Luke 4:1-44
4 Áko Jesus, Níłchʼi Diyinii biiʼ hadeezbingo Jórdandę́ę́ʼ nádzá, áádóó Níłchʼi Diyinii dahodiisáago
2 honoojíidi dízdiin hwiiską́, áadi níłchʼi bidaʼiiníziinii binanitʼaʼí hóneeztą́ą́ʼ. Áko éí neiłkaʼígíí biyiʼ tʼáadoo ajííyą́ąʼ da; tʼáá éí neiłkaʼígíí bíighah azlı̨́įʼgo índa dichin dzizlı̨́ı̨́ʼ.
3 Níłchʼi bidaʼiiníziinii binanitʼaʼí áhodííniid, Diyin God biYeʼ nílı̨́ı̨́ ládą́ą́ʼ díí tsé bááh nídoodleełgo bá handziih.
4 Nítʼééʼ Jesus haadzíiʼgo ííłní, Diyin God bizaad bee akʼeʼashchíinii kóní: Diné doo bááh tʼéí yee hináa da doo, nidi saad tʼáá ałtso Diyin God yee hahadziihii yee hináa doo.
5 Nítʼééʼ níłchʼi bidaʼiiníziinii binanitʼaʼí hoł híiʼáázh, áko nahasdzáán bikáaʼgi bee ídahólníihgo bił nahazʼáanii tʼáá ałtso dzineeskʼoł nahalingo bikʼizhdooghał biniyé hachʼįʼ yitʼíní áyiilaa,
6 áko níłchʼi bidaʼiiníziinii binanitʼaʼí áhodííniid, Díí bee ídahólníihgo bił nahazʼáanii índa yee ayóó ádaatʼéii tʼáá átʼé naa dideeshʼááł, háálá éí shaa deetʼą́, áádóó tʼáá háiida baa dideeshʼááł niizı̨́ʼígíí éí baa dideeshʼááł.
7 Áko shichʼįʼ nahosínísáago, díí tʼáá átʼé ni dooleeł.
8 Áádóó Jesus hanáánáádzíiʼgo ííłní, [Séítan nílíinii, shidinínáágóó aninááh, háálá] kótʼéego bee akʼeʼashchı̨́:
Bóhólníihii niDiyin God bichʼįʼ nahółáa doo,áádóó tʼáá bí tʼéiyá bá nanilʼaʼ doo.
9 Nítʼééʼ Jerúsalemgóó ahóólóóz, áko kin biiʼ sohodizin bikááʼdóó dego yaaʼáhígíí bílátahgi dah hwiisįʼ, áko ánááhodiʼní, Diyin God biYeʼ nílı̨́ı̨́ ládą́ą́ʼ, kodóó hadah dah diilyeed,
10 háálá kótʼéego bee akʼeʼashchı̨́:Diyin God éí bidiyingo nidaalʼaʼí naa ádahalyą́ągo íidoolííł,
11 áádóó,Bílaʼ yee dah daníłteehgo doo tsé bikʼą́ą́h didííltał da.
12 Áko Jesus éí níłchʼi bidaʼiiníziinii binanitʼaʼí yichʼįʼ hanáánáádzíiʼgo ání, Bóhólníihii niDiyin God tʼááká nabínóótaah lágo, haʼní.
13 Níłchʼi bidaʼiiníziinii binanitʼaʼí naʼíhontaah ałtso yee nahóneeztą́ąʼgo, ashja nááhoodzaago índa nízingo hatsʼą́ąjįʼ dah diiyá.
Gáliliigi Jesus éí haneʼ yáʼátʼéehii yaa ahoʼniilneʼ (Mt. 4:12-17; Mk. 1:14,15)
14 Áádóó Níłchʼi Diyinii bibee adziil yee Jesus Gáliliijįʼ nádzá, áádóó bee baa haneʼígíí kéyah tʼáá átʼéé nítʼééʼ bikááʼgóó adahosiistsʼą́ą́ʼ.
15 Áádóó ákwii kéédahatʼínígíí kin yiiʼ áłah nídaadleeh góneʼ tʼáá ałtso nazʼneeztą́ąʼgo haa dahaniih.
Jesus éí Názarethdi doo bidiʼniidzı̨́įʼ da (Mt. 13:53-58; Mk. 6:1-6)
16 Názarethdi hodiʼneeszánígi jiníyá, áko hááʼáyı̨́ı̨́h jı̨́ azlı̨́įʼgo, tʼáá áńjiitʼįįhígíí bikʼehgo kin biiʼ áłah náʼádleeh góneʼ yah ajííyáago, bichʼįʼ íízhdóołtah biniyé dziizįʼ,*
17 áko Aizéíyah éí Diyin God yá halneʼii binaaltsoos haa deizʼą́. Ąą ájiilaago, kótʼéego bee akʼeʼashchínígíí bikʼizhníghal:
18 Bóhólníihii biNíłchʼi Diyinii shił hólǫ́,háálá badahojoobáʼíígíí éí haneʼ yáʼátʼéehii bee bił dahashneʼ doogo biniyéakʼah shikʼi yaadziidgo shíísı̨́ı̨́ʼ.[Bijéí daneezgaígíí hashtʼéédadeeshdlííł biniyé,]daasnáanii éí béédahididoochiłígíí bee bił dahashneʼ dooleeł biniyé,doo daʼooʼínígíí daʼooʼı̨́ nídadoodleeł biniyé shiníłʼaʼ,
19 kʼad yihahígíí Bóhólníihii doogáałgo bá ashja ósin dishníigo baa hashneʼ dooleeł biniyé shiníłʼaʼ.
20 Áko naaltsoos yisdisii ałchʼįʼ áńjiidlaago naalʼaʼí baa názhníʼą́ągo dah názneezdá, áko kin biiʼ áłah náʼádleeh góneʼ áłah nilínígíí dahodiniilgęęzh.
21 Áádóó bichʼįʼ ayázhʼniiłtiʼ, Díí Diyin God bizaad bee akʼeʼashchíinii dasidootsʼą́ʼígíí díí jı̨́ bohoolyaa.
22 Áko tʼáá ałtso yáʼátʼéehgo há hadaasdzííʼ, áádóó saad bee ajoobaʼii bee hadzoodzíʼígíí bikʼee tʼóó bił adahayóigo ádadííniid, Daʼ díísh doo Jóseph biyeʼ átʼı̨́į da?
23 Áko ábizhdííniid, Kóháʼnínígíí tʼáá aaníí bee shá hadadoohdzih, Azeeʼ ííłʼíní, tʼáá ni nááʼádiidlááh. Tʼáá Kapérniyamgi íinidzaago bee naa dahosidiitsʼą́ʼígíí, éí ałdóʼ kweʼé nikéyahgi baa nidíínaał.
24 Áko ánááhodooʼniid, Tʼáá aaníí ánihidishní, Diyin God yá halneʼii doo łaʼda tʼáá bí bikéyahgi tsʼídá doo hodiʼnidzin da.
25 Nidi tʼáá aaníígóó ánihidishní, Iiláíjah hináádą́ą́ʼ tʼáadoo nahałtiní tááʼ nááhaidóó baʼaan hastą́ą́h nídeezid, áko Ízrel bikéyahgi tʼáá átʼéé nítʼééʼ tʼáá íiyisí hodííchįįd; íídą́ą́ʼ éí kéyahgi asdzání bąąh ádahasdįįdii ląʼí dahólǫ́ǫ nidi,
26 Iiláíjah doo łaʼ bichʼįʼ abiʼdoolʼaʼ da, nidi Sáídan kéyahdi Zárefathgóó tʼéiyá asdzání bąąh áhásdįįd léiʼ bichʼįʼ abiʼdoolʼaʼ.
27 Áádóó Iiláísha Diyin God yá halneʼii ałdóʼ hináádą́ą́ʼ Ízrel bikéyahgi łóód atsʼíís yiyáanii naałdzidii bee bąąh dah nidahazʼánígíí tʼóó ahayóí nítʼééʼ, nidi tʼáadoo łaʼ náábiʼdooldzíʼí da, nidi Néíyaman, Síriyadę́ę́ʼ diné nilíinii, tʼéiyá nábiʼdooldzííʼ.
28 Áko kin biiʼ áłah náʼádleehí yiiʼ áłah nilínígíí tʼáá ałtso, díidí deidiiztsʼą́ąʼgo tʼáá íiyisí bádahóóchįįd.
29 Áko hachʼįʼ dah diijéeʼgo kin sinilídóó chʼíhódahazyil. Dah yiskʼid bighą́ąʼgi dabikin sinil, áko hatsiiʼ haʼyaago hadah adahodiyiilghą́ą́ł danízingo tsédáaʼjįʼ adahazlóóz.
30 Nidi tʼóó bitahgóó chʼízhníyáago dashdiiyá.
Diné níłchʼi nichxǫ́ʼí biiʼ hólóonii (Mk. 1:21-28)
31 Áádóó kéyah Gáliliigi Kapérniyam kin haalʼáhí góyaa jiníyá. Áko tʼáá hááʼáyı̨́ı̨́h jı̨́ náʼoodleeł góneʼ nazhʼnitin,
32 áko nazhʼnitinígíí yikʼee tʼóó bił adahayóí, háálá hazaad bidziilgo bee yájíłtiʼ.
33 Áádóó kin biiʼ áłah náʼádleehí biyiʼ góneʼ diné łaʼ níłchʼi biʼiiníziinii nichǫ́ʼíii biiʼ hólǫ́ǫ́ léiʼ sidáá lá; éí yéego hadoolghaazhgo ání,
34 Yíiyá! Haashąʼ nihidíílííł, Názarethdóó Jesus nílíinii? Daʼ ánihidííłdįįłgoósh yíníyá? Ánítʼíinii shił bééhózin, Diyin God bitsʼą́ą́dóó Diyinii nílı̨́.
35 Nidi Jesus éí yideeztehgo ííłní, Tʼáadoo ádíníní, hayiʼdę́ę́ʼ haninááh! Áko níłchʼi biʼiiníziinii áłah ílínígíí bitahjįʼ ahoyííłhango, tʼáadoo atíhoolaaí, hayiʼdę́ę́ʼ haalwod.
36 Áko tʼáá ádzíłtso tʼóó hoł adahayóigo ádaʼahizhdiʼní, Díí saadígíishąʼ haʼátʼíí átʼé? Háálá bee óhólníihii índa bee adziilii bee níłchʼi danchxǫ́ʼíii yichʼįʼ hahadziihgo diné biyiʼdę́ę́ʼ hahaazhjééʼ!
37 Áko ákwii kéyahígíí binaagóó tʼáá átʼéé nítʼééʼ bee haa haneʼgo adahideezdláád.
Jesus éí diné tʼóó ahayóí hadaałtʼé áńdayiidlaa (Mt. 8:14-17; Mk. 1:29-34)
38 Áádóó nízhdiiʼnaʼgo kin biiʼ áłah náʼádleehí biyiʼdę́ę́ʼ chʼízhníyáago, Sáíman bighangi yah ajííyá. Nítʼééʼ Sáíman beʼasdzą́ą́ bimá tʼáá íiyisí bitah honeezgai lá, áko yá nídahookąąh.
39 Áádóó bíighahgi dziizįʼgo tah honiigááh, Bitsʼáníldóóh, bizhdííniid, áko bitsʼáldogo tʼáá áko nídiiʼnaʼgo há choozʼįįd.
40 Áko kʼadę́ę eʼeʼaahgo, tʼáá ałtso naałniih ałʼąą ádaatʼéii bee bąąh dah nidahazʼánígíí haa dayiizhjaaʼ, áko tʼáá ałtso bikʼi dah dahizhdeesniiʼgo hadaałtʼé áńdajiidlaa.
41 Áádóó diné ląʼí dabiyiʼdę́ę́ʼ níłchʼi biʼiiníziinii hahaazhjééʼ, éí dadilwoshgo ádaaní, Ni Christ Diyin God biYeʼ nílı̨́! Nidi Christ jílı̨́įgo bił béédahózingo bąą dzideeztehgo hadadoodzihígi tʼáadoo bee bá hojiiłʼaʼ da.
Jesus éí haneʼ yáʼátʼéehii yaa nahodoolnihgóó dah diiyá (Mk. 1:35-39)
42 Áádóó hoosʼįįdgo dashdiiyáago doo naagháhígóó ajííyá. Áko diné hadahontáago haa haaskaigo chʼééh doo haa daadleeʼgóó bitsʼą́ą́ʼ dashdiiyá,
43 nidi ábizhdííniid, Náánáłahdi kin hadaasʼáhígi ałdóʼ Diyin God bee bóhólníihgo bił hazʼáanii baa haneʼ bee bił ninááháshneʼ dooleeł, háálá éí biniyé shiʼdeelʼaʼ.
44 Áádóó Judíya kéyahdi kin biiʼ áłah nídaʼadleehígíí biyiʼ Diyin God baa ninááhojilneʼ.
Footnotes
^ Áłah náʼádleeh góneʼ alą́ąjįʼ sizíinii éí Jew dineʼé ninísáanii Diyin God bizaad yíníłtaʼ yiłniih.
