Luke 23:1-56
23 Ákohgo diné áłah silı̨́ʼígíí tʼáá átʼé nídiijééʼ, áádóó Jesus éí Páílat yidááhdę́ę́ʼ nideizlóóz.
2 Áko hakʼi dahodiiʼaahgo yaa nídiikaigo ádaaní, Díí dinéhígíí nihidineʼé tʼáá ádzaagóó neinitingo yóóʼayiiʼéésh lá, áádóó Síízar ałdóʼ tʼáadoo nályééh bichʼįʼ nidahohłéhí, nihiłníigo, índa, Tʼáá bí Aláahgo Naatʼáanii Christ nishłı̨́, níigo nihił béédahoozin.
3 Áko Páílat, Daʼ niísh Jew dineʼé Aláahgo biNanitʼaʼí nílı̨́? hałníigo nahódééłkid. Áko ábizhdííniid, Jó, bee háínídzííʼ.
4 Áádóó Páílat éí aláahgo náádaʼiiłniihii índa diné áłah silı̨́ʼígíí áyidííniid, Díí diné yee ádąąh dah hastʼáanii doo łaʼ bá shił bééhoozin da.
5 Nidi dooda yee naasteeʼgo ádaaní, Jó, Gáliliidóó háátʼiʼgo Judíya tʼáá átʼéé nítʼééʼ biiʼ tʼáá kojįʼ nidi, naʼnitingo diné yił hááhoniłchaʼ.
Jesus éí Hérad bidááhdę́ę́ʼ nihoʼdeedlóóz
6 Áko Páílat éí yidiiztsʼą́ąʼgo tʼáá daatsʼí aaníí Gálilii dineʼé łaʼ jílínígíí yínaʼídééłkid.
7 Nítʼééʼ Hérad éí kéyah yiiʼ naatʼáanii nilínígíí biiʼdę́ę́ʼ nijigháago bił bééhoozingo, Hérad yichʼįʼ ahóółʼaʼ; íídą́ą́ʼ Hérad tʼáá bí Jerúsalemdi naaghá.
8 Áko Hérad éí Jesus yiyiiłtsą́ągo, tʼáá íiyisí yąą bił hóózhǫǫd, háálá tʼah ałkʼidídą́ą́ʼ hwiideestsééł chʼééh nízin, háálá haa hodiiztsʼą́ą́ʼ, áko álílee kʼehgo bee ééhózinii łaʼ shinááł ázhdoolííł hóʼní.
9 Áádóó tʼáá nízaadgóó nahódééłkid, nidi tʼáadoo bichʼįʼ hadzoodzíiʼ da.
10 Áko aláahgo náádaʼiiłniihii índa bee hazʼáanii yíndaʼniłtinii tʼáá chaałída hakʼi dahodiiʼaahgo naazı̨́.
11 Áádóó Hérad índa bisiláo éí doo bił jílı̨́ı̨́góó há nidahastʼiʼ, índa ééʼ ayóó ánóolninii yee hadahodiilaago Páílat yichʼįʼ nátʼą́ą́ʼ anáhóółʼaʼ.
12 Áko tʼáá éí bijı̨́ Hérad índa Páílat ałkʼis silı̨́ı̨́ʼ, háálá díí bítséedidą́ą́ʼ ałkʼee diʼniih nítʼééʼ.
Jesus hodiʼyoolyéełjįʼ há nihootʼą́ (Mt. 27:15-26; Mk. 15:6-15; Jn. 18:39-19:16)
13 Ákohgo Páílat éí aláahgo náádaʼiiłniihii índa naatʼáanii danilíinii índa diné ałdóʼ áłah áyiilaago,
14 áyidííniid, Diné tʼáá ádzaagóó neinitingo yóóʼayiiʼéésh dadohníigo díí diné bił shaa noohkai, áko nihinááł nabídééłkid. Jó akoneeʼ, díí diné bikʼi dahodoohʼaahígíí bąąhági átʼéii bąąh ádingo shił bééhoozin;
15 Hérad nidi chʼééh áátʼįįd, háálá tʼóó nihichʼįʼ anáhóółʼaʼ. Jó akoneeʼ, biniinaa dazdootsaałígíí bą́ą́h ílı̨́įgo ájíítʼįįdii éí tʼáá ádin;
16 éí bąą tʼóó náhodínéestsxisgo hwéédideeshchił.
17 [Jó, hodílzingo áłah náʼádleeh néiʼaahgo awáalyaaí tʼááłáʼígo hachʼįʼ chʼééyiiłtʼeʼgo bee hazʼą́.]*
18 Nidi tʼáá ałtso hadadeeshghaazhgo ádaaní, Eii diné sołhé, Barábasgo nihichʼįʼ chʼééníłtʼeʼ.
19 (Éí dinéhígíí kin haalʼáagi hááhoniłchaʼgo naatʼáanii yił daʼahigą́ągo, índa diné neiłtseedgo biniinaa awáalyaa góneʼ yah eeltʼeʼ.)
20 Éí bąą Páílat éí Jesus béédideeshchił nízingo hachʼįʼ hanáánáádzííʼ,
21 nidi dadilwoshgo ádaaní, Tsin ałnáoszid bikáaʼjįʼ bił oʼołkaałgo sołhé héii, bił oʼołkaałgo sołhé!
22 Páílat táadi hadzidziih góneʼ ánáábizhdooʼniid, Haʼátʼéegoshąʼ, haʼátʼíí doo aaníí shı̨́įshąʼ baa nijiyá? Bee ádąąh dah hodzistʼą́ągo biniinaa dazdootsaałii doo łaʼ há shił bééhoozin da; éí bąą tʼóó náhodínéestsxisgo hwéédideeshchił nisin.
23 Nidi hoł iʼdoolkałgo yéego dayókeedgo hodiʼyoolyéłígíí yee naasteeʼgo [aláahgo náádaʼiiłniihii ałdóʼ] ádaanínígíí yee akʼeh dadeesdlı̨́ı̨́ʼ.
24 Áko Páílat éí diné dayókeedígíí biʼdoolnííł biniyé bee lą́ adzisłı̨́ı̨́ʼ.
25 Naatʼáanii yił ahoogą́ąʼii índa diné neiłtseedii awáalyaa góneʼ yah eeltʼeʼígíí nídayókeedgo bichʼįʼ chʼéézhníłtʼeʼ, nidi Jesus éí tʼáá bí danízinígi ádeidoolííł biniyé diné baazhníłtı̨́.
Tsin ałnáoszid bikáaʼjįʼ Jesus hoł oʼoolkaal (Mt. 27:32-44; Mk. 15:21-32; Jn. 19:17-27)
26 Áádóó dah dahodiilóóz, nítʼééʼ Sairíinii hoolyéédę́ę́ʼ diné léiʼ, Sáíman joolyéego, éí dádaʼakʼehdę́ę́ʼ joogáałgo dahasił, áko hawostisgi tsin ałnáoszid dah deiztą́ągo, Jesus bikééʼ nihizhnítą́.
27 Nítʼééʼ diné tʼóó ahayóí áádóó asdzání éí Jesus yaa ákʼidadiitʼaahgo daachago Jesus yikééʼ nánízą́.
28 Nidi Jesus hachʼįʼ názyizgo áháłní, Jerúsalem bichʼéʼéké danohłíinii, tʼáadoo shaa daahchaí, nidi tʼáá nihí índa nihaʼáłchíní baa daahcha.
29 Háálá jóʼakon, diné kódazhdidooniiłígíí tʼáá áhánídę́ę́ʼ bichʼįʼ yoołkááł, Doo daʼałchíhígíí índa doo daaltsánígíí, índa doo dabiʼdooltʼódígíí éí dabízháneeʼ!
30 Áadi índída dził kódeiłníi dooleeł, Nihikʼi daołdaas, áádóó dah daaskʼidígíí, Nídanihidołʼįįh, daaníigo yaa nídidookah.
31 Háálá tsin ditłéeʼgo kódaatʼı̨́įgo, ákoshąʼ tsin sigango haa daatʼı̨́į doo?
32 Ádąąh dah hastʼánígíí nidiltʼéego ałdóʼ nidootsiłjįʼ hoł biʼdeetʼeezh.
33 Áádóó Tsiitsʼin hoolyéego hazʼánígi íldeeʼgo, ákwii tsin ałnáoszid bikáaʼjįʼ hoł adaʼaskaal, ádąąh dah hastʼánígíí ałdóʼ, łaʼ honishʼnáájígo dah hidiiltʼeʼ, łaʼ éí honishtłʼajígo dah hidiiltʼeʼ.
34 Áko Jesus ádííniid, ShiTaaʼ, díí yaa naakaígíí tʼáadoo bikʼijįʼ síníłʼání, háálá doo bił béédahózingóó ádaatʼı̨́. Áádóó haʼééʼ ałtaadeisʼniiʼ biniyé yááʼiiltʼeʼ yaa naaskai.
35 Áádóó diné dadéezʼı̨́įʼgo naazı̨́, áádóó naatʼáanii éí há nidahałtʼiʼgo ádaaní, Łaʼ éí yisdádziiznil; Diyin God biChrist éí Diyin God néidiiłtíinii jílı̨́ı̨́ ládą́ą́ʼ, hániʼdii tʼáá hó yisdáʼázhdílteeh!
36 Siláo ałdóʼ há nidahałtʼiʼgo hayaajįʼ niikaigo chʼil naʼatłʼoʼii bitooʼ dókʼǫ́zhígíí haa deiziidgo
37 ádaaní, Tʼáá aaníí Jew dineʼé Aláahgo biNanitʼaʼí nílı̨́įgo, tʼáá ni yisdáʼádílteeh!
38 Kótʼéego ałdóʼ [Gríik áádóó Látin índa Hííbrew kʼehjí bee akʼeʼalchíhígíí] bee akʼeʼashchı̨́įgo hakʼigi dah yistą́, Díidí Jew dineʼé Aláahgo biNanitʼaʼí nilı̨́.
39 Nítʼééʼ ádąąh dah hastʼánígíí hoł bił oʼoolkaalígíí łaʼ hwéédzíiʼgo ání, Christ nílı̨́ı̨́ ládą́ą́ʼ yisdáʼádílteeh, nihí ałdóʼ yisdánihínííł!
40 Nidi łaʼígíí bichʼahashkéego ábíłní, Daʼ Diyin Godísh doo bééníldzid da? Jó, ni ałdóʼ tʼáá hógi átʼéego dadíítsaałgo ná nihootʼą́.
41 Ni áádóó shí tʼéí tʼáá ánihidiʼdoolnííł góneʼ nihá nihootʼą́, háálá íidzaaígíí biniinaa tʼáá ánihiʼdólneʼ góneʼ ánihiʼdilʼı̨́, nidi díí diné éí doo bąąhági ádzaa da.
42 Áádóó Jesus áyidííniid, Bóhólníihii, bee nóhólníihii biih yíníyáago shéénílniih doo.
43 Áko ábizhdííniid, Tʼáá aaníígóó ándishní, Díí jı̨́ Kéyah Hózhǫ́ǫdi shił honílǫ́ǫ doo.
Jesus dadziztsą́ (Mt. 27:45-56; Mk. 15:33-41; Jn. 19:28-30)
44 Nítʼééʼ ałníʼníʼą́ągo daatsʼí, áádóó táadi ahééʼílkidjįʼ tʼáá átʼéé nítʼééʼ chahóółhéelgo
45 jı̨́honaaʼéí yiijı̨́ı̨́ʼ, áádóó kin biiʼ sohodizin biyiʼ góneʼ achʼą́ą́h naníbaalii ałchʼáádláád.
46 Áko Jesus yéego hazhdoolghaazhgo ájíní, ShiTaaʼ, shiiʼ sizíinii nílákʼedishʼaah! jidííniidgo hajííyol.
47 Áádóó siláo binanitʼaʼí áhóótʼįįdígíí yiyiiłtsą́ągo, Diyin God yaa haznihgo ání, Tʼáá aaníí díí diné tsʼídá tʼáá ákogi átʼéii nilı̨́ı̨́ nítʼééʼ lá!
48 Áko diné áłah daazlı̨́įʼii, áhóótʼįįdígíí dayiiłtsą́ągo, biyid nídeineestsʼingo* anáhaaskai.
49 Áádóó hwéédahósinígíí tʼáá ałtso índa Gáliliidę́ę́ʼ asdzání hakééʼ yíkaígíí tʼáá nízaadę́ę́ʼ naazı̨́įgo díí áhóótʼįįdígíí dayiiłtsą́.
Jesus yóóʼáhoʼdiilyaa (Mt. 27:57-61; Mk. 15:42-47; Jn. 19:38-42)
50 Áko diné łaʼ Jóseph yolyéego Jew dineʼé yá naazíinii łaʼ nilı̨́, éí diné yáʼátʼéehii áádóó tʼáá ákogi átʼéii nilı̨́,
51 éí yindahazʼą́ągo yaa naaskaígíí doo atah yee lą́ asłı̨́įʼ da. Éí Arimathíya hoolyéego Jew dineʼé bikin haalʼáádę́ę́ʼ naaghá, áádóó éí Diyin God bee bóhólníihgo bił hazʼáanii nayólí.
52 Díí dinéhígíí Páílat yaa níyáago Jesus bitsʼíís yíyííkeed.
53 Áko naʼiidiiłtı̨́įgo áłtsʼóózígo yisdizígíí bee naʼatʼą́hí łigaii ditsʼidgo ályaii yił yizdisgo tséníʼootséél góneʼ niiníłtı̨́, ákweʼé tsʼídá tʼah doo diné łaʼ niilteeh da nítʼééʼ.
54 Éí bijı̨́ hashtʼehodiʼnééh yolyéego ooʼááł, áádóó hááʼáyı̨́ı̨́h jı̨́ kʼadę́ę baa hoolzhíísh.
55 Áko Gáliliidę́ę́ʼ asdzání hoł yíkaígíí akééʼ yíkaigo tséníʼootséél deinééłʼı̨́ı̨́ʼ, áádóó hatsʼíís niiltínígíí tsʼídá átʼéegi bił béédahoozin,
56 áko tʼą́ą́ʼ nákaigo łikání halchinii spáis wolyéii índa tłah łikání halchinii hashtʼedayiilaa. Áádóó bee hazʼáanii bikʼehgo hááʼáyı̨́ı̨́h jı̨́ı̨́ góneʼ háádaasyı̨́ı̨́ʼ.
Footnotes
^ Saad łaʼ áádóó saad naazhjaaʼ łaʼ kótʼéego daasdzohígíí [ ] bitaʼgi dabikáʼígíí éí Diyin God bizaad tʼáá ałkʼidą́ą́ʼ bee akʼedaʼashchínígíí doo tʼáá ałtso dabikáaʼ da, nidi łaʼ tʼéiyá dabikááʼ.
^ Yáa, yáa, yáa, dooládóʼ hóchxǫʼ áhóótʼįįd da, danízingo biyid nídeineestsʼin.
