Luke 16:1-31
16 Jesus bídahoołʼaahii ałdóʼ áyidííniid, Diné léiʼ łaʼ ajitʼı̨́įgo hanaalyeʼé há yaa áhályáanii hwee hólǫ́, nítʼééʼ éí yikʼi dahodiiʼą́ągo ádeiłní, Ninaalyeʼé tʼóó yóóʼayiinííł.
2 Nítʼééʼ hágo bizhdííniidgo ábijiní, Haa shı̨́ı̨́ yitʼéego naa hodiistsʼaʼ. Naaltsoos bikʼehgo shinaalyeʼé baa áhólyánígíí yah anáníłtsóós, háálá kodóó shinaalyeʼé doo shá baa ánááhólyą́ą da doo.
3 Áko naalyeʼé baa áhojilyą́ą́ nítʼéʼígíí tʼáá hayiʼídi ázhdííniid, Haa lá deeshnííł lá, jó, shinanitʼaʼí binaalyeʼé baa áháshyą́ą́ nítʼéʼígíí yitsʼááshiníłtʼeʼ? Áko laʼ naʼageed bichʼįʼ doo shidziil da, índa adókeed baa yánísin.
4 Ádeeshníłígíí lá bee hashtʼeʼnitsíníkéez ni. Kóshtʼı̨́įgo naalyeʼé baa áháshyą́ą́ nítʼéʼídóó atsʼááshiʼdeeltʼeʼgo tʼóó diné dabighangóó tádísháah doo.
5 Ákohgo binanitʼaʼí yąąh hadeisʼáhígíí tʼááłáʼí nítínígo hágo yidííniidgo, áłtséhígíí áyidííniid, Shinanitʼaʼíshąʼ díkwíí nąąh hayííłʼá?
6 Nítʼééʼ ázhdííniid, Akʼah tóshjeeh tʼááłáhídi neeznádiin bee shąąh hááʼá. Áádóó ánááhodooʼniid, Nąąh hááʼáhígíí nídiiłtsóosgo tsı̨́įłgo nídaahgo, tʼáá ashdladiinígo ánílééh.
7 Náánáłaʼígíí ánéidooʼniid, Nishąʼ éí díkwíí nąąh hááʼá? Áko ání, Tłʼoh naadą́ą́ʼ neeznádiin azis hadeezbingo bee shąąh hááʼá. Nítʼééʼ ánéidooʼniid, Nąąh hááʼáhígíí nídiiłtsóosgo tʼáá tseebídiinígo ánílééh.
8 Áko naalyeʼé yaa áhályáanii doo ákwii áátʼįįdígíí hóyą́ągo ádzaaígíí binahjįʼ binanitʼaʼí baa haznih, háálá díí hoolzhishígíí biyiʼ nihokááʼ dineʼé ádaʼahilʼínígíí yee adinídíín baʼáłchíní yiláahdi dahóyą́.
9 Áádóó ánihidishní, Naʼadloʼ bee atʼı̨́ bee nihikʼis ádá ádaałneʼ, áko atʼı̨́ ásdįįdgo nihikʼis ádaahłaaígíí hoolʼáágóó kéédahatʼı̨́ı̨́ góneʼ nihaa dahodidooʼááł.
10 Tʼáá háiida tʼáá kóníshéhí nidi bee baʼahódlíhígíí, tʼáá éí ałdóʼ ląʼí bee baʼahódlí, áádóó tʼáá háiida tʼáá kóníshéhí nidi bee binaʼadloʼígíí, tʼáá éí ałdóʼ ląʼí bee binaʼadloʼ.
11 Ákohgo atʼı̨́ doo tʼáá ákogi átʼéii ayaʼiidoolohígíí nidi doo bee nihadaʼahódlíi da nítʼéeʼgo, ákoshąʼ háí atʼı̨́ tʼáá aaníinii yee nihaʼiidooliił?
12 Áádóó diné náánáłaʼ bíhígíí nidi doo bee nihadaʼahódlíi da nítʼéeʼgo, háishąʼ tʼáá danihíhígíí nihaididooʼááł?
13 Naalʼaʼí łaʼda doo tʼáá łahjįʼ naatʼáanii naaki bá nijólʼaʼ átʼée da, háálá łaʼ bikʼeezhdiniih doo, łaʼ éí ayóóʼájóʼníi doo, éí doodaléiʼ łaʼ doo nahdi jóʼníi da doo, łaʼ éí jijoołáa doo. Diyin God índa atʼı̨́ doo tʼáá łahjįʼ bá nijólʼaʼ átʼée da.
Bee hazʼáanii Mózes baa deetʼáanii (Mt. 11:12,13; 5:31,32; Mk. 10:11,12)
14 Férisii danilíinii, éí béeso yíchą́deídéelniʼii, díidí deidiiztsʼą́ąʼgo há nídahodiiłtʼiʼ.
15 Nidi ábizhdííniid, Nihí éí diné dabinááł doo nihidahodiitʼiʼgóó ídadiʼdiilnííł danohsin, nidi Diyin God éí nihijéí bił bééhózin, háálá diné bitahgóó ayóó ádaatʼé dawóʼníinii éí Diyin God binááł nádı̨́ʼídi tʼóó baaʼihii ádaatʼé.
16 Bee hazʼáanii Mózes baa deetʼáanii índa Diyin God yá dahalneʼii binaaltsoos John níyáhíjįʼ bee nihoolzhiizh, áádóó wóshdę́ę́ʼ Diyin God bee bóhólníihgo bił hazʼáanii baa haneʼ yáʼátʼéehii baa hodeezneʼ, áko diné tʼááłáʼí nítínígo tʼáá bizááká yiih hijeeh.
17 Nidi yádiłhił índa nahasdzáán bił yóóʼahodoogááłjí éí doo bohónéedzą́ą da, nidi bee hazʼáanii biyiʼdóó tʼááłáhígo dah alzhin tʼáadoo biniyéhí da dooleełjí éí agháago doo bohónéedzą́ą da.
Jesus ałtsʼáʼiildééh yeinítʼı̨́ (Mt. 5:31,32; Mk. 10:1-12)
18 Tʼáá háiida hweʼasdzą́ą́ yóóʼazhdííʼą́ągo áádóó náánáłahjįʼ asdzání bá nááʼdzísgehígíí éí azhdííláago átʼé, áádóó asdzání yóóʼabiʼdootʼánígíí tʼáá háiida bá nááʼázyehgo éí azhdííláago átʼé.
Diné atʼíinii áádóó Lázaras
19 Diné łaʼ tʼáá íiyisí atʼı̨́ı̨́ léiʼ, ééʼ tsídídééh nahalingo łichíʼígíí índa áłtsʼóózígo yisdizígíí bee naʼatʼą́hí łigaii ditsʼidgo ályaii yee hadítʼé áádóó tʼáá ákwíí jı̨́ chʼiyáán ałtaaskąądí tʼéiyá yiyą́.
20 Áko bichʼéédą́ąʼgi adókeedí léiʼ, Lázaras yolyéego sitı̨́, éí tʼáá átʼéé nítʼééʼ łóód bąąh hólǫ́.
21 Diné atʼínígíí bibikááʼ adání bikááʼdę́ę́ʼ chʼiyáán hadahindéhígíí shaʼdooltsoł jinízingo; tʼah nááyówehígo łééchąąʼí nidi hachʼįʼ dah yijahgo halóód deiłnaad.
22 Nítʼééʼ diné bahojoobáʼíígíí daaztsą́ągo diyingo nidaalʼaʼí dah dabidiiłtı̨́įgo Éíbraham yílákʼe deistı̨́. Áádóó diné atʼíinii ałdóʼ daaztsą́ągo yóóʼábiʼdiilyaa,
23 áko hoolʼáágóó tiʼhojoonííhdóó hajííghal, nítʼééʼ doo deighánídi Éíbraham jiiłtsą́, Lázaras dah yoołtéełgo.
24 Áko hazhdoolghaazhgo ájíní, Shizhéʼé Éíbraham, tʼáá shǫǫdí shaa jiiníbaah, áádóó Lázaras shichʼįʼ díłʼá, bílaʼ bílátahgi yee taah didoolnihgo shitsooʼ yee néidínóołkʼas, háálá díí kǫʼ biyiʼgi tʼáá íiyisí tiʼhooshnííh.
25 Nidi Éíbraham áhodííniid, Shiyeʼ, hinínáádą́ą́ʼ tʼáá ałtso yáʼádaatʼéehii bee ákisínídlaʼígíí béénílnííh áádóó éí tʼáá bináłtʼéego Lázaras bichʼįʼ nahwiiʼnáá nítʼéʼígíí ałdóʼ béénílnííh, nidi kʼad éí kweʼé bił náhoojǫǫd, nidi ni tʼéí tʼáá íiyisí tiʼhwiyínííh.
26 Áádóó nihí índa ni ałdóʼ nihitaʼgi doo tséʼnaa nijóyaʼígi átʼéégóó hashtʼehoolyaa, áko kodóó naa doodáłígíí doo bohónéedzą́ą da, áádę́ę́ʼ łaʼ nihaa doogáłígíí ałdóʼ doo bohónéedzą́ą da.
27 Áko ázhdííniid, Éí lá bąą shizhéʼé, nánooshkąąh, shizhéʼé bighangóó hodíłʼá,
28 háálá bił háájééʼ ashdlaʼ, áko ooʼíinii kʼehgo bił dahozhdoolnih, áko éí ałdóʼ díí tiʼhooʼníhígi doo nidahidookah da.
29 Nidi Éíbraham áhodííniid, Éí Mózes índa Diyin God yá dahalneʼii binaaltsoos bee dahólǫ́; bíniʼdii éí dayíistsʼą́ą́ʼ.
30 Áko ázhdííniid, Dooda, shizhéʼé Éíbraham, jó, łaʼ daaztsą́ą́dę́ę́ʼ baa nádzáago, bił hoolneʼgo łahgo átʼéego tsíńdadookosgo Diyin God yichʼįʼ nídadooyis.
31 Nítʼééʼ ánáábizhdooʼniid, Mózes índa Diyin God yá dahalneʼii doo dayíistsʼą́ą́ʼgóó, haʼátʼéegoshąʼ áko daʼaztsą́ą́dę́ę́ʼ łaʼ náádiidzáii dayíistsʼą́ąʼ doo.
