Luke 17:1-37
17 Áádóó hódahoołʼaahii ábizhdííniid, Bąąhági áhodooníiłgo bee naʼíhontaah tsʼídá tʼáádóo nídí áánííł, nidi haniinaa áhooníiłii, éí doo hojoobaʼ ájíníi da!
2 Díí áłchínígi átʼéego aʼohgo ádaa nitsídaakeesgo dashoodlánígíí łaʼda bąąhági átʼı̨́ ájiilaago, tsé daashjééʼ hazéédéetʼą́ągo, tónteel biih hodiʼyoolghango há yáʼátʼéeh doo nítʼééʼ.
3 Ádaa ádahołyą́; nikʼis nichʼįʼ bąąhági ádzaago didííteh, áko yąąh bíniʼgo yaa tsídeezkéezgo, bá yóóʼadidííʼááł,
4 áádóó tʼáá łaʼa jı̨́ tsostsʼidi nichʼįʼ bąąhági ánádzaago, nítʼééʼ, Bąąh shíniʼgo baa nitséskees, nidííniidgo tsostsʼidi nichʼįʼ ninádzáago bá yóóʼanáhididííʼááł.
Niheʼoodląʼ bee aa dadzííníidlíhígíí bilááh ánílééh
5 Áko daalʼaadii éí Bóhólníihii ádeidííniid, Niheʼoodląʼ bee aa dadzííníidlíhígíí bilááh ánílééh!
6 Áádóó Bóhólníihii ázhdííniid, Niheʼoodląʼ bee aa dzódlí chʼil mástad yolyéhígíí bílástsiiʼgi áníshéhí nidi, díí tsin síkamin sikaadii ábididoohniił, Haniʼdóltsʼǫǫdgo tónteel biiʼdi kʼiniʼdólyééł, áko tʼáá ákǫ́ǫ́ nihikʼehgóó ádoonííł.
Naalʼaʼí binaanish
7 Daʼ nihíísh nihitahdóó łaʼ nihá naalʼaʼí hólǫ́ǫgo, áko éí nihwiiłdlaadę́ę́ʼ, doodaiiʼ naʼniłkaadę́ę́ʼ nádzáago ábididoohniił, Hágoshı̨́ı̨́ nídaahgo ííyą́?
8 Dooda lą́ą. Kótʼéego bichʼįʼ hadoohdzih, Niʼééʼ bee áká nílzisgo adeeshı̨́ı̨́ł áádóó adeeshdlı̨́ı̨́ł biniyé chʼiyáán shá áníléehgo shiyaa niʼníkaah, áádóó índa ni adííyı̨́ı̨́ł áádóó adíídlı̨́ı̨́ł?
9 Daʼ há naalʼaʼísh ábizhdííniidígi ádzaaígíí biniyé ahéheeʼ bijiníi doo? Dooda!
10 Tʼáá ákótʼéego nihí ałdóʼ bichʼįʼ danihiʼdoolʼaadígíí ádaahłaago ádadidoohniił, Á naalʼaʼí doo ílíinii daniidlı̨́; tʼáá bichʼįʼ danihiʼdoolʼaadígíí tʼéí ádeiilyaa.
Diné neeználtʼéego łóód atsʼíís yiyáanii naałdzidii bee bąąh dah nahazʼáanii hadaałtʼé áńdabiʼdiilyaa
11 Jerúsalemgóó joogáałgo Samériya índa Gálilii kéyah bitaʼgóó chʼízhníyá.
12 Nítʼééʼ kin sinil léiʼgi jiníyáago, diné neeználtʼéego łóód atsʼíís yiyáanii naałdzidii bee bąąh dah nahazʼą́ą́ léiʼ hadááh yíkaigo, tʼáá nízaadę́ę́ʼ naazı̨́,
13 áko hadadeeshghaazhgo ádahodííniid, Jesus, Bóhólníihii nílíinii, nihaa jiiníbaah.
14 Áko jiiłtsą́ągo ábizhdííniid, Nihílááh, náádaʼiiłniihii danihinóołʼı̨́ı̨́ʼ. Nítʼééʼ tʼáá ákǫ́ǫ́ yikahgo, hadaałtʼé nídaasdlı̨́ı̨́ʼ.
15 Nítʼééʼ łaʼ hadaałtʼé násdlı̨́įʼgo bił bééhoozin, áko yéego Diyin God yaa haniihgo tʼą́ą́ʼ nádzá,
16 áko Jesus yichʼįʼ nitsidinígoʼgo yichʼįʼ ahééh niizı̨́ı̨́ʼ. Éí Samériya dineʼé jílı̨́įgo ájítʼı̨́.
17 Áko Jesus haadzíiʼgo ádííniid, Daʼ doósh neeználtʼéego hadaałtʼé nídaasdlı̨́įʼ da? Náhástʼéí yiltʼéhígíí éí háájí?
18 Daʼ Diyin God yichʼįʼ ahééh dadínóozįįł biniyé tʼáadoo tʼą́ą́ʼ nákai da, tʼáá hazhóʼó díí łahdę́ę́ʼ dineʼé nilíiniísh tʼéiyá?
19 Áádóó áhozhdííniid, Nídiidáahgo nílááh yínááł; neʼoodląʼ bee doo ánítʼéhí da násínídlı̨́ı̨́ʼ.
Diyin God bee bóhólníihgo bił hazʼáanii bił hoolzhishii (Mt. 24:23-28,37-41)
20 Nítʼééʼ Férisii danilíinii nidahódééłkidgo ádadííniid, Hahgoshąʼ Diyin God bee bóhólníihgo bił hazʼáanii baa hodoolzhish? Áko hadzoodzíiʼgo ábizhdííniid, Diyin God bee bóhólníihgo bił hazʼáanii yitʼı̨́įgo doo hodooleeł da;
21 doo nidi kódadidoohniił da, Jó, kǫ́ǫdí! éí doodaléiʼ, Jó, níláhgóó! háálá jóʼakon, Diyin God bee bóhólníihgo bił hazʼáanii nihiyiʼdi hólǫ́.
22 Áádóó hódahoołʼaahii ábizhdííniid, Tʼáá łaʼa jínígoda Diné Silı̨́įʼii dzoołtsééł laanaa danohsingo yoołkáał dooleełii baa hodoolzhish, nidi doo deiidoołtséeł da.
23 Áádóó ádanihididooniił, Jó, níláhgóó! éí doodago, Jó, kǫ́ǫdí! danihiłníigo tʼááká ákǫ́ǫ́ dah doohjeeh yíilaʼ, tʼááká bikééʼ dadohkááh lágo.
24 Háálá tʼáá atsiniltłʼish ahetaʼgo yá haʼnaa ahetaʼígi átʼéego Diné Silı̨́įʼii beidoołkááł.
25 Nidi kʼad átsé ląʼígóó tiʼhwiizhdoonih áádóó díí oochíłígíí doo dahodínóozįįł da.
26 Tʼáá Nóah bíyoołkááł yę́ędą́ą́ʼ áhootʼéé nítʼéʼígi átʼéego, tʼáá ákótʼéego ałdóʼ Diné Silı̨́įʼii náádááł beiníłką́ągo ákóhootʼée doo.
27 Nóah tsinaaʼeeł yiih híyáajįʼ, diné daʼayą́ áádóó daʼadlą́ índa nidaʼayeh áádóó ahaa dahaʼnííł nítʼééʼ, ákondi tó yíląądgo ałtso ábísdįįd.
28 Tʼáá Lat bíyoołkááł yę́ędą́ą́ʼ áhootʼéé nítʼéʼígi átʼéego, daʼjiyą́ áádóó daʼjidlą́, ahaa nidaʼjiilniih, haa nidaʼiiniih, kʼéédazhʼdidlééh áádóó kin ádajileʼ,
29 nidi Lat éí Sádam kin haalʼáádóó chʼíníyá bijı̨́įdi yádiłhił biyiʼdę́ę́ʼ kǫʼ índa tsékǫʼ łitsoígíí nááłtą́ągo diné ałtso íísdįįd;
30 tsʼídá ákótʼéego Diné Silı̨́įʼii yitʼíní ályaa bijı̨́įdi áhodoonííł.
31 Éí bijı̨́įdi, tʼáá háiida hakin bighą́ąʼdi nijigháhígíí wóneʼdę́ę́ʼ hanaalyeʼé chʼízhdoojih biniyé doo yahanízhdoolwoł da, áádóó tʼáá ákótʼéego tʼáá háiida dáʼákʼehgi nijigháhígíí doo tʼą́ą́ʼ nízhdoolwoł da.
32 Lat beʼasdzą́ą́ béédaałniih.
33 Tʼáá háiida jiinánígíí ádá shójoostʼeʼígíí éí yóóʼazhdootłish, nidi tʼáá háiida jiinánígíí yóóʼazhdííʼą́ągo éí jiinánígíí doodzih.
34 Ánihidishní, Tʼáá éí bitłʼééʼ diné łaʼ tsáskʼeh yikááʼ shitéezh doo; łaʼ nídidooltééł, łaʼígíí éí tʼáá ákǫ́ǫ dooleeł.
35 Asdzání nidiltʼéego tʼááłáhígóó akʼáa dooleeł; łaʼ nídidooltééł, łaʼígíí éí tʼáá ákǫ́ǫ dooleeł.
36 [Áko dáʼákʼehgi diné naaki naaʼaash doo; łaʼ nídidooltééł, łaʼígíí éí tʼáá ákǫ́ǫ doo.]*
37 Áádóó ádahodííniid, Bóhólníihii, díishąʼ háadi ákóhodoonííł? Áádóó ábizhdííniid, Tʼáá haʼátʼíhída daaztsą́ągo sitı̨́įgi, ákweʼé jeeshóóʼ áłah nilı̨́į doo.
Footnotes
^ Saad łaʼ áádóó saad naazhjaaʼ łaʼ kótʼéego daasdzohígíí [ ] bitaʼgi dabikáʼígíí éí Diyin God bizaad tʼáá ałkʼidą́ą́ʼ bee akʼedaʼashchínígíí doo tʼáá ałtso dabikáaʼ da, nidi łaʼ tʼéiyá dabikááʼ.
