,
42 nidi tʼááłáʼí tʼéiyá aláahdi ílı̨́. Mary éí ílínígíí ádeideetʼą́, éí doo bighadidootʼáał da.
Footnotes
^ Tłʼoh yishbizh yee hadadítʼéego łeeshchʼiih ákʼéshjaaʼgo éí bibąąhági átʼéii yąąh dabíniʼgo yee ádaa dahalneʼ nítʼééʼ.
^ Áliv wolyéhígíí bikʼah éí aneezgaigo yidínóołkʼeh biniyé chooʼı̨́ı̨́ nítʼééʼ áádóó wáin éí łóód doo yéego ádooníił da bąą éí chooʼı̨́ı̨́ nítʼééʼ.
^ Denériyas naaki éí naaki jı̨́įjįʼ nidaalnishgo nídayííłbįįh nítʼééʼ.
