Luke 2:1-52
2 Ákweʼé yoołkááł yę́ędą́ą́ʼ nahasdzáán yikááʼ diné kéédahatʼínígíí tʼáá ałtso dabízhiʼ naaltsoos bikʼidadoodzohgo, Síízar Agástas yee nihoníʼą́.
2 Síriya kéyahdi Kwiríniyas naatʼáanii nilı̨́ı̨́dą́ą́ʼ díí tsʼídá átsé dabízhiʼ naaltsoos bikʼidaasdzoh.
3 Áko tʼáá ádzíłtso daházhiʼ naaltsoos bikʼidadoodzoh biniyé, tʼáá hó hakin hadaasʼáágóó adadziiskai.
4 Áádóó Jóseph ałdóʼ Gáliliidę́ę́ʼ, Názareth hoolyéego kin haalʼáhídóó, Judíya biyiʼgóó David bikin haalʼáhígíí Béthlehem hoolyéejįʼ jiníyá, háálá David baʼáłchíní náás ahoolchíłígíí łaʼ jílı̨́,
5 Mary, hweʼasdzą́ą́ dooleełgo haa deetʼánígíí bił, házhiʼ naaltsoos bikʼidoodzoh biniyé jiníʼáázh, áko Mary éí yiltsą́ągo
6 tʼáá ákweʼé dzizkéego, azhdoołchíiłjįʼ ayííłką́.
7 Áko ashkii átsé doochíłígíí jishchı̨́įgo naʼatʼą́hí łigaígíí bił dzizdisgo béégashii yiiʼ nídaʼalchoshígíí biih jííłtı̨́, háálá daʼnijahí góneʼ doo há hazʼą́ą da lá.
Diyingo nidaalʼaʼí áádóó nidaʼniłkaadii
8 Tʼáá éí kéyah hazʼą́ągi nidaʼniłkaadii tłʼéeʼgo dibé yaa ádahalyą́.
9 Nítʼééʼ Bóhólníihii bidiyingo naalʼaʼí hakʼi hooleʼgo Bóhólníihii bitsʼádiʼnílíidii bee hanaagóó iʼdíídláád, áko tʼáá íiyisí nídadzisdzííd.
10 Áádóó diyingo naalʼaʼí áhodííniid, Tʼáadoo nídaałdzidí, háálá jóʼakon, haneʼ yáʼátʼéehii tʼáá íiyisí ił hóshóonii bee nihił hodeeshnih, áko éí diné tʼáá ałtso bá dooleeł,
11 háálá díí jı̨́ David bikin haalʼáhígi Yisdáʼiiníiłii nihá yizhchı̨́, éí Christ Bóhólníihii nilı̨́.
12 Áko díí bee nihichʼįʼ ééhózin doo: naʼatʼą́hí łigaii éí awééʼ bił yisdisgo béégashii yiiʼ nídaʼalchoshígíí yiiʼ sitı̨́įgo deidoołtsééł.
13 Nítʼééʼ tʼáadoo hooyání éí diyingo naalʼaʼí binaagi yá biyiʼdę́ę́ʼ diyingo nidaalʼaʼí tʼóó ahayóí áłah silı̨́ı̨́ʼ, áko Diyin God yaa dahaniihgo ádaaní:
14 Aghánáhóóʼáágóó Diyin God baa haʼniih,índa nahasdzáán bikáaʼgi diné éí Diyin God yaa bił dahózhónígíí bichʼįʼ hózhǫ́ náhásdlı̨́ı̨́ʼ!
15 Ákódzaago diyingo nidaalʼaʼí yáʼąąshgóó nídaasdlı̨́įʼgo, nidaʼniłkaadii ádaʼahidooʼniid, Sołtįʼ, Béthlehemgóó diikah, áadi áhóótʼįįdígíí Bóhólníihii nihił ííshją́ą́ áyiilaaígíí dadíníilʼįįł.
16 Áko tsxı̨́įłgo ákǫ́ǫ́ jíkaigo, Mary áádóó Jóseph índa awééʼ éí béégashii yiiʼ nídaʼalchoshígíí yiiʼ sitı̨́įgo bikʼíjíkai.
17 Áko dajiiłtsą́ągo, díí awééʼ bee hoł dahóóneʼígíí baa nináádahodzisneʼ,
18 áko nidaʼniłkaadii éí yaa dahalneʼgo dazdiiztsʼą́ʼígíí tʼáá ádzíłtso bikʼee tʼóó hoł adahóóyóí.
19 Ákondi Mary díidíígíí tʼáá ałtso hajéí biyiʼdi baa nitsídzíkeesgo tʼóó bił ájítʼé.
20 Áko nidaʼniłkaadii tʼáá hoł dahóóneʼígi átʼéego dazdiiztsʼą́ʼígíí índa dajiiłtsánígíí tʼáá ałtso bąą Diyin God ayóó átʼé dajiníigo índa baa dahojiniihgo tʼą́ą́ʼ níjíkai.
Jesus bąąh náhineeshgizh
21 Tʼah doo hóʼniitsąąh yę́ędą́ą́ʼ diyingo naalʼaʼí Jesus bee hodíʼdóojiił dííniid yę́ę, tseebíí hwiiską́ągo hąąh náhineeshgizhgo Jesus bee hoʼdééjiʼ.
Jesus kin biiʼ sohodizin góneʼ Diyin God baa yíltı̨́
22 Áádóó Diyin God yee hasʼáanii Mózes baa deetʼáanii bikʼehgo hoʼdíídeeʼ dooleełígíí bíighah niiníłką́ągo, Jesus éí Bóhólníihii baa hozhdoołtééł biniyé Jerúsalemgóó hozhníłtı̨́,
23 (Bóhólníihii bibee hazʼáanii biiʼ bee bikʼeʼashchínígi átʼéego, Ashiiké alą́ąjįʼ nidahachíhígíí tʼáá ałtso Bóhólníihii baa nídeetʼáanii dabidiʼníi dooleeł).
24 Áádóó Bóhólníihii bibee hazʼáanii biiʼ áhodooʼniidígíí bikʼehgo hasbídí naakigo, doodago hasbídíłgaii biyázhí naakigo nááhizhdoołnih ałdóʼ biniyé Jerúsalemgóó hozhníłtı̨́.
25 Nítʼééʼ Jerúsalemgi diné léiʼ, Símiyan joolyé, díí dinéhígíí tsʼídá tʼáá ákogi ájítʼé, índa hozdísin, áádóó Ízrel yisdádooʼniłígíí nijólí, índa Níłchʼi Diyinii hoł hólǫ́.
26 Áádóó Bóhólníihii biChrist tʼáadoo jiiłtséhí anoonééł doo yizdoołtséeł daígíí Níłchʼi Diyinii hoł yééhoosįįd.
27 Áádóó Níłchʼi Diyinii hoł ééhósingo kin biiʼ sohodizin bił hazʼą́ą́ góneʼ yah ajííyáago Jóseph índa Mary éí bee hazʼáanii bee éʼélʼínígíí bikʼehgo ázhʼdoolííł biniyé, Jesus awééʼ nilı̨́įgo yah ajííłtı̨́,
28 áko Símiyan éí awééʼ nízhdiiłtı̨́įgo Diyin God baa hodziznihgo ázhdííniid,
29 Kʼad lą́ą Bóhólníihii, nizaad kʼehgobíniʼdii ná naalʼaʼí bił hózhǫ́ǫgo dah hodidooleeł.
30 Háálá tʼáá shí shinááʼ bee nibee yisdáʼiildéehii yiiłtsą́,
31 éí diné tʼáá ałtso binááł hashtʼeinilaa;
32 doo Jew dineʼé danilíinii éí adinídínígíí bá bee ééhózinii átʼé,áádóó tʼáá éí yee nidineʼé Ízrel ayóó átʼéii dadooleeł.
33 Áko díí bee há haʼoodzíʼígíí bikʼee Jóseph índa Mary tʼóó bił ahayóí.
34 Símiyan hakʼi sodoolzingo hamá Mary áyidííniid, Jóʼakon, díí awééʼ bikʼee Ízrel dineʼé ląʼí naaʼahidínóodah índa ląʼí náhididookah biniyé niiltı̨́, áádóó Diyin God bitsʼą́ą́dę́ę́ʼ bee ééhózinii nilı̨́įgo diné ląʼí bitsʼą́ą́jí yádaałtiʼ doo,
35 áko éí bee diné tʼóó ahayóí bintsíkees nideiniłʼinii bikáaʼjįʼ hadooʼnił. Áádóó yínííł diltłish nahalingo niiʼ sizíinii bighá doolnoł.
36 Áádóó asdzání léiʼ Diyin God yá halneʼii nilı̨́įgo Anna yolyé, Fányowel bitsiʼ, éí Ásher bidóoneʼé nilı̨́, tʼóó ahayóí binááhai, chʼikę́ę́h jílı̨́ı̨́dą́ą́ʼ hahastiin hazlı̨́įʼgo bił jiináago tsostsʼid nááhai,
37 áádóó tʼáá bąąh áhásdįįdii jílı̨́įgo tseebídiindóó baʼaan dı̨́ı̨́ʼ nááhai. Áko kin biiʼ sohodizin bił hazʼánígi doo bitsʼájígháah da, tłʼéeʼgo índa jı̨́įgo nidi tʼáadoo ajiyání sodizin bee Diyin God bichʼįʼ nahojiłá.
38 Áko íídą́ą́ʼ ákweʼé jiníyáago Bóhólníihii bichʼįʼ ahéésniizı̨́ı̨́ʼ, áádóó Jerúsalemgi kéédahatʼínígíí yisdádooʼniłgo nidayólíhígíí tʼáá ałtso bichʼįʼ awééʼ baa nahodzisneʼ.
Názarethdi náʼíldeeʼ
39 Áko Bóhólníihii bibee hazʼáanii Jóseph áádóó Mary ałtso biʼjiilaago, Gálilii kéyahdi Názareth kin sinilígi haghanjįʼ Jesus bił níjíkai.
40 Áádóó ashkii nooséełgo bidziil yileeł, hódzą́ tʼáá íiyisí biiʼ hooleeł, índa Diyin God bibee ajoobaʼ bee bikʼihojidlí.
Jesus ashkii nilı̨́įgo kin biiʼ sohodizin bił hazʼą́ą́ góneʼ naaghá
41 Hodílzingo áłah náʼádleeh, éí atisʼadeesdzá bee bééhániihígíí tʼáá baa náhwiilzhíísh góneʼ tʼááłáʼí nináháháahgo Jesus bishchíinii Jerúsalemgóó ałnánátʼash.
42 Áko Jesus naakitsʼáadah binááhaigo, Jerúsalemgóó ałnáádaʼaldahígíí bikʼehgo hodílzingo áłah náʼádleehgóó bił jíkai,
43 éí yoołkááł ałtso bíighah daʼazlı̨́įʼgo níjookah, nítʼééʼ ashkii Jesus tʼáá Jerúsalemdi naagháá lá. Jóseph índa Mary éí doo bił bééhózin da,
44 nidi atah bił ooldah jinízingo łaʼa jı̨́ oodááł ánízahgóó nijíkai, áko dahakʼéí índa bił ahéédahodzílzinígíí bitahgóó chʼééh hazneeztą́ą́ʼ.
45 Tʼáadoo bikʼízhníʼáázhgóó, tʼóó Jerúsalemgóó tʼą́ą́ʼ bíká anázhníítą́ą́ʼ.
46 Nítʼééʼ tááʼ yiską́ągo, kin biiʼ sohodizin bił hazʼą́ą́ góneʼ nidaʼnitinígíí ałníiʼgi sidáago yiyíistsʼą́ąʼgo índa nayídíłkidgo bikʼízhníʼáázh.
47 Áko akʼizhdiʼyiitįįhígíí índa tʼą́ą́ʼ háádziidziihígíí dahwíistsʼą́ąʼii tʼáá ałtso hakʼee tʼóó bił adahayóí.
48 Áko jiiłtsą́ągo tʼóó hoł ahayóí, áádóó bimá ábidííniid, Shiyáázh, haʼátʼéegoshąʼ kónihiinilaa? Jóʼakon, nizhéʼé índa shí nąąh nihíniʼgo níkaniitáá nítʼééʼ.
49 Nítʼééʼ áhodííniid, Haʼátʼéegoshąʼ shíkanohtá? Daʼ shiTaaʼ bá naashʼaʼ dooleełígíísh* doo nihił bééhózin da?
50 Nidi yee hachʼįʼ haadzíʼígíí doo bikʼizhʼdiitą́ą da.
51 Áko Názarethgóó hoł nákaigo hakʼeh hółʼı̨́, áko díí kónínígíí tʼáá ałtso bimá tʼáá bijéí biyiʼídi yaa nitsékees.
52 Áádóó Jesus hojíyą́ jooleeł áádóó jinoosééł, áádóó Diyin God índa diné bił jílı̨́ jooleeł.
Footnotes
^ Éí doodaiiʼ kótʼé, bighan góneʼ naasháa dooleełígíísh.
