Luke 11:1-54
11 Ákódzaago łahgo hazʼą́ą́ léiʼgi Jesus sozdilzin, nítʼééʼ áá hodzoostʼįįdgo hóhoołʼaahii łaʼ áhodííniid, Bóhólníihii, sodadiilzin dooleełígíí bínanihiníłtin, tʼáá John bídahoołʼaahii sodizin yíneineestą́ʼígi átʼéego.
2 Áko ábizhdííniid, Sodadołzingo kódadohní:
NihiTaaʼ [yáʼąąshdi honílóonii], nízhiʼ diyingo óolzin leʼ.Bee nóhólníihii náásgóó kʼeeʼąą yilzhish leʼ.[Bee íinínízinii tʼáá yáʼąąshdi ááníłígi átʼéego nahasdzáán bikáaʼgi ááníił leʼ.]
3 Chʼiyáán tʼáá ákwíí jı̨́ nihaʼiyíłtsódígíí tʼáá ákwíí jı̨́ nihaa hidíʼaah.
4 Áádóó nichʼįʼ nidaʼayiilzíhígíí nihá yóóʼanáhidíʼaah,háálá tʼáá nihí nihichʼįʼ bąąhági ádaaníiłii tʼáá ałtso bá yóóʼanídahidiitʼaah,áádóó nihí hodínóotahjįʼ nihiʼóółnííh lágo,[nidi bąąhági átʼéii bitsʼą́ąjįʼ yisdánihiyínííł].
5 Áádóó ábizhdííniid, Háishąʼ nihí łaʼ nihikʼis hólǫ́ǫgo tłʼéʼííłníiʼgo baa nooyáago ábididoohniił, Shikʼis, bááh táaʼgo shaʼnínííł,
6 háálá shikʼis łaʼ nízaadę́ę́ʼ yigáałgo shaa níyá, áko tʼáadoo biyaa nooshkáłí da?
7 Nítʼééʼ wóneʼdę́ę́ʼ haadzíiʼgo ádidooniił, Tʼáadoo shaa nánítʼíní; tʼáá íídą́ą́ʼ dádiʼníłkaal, áádóó shaʼáłchíní bił daʼashhosh; doo nídooshʼnéehgo naʼóstsóód átʼée da.
8 Ánihidishní, Azhą́ hakʼis nilı̨́į nidi doo nízhdidooʼnahgo bazʼdoołtsoł da, nidi doo diiłheełgóó adókeedígíí biniinaa nízhdidooʼnah, áko tʼáá yinízinígi ánéeltʼeʼgo bazʼdoołtsoł.
9 Áádóó ánihidishní, Daʼíínóhkeed, áko deínóhkeedígíí nihaa dadoolyééł; hádaahtʼı̨́, áko hádaahtʼínígíí bikʼídadoohkah; dáádílkał nídanołtsʼin, áko nihá ąą ádadoolnííł.
10 Háálá tʼááłáʼí jinítínígo dajókeedii éí haa dahalyé, hádajitʼínígíí bikʼídajiikááh, índa dáádílkał nídazniłtsʼinígíí há ąą ádaalneʼ.
11 Háishąʼ nihitahdóó azhéʼé nilíinii łaʼ biyeʼ éí [łeesʼáán bíyííkeedgo, daʼ tséésh yeidooʼááł, doodaiiʼ] łóóʼ bíyííkeedígíísh tłʼiishda yeidoołtééł,
12 doodaiiʼ naaʼahóóhai biyęęzhii bíyííkeedgo, daʼ séígoʼísh yéídoołtééł?
13 Áko nihí doo yáʼádanohtʼée da nidi, aa doolyéełii yáʼádaatʼéehii nihadaʼáłchíní baa dadoohłéełgo nihił béédahózin, éí bilááh átʼéego nihiTaaʼ yáʼąąshdi hólóonii Níłchʼi Diyinii bídayókeedii yeidiyiiʼaah.
Jesus áádóó Béíyalzííbab (Mt. 12:22-30; Mk. 3:20-27)
14 Łah níłchʼi doo yájíłtiʼgóó áhoolaii hayiʼdóó hainííłchą́ą́ʼ, áko níłchʼi biʼiiníziinii hanoolchą́ąʼgo doo yájíłtiʼígíí yájíłtiʼ nídzísdlı̨́ı̨́ʼ, áko diné yílʼáhígíí tʼóó bił adahóóyóí.
15 Nidi łaʼ ádadííniid, Níłchʼi bidaʼiiníziinii binanitʼaʼí Béíyalzííbab yolyéii bee níłchʼi bidaʼiiníziinii ayiʼdę́ę́ʼ hahizhniłkaad lá,
16 nidi náádaałaʼ, hákadaʼiiłhilgo nidahódééłkidgo ádaaní, Yáʼąąshdę́ę́ʼ bee ééhózinii łaʼ dadíníilʼįįł.
17 Nidi yaa nitsídaakeesígíí hoł bééhózingo ábizhdííniid, Łaʼ hooghandóó danilíinii tʼáá bí ałkʼi néijahgo éí tʼáá ádzaaí neheleeh, áádóó łahgo dah oonééł tʼáá bí ałkʼi néijahgo tʼóó ałtsʼáʼáldah doo.
18 Séítan ałdóʼ tʼáá bí ákʼinéilwodgo, haitʼéegoshąʼ áko bee bóhólníihgo bił hazʼáanii dinaʼ dooleeł? Háálá, Béíyalzííbab bee níłchʼi bidaʼiiníziinii ayiʼdę́ę́ʼ hahizhniłkaad, dashidohní.
19 Áko Béíyalzííbab bee níłchʼi bidaʼiiníziinii ayiʼdę́ę́ʼ hahinishkaadgo, ákoshąʼ nidanohtinígíí éí háí bibee adziilii shı̨́ı̨́ bee ayiʼdę́ę́ʼ hadeiniiłkaad? Éí bąą éí tʼáá bí nihaa nídadóotʼįįł.
20 Nidi Diyin God bílázhoozh bee níłchʼi bidaʼiiníziinii ayiʼdę́ę́ʼ hahinishkaadgo, áko éí bee tʼáadoo bahatʼaadí Diyin God bee bóhólníihgo bił hazʼáanii bił nihaa honíyá.
21 Diné bidziilii éí yee naabaahii tʼáá átʼé bee hólǫ́ǫgo, tʼáá bí bighan yichʼą́ą́h naagháago binaalyeʼé hazhóʼó sinil łeh,
22 nidi diné náánáłaʼ halááh ábóodziilgo hakʼiilwodgo hakʼeh didoodleeł, áko bee nijibaahii beijólíhígíí haghaidooʼnił, áádóó hanaalyeʼé ałtsʼádeidooniłgo neidoonih.
23 Diné doo shichʼijí jílínígíí éí shitsʼą́ą́jí jílı̨́, áádóó doo shił ahanizhʼniiłkaadígíí éí taʼizhnoołkaad.
Níłchʼi nichxǫ́ʼíii nádááh (Mt. 12:43-45)
24 Níłchʼi nichxǫ́ʼígíí diné yiiʼdę́ę́ʼ haagháahgo, háádoolyįhgi haintáago tó ádaadingóó hahidiighááh, nidi doo łaʼ yikʼéghááhgóó ániih, Shighandóó chʼíníyáhígóó nídeeshdááł.
25 Áko nádáahgo nahashzhóoʼgo índa hashtʼehoolyaago yikʼéghááh.
26 Áko dah náádiidáahgo, náánáłaʼ níłchʼi tsostsʼidgo tʼah biláhígo doo yáʼádaashóonii yił nákah, áko éí yił hwiih yikahgo hwiiʼ kéédahatʼı̨́į łeh, áko diné áłtséédą́ą́ʼ átʼéhę́ę tʼóó nówehda átʼįįh.
Tsʼídá tʼáá aaníí bikʼihojidlí yolyéii
27 Kójíníigo nítʼééʼ áłah ílínígíí bitahdę́ę́ʼ asdzání léiʼ łaʼ hadoolghaazhgo áháłní, Nishchínígíí índa yíníłtʼódígíí éí bikʼihojidlí!
28 Nidi ázhdííniid, Ákondi Diyin God bizaad deidiitsʼaʼgo yikʼeh dahółʼínígíí éí aláahgo bikʼidahojidlí!
Doo yáʼáshxǫ́ǫ́góó ahoolchíiłii bee ééhózinii hadeintá (Mt. 12:38-42)
29 Áko diné hachʼįʼ ahinééltihgo ayázhʼniiłtiʼgo ájíní, Díí kʼad dineʼé doo yáʼátʼééhgóó ahoolchíiłii bee ééhózinii hadeintá, nidi bee ééhózinii doo łaʼ bá ádoolníił da, tʼáá hazhóʼó Jónah Diyin God yá halneʼii bee ééhózinii silı̨́ʼígíí tʼéiyá.
30 Háálá tʼáá Jónah éí Níneveh dineʼé yá bee ééhózinii silı̨́ʼígi átʼéego, tʼáá ákótʼéego Diné Silı̨́įʼii ałdóʼ, díí kʼad ahoolchíłígíí bá bee ééhózinii dooleeł.
31 Kéyah Shádiʼááh hoolyéedi asdzání naatʼáanii jílı̨́ı̨́ nítʼéʼígíí díí kʼad ahoolchíłígíí ánihwiitʼaah beiníłką́ądi bił náázhdidoojahgo bá nihozhdooʼááł, háálá Sálaman bibee hódzáanii yízdóołtsʼįįł biniyé niʼ nineelʼą́ą́dę́ę́ʼ jiníyá, nidi jóʼakon, Sálaman yiláahgo ayóó átʼéii kʼad kweʼé naaghá.
32 Níneveh dineʼé yę́ę ánihwiitʼaah beiníłką́ądi díí kʼad ahoolchíłígíí yá nidahodooʼáałgo yee deidoozįįł, háálá Jónah éí Diyin God bizaad yaa hoolneʼígíí binahjįʼ łahgo átʼéego Diyin God yichʼįʼ tsíńdadeezkéezgo dayoosdląądgo ádił nidaʼiiszíʼígíí yitsʼáhaaskai, nidi jóʼakon, Jónah yiláahgo ayóó átʼéii éí kǫ́ǫ́ naaghá.
Atsʼíís yá adiníłdíinii (Mt. 5:15; 6:22,23)
33 Diné doo łaʼda bee hoolʼiní yidiiłtłiʼgo nahontʼingi niíʼaah da, doo nidi tsitsʼaaʼ yił yaa niíʼaah da, nidi bá yaʼiiʼáhígi dah yiʼááh, áko yah ahikáhígíí bá adinídíingo daʼooʼı̨́į łeh.
34 Bee hoolʼiní bee adinídínígi átʼéego ninááʼ éí nitsʼíís bee bá adinídíín, ninááʼ yáʼátʼéehgo, nitsʼíís tʼáá átʼé bił hoolʼin, nidi ninááʼ doo yáʼátʼééhgóó, nitsʼíís tʼáá átʼé bił chahałheeł.
35 Éí bąą ádaa áhólyą́, doodago adinídíín niyiʼdi hólónígíí éí bił chahałheeł doo.
36 Éí bąągo tʼáá átʼé adinídíín bee nitsʼíís bił hoolʼingo tʼáadoo łahjįʼ bił chahałheełí, tʼáá bee hoolʼiní iʼdííłdláadgo ná adiníłdínígi átʼéego tʼáá átʼé adinídíin dooleeł.
Jesus éí Férisii danilíinii áádóó bee hazʼáanii yíndaʼniłtinii yideezteh (Mt. 23:1-36; Mk. 12:38-40)
37 Tʼah yájíłtiʼgo, nítʼééʼ Férisii danilíinii łaʼ adiidı̨́ı̨́ł hodííniid, áádóó yah ajííyáago azhdooyı̨́ı̨́ł biniyé dasneezdá.
38 Nítʼééʼ Férisii honíłʼı̨́įgo tʼáadoo átsé Jew dineʼé binahaghaʼ bikʼehgo táʼázdígisí izhʼniiyą́ąʼgo tʼóó bił ahóóyóí.
39 Áko Bóhólníihii áhodííniid, Jó, Férisii danohłíinii, bee adlání índa łeetsʼaaʼ bikááʼdę́ę́ʼ tʼéiyá táádaahgis, nidi aghaʼílyé índa bąąhági átʼéii nihiyiʼ hadadeezbin.
40 Doo ádahalyáanii danohłíinii, daʼ akááʼdę́ę́ʼ áyiilaaígíísh ałdóʼ doo ayiʼdę́ʼígíí áyiilaa da?
41 Nidi ayiʼdiígíí badahojoobáʼíii baa dahidoohnił, áko tʼáá ałtsoní nihá chin bąąh ádin doo.
42 Nidi Férisii danohłíinii, doo hojoobaʼ ájíníi da! Háálá tólchiin áádóó ru yolyéhígíí índa chʼil tʼáá ałtah áátʼeełii neeznáá daníjoolígíí éí tʼááłáʼígo shijool Diyin God baa nídahidohʼaah, nidi tsʼídá tʼáá ákǫ́ǫ́ átʼéego áhooníiłii índa Diyin God ayóóʼóóʼníinii doo baa nídaahtʼı̨́į da; díí akéeʼdi chʼétʼánígíí ádaahníił doo nítʼééʼ, łaʼígíí tʼáadoo baa dayoohnéhí.
43 Nihí Férisii danohłíinii, doo hojoobaʼ ájíníi da! Háálá kin biiʼ áłah nídaʼadleehí dabiyiʼgóó aląąjįʼ naazíinii bá nidahazʼą́ą́góó nihił ayóó ádahootʼé índa nidaʼiiniihgóó kʼé danihidiʼníigo nihił ayóó ádaatʼé.
44 Bee hazʼáanii bíndaʼnołtinii áádóó Férisii danohłíinii, tʼóó ádahodołʼíinii, doo hojoobaʼ ájíníi da! Háálá dajishchááʼ doo daatʼíinii nidahonohłin, áko éí diné tʼáadoo bił béédahóziní yikááʼ naaldeeh.
45 Bee hazʼáanii yíndaʼniłtinígíí łaʼ haadzíiʼgo áhodííniid, Naʼnitiní, díí háínídzíʼígíí bee tʼóó baa yáhásinígi ánihidííníniid.
46 Áko ázhdííniid, Bee hazʼáanii bíndaʼnołtinii, nihí ałdóʼ doo hojoobaʼ ájíníi da! Háálá nihí bee hazʼáanii diné bide ádaahłaa, nidi tʼáá nihí éí nihílázhoozh tʼááłáʼí nidi doo bee bidadinołníih da.
47 Doo hojoobaʼ ájíníi da! Háálá danihizhéʼé yę́ę Diyin God yá dahalneʼii nideistseed. Nihí kʼad Diyin God yá dahalneʼii yę́ę bee béédahaniih biniyé kin danizhónígíí nidaahnilgo ákóneʼ yóóʼáńdaahdleʼ.
48 Áko danihizhéʼé yę́ę yaa naaskaígíí tʼáá aaníí baa dahołneʼgo bee lą́ nidaʼiyohłeeh, háálá éí dahalneʼii nideistseed índa nihí bee béédahaniih biniyé kin danizhónígíí nidaahnilgo ákóneʼ yóóʼáńdaahdleʼ.
49 Éí bąą Diyin God bibee hódzáanii ałdóʼ ádííniid, Diyin God yá dahalneʼii índa daalʼaadii hachʼįʼ dadeeshʼaał, łaʼ nidazdoołtsił, áádóó łaʼ éí atídazhdoolííł,
50 áko nahasdzáán niitʼą́ą́dóó wóshdę́ę́ʼ Diyin God yá dahalneʼii tʼáá ałtso dabidił dadeeznaʼígíí díí kʼad oochíłígíí yá ninádínóodah,
51 tʼáá níléí Éíbel bidił deeznaʼ yę́ędóó níléí Zekaráíyah bidił deeznaʼ yę́ęjįʼ, éí bikááʼ nááʼiiniihí índa kin biiʼ sohodizin bitaʼgi ábiʼdisdįįdígíí. Tʼáá aaníí ánihidishní, Díí oochíłígíí éí yá ninádínóodah.
52 Bee hazʼáanii bíndaʼnołtinii, doo hojoobaʼ ájíníi da! Háálá óhooʼaah bibee ąą ńdítı̨́hí yóóʼadasootą́; tʼáá nihí nidi doo yah ahisoohkai da, índa łaʼ yah ahidookahígíí ałdóʼ dasinoołtłʼah.
53 Áádóó díidí bee hadziidziihgo, bee hazʼáanii yíndaʼniłtinii índa Férisii danilíinii hádahodiilchįįł danízingo índa tsístłʼah dahodíníilchééł danízingo tʼáá bizáákáágóó nidahódééłkid,
54 hazaad łaʼ yee hákadaʼiiłhilgo haa nahaakai, éí yee hakʼi dahodidooʼááł biniyé.
