Luke 3:1-38
3 Áko Taibííriyas Síízar tsʼídá aláahgo naatʼáanii nilı̨́įgo ashdlaʼáadah náhááh góneʼ, áádóó Pántiyas Páílat éí Judíya yinanitʼaʼí nilı̨́įgo, Hérad éí Gáliliidi naatʼáaniishchíín nilı̨́įgo, Hérad yił hááʼázhígíí, Philip, éí Ituríya índa Trakonáítis kéyahdi naatʼáaniishchíín nilı̨́įgo, índa Laiséíniyas éí Ábiliindi naatʼáaniishchíín nilı̨́įgo,
2 Ánas índa Kéíyafas aláahgo nááʼiiłniihii nilı̨́įgo, íídą́ą́ʼ Zekaráíyah biyeʼ John, honoojíidi Diyin God bichʼįʼ haadzííʼ,
3 áko John éí Jórdan tooh binaagóó kéyah tʼáá átʼé yiiʼ nahalneʼgo tádíghááh. Łahgo átʼéego Diyin God bichʼįʼ tsínádahodiikeesgo habąąhági átʼéii há yóóʼiididooʼáałgo tó bee hoʼdidoolzįhjí yee naʼneeztą́ą́ʼ,
4 Aizéíyah éí Diyin God yá halneʼii bizaad naaltsoos tʼáá yee yikʼeʼashchínígi átʼéego:
Honoojíidi łaʼ jidilwoshgo hwiinééʼ diitsʼaʼgo hojilneʼ:Bóhólníihii bá honítʼiʼii hashtʼedahohłééh, beʼatiin kʼéhézdongo ádaahłééh.
5 Deíldzisgóó tʼáá ałtso háádahodidoobı̨́ı̨́ł,áádóó daadził índa dah daaskʼidgi tʼáá ałtso wóyahgo ádadoolnííł,áádóó nidahoneeshtłʼiizhígíí kʼéhézdon ádadoolnííł,áádóó hodiwolgo dahonítʼiʼgóó dahodilkǫǫh ádadoolnííł.
6 Índa nihokááʼ dineʼé tʼáá ałtso Diyin God bibee yisdáʼiildéehii bił ííshją́ą́ dadooleeł.
7 Éí bąą tʼóó ahojíyóí tó bee dahodiʼdoolzįh biniyé baa dziiskaígíí áhodííniid, Tłʼiish baʼáłchíní danohłíinii! Háishąʼ Diyin God tʼóó báhádzidgo bibee atéʼélʼíinii bitsʼą́ąjįʼ dah dadínóohchééh nihidííniid?
8 Éí bąą łahgo átʼéego Diyin God bichʼįʼ tsíńdahidohkeesgo beełtʼéego nihitsʼą́ą́dóó aneestʼąʼ dahóleʼ, áádóó tʼóó ádaa dadzíínóhdlíigo tʼáá nihiyiʼídi, Éíbraham yę́ę éí nihizhéʼé nilı̨́, tʼáadoo dadohníní, háálá ánihidishní, Diyin God díí tsé kǫ́ǫ́ naaznilígíí bee Éíbraham baʼáłchíní íidoolíiłgo yíneelʼą́.
9 Kʼad nidi tsin bihétłʼóól biniyé tsénił siʼą́, áko tsin tʼáá ałtso bineestʼąʼ doo yáʼátʼééhgóó bąąh nídahadleehígíí kʼídahalneʼgo kǫʼ biyiʼ góneʼ adahaltłʼiid.
10 Áko áłah silı̨́ʼígíí nidahódíłkidgo ádaaní, Ákoshąʼ haa dadiiʼnííł?
11 Áko bichʼįʼ hadzoodzíiʼgo ábijiní, Tʼáá háiida biʼéétsoh naaki bee hólónígíí, éí bee ádinígíí łaʼ baazhdoołtsos, áádóó tʼáá háiida chʼiyáán bee hólónígíí ałdóʼ tʼáá ákózhdoonííł.
12 Tax nahalyéhígíí yiniyé naazdáii ałdóʼ tó bee dabidiʼdoolzı̨́ı̨́ł yiniyé deíkáahgo ádahodííniid, Naʼnitiní, nihíshąʼ haa dadiiʼnííł?
13 Áko ábizhdííniid, Nihaa deetʼánígíí tʼáadoo biláahgo dayínóhkeedí.
14 Siláo ałdóʼ ádahałní, Nihíshąʼ ałdóʼ haa dadiiʼnííł? Áádóó ábizhdííniid, Tʼááká diné łaʼda tʼáá nihizááká bighadaʼoołyééł lágo, doo nidi tʼáá ádzaagóó bikʼi dahodidoohʼáał da, nidi nihichʼįʼ nidaʼiilyéhígíí nihił dabíighah doo.
15 Áko diné nidaʼoozlííʼ, áádóó tʼáá ałtso dabijéí biyiʼdi, John daatsʼí Christ átʼı̨́, danízingo yaa nitsídaakees,
16 nítʼééʼ John éí diné tʼáá ałtso ííłní, Shí tʼéí tó bee danihisı̨́ı̨́h, nidi łaʼ shiláahgo átʼéii yigááł, éí bikétłʼóól kʼeʼdeeshʼał nidi doo bą́ą́h nishłı̨́į da; éí Níłchʼi Diyinii índa kǫʼ yee danihisı̨́įh dooleeł.
17 Éí ásaaʼ bee ąąh oolchʼíhígíí dah jooʼááł, áko hááʼjíłchʼihgi hozhdidooshǫǫłgo hatłʼoh naadą́ą́ʼ nooh níjílchíihgi yah ahizhdooyééł, nidi azhool tʼéí kǫʼ doo nitséesii bee adizhdoołkʼą́ą́ł.
18 Áko John ląʼídi bee nidaʼnitinii ałʼąą ádaatʼéego yíneedlı̨́įgo haneʼ yáʼátʼéehii yee diné yił halneʼ.
19 Nidi John éí Hérad naatʼáaniishchíín nilíinii, bitsilí beʼasdzą́ą́ Heródiyas yolyéhígíí yiniinaa, índa bąąhági ádzaaígíí tʼáá ałtso yiniinaa yichʼahóóshkeed,
20 áko Hérad éí díí tʼáá ałtso tʼáá biláahjįʼ bąąhági ánáánádzaago John yah ayííłtʼeʼ
Jesus éí tó bee biʼdoolzı̨́ı̨́ʼ (Mt. 3:13-17; Mk. 1:9-11)
21 Ákódzaago diné tʼáá ałtso tó bee dabiʼdoolzı̨́ı̨́ʼ áádóó Jesus ałdóʼ tó bee biʼdoolzı̨́įʼgo sodilzingo yádiłhił ąą ádzaa,
22 áádóó Níłchʼi Diyinii hasbídí ánoolinígi átʼéego hakʼijįʼ hadahóóleʼ, áádóó yádiłhił biyiʼdę́ę́ʼ iinééʼ diistsʼą́ąʼgo ání, ShiYeʼ ayóóʼóóshʼníinii nílı̨́; tʼáá íiyisí naa shił hózhǫ́.
Jesus Christ dabizází (Mt. 1:1-17)
23 Jesus tʼóó nídíʼníitą́ą́ʼ yę́ędą́ą́ʼ tádiin daatsʼí binááhai, éí Jóseph biyeʼ (biʼdóʼníigo), Jóseph éí Híílai biyeʼ,
24 Híílai éí Máthat biyeʼ, Máthat éí Líívai biyeʼ, Líívai éí Mélkai biyeʼ, Mélkai éí Jána biyeʼ, Jána éí Jóseph biyeʼ,
25 Jóseph éí Matatháíyas biyeʼ, Matatháíyas éí Éímas biyeʼ, Éímas éí Néíham biyeʼ, Néíham éí Éslai biyeʼ, Éslai éí Néígeiyai biyeʼ,
26 Néígeiyai éí Méíyath biyeʼ, Méíyath éí Matatháíyas biyeʼ, Matatháíyas éí Sémeiyai biyeʼ, Sémeiyai éí Jóseph biyeʼ, Jóseph éí Júdah biyeʼ,
27 Júdah éí Joána biyeʼ, Joána éí Ríísa biyeʼ, Ríísa éí Zerábabel biyeʼ, Zerábabel éí Sheáltiyel biyeʼ, Sheáltiyel éí Níírai biyeʼ,
28 Níírai éí Mélkai biyeʼ, Mélkai éí Ádai biyeʼ, Ádai éí Kósam biyeʼ, Kósam éí Elmódam biyeʼ, Elmódam éí Er biyeʼ,
29 Er éí Jáshowa biyeʼ, Jáshowa éí Eliyíízer biyeʼ, Eliyíízer éí Jórim biyeʼ, Jórim éí Máthat biyeʼ, Máthat éí Líívai biyeʼ,
30 Líívai éí Símiyan biyeʼ, Símiyan éí Júdah biyeʼ, Júdah éí Jóseph biyeʼ, Jóseph éí Jónan biyeʼ, Jónan éí Iiláíyakim biyeʼ,
31 Iiláíyakim éí Mííliya biyeʼ, Mííliya éí Míínan biyeʼ, Míínan éí Mátatha biyeʼ, Mátatha éí Néíthan biyeʼ, Néíthan éí David biyeʼ,
32 David éí Jésii biyeʼ, Jésii éí Óbed biyeʼ, Óbed éí Bóʼaz biyeʼ, Bóʼaz éí Sálman biyeʼ, Sálman éí Náshan biyeʼ,
33 Náshan éí Amínadab biyeʼ, Amínadab éí Ram biyeʼ, Ram éí Hézran biyeʼ, Hézran éí Píírez biyeʼ, Píírez éí Júdah biyeʼ,
34 Júdah éí Jéíkab biyeʼ, Jéíkab éí Áízak biyeʼ, Áízak éí Éíbraham biyeʼ, Éíbraham éí Tíírah biyeʼ, Tíírah éí Néíhor biyeʼ,
35 Néíhor éí Síírug biyeʼ, Síírug éí Ríyo biyeʼ, Ríyo éí Pííleg biyeʼ, Pííleg éí Ííber biyeʼ, Ííber éí Séílah biyeʼ,
36 Séílah éí Kéínan biyeʼ, Kéínan éí Arfáksad biyeʼ, Arfáksad éí Shem biyeʼ, Shem éí Nóah biyeʼ, Nóah éí Léímek biyeʼ,
37 Léímek éí Miithúzelah biyeʼ, Miithúzelah éí Íínak biyeʼ, Íínak éí Jéíred biyeʼ, Jéíred éí Mahéílalííyel biyeʼ, Mahéílalííyel éí Kéínan biyeʼ,
38 Kéínan éí Íínas biyeʼ, Íínas éí Seth biyeʼ, Seth éí Ádam biyeʼ, Ádam éí Diyin God biyeʼ.
